Neˬhaˬmiˇ 5 - Akha

Shaˬ zaˬ zahˬ zaˬ kʼoeˇ taˆ kʼaˆ dzaˬ-euˬ

¹ Aˇ nah aˇ yamˬ ui cuiˆ myahˇ laˇ ngeh jawˇ, kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, tsawˇ haˬ gʼawˬ mya gʼaˬ Yuˇdaˆ tsawˇ haˬ cawˬ cawˬ iˬ baˇ taˬ-eu dawˬ ngehˬ laˇ-euˬ meh.

² Tiˬ paˆ na deuˬ ehˇ-eu, “Nga maꞈ nymˇ kʼahˬ zaˬ yaw myaˬ miˇ neh yaw dehꞈ ya dehꞈ ni dzaˬ-eu gʼaˇ duˬ cehˇ loˬ nya.”

³ Tiˬ paˆ na deuˬ ehˇ-eu, “Nga maꞈ maˬ ya shiˇ-eu gʼaˇ duˬ, deh ma deuˬ, aˬ gaꞈ yaˇ kmˇ deuˬ hawˇ-eu nymˇ deuˬ biꞈ daˇ nehˬ-awˇ cehˇ yuˇ dzaˬ-euˬ ma.”

⁴ Tiˬ deuˬ na paˇ ehˇ-eu, “Sahˬ paˬ-ahˇ, deh yaˇ kawˬ hawˇ-eu aˬ gaꞈ yaˇ kmˇ kawˬ doˆ nehˬ-eu gʼaˇ duˬ, aˬ cawˬ-ahˇ pyuˇ shaˇ paˇ-euˬ ma.

⁵ Nga maꞈ kʼawꞈ aˬ cawˬ loꞈ-ehˇ Yuˇdaˆ tsawˇ haˬ pyeuꞈ-eu ma. Nga maꞈ-euˬ aˬ buˇ aˬ li deuˬ kʼawꞈ, aˬ yawꞈ maꞈ-euˬ aˬ buˇ aˬ li loꞈ-ehˇ muiˬ-eu ma. Ehˇ kʼawꞈ, nga maꞈ-euˬ zaˬ deuˬ-ahˇ aˬ cawˬ zaˬ kʼaˆ bi geuꞈ taˬ-euˬ ma. Nga maꞈ-euˬ aˬ buˇ tiˬ paˆ na deuˬ-ahˇ ahˬ dzaˬ-awˇ aˬ cawˬ zaˬ kʼaˆ bi geuꞈ taˬ-euˬ ma. Nga maꞈ-euˬ deh yaˇ deuˬ hawˇ-eu aˬ gaꞈ yaˇ kmˇ deuˬ aˬ cawˬ neh bi yuˇ geuꞈ jiˇ-euˬ miˇ neh tiˬ jeˬ-iˬ maˬ paˇ gʼeh nya miˇ-a.”

⁶ Aˬ yawꞈ maꞈ kʼoeˇ loꞈ-ehˇ toˇ luꞈ gaˇ ngaˇ ya gaˬ ngeh, nui ma pehˇ dui dui-euˬ ma.

⁷ Gaˇ kawˆ kʼoeˇ-ahˇ ngaˬ-euˬ nui ma laꞈ kʼoeˇ saˇ sawˇ haw-awˇ, aˬ yuiꞈ aˬ tsu deuˬ hawˇ-eu yaw huiˬ yaw mahˇ deuˬ-ahˇ ngaˇ iˬ baˇ taˬ-awˇ, “Naw maꞈ, yawˬ ha tsawˇ jeuˬ kʼoeˇ taˆ kʼaˆ dzaˬ nga” lehˇ ehˇ nehˬ-euˬ ma. Gaˇ kawˆ kʼoeˇ hmˬ-ahˇ taꞈ leˇ-awˇ, tsawˇ haˬ dawˬ tawˆ luꞈ-ahˇ ngaˇ kuˇ uiˬ-eu laꞈ kʼoeˇ,

⁸ heu loꞈ-ehˇ ehˇ nehˬ-euˬ ma. “Maˬ gʼeh nya-ehˇ pyeuꞈ laˇ-awˇ aˬ cawˬ tsawˇ jeuˬ-euˬ laꞈ-ahˇ ahˬ ahˇ nehˬ-eu lehˇ gʼeh-eu Yuˇdaˆ tsawˇ haˬ deuˬ-ahˇ aˬ dui kʼaˇ gʼeh nya-eu loꞈ-ehˇ zeuˇ kʼoꞈ nehˬ-euˬ ma. Nymˬ-mˇ poˆ jawˇ-aˬ, yawˬ ha tsawˇ jeuˬ pyeuꞈ-eu Yuˇdaˆ tsawˇ haˬ-ahˇ yawˬ ha paˇ zeuˇ geuꞈ-eu lehˇ naw maꞈ leh jeh luꞈ-eu nga laˬ.” Aˬ yuiꞈ aˬ tsu kʼoeˇ deuˬ ciˬ cuˇ ni jawˇ-awˇ tiˬ jeˬ-iˬ maˬ ngehˬ maˬ tmˇ nya ni pyeuꞈ-iˇ-euˬ meh.

⁹ Kʼoeˇ naˇ, ngaˇ heu loꞈ-ehˇ ehˇ-euˬ ma. “Naw maꞈ mˇ luꞈ-eu teu maˬ tsaˬ-a. Naw maꞈ Miˬyehˇ-ahˇ guˆ-awˇ yaw tsaˬ jeˬ mˇ-eu laꞈ kʼoeˇ, aˬ dui-ahˇ muiˇ-eu lawˇ ciꞈ zaˬ deuˬ neh bi ja doeˇ kʼaˇ maˬ za ni dehꞈ-eu tsaˬ meh.

¹⁰ Ngaˇ maˬ ehˇ, ngaˬ-euˬ cawˬ deuˬ maˬ ehˇ, ngaˬ-euˬ gaˇ mˇ luꞈ-eu deuˬ maˬ ehˇ, miˇ kʼahˬ zaˬ deuˬ-ahˇ pyuˇ hawˇ-eu cehˇ biꞈ paˇ nehˬ taˬ-euˬ jaˆ-eu ma. Ehˇ kʼawꞈ, aˬ dui za jeˬ maˬ paˇ yuˇ kʼoꞈ ni byehˇ kaˇ-euˇ.

¹¹ Pyuˇ maˬ ehˇ, cehˇ maˬ ehˇ, aˬ gaꞈ dzaˇ uiˇ maˬ ehˇ, saˬ loˬ tsiˇ maˬ ehˇ, naw maꞈ neh kʼaˇ biꞈ paˇ nehˬ-euˬ jeˬ dziˇ dzoˆ maˬ gʼaˬ kʼoꞈ ni byehˇ nehˬ-awˬ. Naw maꞈ neh yuˇ geuꞈ-euˬ aˬ yawꞈ maꞈ-euˬ deh ma deuˬ, aˬ gaꞈ yaˇ kmˇ deuˬ, saˬ loˬ yaˇ deuˬ hawˇ-eu nymˇ deuˬ kʼawꞈ tiˬ poˆ tehꞈ-ehˇ biꞈ kʼoꞈ nehˬ jiˇ-awˬ.”

¹² Aˬ yuiꞈ aˬ tsu kʼoeˇ deuˬ ehˇ-eu, “Nawˬ neh ehˇ-euˬ loꞈ-ehˇ nga maꞈ mˇ ma. Nga maꞈ neh kʼaˇ yuˇ taˬ-euˬ jeˬ biꞈ kʼoꞈ jiˇ-awˇ, dziˇ dzoˆ kʼawꞈ byehˇ jiˇ nehˬ ma.” Piˇ ma deuˬ-ahˇ ngaˇ kuˇ ahˇ-awˇ, aˬ yuiꞈ aˬ tsu kʼoeˇ deuˬ-ahˇ yawˬ ha neh saˇ jaˇ dzaˬ-euˬ loꞈ-ehˇ mˇ ma lehˇ piˇ ma deuˬ-euˬ mehˬ shi bi kamˬ-euˬ ma.

¹³ Kʼoeˇ naˇ, ngaˬ-euˬ joꞈ-ahˇ paꞈ luꞈ-eu pawˬ behˆ ngaˇ lehˆ doˆ-awˇ, aˬ yawꞈ maꞈ mehˬ shi byuˬ kʼaˇ mehˬ nehˬ-awˇ heu loꞈ-ehˇ ehˇ nehˬ-euˬ ma. “Yawˬ ha neh saˇ jaˇ dzaˬ taˬ-euˬ loꞈ-ehˇ maˬ mˇ-eu tsawˇ haˬ-ahˇ Miˬyehˇ heu loꞈ-ehˇ byuˬ kʼaˇ nehˬ tehꞈ-a. Naw maꞈ-euˬ nymˇ deuˬ hawˇ-eu naw maꞈ kʼaˇ jaˆ-eu yawˬ jeˬ na luꞈ-ahˇ Miˬyehˇ yuˇ kʼoꞈ jiˇ-awˇ, tiˬ jeˬ-iˬ maˬ jaˆ ni bi jawˇ nehˬ laꞈ tehꞈ-a.” Kʼoeˇ ngeh, kʼoeˇ gaˇ kʼaˇ uiˬ laˇ-euˬ yawˬ gʼaˬ na luꞈ, “Aˬmiˬ” lehˇ ehˇ-awˇ, Sahˬpaˬ miˬyehˇ-euˬ guiˬ lahˬ-ahˇ ja ceuˬ-euˬ meh. Aˬ yuiꞈ aˬ tsu deuˬ kʼawꞈ yawˬ ha neh saˇ jaˇ kʼaˇ dzaˬ taˬ-euˬ loꞈ-ehˇ mˇ-euˬ meh.

Miˇ kʼahˬ zaˬ deuˬ-ahˇ Neˬhaˬmiˇ gaˬ-euˬ

¹⁴ Sahˬpaˬ Aˬtaˬdzeuˬsehˆ sahˬpaˬ geuꞈ-euˬ nyiˬ tseˇ kʼoꞈ tiˬ kʼoꞈ-ahˇ neh smˬ tseˇ nyiꞈ kʼoꞈ tiˬ kʼoꞈ-ahˇ keuˆ ni, Yuˇdaˆ miˇ kʼahˬ-ahˇ ngaˇ tseˇ nyiꞈ kʼoꞈ uˆ lahˇ-euˬ ma. Tseˇ nyiꞈ kʼoꞈ aˇ yamˬ kʼoeˇ laꞈ kʼoeˇ, uˆ lahˇ-eu gʼaˬ-ahˇ oꞈ-eu dzaˬ dzaˬ dawˇ dawˇ deuˬ-ahˇ, ngaˇ maˬ ehˇ, ngaˬ-euˬ aˬ yuiꞈ aˬ nyiˇ deuˬ maˬ ehˇ, maˬ taꞈ dzaˬ-aˬ.

¹⁵ Ngaˬ-euˬ mehˬ hu Yuˇdaˆ miˇ kʼahˬ-ahˇ uˆ lahˇ-eu gaˇ mˇ yaꞈ-euˬ deuˬ-aˬ, miˇ kʼahˬ zaˬ deuˬ-ahˇ kʼaˆ behˆ yaw kah ciˬ pi-awˇ, tiˬ nah dzaˬ-eu dzaˬ dzaˬ dawˇ dawˇ, aˬ gaꞈ dzaˇ uiˇ hawˇ-eu pyuˇ maˇ byaˆ oeˬ tseˇ byaˆ taꞈ-euˬ meh. Aˬ yawꞈ maꞈ-euˬ zaˬ kʼaˆ deuˬ kʼawꞈ miˇ kʼahˬ zaˬ kʼoeˇ taˆ kʼaˆ dzaˬ-euˬ meh. Ehˇ kʼawꞈ, ngaˇ-aˬ, Miˬyehˇ-ahˇ guˆ-eu miˇ neh kʼoeˇ loꞈ-ehˇ maˬ jahˇ-aˬ.

¹⁶ Ngaˬ-euˬ nui ma gʼawˇ mawˇ dawˬ tawˆ luꞈ, meuˬ lahˇ gawˬ muiˬ-eu gaˇ-ahˇ mˇ-awˇ, yawˬ ha gʼaˇ duˬ miˇ tsaˬ za laˇ ni maˬ mˇ-aˬ. Ngaˬ-euˬ gaˇ mˇ-eu yawˬ gʼaˬ na luꞈ kʼawꞈ, ngaˬ nehˬ-ehˇ meuˬ lahˇ gawˬ muiˬ-euˬ ma.

¹⁷ Ngaˇ jawˇ gaˇ laˇ-euˬ jawˬ jawˬ-ehˇ jaˆ-eu aˬ cawˬ miˇ kʼahˬ deuˬ-ahˇ jawˇ-eu tsawˇ haˬ deuˬ uˬ taꞈ, Yuˇdaˆ tsawˇ haˬ hawˇ-eu aˬ yawꞈ maꞈ-euˬ aˬ yuiꞈ aˬ tsu tiˬ yaˇ ngaˬ tseˇ gʼaˬ-ahˇ, aˬ myah luꞈ ngaˇ bi dzaˬ bi dawˇ-euˬ ma.

¹⁸ Aˬ yawꞈ nah yawꞈ mawˇ neˇ tiˬ mawˇ, muiˬ dui dui-eu yawˇ koꞈ mawˇ hawˇ-eu, ya ciˆ gʼawˬ mya mawˇ sehꞈ nehˬ-awˇ, tseˇ nah kaˬ tiˬ poˆ aˬ gaꞈ dzaˇ uiˇ yaw shuiꞈ bi dawˇ-euˬ ma. Ehˇ kʼawꞈ, miˇ kʼahˬ zaˬ deuˬ kʼaˆ behˆ kah-eu ngaˇ siˬ nya-eu miˇ neh, uˆ lahˇ-eu gʼaˬ-ahˇ oꞈ-eu shaˬ bymˇ ngaˇ maˬ taꞈ dzaˬ-aˬ.

¹⁹ Miˬyehˇ-oˇ, tsawˇ haˬ heu deuˬ gʼaˇ duˬ ngaˬ neh mˇ-euˬ yawˬ jeˬ na luꞈ-ahˇ maˬ ngehˇ ni noeˬ keuˆ nehˬ laꞈ lehˇ nawˬ-ahˇ ngaˇ shaˇ-eu ma.