Miˇkaˬ 5 - Akha

¹ Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ-euˬ guiˇ maꞈ deuˬ kuˇ uiˬ-awˬ. Aˬ dui maꞈ-ahˇ aˬ cawˬ jawˬ lahˇ taˬ-euˬ meh. Iˇsaˬleˬlaˆ tsawˇ haˬ aˬ yuiꞈ aˬ tsu deuˬ-euˬ baˬ ba-ahˇ aˬ yawꞈ maꞈ daˇ cuiˇ neh juiꞈ-eu lehˇ gʼeh luꞈ meh.

Behˬlehˬhehˬ meuˬ laꞈ kʼoeˇ sahˬ paˬ tiˬ gʼaˬ doˆ laˇ tehꞈ-a lehˇ Miˬyehˇ saˇ jaˇ biꞈ-eu

² Sahˬpaˬ Miˬyehˇ ehˇ-eu, “Eˇpaˬlaˬdaˬ miˇ kʼahˬ-ahˇ jaˆ-eu Behˬlehˬhehˬ meuˬ-oˇ, nawˇ-aˬ Yuˇdaˆ miˇ kʼahˬ laꞈ kʼoeˇ jaˆ-eu nyiˇ dui teˬ dui dui-eu meuˬ tiˬ meuˬ pyeuꞈ-eu meh. Ehˇ kʼawꞈ, nawˬ-euˬ laꞈ kʼoeˇ, Iˇsaˬleˬlaˆ miˇ kʼahˬ-ahˇ uˆ lahˇ-eu sahˬ paˬ tiˬ gʼaˬ ngaˇ bi doˆ laˇ ma. Aˬ yawꞈ-euˬ tsuiꞈ-aˬ, aˇ hu ba-euˬ ziˇ-ahˇ keuˆ ni jaˆ luꞈ-eu meh.”

³ Kʼoeˇ miˇ neh, zaˬ ya ciˬ-eu zaˬ miˬ zaˬ kʼoeˇ gʼaˬ aˬ yawꞈ-euˬ aˬ li maˬ dehꞈ doˆ le kʼoeˇ keuˆ ni, Sahˬpaˬ Miˬyehˇ aˬ yawꞈ-euˬ tsawˇ haˬ deuˬ-ahˇ muiˇ-eu deuˬ-euˬ laꞈ-ahˇ byehˇ dzeh taˬ tehꞈ-a. Kʼoeˇ sahˇ miˇ tsa, aˬ cawˬ miˇ kʼahˬ-ahˇ bi nyehꞈ byoˆ gʼeh-euˬ aˬ yawꞈ-euˬ tsawˇ jeuˬ Iˇsaˬleˬlaˆ tsawˇ haˬ deuˬ yawˬ ha-euˬ tsawˇjeuˬ nehˬ-ehˇ paˇ ya jawˇ taꞈ tehꞈ-a.

⁴ Aˬ yawꞈ oe ngeh, Sahˬpaˬ Miˬyehˇ jawˇ gaˇ neh oe-euˬ gʼaˬ hawˇ-eu Miˬyehˇ pyeuꞈ-eu Sahˬpaˬ Miˬyehˇ-euˬ yaw shehꞈ kʼahˬ sehˇ-ahˇ gʼoe-awˇ, aˬ yawꞈ-euˬ tsawˇ haˬ deuˬ-ahˇ uˆ lahˇ tehꞈ-a. Aˬ yawꞈ-euˬ tsawˇ haˬ deuˬ guˆ kʼaˇ maˬ za ni ya dehꞈ tehꞈ-a. Aˬ jeˬ miˇ neh ehˇ naˇ, miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ aˬ yawꞈ huiˬ-eu mahˇ-eu gaˇ kawˆ siˬ nya tehꞈ-a.

⁵ Aˬ yawꞈ-aˬ, nui saˇ oꞈ-eu jeˬ bi keuˆ le-eu gʼaˬ pyeuꞈ tehꞈ-a. Aˬshuˇliˆ tsawˇ haˬ deuˬ aˬ dui-euˬ miˇ kʼahˬ-ahˇ guiˇ deuˆ le-awˇ, ziꞈ dah ni tsoˆ taˬ-euˬ aˬ dui-euˬ nymˇ-ahˇ uˇ le ngeh, aˬ yawꞈ maꞈ-ahˇ bi deuˆ-eu gʼaˇ duˬ gʼaˬ kʼaˆ dui dui-eu aˬ yuiꞈ aˬ tsu deuˬ-ahˇ aˬ dui maꞈ pyehˬ gʼeh ma.

Ka kʼoꞈ-eu jeˬ hawˇ-eu kʼehˬ-eu kʼaˆ-eu jeˬ

⁶ Guiˇ deuˆ-eu keu ka neh Aˬshuˇliˆ miˇ kʼahˬ-ahˇ aˬ yawꞈ maꞈ deuˆ gʼaˬ-awˇ, Aˬshuˇliˆ tsawˇ haˬ deuˬ aˬ dui-euˬ miˇ kʼahˬ-ahˇ uˇ le ngeh, Aˬshuˇliˆ tsawˇ jeuˬ-euˬ laꞈ-ahˇ neh aˬ dui maꞈ-ahˇ aˬ yawꞈ maꞈ ka kʼoꞈ tehꞈ-a.

⁷ Dzeˇ yaꞈ-euˬ Iˇsaˬleˬlaˆ tsawˇ haˬ deuˬ-aˬ, tsawˇ jeuˬ gʼawˬ mya jeuˬ gʼaˇ duˬ gʼaˬ bi ahˇ laˇ-eu lehˇ Sahˬpaˬ Miˬyehˇ neh pyehˬ gʼeh leꞈ-euˬ ngehˇ hawˇ-eu, aˇ bawˬ bi mehˇ laˇ-eu lehˇ bi yehˇ shehˬ le-euˬ uˬ yehˇ-ahˇ duˇ-eu meh. Tsawˇ haˬ zaˬ-ahˇ aˬ yawꞈ maꞈ maˬ gʼoe ni Miˬyehˇ-ahˇ gʼoe tehꞈ-a.

⁸ Aˬ cawˬ tsawˇ jeuˬ yaw kaˬ-ahˇ jawˇ tehˬ yaꞈ-euˬ deuˬ-aˬ, aˇ bawˇ sahˬ kʼaˆ hawˇ-eu gaˆ dzaˬ duˬ-ahˇ smˇ dzaˬ luꞈ-eu aˇ laˬ jaˬ shiˇ-ahˇ duˇ tehꞈ-a. Yawˇ yawˇ maꞈ laꞈ kʼoeˇ aˬ yawꞈ uˇ-iˇ-awˇ, yawˇ-ahˇ baꞈ dawꞈ gʼeh-awˇ, gʼeu pyaˬ gʼeu shaˇ nehˬ-eu miˇ neh, bi ka kʼoꞈ-eu gʼaˇ duˬ noeˬ tmˬ kʼaˇ maˬ paˇ za ni jahˇ nehˬ-eu meh.

⁹ Iˇsaˬleˬlaˆ-aˬ, aˬ yawꞈ-ahˇ muiˇ-eu deuˬ dawˬ tawˆ luꞈ-ahˇ deuˆ gʼaˬ-awˇ, laˆ luˬ laˆ seˇ nehˬ jiˇ tehꞈ-a.

¹⁰ Sahˬpaˬ Miˬyehˇ ehˇ-eu, “Aˇ yamˬ kʼoeˇ yamˬ keuˆ le ngeh, naw maꞈ-euˬ mahˬ deuˬ-ahˇ ngaˇ tsahˇ byoˆ gʼeh-awˇ, mahˬ laˆ lawˬ deuˬ-ahˇ ngaˇ laˆ cawˆ jiˇ ma.

¹¹ Naw maꞈ-euˬ miˇ kʼahˬ laꞈ kʼoeˇ jaˆ-eu meuˬ deuˬ-ahˇ ngaˇ laˆ cawˆ-awˇ, ziꞈ dah ni tsoˆ taˬ-euˬ taˆ deuˬ-ahˇ ngaˇ laˆ byaˆ ma.

¹² Naw maꞈ zmˬ-eu mah loˬ ja maw tsawˇ gahˇ deuˬ-ahˇ ngaˇ laˆ cawˆ-awˇ, nyiˇ paˬ shaˆ ma deuˬ maˬ jawˇ ni bi shaˬ ma.

¹³ Naw maꞈ-euˬ tahˬ pahˬ aˬ ma mawˇ kawˇ deuˬ hawˇ-eu muiˬ-eu shawˇ-eu kʼaˬ lo kʼawˇ zeuˇ deuˬ-ahˇ ngaˇ laˆ cawˆ ma. Naw maꞈ neh yawˬ haˇ yawˬ ha jahˇ taˬ-euˬ jeˬ-ahˇ naw maꞈ uˬ duˬ maˬ paˇ ya tahˬ ni pyeuꞈ-iˇ tehꞈ-a.

¹⁴ Naw maꞈ-euˬ miˇ kʼahˬ laꞈ kʼoeˇ jaˆ-eu Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ deuˬ-ahˇ ngaˇ ngawˬ coˬ-awˇ, naw maꞈ-euˬ meuˬ deuˬ-ahˇ ngaˇ laˆ cawˆ ma.

¹⁵ Ngaˬ-euˬ dawˬ-ahˇ maˬ naˇ haˬ geuꞈ-eu miˇ kʼahˬ deuˬ-ahˇ ngaˇ nui ma pehˇ dui dui-eu laꞈ kʼoeˇ laꞈ poˆ poˆ nehˬ ma.”