Neˬhaˬmiˇ 12 - Akha

Piˇ ma deuˬ hawˇ-eu Leˬbiˇ tsawˇ haˬ deuˬ-euˬ jaˇ laˇ

¹ Heu-aˬ, Sheˬliˇlaˆ-euˬ aˬ li Yeˬluˇbaˬdeˬlaˇ hawˇ-eu Piˇ ma yaw huiˬ gʼaˬ pyeuꞈ-eu Yawˇshuˆ nehˬ-ehˇ Baˬbuˇloˬ miˇ kʼahˬ-ahˇ neh gʼoꞈ laˇ-euˬ piˇ ma deuˬ hawˇ-eu Leˬbiˇ tsawˇ haˬ deuˬ-euˬ jaˇ laˇ meh. Piˇ ma deuˬ laꞈ kʼoeˇ, Seˬlehˇyaˬ, Yeˬlaˬmiˇ, Eˇzaˬlaˬ,

² Aˬmaˬliˇ, Maˬluꞈ, Haˬtuˇshaˬ,

³ Sheˬkaˬniˇ, Leˬhamˬ, Meˬlaˬmoˇ,

⁴ Iˇdoˬ, Giˇneˬdoi, Aˬbiˇyaˬ,

⁵ Miˇyaˬme, Maˬdiˇyaˬ, Biˇlaˬgahˬ,

⁶ Sheˬmaˇyaˬ, Yawˇyaˬliˆ, Yeˬdaˬyaˇ,

⁷ Saˇlu, Aˬmawˆ, Hiˇlaˬkiˇ hawˇ-eu Yeˬdaˬyaˇ meh. Heu deuˬ-aˬ, Yawˇshuˆ-euˬ ziˇ-ahˇ yawˬ ha-euˬ aˬ yuiꞈ aˬ nyiˇ pyeuꞈ-eu piˇ ma dawˬ tawˆ luꞈ kʼoeˇ taˆ aˬ yuiꞈ aˬ tsu geuꞈ-euˬ deuˬ meh.

⁸ Leˬbiˇ tsawˇ haˬ deuˬ laꞈ kʼoeˇ, Yeˬshah, Biˇnuiˇ, Kaˬdaˬmeˬlaˇ, Sheˬleˬbiˇ, Yuˇdaˆ hawˇ-eu Maˬtaˬniˇ meh. Aˬ yawꞈ maꞈ-aˬ, ja ceuˬ-eu caˇ dawˬ caˇ-eu paw aˬ yuiꞈ geuꞈ-eu deuˬ pyeuꞈ-eu meh.

⁹ Baˬkaˬbuˇkiˇ, Uˇnoˬ hawˇ-eu aˬ yawꞈ ha tsawˇ jeuˬ Leˬbiˇ tsawˇ haˬ deuˬ-aˬ, kʼoeˇ deuˬ nehˬ-ehˇ kʼoeˇ paˆ ma paˆ-ehˇ yawꞈ-awˇ caˇ dawˬ caˇ-euˬ meh.

Piˇ ma yaw huiˬ gʼaˬ pyeuꞈ-eu Yawˇshuˆ-euˬ zaˬ deuˬ uˆ deuˬ

¹⁰ Piˇ ma yaw huiˬ gʼaˬ pyeuꞈ-eu Yawˇshuˆ-ahˇ neh gui ka leꞈ-euˬ tsuiꞈ-aˬ, Yawˇshuˆ, Yawˇyaˬkmˬ, Eˇlaˬshiˆ, Yawˇyaˬdaˇ,

¹¹ Yawˇnaˆshaˬ, Yaˬduˇ lehˇ meh.

Piˇ ma aˇ jeuˬ aˇ ca deuˬ kʼoeˇ taˆ aˬ yuiꞈ geuꞈ-euˬ deuˬ

¹² Yawˇyaˬkmˬ gʼaˬ Piˇ ma yaw huiˬ gʼaˬ geuꞈ-eu yamˬ-ahˇ, piˇ ma aˇ jeuˬ aˇ ca deuˬ kʼoeˇ taˆ aˬ yuiꞈ aˬ tsu geuꞈ-euˬ deuˬ-aˬ heu loꞈ-ehˇ meh. Seˬlehˇyaˬ aˇ jeuˬ-euˬ aˬ yuiꞈ-aˬ Meˬlaˇyaˬ meh. Yeˬlaˬmiˇ aˇ jeuˬ-euˬ aˬ yuiꞈ-aˬ Haˬnaˬniˇyaˆ meh.

¹³ Eˇzaˬlaˬ aˇ jeuˬ-euˬ aˬ yuiꞈ-aˬ Meˬshuˇlamˬ meh. Aˬmaˬliˇ aˇ jeuˬ-euˬ aˬ yuiꞈ-aˬ Yeˬhawˇhaˬnaˬ meh.

¹⁴ Maˬluˇciˇ aˇ jeuˬ-euˬ aˬ yuiꞈ-aˬ Yawˇnaˆshaˬ meh. Sheˬbaˬniˇ aˇ jeuˬ-euˬ aˬ yuiꞈ-aˬ Yoˇsehˆ meh.

¹⁵ Haˬlmˬ aˇ jeuˬ-euˬ aˬ yuiꞈ-aˬ Aˬdaˬnaˬ meh. Meˬyaˬyoˇ aˇ jeuˬ-euˬ aˬ yuiꞈ-aˬ Heˬlaˬgehˇ meh.

¹⁶ Iˇdoˬ aˇ jeuˬ-euˬ aˬ yuiꞈ-aˬ Zaˬkaˬliˇ meh. Giˇneˬdoˬ aˇ jeuˬ-euˬ aˬ yuiꞈ-aˬ Meˬshuˇlamˬ meh.

¹⁷ Aˬbiˇyaˬ aˇ jeuˬ-euˬ aˬ yuiꞈ-aˬ Ziˇkaˬliˇmeh. Miˇnaˬmeˬ aˇ jeuˬ hawˇ-eu Mawˇdiˇyaˆ aˇ jeuˬ-euˬ aˬ yuiꞈ-aˬ Piˇlaˬtehˇ meh.

¹⁸ Biˇlaˬgahˬ aˇ jeuˬ-euˬ aˬ yuiꞈ-aˬ Shaˬmeuˬ meh. Sheˬmaˇyaˬ aˇ jeuˬ-euˬ aˬ yuiꞈ-aˬ Yeˬhawˇnaˬdaˬ meh.

¹⁹ Yawˇyaˬliˆ aˇ jeuˬ-euˬ aˬ yuiꞈ-aˬ Maˬteˬnehˇ meh. Yeˬdaˬyaˇ aˇ jeuˬ-euˬ aˬ yuiꞈ-aˬ Awˇzeˬ meh.

²⁰ Saˬlai aˇ jeuˬ-euˬ aˬ yuiꞈ-aˬ Kaˬlai meh. Aˬmawˆ aˇ jeuˬ-euˬ aˬ yuiꞈ-aˬ Eˬbaˬ meh.

²¹ Hiˇlaˬkiˇ aˇ jeuˬ-euˬ aˬ yuiꞈ-aˬ Haˬshaˬbiˇ meh. Yeˬdaˬyaˇ aˇ jeuˬ-euˬ aˬ yuiꞈ-aˬ Neˬdaˬneˬlaˇ meh.

Piˇ ma aˇ jeuˬ aˇ ca deuˬ hawˇ-eu Leˬbiˇ aˇ jeuˬ aˇ ca deuˬ-euˬ tsawˇ myahˇ yuˇ-euˬ

²² Piˇ ma yaw huiˬ gʼaˬ geuꞈ-euˬ deuˬ pyeuꞈ-eu Eˇlaˬshiˆ, Yawˇyaˬdaˇ, Yawˇnaˆshaˬ, Yaˬduˇ heu deuˬ-euˬ ziˇ-ahˇ, Leˬbiˇ tsawˇ jeuˬ tsawˇ ca kʼoeˇ taˆ aˬ yuiꞈ aˬ tsu geuꞈ-euˬ deuˬ hawˇ-eu, piˇ ma aˇ jeuˬ aˇ ca kʼoeˇ taˆ aˬ yuiꞈ aˬ tsu geuꞈ-euˬ deuˬ-euˬ tsawˇ myahˇ yuˇ taˬ-euˬ meh. Sahˬpaˬ Daˬliˇ Paˇshaˇ miˇ kʼahˬ-ahˇ uˆ lahˇ-eu aˇ yamˬ laꞈ kʼoeˇ tsawˇ myahˇ jaˇ laˇ yuˇ gʼaˬ-euˬ meh.

²³ Ehˇ kʼawꞈ, Leˬbiˇ tsawˇ jeuˬ tsawˇ ca deuˬ-euˬ kʼoeˇ taˆ aˬ yuiꞈ aˬ tsu geuꞈ-euˬ deuˬ-euˬ tsawˇ myahˇ deuˬ-ahˇ-aˬ, Eˇlaˬshiˆ-euˬ oeˬ paˬ Yawˇnaˆshaˬ-euˬ ziˇ-ahˇ hawˇ-eu Laˬsaˬbaˬ sahˬ boꞈ laꞈ kʼoeˇ dawˆ ahˇ-euˬ meh.

Uˬ duˬ tahˬ nymˇ nymˇ ma-ahˇ mˇ-eu gaˇ biˇ nehˬ-euˬ

²⁴ Haˬshaˬbiˇ, Sheˬleˬbiˇ, Yeˬshah, Biˇnuiˇ hawˇ-eu Kaˬdaˬmeˬlaˇ aˬ ha maꞈ neh mehˬ nehˬ tsoˆ nehˬ-euˬ loꞈ-ehˇ, Leˬbiˇ tsawˇ haˬ deuˬ-ahˇ aˇ muˇ biˇ-euˬ meh. Miˬyehˇ-euˬ tsawˇ haˬ pyeuꞈ-eu sahˬpaˬ Daˬbiˇ neh mehˬ taˬ tsoˆ taˬ yaꞈ-euˬ loꞈ-ehˇ, tiˬ yamˬ laꞈ kʼoeˇ nyiˬ muˇ, tiˬ muˇ tiˬ poˆ caˇ caˇ-ehˇ Miˬyehˇ-ahˇ ja ceuˬ-euˬ meh.

²⁵ Maˬtaˬniˇ, Baˬkaˬbuˇkiˇ, Awˇbaˬdiˇ, Meˬshuˇlamˬ, Taˬlaˬmoˬ hawˇ-eu Aˬkuˇ aˬ ha maꞈ-aˬ, Uˬ duˬ tahˬ nymˇ nymˇ ma-ahˇ uˇ leˇ-eu gʼoˆ kʼehˬ deuˬ dawˬ peh jaˆ-eu myawˬ taˬ-eu aˇ lawˆ deuˬ-ahˇ loꞈ piˇ-eu tsawˇ haˬ deuˬ pyeuꞈ-eu meh.

²⁶ Tsawˇ haˬ heu deuˬ-aˬ, Yeˬhawˇzaˬdaˆ-euˬ aˬ li Yawˇshuˆ-euˬ aˬ li Yawˇyaˬkmˬ-euˬ ziˇ, Yuˇdaˆ miˇ kʼahˬ-ahˇ uˆ lahˇ-euˬ Neˬhaˬmiˇ-euˬ ziˇ hawˇ-eu, zahˇ dawˬ kʼoꞈ dawˬ siˬ nya dui dui-eu zahˇ dzoeˬ miˬ ma pyeuꞈ-eu piˇ ma Eˇzaˬlaˬ-euˬ ziˇ-ahˇ gaˇ mˇ-euˬ tsawˇ haˬ deuˬ pyeuꞈ-eu meh.

Neˬhaˬmiˇ neh meuˬ meuˬ lahˇ Miˬyehˇ-ahˇ a nehˬ-euˬ

²⁷ Yeˬluˇsaˬlehˬ meuˬ lahˇ Miˬyehˇ-ahˇ a nehˬ ngeh, cehˇ lehˇ ciˆ, deuˇ-mˬ diˬ-awˇ ja ceuˬ-eu caˇ dawˬ bi caˇ-eu gʼaˇ duˬ, doe doe-ehˇ jawˇ luꞈ-eu Leˬbiˇ tsawˇ haˬ deuˬ-ahˇ meuˬ lahˇ a nehˬ-eu bawˬ-iˬ jahˇ gaˇ bi laˇ uiˬ-euˬ meh.

²⁸ Yeˬluˇsaˬlehˬ meuˬ-euˬ tahˬ gʼoꞈ tahˬ jawˇ hawˇ-eu Neˬtawˇpaˬ meuˬ deuˬ-ahˇ jawˇ-eu caˇ dawˬ caˇ-eu Leˬbiˇ tsawˇ haˬ deuˬ laˇ uiˬ-awˬ,

²⁹ Behˬgiˇlaˇgaˬlaˇ meuˬ, Geˬbaˬ meuˬ hawˇ-eu Aˬzaˇmaˬbehˇ meuˬ-ahˇ jawˇ-eu caˇ dawˬ caˇ-eu Leˬbiˇ tsawˇ haˬ deuˬ kʼawꞈ, laˇ uiˬ-euˬ meh.

³⁰ Piˇ ma deuˬ hawˇ-eu Leˬbiˇ tsawˇ haˬ deuˬ-aˬ, yawˬ ha gʼaˇ duˬ maˬ ehˇ, miˇ kʼahˬ zaˬ deuˬ gʼaˇ duˬ maˬ ehˇ, meuˬ-euˬ lahˇ kʼehˬ deuˬ hawˇ-eu meuˬ lahˇ gʼaˇ duˬ maˬ ehˇ, shawˇ-eu zahˇ jahˇ-euˬ meh.

³¹ Yuˇdaˆ miˇ kʼahˬ-euˬ aˬ yuiꞈ aˬ tsu deuˬ-ahˇ meuˬ meuˬ lahˇ kʼoeˇ taˆ ngaˇ bi daˆ leˇ-awˇ, meuˬ meuˬ lahˇ jawˬ jawˬ-ehˇ cah-awˇ Miˬyehˇ-ahˇ ja ceuˬ-eu tsawˇ haˬ aˇ maꞈ aˇ muˇ muˇ ma nyiˬ muˇ-ahˇ bi haw bi pyaˆ-euˬ ma. Yaw beh muˇ-aˬ, meuˬ meuˬ lahˇ kʼoeˇ taˆ neh Mawˇ neˇ ceˬ lahˇ kʼehˬ paw cah gʼeh-euˬ meh.

³² Caˇ dawˬ caˇ-eu deuˬ-euˬ naˇ kʼah Hawˇshaˬyaˇ caw teh luꞈ-awˇ, aˬ yawꞈ-euˬ mehˬ nah Yuˇdaˆ miˇ kʼahˬ-euˬ aˬ yuiꞈ aˬ tsu tiˬ paˆ caw teh luꞈ-eu meh.

^33-35 Daˇ heh baw-awˇ aˬ yawꞈ maꞈ-euˬ mehˬ nah caw teh luꞈ-eu piˇ ma deuˬ-aˬ, Aˬzaˬliˇ, Eˇzaˬlaˬ, Meˬshuˇlamˬ, Yuˇdaˆ, Beˬyaˬmiˬ, Sheˬmaˇyaˬ hawˇ-eu Yeˬlaˬmiˇ meh. Kʼoeˇ deuˬ-euˬ naˇ kʼah cah luꞈ-eu gʼaˬ-aˬ, Yawˇnaˆshaˬ-euˬ aˬ li Zaˬkaˬliˇ meh. (Zaˬkaˬliˇ-euˬ tsuiꞈ-aˬ, Aˬsaˆ, Zaˬkuˬlaˇ, Miˇkaˬyaˇ, Maˬtaˬniˇ, Sheˬmaˇyaˬ, Yawˇnaˆshaˬ, Zaˬkaˬliˇ lehˇ meh.)

³⁶ Aˇ hu Miˬyehˇ-euˬ tsawˇ haˬ pyeuꞈ-eu sahˬpaˬ Daˬbiˇ neh zmˬ-euˬ caˇ dawˬ caˇ ngeh diˬ-eu baw-eu keu ka deuˬ baꞈ-awˇ Zaˬkaˬliˇ-euˬ mehˬ nah caw teh luꞈ-eu aˬ yawꞈ-euˬ aˬ yuiꞈ aˬ nyiˇ deuˬ-aˬ, Sheˬmaˇyaˬ, Aˬzaˬyeˬlaˇ, Miˇlaˬlehˇ, Giˇlaˬlehˇ, Mawˇi, Neˬdaˬneˬlaˇ, Yuˇdaˆ, hawˇ-eu Haˬnaˬniˇ meh. Aˇ muˇ kʼoeˇ muˇ-ahˇ zahˇ dzoeˬ miˬ ma Eˇzaˬlaˬ sheuˬ gʼeh-euˬ meh.

³⁷ Lawˇ kʼawꞈ lahˇ kʼehˬ-ahˇ aˬ yawꞈ maꞈ le keuˆ ngeh, Daˬbiˇ-euˬ meuˬ-ahˇ le-eu dawˬ dzm-ahˇ aˬ yawꞈ maꞈ daˆ leˇ-awˇ, Daˬbiˇ-euˬ nymˇ iˇ dzeuˇ-awˇ, meuˬ-euˬ nahˇ ma doˆ kʼehˬ paw jaˆ-eu Iˇ cuꞈ lahˇ kʼehˬ kʼoeˇ tsahˇ-ahˇ, meuˬ meuˬ lahˇ-ahˇ paˇ gʼoꞈ ka le-euˬ meh.

³⁸ Ja ceuˬ-eu caˇ dawˬ caˇ-eu nyiˬ muˇ tiˬ muˇ-aˬ, meuˬ meuˬ lahˇ kʼoeˇ taˆ cah cah-ehˇ aˇ caˇ paw iˇ-euˬ meh. Ngaˇ kʼawꞈ, tsawˇ haˬ tiˬ paˆ sheuˬ-awˇ aˬ yawꞈ maꞈ-euˬ mehˬ nah caw teh gʼeh-euˬ ma. Miˬ dzaˬ tsawˬ bu nymˇ goˇ kʼoeˇ nymˇ-ahˇ nga maꞈ iˇ dzeuˇ-awˇ, Meuˬ lahˇ lahˇ ma-ahˇ iˇ keuˆ-euˬ ma.

³⁹ Kʼoeˇ gaˇ neh naˇ, Eˇpaˬleˬ lahˇ kʼehˬ, Yeˬshaˬnahˬ lahˇ kʼehˬ, Ngaˬ shaˬ lahˇ kʼeh, Haˬnaˬneˬlaˇ nymˇ goˇ, Tiˬ yaˇ gʼaˬ-euˬ nymˇ goˇ hawˇ-eu Yawˇ lahˇ kʼehˬ iˇ dzeuˇ-awˇ, Uˬ duˬ tahˬ nymˇ nymˇ ma -euˬ lahˇ kʼehˬ-ahˇ keuˆ ni iˇ-euˬ ma.

⁴⁰ Kʼoeˇ loꞈ-ehˇ, Miˬyehˇ-ahˇ ja ceuˬ-eu aˇ muˇ kʼoeˇ nyiˬ muˇ luꞈ Uˬ duˬ tahˬ nymˇ nymˇ ma dawˬ peh le keuˆ-euˬ meh. Ngaˬ nehˬ-ehˇ cah-euˬ aˬ yuiꞈ aˬ tsu deuˬ uˬ taꞈ,

⁴¹ daˇ heh baw-awˇ nga maꞈ-euˬ aˇ muˇ nehˬ-ehˇ cah-euˬ piˇ ma deuˬ-aˬ, Eˇliˇkmˬ, Maˬseˬyaˇ, Miˇnaˬmeˬ, Miˇkaˬyaˇ, Eˇlawˇneˬ, Zaˬkaˬliˇ hawˇ-eu Haˬnaˬniˇyaˆ meh.

⁴² Kʼoeˇ naˇ, aˬ yawꞈ maꞈ-euˬ mehˬ nah caw teh-euˬ deuˬ-aˬ, Maˬseˬyaˇ, Sheˬmaˇyaˬ, Eˇlaˬzaˬ, Awˇzeˬ, Yeˬhawˇhaˬnaˬ, Maˬlaˬkiˇyaˬ, Eˇlamˬ hawˇ-eu Eˇzaˬ meh. Yeˬzaˬlaˬhiˇ aˬ yuiꞈ geuꞈ-awˇ caˇ dawˬ caˇ-eu deuˬ-aˬ, yaw kʼaˆ-ehˇ guˇ guˇ-ehˇ caˇ-eu meh.

⁴³ Kʼoeˇ ngeh nah aˬ yawꞈ maꞈ lawˇ-eu shehˇ-eu jeˬ gʼawˬ mya ni mˇ-awˇ, Miˬyehˇ aˬ yawꞈ maꞈ-ahˇ laˬ kʼaˬ cehˇ-eu jeˬ biꞈ-euˬ miˇ neh, aˬ yawꞈ maꞈ laˬ kʼaˬ cehˇ dui dui-eu meh. Zaˬ miˬ zaˬ deuˬ hawˇ-eu zaˬ deuˬ kʼawꞈ bawˬ-iˬ gʼeh gaˇ uiˬ leˇ-awˇ, aˬ yawꞈ maꞈ laˬ kʼaˬ cehˇ cehˇ-ehˇ lawꞈ gʼa-eu teˇ saˇ, gaˇ mahˇ kaˬ gaˇ keuˆ ni gaˬ keuˆ-iˇ-euˬ meh.

Uˬ duˬ tahˬ nymˇ nymˇ ma laꞈ kʼoeˇ uˬ duˬ tahˬ gaˇ damˬ-euˬ

⁴⁴ Aˇ yamˬ kʼoeˇ yamˬ laꞈ kʼoeˇ, tseˇ bymˇ tiˬ bymˇ hawˇ-eu keuˆ beh beh le-euˬ dzaˬ la gʼo cehˇ hawˇ-eu aˇ siˬ aˇ lu deuˬ ahˇ leˇ-ehˇ, Uˬ duˬ tahˬ nymˇ nymˇ ma-ahˇ kʼaˇ damˬ-euˬ yawˬ jeˬ na luꞈ jeˬ hmˬ-eu aˇ lawˆ deuˬ-ahˇ tsawˇ haˬ tseˇ doˆ-awˇ bi haw bi pyaˆ-euˬ meh. Tsawˇ haˬ kʼoeˇ deuˬ-aˬ, meuˬ yawˬ meuˬ na luꞈ dawˬ peh deh ma deh yaˇ kʼaˇ jaˆ gaˇ iˇ-awˇ zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ piˇ ma deuˬ hawˇ-eu Leˬbiˇ tsawˇ haˬ deuˬ-ahˇ kʼaˇ damˬ nehˬ-euˬ jeˬ ya taꞈ uiˬ-eu meh. Yuˇdaˆ miˇ kʼahˬ zaˬ dawˬ tawˆ luꞈ piˇ ma deuˬ hawˇ-eu Leˬbiˇ tsawˇ haˬ deuˬ-ahˇ nui kʼahˇ shiˇ-eu meh.

⁴⁵ Aˬ jeˬ miˇ neh ehˇ naˇ, Miˬyehˇ neh dawˬ biꞈ taˬ-eu loꞈ-ehˇ shawˇ-eu zahˇ hawˇ-eu zahˇ sahˇ kʼoꞈ-ahˇ taꞈ-awˇ ya mˇ-eu gaˇ deuˬ aˬ yawꞈ maꞈ mˇ-euˬ meh. Uˬ duˬ tahˬ nymˇ nymˇ ma-ahˇ caˇ dawˬ caˇ-eu deuˬ hawˇ-eu loꞈ-eu tsawˇ haˬ deuˬ kʼawꞈ, sahˬpaˬ Daˬbiˇ hawˇ-eu aˬ yawꞈ-euˬ aˬ li Sawˇlaˬmoˬ neh dawˬ biꞈ taˬ yaꞈ-euˬ loꞈ-ehˇ, yawˬ ha-ahˇ daˇ-eu gaˇ deuˬ-ahˇ yaw muiˬ paˬ-ehˇ mˇ-euˬ meh.

⁴⁶ Aˇ hu ba sahˬpaˬ Daˬbiˇ hawˇ-eu caˇ dawˬ caˇ-eu gʼaˬ pyeuꞈ-eu Aˬsaˆ-euˬ ziˇ-ahˇ neh, Miˬyehˇ-euˬ guiˬ lahˬ-ahˇ ja ceuˬ-eu caˇ dawˬ caˇ-eu laꞈ kʼoeˇ sheuˬ gʼeh-eu tsawˇ haˬ deuˬ jawˇ luꞈ-eu meh.

⁴⁷ Zeˬluˇbaˬbeˬlaˇ-euˬ ziˇ-ahˇ neh Neˬhaˬmiˇ-euˬ ziˇ-ahˇ keuˆ ni, Uˬ duˬ tahˬ nymˇ nymˇ ma laꞈ kʼoeˇ caˇ dawˬ caˇ-eu deuˬ hawˇ-eu Uˬ duˬ tahˬ nymˇ nymˇ ma -ahˇ loꞈ-eu deuˬ loˬ-eu yawˬ jeˬ na luꞈ-ahˇ, Iˇsaˬleˬlaˆ tsawˇ haˬ deuˬ aˬ yawꞈ nah yawꞈ caw ba nehˬ-euˬ meh. Iˇsaˬleˬlaˆ tsawˇ haˬ deuˬ Leˬbiˇ tsawˇ haˬ deuˬ-ahˇ muiˬ-eu shawˇ-eu damˬ-eu jeˬ biꞈ nehˬ-awˇ, Leˬbiˇ tsawˇ haˬ deuˬ-aˬ, piˇ ma deuˬ oꞈ-eu shaˬ bymˇ paˇ yuˇ doˆ nehˬ-euˬ meh.