Neˬhaˬmiˇ 6 - Akha

Neˬhaˬmiˇ gaˇ mˇ gaˇ laˆ bahˬ nehˬ-euˬ

¹ Meuˬ-euˬ lahˇ kʼehˬ deuˬ-ahˇ nga maꞈ laˇ gʼoˆ maˬ jahˇ ahˇ dah mi naˆ-ehˇ, nga maꞈ meuˬ lahˇ gawˬ gʼaˬ-awˇ maˇ pehꞈ maˬ paˇ jaˆ-euˬ gaˇ kawˆ, Sahˬbaˬlaˆ, Tawˇbyaˬ, Geˬsheˬ hawˇ-eu nga maꞈ-ahˇ muiˇ-eu tsawˇ haˬ nui deuˬ-ahˇ gaˬ leˇ-euˬ meh.

² Kʼoeˇ miˇ neh, Sahˬbaˬlaˆ hawˇ-eu Geˬsheˬ aˬ nyaꞈ-aˬ, Oˇnoˇ deh ga-ahˇ aˬ yawꞈ nyaꞈ-ahˇ tahˬ puˬ le-awˬ lehˇ ngaˬ-ahˇ bi ehˇ gaˬ laˇ-euˬ meh. Aˬ yawꞈ nyaꞈ ngaˬ-ahˇ yehˬ bawˬ-ehˇ jahˇ mawꞈ-eu miˇ neh, kʼoeˇ loꞈ-ehˇ bi tsaꞈ gaˬ laˇ-euˬ jeˬ pyeuꞈ-eu meh.

³ Aˬ yawꞈ nyaꞈ jawˇ gaˇ ngaˇ tsawˇ haˬ pyehˬ gʼeh-awˇ, “Ngaˇ huiˬ dui dui-eu gaˇ mˇ luꞈ-eu miˇ neh oe-eu maˬ dah-eu uˬ taꞈ, naw nyaꞈ-ahˇ tahˬ puˬ le-eu gʼaˇ duˬ gaˇ heu-ahˇ maˬ byehˇ coeˇ nya” lehˇ bi tsaꞈ gaˬ-iˇ-euˬ ma.

⁴ Aˬ yawꞈ nyaꞈ oeˬ poˆ keuˆ ni ngaˬ-ahˇ kʼoeˇ loꞈ-ehˇ bi kuˇ laˇ-awˇ, ngaˇ gʼeh, yawˬ poˆ na luꞈ aˬ yawꞈ tiˬ dawˬ tehꞈ-ehˇ bi gaˬ kʼoꞈ-iˇ-euˬ ma.

⁵ Kʼoeˇ naˇ, Sahˬbaˬlaˆ gʼaˬ aˬ yawꞈ-euˬ zaˬ kʼaˆ pyehˬ gʼeh laꞈ-awˇ, ngaˬ poˆ tiˬ poˆ dawˬ tsaꞈ paˇ bi tsaꞈ laˇ-euˬ meh. Kʼoeˇ ngeh poˆ-aˬ, jmˬ maˬ diˬ taˬ-euˬ sahˬ boꞈ tiˬ taꞈ bi hehˇ laꞈ-euˬ meh.

⁶ Sahˬ boꞈ kʼoeˇ taꞈ laꞈ kʼoeˇ boꞈ taˬ-euˬ-aˬ, Nawˇ hawˇ-eu Yuˇdaˆ tsawˇ haˬ deuˬ sahˬpaˬ-ahˇ puiˬ mawꞈ-eu miˇ neh meuˬ lahˇ paˇ gawˬ muiˬ luꞈ-eu meh lehˇ naw maꞈ dawˬ peh jawˇ-eu tsawˇ jeuˬ deuˬ ja luꞈ-eu gaˇ kawˆ Geˬsheˬ ngaˬ-ahˇ dzawˇ nehˬ laꞈ-euˬ meh. Kʼoeˇ uˬ taꞈ, nawˇ yawˬ haˇ yawˬ ha sahˬpaˬ geuꞈ mawꞈ-awˇ,

⁷ nawˇ Yuˇdaˆ sahˬpaˬ pyeuꞈ-eu meh lehˇ Yeˬluˇsaˬlehˬ meuˬ laꞈ kʼoeˇ bi ehˇ gaˬ-eu gʼaˇ duˬ Miˬyehˇ gʼaˇ duˬ ngehˬ dah-eu deuˬ kʼawꞈ tseˇ doˆ gʼaˬ-euˬ meh lehˇ aˬ yawꞈ ehˇ-eu meh. Gaˇ kawˆ heu sahˬpaˬ jawˇ gaˇ aˬ diˇ aˬ maˇ gaˬ keuˆ-iˇ tehꞈ-a. Kʼoeˇ miˇ neh, gaˇ kawˆ heu bawˬ dzaˬ-eu gʼaˇ duˬ aˇ nyaꞈ tahˬ dzoeˇ kaˇ-euˇ lehˇ ngaˇ nawˬ-ahˇ kuˇ-eu ma.

⁸ Kʼoeˇ ngeh, aˬ yawꞈ-ahˇ ngaˇ heu loꞈ-ehˇ bi tsaꞈ kʼoꞈ nehˬ-iˇ-euˬ ma. “Nawˇ kʼaˇ ehˇ-eu jeˬ yaw tsaˬ tiˬ hmˬ-iˬ maˬ ahˇ-a. Dawˬ tawˆ luꞈ nawˬ neh noeˬ doˆ-awˇ ehˇ-euˬ jeˬ tehꞈ nya.”

⁹ Aˬ yawꞈ maꞈ-aˬ, nga maꞈ-ahˇ ja guˆ-awˇ gaˇ maˬ mˇ ni bi byehˇ-eu lehˇ leh jeh luꞈ-eu meh. “Miˬyehˇ-oˇ, nymˬ-mˇ ngaˬ-ahˇ gʼaˬ biꞈ lahˬ laꞈ-awˬ” lehˇ, ngaˇ guiˬ lahˬ shaˇ-euˬ ma.

¹⁰ Aˇ yamˬ kʼoeˇ yamˬ laꞈ kʼoeˇ, Maˬheˬtaˬbeˬlaˇ-euˬ aˬ li Daˬlaˇyaˬ-euˬ aˬ li Sheˬmaˇyaˬ lehˇ myahˇ-euˬ iˇ kahˇ laꞈ nyiˇ maˬ doˆ le ni jawˇ-eu gʼaˬ jawˇ gaˇ, ngaˇ dawˬ deh gʼa-iˇ-euˬ ma. Aˬ yawꞈ ngaˬ-ahˇ ehˇ-eu, “Aˇ nyaꞈ Uˬ duˬ tahˬ nymˇ nymˇ ma laꞈ kʼoeˇ Muiˬ-eu shawˇ-eu jawˇ duˬ-ahˇ dzuˇ zaꞈ leˇ-awˇ, laˇ gʼoˆ kaꞈ kaꞈ tehˬ-awˇ jawˇ kaˇ-euˇ. Aˬ jeˬ miˇ neh ehˇ naˇ, aˬ cawˬ nawˬ-ahˇ sehꞈ laˇ-eu lehˇ lehˬ hmˬ luꞈ meh. Aˬ geu ngeh miˇ aˬ cawˬ nawˬ-ahˇ sehꞈ laˇ-eu lehˇ maˬ paˇ ehˇ nya meh.”

¹¹ Ngaˇ aˬ yawꞈ-ahˇ heu loꞈ-ehˇ ehˇ kʼoꞈ nehˬ-euˬ ma. “Ngaˇ loꞈ-ehˇ gʼeh-eu tsawˇ haˬ tiˬ gʼaˬ cehˆ zaꞈ-eu tsaˬ tehꞈ-a loˇ. Yawˬ ha-euˬ tsawˇ shiˇ uˬ kʼawˇ ya buˬ-iˇ ni Uˬ duˬ tahˬ nymˇ nymˇ ma laꞈ kʼoeˇ ngaˇ cehˆ yaꞈ-iˇ tehꞈ-a lehˇ nawˇ noeˬ te loˇ. Ngaˇ maˬ cehˆ zaꞈ-iˇ.”

¹² Ngaˇ paˇ saˇ sawˇ haw ngeh, Miˬyehˇ neh Sheˬmaˇyaˬ-ahˇ dawˬ ngehˬ cawˬ-euˬ maˬ ngeuˇ-ehˇ, Sheˬmaˇyaˬ ngaˬ-ahˇ kʼoeˇ loꞈ-ehˇ ehˇ ni Tawˇbyaˬ hawˇ-eu Sahˬbaˬlaˆ aˬ nyaꞈ laꞈ nmꞈ nmꞈ-euˬ nga lehˇ siˬ duˬ-euˬ ma.

¹³ Ngaˇ kʼoeˇ loꞈ-ehˇ mˇ-eu baˬ da neh iˬ baˇ doˆ laˇ-awˇ, ngaˬ-euˬ tsawˇ myahˇ cawˆ-iˇ-eu uˬ taꞈ shaꞈ dawˇ dui dui paˬ-ehˇ gʼeh-eu daˬ ga-eu jeˬ ngaˬ-euˬ kʼoeˇ taˆ keuˆ le ni, ngaˬ-ahˇ mehˇ shuiˇ bi shuiˇ-eu gʼaˇ duˬ, Sheˬmaˇyaˬ-ahˇ aˬ yawꞈ nyaꞈ kʼehˇ-euˬ meh.

¹⁴ Kʼoeˇ ngeh, ngaˇ heu loꞈ-ehˇ guiˬ lahˬ shaˇ-euˬ ma. “Miˬyehˇ-oˇ, Tawˇbyaˬ hawˇ-eu Sahˬbaˬlaˆ aˬ nyaꞈ neh ngaˬ-ahˇ mˇ nehˬ laꞈ-euˬ gaˇ maˬ ngehˇ ni aˬ yawꞈ nyaꞈ-ahˇ kʼehˬ nehˬ-awˬ. Nawˇ diˇ lehˇ myahˇ-euˬ zaˬ miˬ zaˬ kʼoeˇ gʼaˬ hawˇ-eu ngaˬ-ahˇ guˆ ciˬ nyehꞈ-eu lehˇ kʼaˇ leh jeh-euˬ nawˬ-euˬ gʼaˇ duˬ ngehˬ dah-eu kʼoeˇ deuˬ-ahˇ kʼawꞈ maˬ kʼehˬ nehˬ ni taˬ byehˇ nehˬ laꞈ.”

Meuˬ lahˇ gawˬ muiˬ-eu gaˇ mˇ gʼaˬ-euˬ

¹⁵ Meuˬ lahˇ paˇ gawˬ muiˬ-eu gaˇ kʼoeˇ hmˬ, ngaˬ tseˇ nyiꞈ nah byah ni mˇ-awˇ, Eˇluˇlaˆ ba la nyiˬ tseˇ ngaˬ nah-ahˇ mˇ gʼaˬ-euˬ ma.

¹⁶ Nga maꞈ-euˬ jawˬ jawˬ-ehˇ jawˇ-eu nga maꞈ-ahˇ muiˇ-eu aˬ cawˬ tsawˇ jeuˬ deuˬ gaˇ kawˆ kʼoeˇ ya gaˬ ngeh, aˬ yawꞈ maꞈ-euˬ myaˆ pyawˬ naˇ mehˇ maˬ jaˆ-ehˇ pyeuꞈ-iˇ-euˬ meh. Aˬ jeˬ miˇ neh ehˇ naˇ, Miˬyehˇ caw ba-eu miˇ neh gaˇ kʼoeˇ mˇ pyeuꞈ nya-euˬ gaˇ kawˆ, yawˬ gʼaˬ na luꞈ siˬ duˬ-eu meh.

¹⁷ Aˇ nah aˇ yamˬ kʼoeˇ laꞈ kʼoeˇ, Yuˇdaˆ tsawˇ haˬ aˬ yuiꞈ aˬ tsu gʼawˬ mya gʼaˬ Tawˇbyaˬ nehˬ-ehˇ sahˬ boꞈ boꞈ taꞈ boꞈ taꞈ-ehˇ jawˇ-euˬ meh.

¹⁸ Tawˇbyaˬ-euˬ aˬ mawˬ-aˬ Yuˇdaˆ tsawˇ jeuˬ Aˬlah-euˬ aˬ li Sheˬkaˬniˇ pyeuꞈ-eu miˇ neh, Yuˇdaˆ miˇ kʼahˬ zaˬ gʼawˬ mya ni Tawˇbyaˬ jawˇ paw nui ma ahˇ-eu meh. Kʼoeˇ uˬ taꞈ, aˬ yawꞈ-euˬ aˬ li Yeˬhawˇhaˬnaˬ-aˬ, Beˬleˬkiˇ-euˬ aˬ li Meˬshuˇlamˬ-euˬ aˬ buˇ-ahˇ sheuˬ-euˬ miˇ neh meh.

¹⁹ Tawˇbyaˬ neh mˇ-euˬ yaw muiˬ jeˬ gaˇ kawˆ ngaˬ-euˬ mehˬ shi aˬ cawˬ ja-awˇ, ngaˬ neh kʼaˇ ehˇ-euˬ jeˬ dawˬ tawˆ luꞈ Tawˇbyaˬ-ahˇ aˬ yawꞈ maꞈ dzawˇ nehˬ-iˇ-eu meh. Kʼoeˇ naˇ, aˬ yawꞈ ngaˬ-ahˇ laˆ guˆ-eu lehˇ sahˬ boꞈ boꞈ tehˇ tehˬ-eu meh.