Neˬhaˬmiˇ 2 - Akha

Neˬhaˬmiˇ Yeˬluˇsaˬlehˬ meuˬ-ahˇ le-euˬ

¹ Ba la oeˬ siˬ paˇ dzeuˇ-iˇ-awˇ, sahˬ paˬ Aˬtaˬdzeuˬsehˆ uˆ lahˇ-eu nyiˬ tseˇ kʼoꞈ tiˬ kʼoꞈ Niˬsaˬ ba la-ahˇ, sahˬ paˬ hawˬ dzaˬ luꞈ ngeh, ngaˇ aˬ gaꞈ dzaˇ uiˇ ciˬ ha nehˬ-euˬ ma. Dzeuˇ laˇ ngeh ngaˇ noeˬ shaˬ luꞈ-eu aˬ yawꞈ tiˬ poˆ-iˬ maˬ mawˇ haw-aˬ.

² Kʼoeˇ miˇ neh aˬ yawꞈ ngaˬ-ahˇ heu loꞈ-ehˇ naˇ haˬ-eu meh. “Aˬ jeˬ miˇ neh nawˇ teu naˆ naˆ-ehˇ noeˬ shaˬ te. Nawˇ jawˇ saˇ maˬ doˆ-eu kʼawꞈ maˬ ngeuˇ-a. Nawˇ nui ma maˬ saˇ-eu jeˬ jaˆ-eu paˬ.” Kʼoeˇ loꞈ-ehˇ ehˇ laˇ gaˇ ngaˇ guˆ-awˇ zahˬ leˇ-euˬ ma.

³ Ehˇ kʼawꞈ aˬ yawꞈ-ahˇ ngaˇ heu loꞈ-ehˇ ehˇ kʼoꞈ nehˬ-euˬ ma. “Sahˬ paˬ-oˇ, nawˇ ziˇ baw ziˇ za luꞈ-uˇ. Ngaˬ-euˬ aˬ poeˬ aˬ bawˇ deuˬ-euˬ lmˬ bymˇ jaˆ-eu meuˬ cawˆ-iˇ-awˇ, meuˬ lahˇ laˇ gʼoˆ deuˬ-ahˇ miˬ dzaˬ puiˆ dzeh jiˇ-euˬ miˇ neh, ngaˬ-ahˇ maˬ noeˬ shaˬ-ehˇ maˬ jawˇ tehˬ coeˇ nya.”

⁴ Kʼoeˇ naˇ, “Nawˇ aˬ jeˬ mawꞈ-eu nya” lehˇ sahˬ paˬ ngaˬ-ahˇ naˇ haˬ laˇ-eu meh. Kʼoeˇ ngeh, ngaˇ Miˬyehˇ-ahˇ guiˬ lahˬ shaˇ-awˇ,

⁵ sahˬ paˬ-ahˇ heu loꞈ-ehˇ ehˇ nehˬ-euˬ ma. “Sahˬ paˬ-oˇ, nawˇ ngaˬ-ahˇ nui ma tsaˬ-awˇ ngaˬ neh shaˇ-euˬ jeˬ biꞈ laꞈ ma lehˇ ngeuˇ naˇ, ngaˬ-euˬ aˬ poeˬ aˬ bawˇ deuˬ-euˬ lmˬ bymˇ jaˆ-eu Yuˇdaˆ miˇ kʼahˬ meuˬ kʼoeˇ meuˬ-ahˇ ngaˬ-ahˇ bi gʼoꞈ leˇ laꞈ-awˇ, meuˬ kʼoeˇ meuˬ bi tsoˆ muiˬ leˇ nehˬ laꞈ.”

⁶ Miˬ zaˬ gʼaˬ nehˬ-ehˇ tiˬ kawˆ loꞈ-ehˇ nuiˇ luꞈ-eu sahˬ paˬ kʼoeˇ gʼaˬ ngaˬ-euˬ shaˇ dawˬ-ahˇ naˇ haˬ nehˬ laꞈ-euˬ meh. Kʼoeˇ gaˇ le-eu gʼaˇ duˬ aˇ yamˬ aˇ myah ni ga-iˇ-eu gaˇ kawˆ aˬ yawꞈ ngaˬ-ahˇ naˇ haˬ laˇ ngeh, aˇ yamˬ aˇ myah ni ga-iˇ-eu gaˇ kawˆ aˬ yawꞈ-ahˇ ngaˇ ehˇ kʼoꞈ nehˬ-euˬ ma.

⁷ Ngaˬ-ahˇ gʼawˬ shaˬ gaˬ-eu laꞈ kʼoeˇ, Uˇpaˬlaˇ lawˇ baˬ nahˇ ma ga kʼehˬ paw miˇ kʼahˬ-ahˇ uˆ lahˇ-eu sahˬ paˬ sahˬ ma deuˬ-ahˇ sahˬ boꞈ boꞈ nehˬ-awˇ, ngaˬ-ahˇ Yuˇdaˆ miˇ kʼahˬ-ahˇ bi le-awˬ lehˇ tiˬ poˆ ehˇ nehˬ-awˬ lehˇ aˬ yawꞈ-ahˇ ngaˇ shaˇ-euˬ ma.

⁸ Uˬ duˬ tahˬ nymˇ nymˇ ma-ahˇ loꞈ piˇ-eu nymˇ goˇ-euˬ laˇ gʼoˆ gʼoˆ ma deuˬ laˆ saˆ muiˬ-eu gʼaˇ duˬ maˬ ehˇ, meuˬ meuˬ lahˇ gawˬ muiˬ-eu gʼaˇ duˬ maˬ ehˇ, ngaˇ jawˇ-eu nymˇ tsoˆ-eu gʼaˇ duˬ maˬ ehˇ, daˇ kawˬ za nya ni, sahˬ paˬ-euˬ aˇ bawˇ sahˬ kʼaˆ-ahˇ haw-eu pyaˆ-eu gʼaˬ pyeuꞈ-eu Aˬsaˆ-ahˇ kʼawꞈ sahˬ boꞈ tiˬ taꞈ boꞈ nehˬ-awˬ lehˇ ngaˇ shaˇ-euˬ ma. Miˬyehˇ ngaˬ nehˬ-ehˇ jawˇ-eu miˇ neh, ngaˇ kʼaˇ shaˇ-eu jeˬ-ahˇ sahˬ paˬ mˇ nehˬ laꞈ-euˬ meh.

⁹ Sahˬ paˬ Aˬtaˬdzeuˬsehˆ-aˬ, guiˇ maꞈ-ahˇ uˆ lahˇ-eu yaw huiˬ yaw mahˇ tiˬ paˆ na deuˬ hawˇ-eu mahˬ dziˬ-eu yehˇ deuˬ-ahˇ ngaˬ nehˬ-ehˇ Uˇpaˬlaˇ lawˇ baˬ nahˇ ma ga kʼehˬ paw bi laˇ-euˬ meh. Kʼoeˇ gaˇ jawˇ-eu sahˬ paˬ sahˬ ma deuˬ-ahˇ sahˬ paˬ neh boꞈ ahˇ laꞈ-euˬ sahˬ boꞈ deuˬ ngaˇ biꞈ-euˬ ma.

¹⁰ Ehˇ kʼawꞈ, Iˇsaˬleˬlaˆ tsawˇ jeuˬ huiˬ laˇ mahˇ laˇ ni mˇ-eu gʼaˇ duˬ tsawˇ haˬ laˇ taˬ-euˬ gaˇ kawˆ-ahˇ, Behˬhawˇleuˬ meuˬ-ahˇ jawˇ-eu Sahˬbaˬlaˆ hawˇ-eu Aˬmoˬ miˇ kʼahˬ-ahˇ yaw huiˬ yaw mahˇ geuꞈ luꞈ-eu Tawˇbyaˬ aˬ nyaꞈ ya gaˬ ngeh, nui ma maˬ tsaˬ-a.

¹¹ Ngaˇ Yeˬluˇsaˬlehˬ meuˬ-ahˇ le-awˇ smˬ nah jawˇ-euˬ ma.

¹² Yeˬluˇsaˬlehˬ meuˬ gʼaˇ duˬ aˬ joˆ-ehˇ ya mˇ ya shaˇ-eu gaˇ kawˆ Miˬyehˇ neh ngaˬ-ahˇ mehˬ nehˬ laꞈ-euˬ jeˬ, tsawˇ haˬ tiˬ gʼaˬ-ahˇ-iˬ ngaˇ maˬ dzawˇ mehˬ nehˬ-aˬ. Uˬ ciꞈ sehˇ gʼahˇ ceh laˇ ngeh ngaˇ tsawˬ tuˇ-awˇ, cawˬ heu myaˆ gʼaˬ sheuˬ-awˇ doˆ-iˇ-euˬ ma. Nga maꞈ nehˬ-ehˇ ahˇ-eu jeˬ zaˬ-aˬ, ngaˇ dziˬ luꞈ-eu mahˬ tahˬ laˆ tiˬ mawˇ tehꞈ ma.

¹³ Nahˇ ma ga kʼehˬ paw dzeˇ jaˆ-eu Deh kʼawꞈ lahˇ kʼehˬ-ahˇ neh ngaˇ iˇ doˆ-awˇ, laꞈ oˆ paw Byaˆ yahˬ lawˇ kʼawꞈ iˇ dzeuˇ-awˇ, Mawˇ neˇ ceˬ lahˇ kʼehˬ-ahˇ iˇ keuˆ ngeh, uˬ bya maˬ bya laˇ-aˬ siˬ. Ngaˇ kʼoeˇ loꞈ-ehˇ iˇ luꞈ ngeh, byaˆ-iˇ taˬ-euˬ meuˬ meuˬ lahˇ hawˇ-eu miˬ dzaˬ keuˬ dzeh taˬ-euˬ meuˬ lahˇ laˇ gʼoˆ deuˬ-ahˇ pyehˆ tseˇ haw-euˬ ma.

¹⁴ Kʼoeˇ naˇ, meuˬ-euˬ nahˇ ma doˆ kʼehˬ paw dzeˇ, laꞈ taˆ paw Lawˇ kʼawꞈ lahˇ kʼehˬ hawˇ-eu Sahˬpaˬ-euˬ lah paw ngaˇ le daˆ-euˬ ma. Ehˇ kʼawꞈ, ngaˇ dziˬ luꞈ-eu mahˬ tahˬ laˆ kʼoeˇ mawˇ le doˆ nya ni gaˇ ma maˬ dahˇ-a.

¹⁵ Kʼoeˇ miˇ neh, Giˇdaˬloˬ deh kʼawꞈ paw ngaˇ iˇ ka gʼeh-awˇ, meuˬ meuˬ lahˇ-ahˇ pyehˆ tseˇ pyehˆ tseˇ-ehˇ iˇ gʼeh-euˬ ma. Kʼoeˇ naˇ, ngaˬ neh oe-euˬ gaˇ ma caw caw-ehˇ paˇ gʼoꞈ poˆ leˇ-awˇ, Deh kʼawꞈ lahˇ kʼehˬ-ahˇ neh meuˬ-ahˇ paˇ gʼoꞈ uˇ leˇ-euˬ ma.

¹⁶ Ngaˇ aˬ gaˇ iˇ keuˆ-awˇ aˬ jeˬ mˇ yaꞈ-euˬ gaˇ kawˆ, kʼoeˇ gaˇ jawˇ-eu yaw huiˬ yaw mahˇ deuˬ tiˬ gʼaˬ-iˬ maˬ siˬ nya-a. Meuˬ meuˬ lahˇ tsoˆ muiˬ-eu gaˇ ya mˇ-eu deuˬ pyeuꞈ-eu Yuˇdaˆ tsawˇ haˬ deuˬ, piˇ ma deuˬ, aˬ yuiꞈ aˬ tsu deuˬ hawˇ-eu yaw huiˬ yaw mahˇ deuˬ tiˬ gʼaˬ-ahˇ-iˬ, kʼoeˇ ngeh keuˆ ni gaˇ kawˆ kʼoeˇ ngaˇ maˬ ehˇ nehˬ-aˬ siˬ.

¹⁷ Ehˇ kʼawꞈ, kʼoeˇ ngeh jawˇ aˬ yawꞈ maꞈ-ahˇ heu loꞈ-ehˇ ehˇ nehˬ-euˬ ma. “Yeˬluˇsaˬlehˬ meuˬ cawˆ-iˇ taˬ-awˇ meuˬ meuˬ lahˇ yaw pyaˆ-ehˇ jaˆ luꞈ-eu miˇ neh, aˬ dui aˇ naˆ ni ya shaˬ ya zahˬ luꞈ gaˇ haw sheˇ. Meuˬ meuˬ lahˇ paˇ gawˬ ziꞈ-awˇ, maˬ noeˬ shaˬ maˬ noeˬ zahˬ ni dehꞈ kaˇ-euˇ.”

¹⁸ Kʼoeˇ naˇ, Miˬyehˇ ngaˬ nehˬ-ehˇ jawˇ-awˇ ngaˬ-ahˇ aˬ joˆ-ehˇ caw ba nehˬ laꞈ-euˬ gaˇ kawˆ hawˇ-eu, sahˬ paˬ neh ngaˬ-ahˇ aˬ joˆ-ehˇ ehˇ nehˬ laꞈ-euˬ gaˇ kawˆ, aˬ yawꞈ maꞈ-ahˇ ngaˇ dzawˇ nehˬ-euˬ ma. Kʼoeˇ ngeh, “Aˬ dui maꞈ meuˬ meuˬ lahˇ paˇ gawˬ ziꞈ kaˇ-euˇ” lehˇ aˬ yawꞈ maꞈ ehˇ-awˇ, gaˇ mˇ-eu gʼaˇ duˬ lehˬ hmˬ-euˬ meh.

¹⁹ Nga maꞈ kʼoeˇ loꞈ-ehˇ mˇ-eu lehˇ lehˬ hmˬ luꞈ-eu gaˇ kawˆ-ahˇ, Sahˬbaˬlaˆ, Tawˇbyaˬ hawˇ-eu Aˬlaˆ tsawˇ haˬ Geˬsheˬ lehˇ myahˇ-euˬ aˬ ha smˇ gʼaˬ ya gaˬ ngeh, nga maꞈ-ahˇ naˬ gʼa-eu laꞈ kʼoeˇ ehˇ-eu, “Naw maꞈ aˬ jeˬ mˇ-eu gʼeh te. Sahˬ paˬ-ahˇ puiˬ-eu lehˇ gʼeh te loˇ.”

²⁰ Aˬ yawꞈ maꞈ-ahˇ ngaˇ heu loꞈ-ehˇ ehˇ kʼoꞈ nehˬ-euˬ ma. “Gaˇ heu mˇ pyeuꞈ nya ni Mˬ taˆ Miˬyehˇ nga maꞈ-ahˇ caw ba nehˬ laꞈ tehꞈ-a. Nga maꞈ-aˬ aˬ yawꞈ-euˬ zaˬ kʼaˆ pyeuꞈ-awˇ, gaˇ heu hmˬ mˇ dahˬ beh-eu lehˇ gʼeh-eu ma. Ehˇ kʼawꞈ, naw maꞈ-aˬ, Yeˬluˇsaˬlehˬ meuˬ-ahˇ tiˬ jeˬ-iˬ maˬ taꞈ-a. Meuˬ heu meuˬ laꞈ kʼoeˇ pyeuꞈ dzeuˇ yaꞈ-euˬ aˇ hu gaˇ kawˆ deuˬ kawꞈ naw maꞈ-ahˇ maˬ taꞈ-a.”