Neˬhaˬmiˇ 9 - Akha

Iˇsaˬleˬlaˆ tsawˇ haˬ deuˬ iˬ baˇ noeˬ poˆ-euˬ

¹ Ba la kʼoeˇ siˬ nyiˬ tseˇ oeˬ nah tiˬ nah-ahˇ Iˇsaˬleˬlaˆ tsawˇ haˬ deuˬ maˬ dzaˬ maˬ dawˇ ni tiˬ gaˇ uiˬ leˇ-awˇ, aˬ yawꞈ maꞈ noeˬ shaˬ dui dui-eu jeˬ bi siˬ bi mawˇ-eu gʼaˇ duˬ, guˬ daˇ pehˇ zeuˇ mehˬ tsoeˬ dm-eu laꞈ kʼoeˇ, yawˬ ha-euˬ uˬ duˬ-ahˇ kʼaˬ lehˇ tawˆ daˆ-euˬ meh.

² Iˇsaˬleˬlaˆ zaˬ deuˬ uˆ deuˬ-aˬ, aˬ cawˬ tsawˇ jeuˬ dawˬ tawˆ luꞈ nehˬ-ehˇ dehꞈ gʼawˬ jawˇ gʼawˬ-awˇ, yawˬ ha-euˬ jawˇ duˬ-ahˇ yawꞈ-awˇ, yawˬ ha-euˬ iˬ baˇ hawˇ-eu aˬ yawꞈ maꞈ-euˬ aˬ poeˬ aˬ bawˇ deuˬ neh mˇ-euˬ yaw haiˬ jeˬ gʼaˇ duˬ iˬ baˇ shaˇ pyehˬ-euˬ meh.

³ Naˬ liˬ smˇ laꞈ byah ni aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ gui gaˇ aˬ yawꞈ maꞈ naˇ haˬ-awˇ, dzaiˇ naˬ liˬ smˇ laꞈ byah ni aˬ yawꞈ maꞈ-euˬ iˬ baˇ shaˇ pyehˬ-awˇ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-euˬ meh.

⁴ Leˬbiˇ tsawˇ haˬ deuˬ gʼaˇ duˬ guiˇ ga tiˬ ga tsoˆ taˬ-awˇ, Leˬbiˇ tsawˇ haˬ deuˬ pyeuꞈ-eu Yeˬshah, Kaˬdaˬmeˬlaˇ, Sheˬbaˬniˇ, Baˬniˬ, Sheˬleˬbiˇ, Baˬniˬ, Sheˬnaˬniˇ aˬ ha maꞈ, kʼoeˇ-euˬ kʼoeˇ taˆ yawꞈ-awˇ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ yaw kʼaˆ-ehˇ guˇ-awˇ guiˬ lahˬ shaˇ-euˬ meh.

⁵ Kʼoeˇ naˇ, Leˬbiˇ tsawˇ haˬ deuˬ pyeuꞈ-eu Yeˬshah, Kaˬdaˬmeˬlaˇ, Baˬniˬ, Haˬshaˬbaˬniˇ, Sheˬleˬbiˇ, Hawˇdiˇyaˆ, Sheˬbaˬniˇ, Peˬdaˬhiˇ aˬ ha maꞈ heu loꞈ-ehˇ ehˇ-eu meh. “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ tuˇ-awˇ ja ceuˬ-awˬ. Mˬ maˬ maˬ byaˆ zaˇ ziˇ aˬ yawꞈ-ahˇ ja ceuˬ-awˬ. Tsawˇ haˬ zaˬ neh maˬ ja ceuˬ jiˇ coeˇ kʼawꞈ, Baoˬ kʼahˬ sehˇ huiˬ-eu aˬ yawꞈ-euˬ tsawˇ myahˇ-ahˇ, yawˬ gʼaˬ na luꞈ ja ceuˬ-awˬ.”

Iˬ baˇ shaˇ pyehˬ-eu guiˬ lahˬ shaˇ dawˬ

⁶ Kʼoeˇ naˇ, Iˇsaˬleˬlaˆ tsawˇ haˬ deuˬ heu loꞈ-ehˇ guiˬ lahˬ shaˇ-euˬ meh. “Sahˬpaˬ Miˬyehˇ-oˇ, nawˇ tiˬ gʼaˬ tehꞈ-ehˇ Sahˬpaˬ Miˬyehˇ pyeuꞈ-eu meh. Mˬ hawˇ-eu mˬ taˆ tsehˬ-eu aˬ guiˇ deuˬ, nawˬ neh beh taˬ-euˬ meh. Mˬ hawˇ-eu miˇ kʼoeˇ taˆ kʼaˇ jawˇ-eu jeˬ maˬ ehˇ, laˆ shaˆ hawˇ-eu kʼoeˇ gaˇ uˇ-eu boeˬ boeˬ luˆ luˆ maˬ ehˇ, dawˬ tawˆ luꞈ-ahˇ nawˇ beh taˬ-awˇ, dehꞈ-eu saꞈ laˇ nawˇ biꞈ-euˬ meh. Mˬ kʼoeˇ taˆ kʼaˇ jaˆ-eu baoˬ dawˬ tawˆ luꞈ nawˬ-ahˇ uˬ duˬ tahˬ-eu meh.

⁷ Aˬbyaˬ-ahˇ tseˇ doˆ-euˬ Miˬyehˇ, Sahˬpaˬ Miˬyehˇ nawˇ gʼaˬ pyeuꞈ-awˇ, Baˬbuˇloˬ miˇ kʼahˬ Uˇlaˆ meuˬ-ahˇ neh, aˬ yawꞈ-ahˇ nawˇ sheuˬ doˆ laꞈ-awˇ, aˬ yawꞈ tsawˇ myahˇ Aˬbyaˬhaˬ lehˇ, nawˇ myahˇ paˇ nehˬ-euˬ meh.

⁸ Aˬ yawꞈ nawˬ-ahˇ saˇ jaˇ ziꞈ gaˇ nawˇ ya mawˇ-awˇ, aˬ yawꞈ nehˬ-ehˇ dawˬ ma saˇ jaˇ nawˇ dzaˬ-euˬ meh. Kaˬnaˬ tsawˇ jeuˬ-euˬ miˇ kʼahˬ, Heˬtaˆ tsawˇ jeuˬ hawˇ-eu Aˬmawˇliˆ tsawˇ jeuˬ-euˬ miˇ kʼahˬ, Paˬyehˆ tsawˇ jeuˬ, Yeˬbuˇ tsawˇ jeuˬ hawˇ-eu, Geuˬgaˬshaˆ tsawˇ jeuˬ heu deuˬ-euˬ miˇ kʼahˬ, aˬ yawꞈ-euˬ zaˬ deuˬ-ahˇ biꞈ ma lehˇ, aˬ yawꞈ-ahˇ nawˇ saˇ jaˇ dzaˬ-euˬ meh. Nawˇ saˇ jaˇ ziꞈ dui dui-eu gʼaˬ pyeuꞈ-awˇ, nawˬ-euˬ saˇ jaˇ dawˬ kawˬ byah laˇ-euˬ meh.

⁹ Nga maꞈ-euˬ poeˬ piˬ deuˬ Iˇjiˇtuˆ meuˬ laꞈ kʼoeˇ, shaˬ zahˬ naꞈ-eu nawˇ mawˇ-euˬ meh. Caw ba le-awˬ lehˇ aˬ yawꞈ maꞈ guˇ-eu dawˬ, laˆ shaˆ yaw neˇ dawˬ peh nawˇ gaˬ-euˬ meh.

¹⁰ Iˇjiˇtuˆ sahˬ paˬ hawˇ-eu aˬ yawꞈ-euˬ gʼaˬ zaˬ yaw huiˬ yaw mahˇ deuˬ-ahˇ maˬ ehˇ, aˬ yawꞈ-euˬ miˇ kʼahˬ zaˬ deuˬ-ahˇ maˬ ehˇ, kʼaˆ jeˬ-ehˇ gʼeh-eu jeˬ nawˇ mˇ mehˬ nehˬ-euˬ meh. Nawˬ-euˬ tsawˇ jeuˬ-ahˇ aˬ yawꞈ maꞈ kʼehˬ-euˬ nawˇ siˬ nya-awˇ, aˬ yawꞈ maꞈ-ahˇ kʼoeˇ loꞈ-ehˇ kʼehˬ kʼoꞈ nehˬ-euˬ meh. Nawˬ neh mˇ-euˬ gaˇ kʼoeˇ deuˬ baˬ da neh, iˬ nah keuˆ ni nawˇ tsawˇ myahˇ huiˬ-eu meh.

¹¹ Iˬ ma laˆ shaˆ-ahˇ nawˇ gaˇ ma shaˇ dahˇ-awˇ, nawˬ-euˬ tsawˇ haˬ deuˬ gui coˇ ni tsehˆ doˆ-euˬ meh. Aˬ yawꞈ maꞈ-euˬ mehˬ nah teh le-euˬ tsawˇ haˬ deuˬ, laˆ shaˆ-ahˇ ga puꞈ-euˬ kʼaˬ lo loꞈ-ehˇ, yaw naꞈ-ahˇ bi dahˬ sehꞈ-euˬ meh.

¹² Nah gʼahˇ paw mˬ dmˇ neh gaˇ ma mehˬ-awˇ, uˬ ciꞈ paw miˬ dzaˬ bya nehˬ-eu laꞈ kʼoeˇ, aˬ yawꞈ maꞈ-ahˇ nawˇ sheuˬ gʼeh-euˬ meh.

¹³ Siˇnaˆ gawˬ jawˬ kʼoeˇ taˆ mˬ-ahˇ neh nawˇ oe-awˇ, nawˬ-euˬ tsawˇ jeuˬ-ahˇ dawˬ ngehˬ cawˬ le-awˇ, muiˬ-eu tsaˬ-eu zahˇ sahˇ kʼoꞈ dawˬ kawˬ deuˬ, aˬ yawꞈ maꞈ-ahˇ nawˇ biꞈ le-euˬ meh.

¹⁴ Nawˬ-euˬ gʼaˬ nah jawˇ nah-ahˇ bi muiˬ bi shawˇ-eu gʼaˇ duˬ, aˬ yawꞈ maꞈ-ahˇ nawˇ mehˬ nehˬ tsoˆ nehˬ-awˇ, nawˬ-euˬ zaˬ kʼaˆ Moˇseˬ-ahˇ nawˇ gʼoe-awˇ, aˬ yawꞈ maꞈ-ahˇ zahˇ dawˬ kʼoꞈ dawˬ biꞈ-euˬ meh.

¹⁵ Aˬ yawꞈ maꞈ hawˬ mehꞈ luꞈ ngeh jawˇ, mˬ taˆ kaˬ muˇ nawˇ bi dzaˬ-awˇ, aˬ yawꞈ maꞈ iˇ cuꞈ mehꞈ ngeh jawˇ, kʼaˬ lo-ahˇ iˇ cuꞈ bi doˆ le-euˬ meh. Nawˇ saˇ jaˇ dzaˬ taˬ-euˬ miˇ kʼahˬ kʼoeˇ geuꞈ-awˬ lehˇ, aˬ yawꞈ maꞈ-ahˇ nawˇ ehˇ-awˇ biꞈ-euˬ meh.

¹⁶ Ehˇ kʼawꞈ nga maꞈ-euˬ poeˬ piˬ deuˬ nui ma gʼahˇ-awˇ, nawˬ-euˬ dawˬ-ahˇ maˬ naˇ haˬ-a.

¹⁷ Nawˬ neh mˇ-euˬ gaˇ-ahˇ aˬ yawꞈ maꞈ ngehˇ jiˇ-awˇ, nawˬ-euˬ dawˬ-ahˇ maˬ naˇ haˬ ni, nawˇ mˇ-euˬ kʼaˆ jeˬ-ehˇ gʼeh-eu gaˇ-ahˇ, aˬ yawꞈ maꞈ ngehˇ byoˆ jiˇ-euˬ meh. Aˬ yawꞈ maꞈ nui ma huiˬ-eu mahˇ-eu jeˬ laꞈ kʼoeˇ, Iˇjiˇtuˆ miˇ kʼahˬ-ahˇ zaˬ kʼaˆ geuꞈ poˆ-iˇ-eu gʼaˇ duˬ, sheuˬ gʼeh-eu aˬ yuiꞈ tseˇ-euˬ meh. Ehˇ kʼawꞈ nawˇ iˬ baˇ pyehˬ nehˬ-eu Miˬyehˇ pyeuꞈ-awˇ, gʼoeˇ-eu gaˬ-eu jeˬ byah-eu uˬ taꞈ, nawˇ nui ma pehˇ-eu maˬ kawˇ-a. Nawˇ gʼawˬ shaˬ gaˬ-eu jeˬ huiˬ dui myaˬ dui dui-awˇ, aˬ yawꞈ maꞈ-ahˇ nawˇ maˬ byehˇ dzeh-aˬ.

¹⁸ Mawˇ neˇ mawˇ kawˇ tahˬ pahˬ aˬ ma aˬ yawꞈ maꞈ tehˆ-awˇ, Iˇjiˇtuˆ-ahˇ neh sheuˬ doˆ nehˬ laꞈ-euˬ miˬ yehˇ, mawˇ kawˇ kʼoeˇ meh lehˇ aˬ yawꞈ maꞈ ehˇ-eu meh. Sahˬpaˬ Miˬyehˇ nawˬ-ahˇ aˬ yawꞈ maꞈ, ngehˬ bahˬ tmˇ bahˬ dui dui-euˬ meh.

¹⁹ Ehˇ kʼawꞈ nawˇ gʼawˬ shaˬ gaˬ-eu jeˬ myaˬ-eu miˇ neh, bawˇ tsahˬ bawˇ dahˇ kʼaˇ shuiꞈ deh-ahˇ, aˬ yawꞈ maꞈ-ahˇ nawˇ maˬ byehˇ dzeh-aˬ. Uˬ ciꞈ hawˇ-eu nah gʼahˇ aˬ yawꞈ maꞈ-ahˇ gaˇ ma mehˬ luꞈ-eu, miˬ dzaˬ hawˇ-eu mˬ dmˇ nawˇ maˬ yuˇ dzeh nehˬ-aˬ.

²⁰ Muiˬ-eu jaˬ-eu nawˬ-euˬ Yaw sahˇ, aˬ yawꞈ maꞈ mˇ paˬ-ehˇ gʼeh-eu jeˬ mehˬ-euˬ meh. Aˬ yawꞈ maꞈ-ahˇ nawˇ maˬ naˆ kaˬ muˇ biꞈ nehˬ-awˇ, dawˇ-eu iˇ cuꞈ kʼawꞈ biꞈ-euˬ meh.

²¹ Kʼaˇ shuiꞈ deh yaˇ-ahˇ oeˬ tseˇ kʼoꞈ cah ngeh, kʼaˇ loˬ-eu jeˬ nawˇ biꞈ nehˬ-awˇ, dm gʼaˬ dm lmˇ maˬ ya shaˬ-eu uˬ taꞈ, aˬ kuiˇ puˬ laˇ naˇ laˇ-euˬ maˬ jaˆ-a.

²² Aˬ yawꞈ maꞈ-euˬ dawˬ peh jaˆ-eu miˇ kʼahˬ hawˇ-eu, dawˬ peh jawˇ-eu tsawˇ jeuˬ deuˬ-ahˇ, aˬ yawꞈ maꞈ gʼaˬ leˇ ni nawˇ caw ba nehˬ-euˬ meh. Siˇhoˬ uˆ lahˇ-euˬ Heˬshaˬboˬ miˇ kʼahˬ hawˇ-eu, Awˇgaˆ sahˬ paˬ geuꞈ-awˇ dzoeˬ-eu Baˬshaˬ miˇ kʼahˬ, aˬ yawꞈ maꞈ neh deuˆ gʼaˬ-euˬ meh.

²³ Mˬ taˆ tsehˬ byah taˬ-euˬ aˬ guiˇ loꞈ-ehˇ, aˬ yawꞈ maꞈ-euˬ zaˬ deuˬ-ahˇ nawˇ bi myaˬ laˇ-awˇ, aˬ yawꞈ maꞈ-ahˇ biꞈ-eu gʼaˇ duˬ, aˬ poeˬ aˬ bawˇ deuˬ-ahˇ nawˇ saˇ jaˇ dzaˬ-euˬ miˇ kʼahˬ-ahˇ, aˬ yawꞈ maꞈ deuˆ gʼaˬ-awˇ bi jawˇ-euˬ meh.

²⁴ Kaˬnaˬ miˇ kʼahˬ-ahˇ aˬ yawꞈ maꞈ deuˆ gʼaˬ-euˬ meh. kʼoeˇ gaˇ jawˇ-eu tsawˇ haˬ deuˬ-ahˇ nawˇ gʼaˬ-euˬ meh. Kaˬnaˬ sahˬ paˬ hawˇ-eu miˇ kʼahˬ zaˬ deuˬ kʼoeˇ taˆ, kʼaˇ jahˇ mawꞈ-eu jeˬ jahˇ nehˬ nya-eu baoˬ, nawˬ-euˬ tsawˇ haˬ deuˬ-ahˇ nawˇ biꞈ-euˬ meh.

²⁵ Ziꞈ-eu meuˬ deuˬ hawˇ-eu muiˬ-eu miˇ tsaˬ maˬ ehˇ, pyuˇ shuiˇ byah-eu nymˇ deuˬ hawˇ-eu duˬ gʼaˬ taˬ-euˬ lah duˬ maˬ ehˇ, Saˬloˬ aˇ bawˇ, aˇ siˬ aˇ bawˇ, aˬ gaꞈ yaˇ kmˇ maˬ ehˇ, nawˬ-euˬ tsawˇ jeuˬ deuˆ za-euˬ meh. Aˬ yawꞈ maꞈ kʼaˇ dzaˬ mawꞈ-eu jeˬ dzaˬ-awˇ tsuˇ laˇ-euˬ meh. Nawˬ neh biꞈ-euˬ muiˬ-eu guiˬ lahˬ deuˬ-ahˇ, aˬ yawꞈ maꞈ laˬ kʼaˬ cehˇ dui dui-euˬ meh.

²⁶ Ehˇ kʼawꞈ, nawˬ-euˬ tsawˇ jeuˬ nawˬ-ahˇ puiˬ-awˇ, nawˬ-euˬ ehˇ dawˬ maˬ naˇ haˬ-ehˇ, nawˬ-euˬ zahˇ dawˬ kʼoꞈ dawˬ-ahˇ byehˇ dzeh-awˇ, naˇ kʼah ciˬ pyawˇ-awˇ cah-euˬ meh. Nawˇ jawˇ paw gʼoꞈ leˇ-eu gaˇ kawˆ mehˬ-eu, nawˬ-euˬ gʼaˇ duˬ ngehˬ dah nehˬ-eu deuˬ-ahˇ, aˬ yawꞈ maꞈ sehꞈ dzeh-awˇ, nawˬ-ahˇ gʼawˬ mya poˆ ngehˬ bahˬ tmˇ bahˬ-euˬ meh.

²⁷ Kʼoeˇ miˇ neh, aˬ yawꞈ maꞈ-ahˇ muiˇ-eu deuˬ neh, aˬ yawꞈ maꞈ-ahˇ nawˇ bi deuˆ gʼaˬ-awˇ, bi uˆ lahˇ-euˬ meh. Aˬ yawꞈ maꞈ shaˬ-eu zahˬ-eu laꞈ kʼoeˇ, caw ba le-awˬ lehˇ nawˬ-ahˇ kuˇ ngeh, nawˇ mˬ kʼoeˇ taˆ jawˇ-awˇ naˇ haˬ nehˬ-euˬ meh. Aˬ yawꞈ maꞈ-ahˇ nawˇ gʼawˬ shaˬ gaˬ dui dui-eu laꞈ kʼoeˇ, muiˇ-eu deuˬ-euˬ laꞈ-ahˇ neh bi ka kʼoꞈ-eu gʼaˇ duˬ, aˬ yuiꞈ aˬ tsu deuˬ nawˇ pyehˬ gʼeh-euˬ meh.

²⁸ Miˇ kʼahˬ paˇ saˇ laˇ ngeh, aˬ yawꞈ maꞈ iˬ baˇ mˇ poˆ-awˇ, aˬ yawꞈ maꞈ-ahˇ muiˇ-eu deuˬ neh, aˬ yawꞈ maꞈ-ahˇ nawˇ paˇ bi deuˆ gʼaˬ-euˬ meh. Ehˇ kʼawꞈ, aˬ yawꞈ maꞈ iˬ baˇ noeˬ poˆ-awˇ, ka kʼoꞈ nehˬ laꞈ lehˇ paˇ shaˇ ngeh, mˬ taˆ neh nawˇ naˇ haˬ nehˬ-awˇ, gʼawˬ shaˬ gaˬ dui dui-eu laꞈ kʼoeˇ, tiˬ poˆ saˇ-iˬ tiˬ poˆ ka kʼoꞈ nehˬ-euˬ meh.

²⁹ Nawˬ neh mehˬ-euˬ tsoˆ-euˬ jeˬ-ahˇ naˇ haˬ-awˬ lehˇ, aˬ yawꞈ maꞈ-ahˇ nawˇ mehˬ nehˬ-euˬ meh. Ehˇ kʼawꞈ, aˬ yawꞈ maꞈ nui ma huiˬ-eu laꞈ kʼoeˇ, nawˬ-euˬ zahˇ dawˬ kʼoꞈ dawˬ-ahˇ byehˇ-euˬ meh. Nawˬ-euˬ zahˇ dawˬ kʼoꞈ dawˬ mehˬ nah caw teh-eu jeˬ-aˬ, dehꞈ-eu saꞈ laˇ gaˇ ma pyeuꞈ kʼawꞈ, aˬ yawꞈ maꞈ nui ma huiˬ-eu gʼahˇ-eu laꞈ kʼoeˇ, maˬ naˇ haˬ geuꞈ ni dehꞈ-euˬ meh.

³⁰ Nawˇ nui ma gʼawˬ mahˇ ni taˬ-awˇ, tiˬ kʼoꞈ saˇ-iˬ tiˬ kʼoꞈ aˬ yawꞈ maꞈ-ahˇ mehˬ-euˬ meh. Miˬyehˇ gʼaˇ duˬ ngehˬ dah-eu deuˬ-ahˇ nawˬ-euˬ Yaw sahˇ sheuˬ gʼeh nehˬ-awˇ, aˬ yawꞈ maꞈ-ahˇ dawˬ bi ngehˬ cawˬ kʼawꞈ, aˬ yawꞈ maꞈ naˬ bawˇ maˬ gaˬ leˇ-eu miˇ neh, aˬ cawˬ tsawˇ jeuˬ deuˬ neh aˬ yawꞈ maꞈ-ahˇ nawˇ bi deuˆ gʼaˬ-euˬ meh.

³¹ Ehˇ kʼawꞈ nawˇ gʼawˬ shaˬ gaˬ-eu jeˬ myaˬ-eu miˇ neh, aˬ yawꞈ maꞈ-ahˇ nawˇ maˬ byehˇ dzeh-ehˇ, maˬ laˆ luˬ maˬ laˆ seˇ nehˬ-aˬ. Nawˇ-aˬ, gʼawˬ shaˬ gaˬ mya dui dui-eu Miˬyehˇ meh.

³² Miˬyehˇ-oˇ, Nga maꞈ-euˬ Miˬyehˇ-oˇ, nawˇ aˇ naˆ ni huiˬ-eu mahˇ-eu nga. Aˇ naˆ ni guˆ laˇ paˬ-ehˇ gʼeh-awˇ, aˇ naˆ ni baoˬ huiˬ-eu nga. Nawˬ-euˬ dawˬ ma saˇ jaˇ-ahˇ nawˇ ziꞈ-eu meh. Aˬshuˇliˆ sahˬ paˬ deuˬ nga maꞈ-ahˇ kʼehˬ ngeh neh iˬ nah keuˆ ni, nga maꞈ aˇ naˆ ni ya shaˬ ya zahˬ-euˬ nga. Nga maꞈ-euˬ sahˬ paˬ deuˬ, aˬ yuiꞈ aˬ tsu deuˬ, piˇ ma deuˬ hawˇ-eu, Miˬyehˇ gʼaˇ duˬ ngehˬ dah-eu deuˬ maˬ ehˇ, nga maꞈ-euˬ aˬ poeˬ aˬ bawˇ deuˬ hawˇ-eu nga maꞈ-euˬ tsawˇ haˬ dawˬ tawˆ luꞈ maˬ ehˇ, ya shaˬ ya zahˬ-euˬ ma. Nga maꞈ aˇ naˆ ni ya daˬ-euˬ gaˇ noeˬ keuˆ nehˬ laꞈ-awˬ.

³³ Nawˇ nga maꞈ-ahˇ kʼehˬ-euˬ yaw tsaˬ yaw dawˇ meh. Nga maꞈ iˬ baˇ mˇ-euˬ kʼawꞈ, nawˇ saˇ jaˇ ziꞈ-eu meh.

³⁴ Nga maꞈ-euˬ aˬ poeˬ aˬ bawˇ deuˬ, sahˬ paˬ deuˬ, aˬ yuiꞈ aˬ tsu deuˬ hawˇ-eu piˇ ma deuˬ, nawˬ-euˬ zahˇ dawˬ kʼoꞈ dawˬ mehˬ nah maˬ caw teh-a. Yahˇ-awˇ dehꞈ-eu gʼaˇ duˬ nawˬ neh mehˬ-euˬ dawˬ-ahˇ aˬ yawꞈ maꞈ maˬ naˇ haˬ geuꞈ-a.

³⁵ Nawˬ-euˬ guiˬ lahˬ baˬ da neh aˬ yawꞈ maꞈ sahˬ paˬ baw laˇ-awˇ, aˬ cawˬ miˇ kʼahˬ-ahˇ jawˇ luꞈ ngeh muiˬ-eu miˇ tsaˬ aˬ yawꞈ maꞈ-ahˇ nawˇ biꞈ-euˬ kʼawꞈ, haiˬ-eu jeˬ-ahˇ aˬ yawꞈ maꞈ maˬ byehˇ-ehˇ, nawˇ nui ma tsaˬ-eu jeˬ maˬ mˇ-a.

³⁶ Miˇ muiˬ muiˬ-awˇ baw le za le-eu miˇ kʼahˬ pyeuꞈ-eu, nawˬ neh biꞈ laꞈ-euˬ miˇ kʼahˬ heu kʼahˬ-ahˇ, nga maꞈ nymˬ-mˇ aˬ cawˬ zaˬ kʼaˆ geuꞈ luꞈ-eu ma.

³⁷ Miˇ kʼahˬ heu kʼahˬ-ahˇ nga maꞈ kʼaˇ mˇ za-euˬ jeˬ, nga maꞈ iˬ baˇ mˇ-euˬ miˇ neh nga maꞈ kʼoeˇ taˆ nawˬ neh bi uˆ lahˇ-euˬ sahˬ paˬ deuˬ-euˬ laꞈ-ahˇ le jiˇ-euˬ meh. Nga maꞈ hawˇ-eu nga maꞈ-euˬ jeˬ zaˬ deuˬ-ahˇ, sahˬ paˬ kʼoeˇ deuˬ kʼaˇ jahˇ mawˬ-eu jahˇ-eu miˇ neh, nga maꞈ nui ma cawˆ dui dui-eu ma.”

Bawˬ tsehˆ biˆ tsehˆ-euˬ dawˬ-ahˇ laꞈ ma dehˬ-eu

³⁸ Pyeuꞈ laˇ-euˬ gaˇ kawˆ kʼoeˇ deuˬ baˬ da neh, nga maꞈ Iˇsaˬleˬlaˆ tsawˇ haˬ deuˬ bawˬ tsehˆ biˇ tsehˆ-euˬ gaˇ kawˆ boꞈ doˆ-awˇ, nga maꞈ-euˬ aˬ yuiꞈ aˬ tsu deuˬ, Leˬbiˇ tsawˇ haˬ deuˬ hawˇ-eu piˇ ma deuˬ, aˬ yawꞈ maꞈ-euˬ jmˬ diˬ-euˬ meh.