Miˇkaˬ 1 - Akha

¹ Yoˇdaˬ, Aˬkaˆ, Heˬsaˬgiˇ, heu deuˬ Yuˇdaˆ miˇ kʼahˬ-euˬ sahˬ paˬ geuꞈ-euˬ aˇ yamˬ-ahˇ, Mawˇleˇshehˆ meuˬ-ahˇ jawˇ-euˬ Miˇkaˬ jawˇ gaˇ Sahˬpaˬ Miˬyehˇ-euˬ dawˬ keuˆ le-euˬ meh. Saˬmaˬliˆ meuˬ hawˇ-eu Yuˇdaˆ miˇ kʼahˬ-ahˇ taꞈ leˇ-eu gaˇ kawˆ heu deuˬ dawˬ tawˆ luꞈ, Miˇkaˬ-ahˇ Sahˬpaˬ Miˬyehˇ pah mehˬ nehˬ-euˬ meh.

Saˬmaˬliˆ meuˬ hawˇ-eu Yeˬluˇsaˬlehˬ meuˬ gʼaˇ duˬ tsawˇ ngoeˇ ngoeˇ-eu

² Tsawˇ jeuˬ dawˬ tawˆ luꞈ naˇ haˬ sheˇ. Miˇ tsaˬ tsawˇ haˬ zaˬ dawˬ tawˆ luꞈ, naˬ bawˇ ciˬ kʼmˇ-awˇ naˇ haˬ sheˇ. Naw maꞈ yaw doeˇ mˇ-euˬ gaˇ kawˆ, Baoˬ huiˬ-eu Sahˬpaˬ Miˬyehˇ-aˬ, naw maꞈ-ahˇ saˇ kiˇ kamˬ tehꞈ-a. Naˇ haˬ sheˇ. Mˬ taˆ aˬ yawꞈ-euˬ nymˇ laꞈ kʼoeˇ, aˬ yawꞈ dawˬ ngehˬ gaˇ naˇ haˬ sheˇ.

³ Yawꞈ-euˬ shawˇ-eu jawˇ duˬ-ahˇ neh, Sahˬpaˬ Miˬyehˇ oe luꞈ-eu meh. Mˬ-ahˇ neh yawꞈ zaꞈ ka le-awˇ, gawˬ jawˬ deuˬ-ahˇ nawˬ le tehꞈ-a.

⁴ Byaˬ shahˬ miˬ dzaˬ puiˆ-eu loꞈ-ehˇ, gawˬ jawˬ kʼoeˇ deuˬ aˬ yawꞈ uˬ moˆ, ya guiˇ byoˆ-iˇ jiˇ gaˇ keuˆ-awˇ, baˬ gʼa yoeˇ-eu iˇ cuꞈ loꞈ-ehˇ, lawˇ kʼmˬ-ahˇ yoeˇ ka le tehꞈ-a.

⁵ Iˇsaˬleˬlaˆ tsawˇ haˬ deuˬ iˬ baˇ mˇ-awˇ Miˬyehˇ-ahˇ puiˬ-euˬ miˇ neh, gaˇ kawˆ heu deuˬ dawˬ tawˆ luꞈ pyeuꞈ laˇ tehꞈ-a. Aˬ suˇ gʼaˬ baˬ da neh Iˇsaˬ leˬlaˇ miˇ kʼahˬ Miˬyehˇ-ahˇ puiˬ ta. Saˬmaˬliˆ meuˬ baˬ da neh maˬ ngeuˇ-a loˇ. Aˬ suˇ gʼaˬ baˬ da neh Yuˇdaˆ miˇ kʼahˬ tahˬ pahˬ aˬ ma mawˇ kawˇ-ahˇ uˬ duˬ tahˬ ta.

⁶ Yeˬluˇsaˬlehˬ meuˬ baˬ da neh maˬ ngeuˇ-a loˇ. Kʼoeˇ miˇ neh, Sahˬpaˬ Miˬyehˇ ehˇ-eu, “Saˬmaˬliˆ meuˬ-euˬ deh ga-ahˇ nymˇ nymˇ cehˇ baꞈ bymˇ taˬ-euˬ loꞈ-ehˇ ngaˇ laˆ pyeuꞈ-awˇ, aˬ gaꞈ aˇ bawˬ ka-eu jawˇ duˬ bi pyeuꞈ-iˇ ma. Meuˬ gawˬ-euˬ kʼaˬ lo tsaˬ byaˆ deuˬ gʼaˬ lawˬ-ahˇ ngaˇ shehˆ dzeh-awˇ, meuˬ-euˬ dawˬ pehˬ neˇ myawˆ ni bi jaˆ ma.

⁷ Aˇ poeˬ kʼaˆ-eu tahˬ pahˬ aˬ ma mawˇ kawˇ dawˬ tawˆ luꞈ meuˇ-iˇ loeˇ-iˇ jiˇ-awˇ, uˬ duˬ tahˬ nymˇ-ahˇ jawˇ-eu meh maˬ laˇ deuˬ-ahˇ kʼaˇ biꞈ-euˬ yawˬ jeˬ na luꞈ miˬ dzaˬ bi keuˬ dzeh-eu uˬ taꞈ, tahˬ pahˬ aˬ ma mawˇ kawˇ dawˬ tawˆ luꞈ yaw cawˆ-ehˇ baꞈ bymˇ taˬ-awˇ ga tehꞈ-a. Zaˬ bi myaˬ laˇ-eu gʼaˇ duˬ maˬ tsaˬ maˬ dawˇ-eu zahˇ sahˇ kʼoꞈ bawˬ-iˬ jahˇ gaˇ geuꞈ-eu lehˇ, aˬ yawꞈ maꞈ neh poˆ uiˬ taˬ-euˬ mˇ myawˬ kʼoeˇ deuˬ-ahˇ, muiˇ-eu deuˬ neh uˬ duˬ tahˬ gaˇ geuꞈ-eu lehˇ yawˬ gaˇ yawˬ bi baꞈ byoˆ gʼeh tehꞈ-a.”

⁸ Kʼoeˇ naˇ, Miˇkaˬ ehˇ-eu, “Teu baˬ da neh ngaˇ noeˬ shaˬ-awˇ tsawˇ ngoeˇ ngoeˇ ma. Ngaˇ noeˬ shaˬ-eu gaˇ kawˆ bi mawˇ-eu gʼaˇ duˬ sehˬ nawˆ maˬ nawˬ-ehˇ, mehˬ tsoeˬ maˬ ahˇ ni laꞈ di laꞈ cuˬ tehꞈ-ehˇ dm-awˇ ngaˇ cah ma. Bawˇ tsahˬ aˬ kuiˬ loꞈ-ehˇ mahˇ-awˇ, law taw aˇ jiˇ loꞈ-ehˇ guˇ guˇ-ehˇ cah ma.

⁹ Saˬmaˬliˆ meuˬ-euˬ naˇ gawˇ maˬ paˇ laˆ saˆ nya-ehˇ, Yuˇdaˆ miˇ kʼahˬ kʼawꞈ kʼoeˇ loꞈ-ehˇ duˇ ni ya naˇ ya gawˇ-eu keuˆ le taˬ-euˬ meh. Ngaˬ-euˬ tsawˇ haˬ deuˬ jawˇ-eu Yeˬluˇsaˬlehˬ meuˬ-euˬ lahˇ kʼehˬ-ahˇ, luˬ-iˇ seˇ-iˇ-eu jeˬ keuˆ le taˬ-euˬ meh.”

Muiˇ-eu deuˬ Yeˬluˇsaˬlehˬ meuˬ dawˬ peh laˇ keuˆ taˬ-euˬ

¹⁰ Aˬ cawˬ aˬ dui-ahˇ deuˆ gʼaˬ-eu keuˆ laˇ-euˬ gaˇ kawˆ Gaˬdaˇ meuˬ-ahˇ jawˇ-eu aˬ dui-ahˇ muiˇ-eu tsawˇ haˬ deuˬ-ahˇ taˬ bi siˬ. Naw maꞈ ngoeˇ luꞈ-eu aˬ yawꞈ maꞈ-ahˇ taˬ bi mawˇ. Beˬleˬpaˬlahˬ meuˬ-ahˇ jawˇ-eu tsawˇ haˬ deuˬ-oˇ, kʼaˬ lehˇ kʼoeˇ taˆ mahˬ poˆ poˆ poˆ-ehˇ naw maꞈ aˇ naˆ ni noeˬ shaˬ luꞈ-eu gaˇ kawˆ bi siˬ bi mawˇ-awˬ.

¹¹ Shaˬpiˇ meuˬ-ahˇ jawˇ-eu tsawˇ haˬ deuˬ-oˇ, shaꞈ dawˇ dui dui paˬ-ehˇ neˇ myawˆ ni aˬ cawˬ-euˬ miˇ kʼahˬ-ahˇ bi nyehꞈ byoˆ gʼeh-awˬ. Zaˬnaˬ meuˬ-ahˇ jawˇ-eu tsawˇ haˬ deuˬ meuˬ laꞈ nyiˇ maˬ doˆ le peuˬ-a. Beˬdeˬzeˬlaˇ meuˬ-ahˇ jawˇ-eu tsawˇ haˬ deuˬ ngoeˇ-eu teˇ saˇ naw maꞈ ya gaˬ ngeh, kʼoeˇ gaˇ cehˆ zaꞈ duˬ maˬ paˇ jaˆ meh lehˇ naw maꞈ siˬ nya-awˬ.

¹² Luˬ-iˇ seˇ-iˇ-eu jeˬ Sahˬpaˬ Miˬyehˇ neh Yeˬluˇsaˬlehˬ meuˬ-euˬ lahˇ kʼehˬ-ahˇ tehˬ ni bi keuˆ le taˬ-euˬ miˇ neh, Maˬyawˆ meuˬ-ahˇ jawˇ-eu tsawˇ haˬ deuˬ noeˬ shaˬ dui dui-eu laꞈ kʼoeˇ saꞈ gʼawˇ daˆ-awˇ, buˬ-iˇ-eu gaˇ ma dahˇ-eu maˬ siˬ lehˇ noeˬ kʼoeˬ-awˇ gʼaˬ doeˇ doeˇ dui dui luꞈ meh.

¹³ Laˬkiˇshaˆ meuˬ-ahˇ jawˇ-eu tsawˇ haˬ deuˬ-oˇ, mahˬ laˆ lawˬ lehˬ hmˬ-awˬ. Iˇsaˬleˬlaˆ miˇ kʼahˬ iˬ baˇ mˇ-euˬ gaˇ naw maꞈ dzaw geuꞈ-awˇ, Yeˬluˇsaˬlehˬ meuˬ iˬ baˇ mˇ ni naw maꞈ jahˇ-euˬ meh.

¹⁴ Yuˇdaˆ miˇ kʼahˬ-ahˇ jawˇ-eu tsawˇ haˬ deuˬ-oˇ, Mawˇleˇshehˆgaˬdaˇ meuˬ-ahˇ, aˇ saˬ saˬ-eu dawˬ tsaꞈ tsaꞈ nehˬ yaꞈ-awˬ. Aˬkaˬziˇ meuˬ-aˬ Iˇsaˬleˬlaˆ sahˬ paˬ deuˬ-ahˇ caw ba le-eu gaˇ ma maˬ paˇ dahˇ meh.

¹⁵ Maˬleˇshaˬ meuˬ-ahˇ jawˇ-eu tsawˇ haˬ deuˬ-oˇ, naw maꞈ-euˬ meuˬ-ahˇ deuˆ gʼaˬ-eu lehˇ gʼeh-eu muiˇ-eu tsawˇ haˬ-euˬ aˬ laꞈ laꞈ kʼoeˇ, Sahˬpaˬ Miˬyehˇ naw maꞈ-ahˇ a nehˬ tehꞈ-a. Tsawˇ myahˇ doˆ-eu Iˇsaˬleˬlaˆ tsawˇ haˬ aˬ yuiꞈ aˬ tsu deuˬ Aˬduˬlamˬ meuˬ dawˬ peh jaˆ-eu lo kʼahˬ-ahˇ cehˆ yaꞈ tehꞈ-a.

¹⁶ Yuˇdaˆ miˇ kʼahˬ zaˬ deuˬ-oˇ, naw maꞈ gaˬ-eu aˬ buˇ aˬ li deuˬ gʼaˇ duˬ tsawˇ ngoeˇ ngoeˇ-eu laꞈ kʼoeˇ naw maꞈ-euˬ uˬ duˬ tsehˇ kʼahˇ tehˬ cuˬ-awˇ, kʼaˬ dzeˇ jeˬ shiˇ loꞈ-ehˇ uˬ duˬ neˇ leuꞈ ni bi pyeuꞈ-iˇ-awˬ. Aˬ jeˬ miˇ neh ehˇ naˇ, naw maꞈ-euˬ aˬ buˇ aˬ li deuˬ aˬ cawˬ miˇ kʼahˬ-ahˇ bi nyehꞈ byoˆ gʼeh tehꞈ-a.