Maꞈtehˬ 8 - Akha

Coiˬ doi tiˬ gʼaˬ-ahˇ bi shawˇ laˇ-euˬ

¹ Yeˬsuˇ gawˬ jawˬ kʼoeˇ taˆ neh zaꞈ ka le ngeh, aˬ yawꞈ-euˬ mehˬ nah tsawˇ haˬ aˇ maꞈ maꞈ ma caw teh-euˬ meh.

² Kʼoeˇ ngeh, coiˬ doi naˇ-eu tsawˇ haˬ tiˬ gʼaˬ aˬ yawꞈ jawˇ gaˇ laˇ-awˇ, pawˬ tsuiꞈ pawˬ dmˬ dmˬ-awˇ, “Sahˬ paˬ-oˇ, nawˇ mˇ mawꞈ naˇ, ngaˇ muiˬ laˇ shawˇ laˇ ni mˇ nya meh” lehˇ ehˇ-eu meh.

³ Yeˬsuˇ aˬ laꞈ cawˬ ja-awˇ, tsawˇ haˬ kʼoeˇ gʼaˬ-ahˇ toeˬ ciˆ-awˇ, “Ngaˇ mˇ mawꞈ ma. Muiˬ laˇ shawˇ laˇ-awˬ” lehˇ ehˇ ngeh, tsawˇ haˬ kʼoeˇ gʼaˬ-euˬ coiˬ doi naˇ gawˇ tiˬ poˆ tehꞈ-ehˇ taˬ tsehˆ leˇ-euˬ meh.

⁴ Kʼoeˇ naˇ, aˬ yawꞈ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Gaˇ kawˆ heu tsawˇ haˬ tiˬ gʼaˬ-ahˇ-iˬ maˬ ja mehˬ ni yahˇ-awˬ. Ehˇ kʼawꞈ, piˇ ma jawˇ gaˇ iˇ-awˇ, nawˬ-euˬ gʼawˇ mawˇ-ahˇ bi pyehˆ tseˇ duˬ-awˬ. Kʼoeˇ naˇ, nawˬ-euˬ naˇ gawˇ taˬ leˇ-euˬ gaˇ kawˆ aˬ cawˬ bi siˬ duˬ-eu gʼaˇ duˬ, Moˇseˬ-euˬ Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ lawˇ-eu shehˇ-eu jeˬ mˇ-iˇ-awˬ.”

Yaw huiˬ yaw mahˇ-euˬ zaˬ kʼaˆ-ahˇ naˇ gawˇ laˆ taˬ nehˬ-euˬ

⁵ Gaˬbeˬneˬoˬ meuˬ-ahˇ Yeˬsuˇ le-awˇ, meuˬ laꞈ kʼoeˇ uˇ leˇ ngeh, Loˇmaˆ yehˇ tiˬ yaˇ gʼaˬ kʼoeˇ taˆ uˆ lahˇ-eu yaw huiˬ yaw mahˇ tiˬ gʼaˬ aˬ yawꞈ jawˇ gaˇ oe-awˇ,

⁶ “Sahˬ paˬ-oˇ, ngaˬ-euˬ zaˬ kʼaˆ naˇ dui dui-eu miˇ neh, maˬ luˆ maˬ laˆ nya ni iˇ kahˇ laꞈ kʼoeˇ yuꞈ luꞈ meh” lehˇ ehˇ nehˬ-euˬ meh.

⁷ “Ngaˇ oe-awˇ laˆ taˬ nehˬ ma” lehˇ, aˬ yawꞈ-ahˇ Yeˬsuˇ ehˇ kʼoꞈ nehˬ-euˬ meh.

⁸ Ehˇ kʼawꞈ, yehˇ tiˬ yaˇ gʼaˬ kʼoeˇ taˆ uˆ lahˇ-eu yaw huiˬ yaw mahˇ kʼoeˇ gʼaˬ ehˇ-eu, “Sahˬ paˬ-oˇ, nawˇ-aˬ, huiˬ dui mahˇ dui dui-eu miˇ neh, ngaˬ-euˬ nymˇ-ahˇ bi uˇ laˇ-eu maˬ geuˇ nya. Nawˬ neh dawˬ tiˬ dawˬ tehꞈ-ehˇ ngehˬ ahˇ leꞈ-euˬ kʼawꞈ, ngaˬ-euˬ zaˬ kʼaˆ taˬ leˇ tehꞈ-a.

⁹ Aˬ jeˬ miˇ neh ehˇ naˇ, ngaˇ kʼawꞈ, ngaˇ naˆ maˬ tseˇ huiˬ-eu yaw huiˬ yaw mahˇ deuˬ-euˬ laꞈ oˆ gaˇ ya mˇ luꞈ-eu loꞈ-ehˇ, ngaˬ-euˬ laꞈ oˆ gaˇ mˇ-eu yehˇ deuˬ kʼawꞈ jawˇ ma. Ngaˬ neh ‘Iˇ-awˬ’ lehˇ kʼaˇ ehˇ nehˬ-euˬ gʼaˬ ya iˇ-awˇ, ‘Laˇ-awˬ’ lehˇ kʼaˇ ehˇ nehˬ-euˬ gʼaˬ ya laˇ meh. ‘Heu jeˬ mˇ sheˇ’ lehˇ ngaˬ-euˬ zaˬ kʼaˆ-ahˇ ngaˇ kʼehˇ naˇ, ngaˬ neh kʼaˇ kʼehˇ-euˬ jeˬ ya mˇ meh.”

¹⁰ Yaw huiˬ yaw mahˇ kʼoeˇ gʼaˬ kʼoeˇ loꞈ-ehˇ ehˇ gaˇ Yeˬsuˇ ya gaˬ ngeh, zahˬ leˇ-awˇ, aˬ yawꞈ-euˬ mehˬ nah caw teh luꞈ-eu tsawˇ haˬ deuˬ-ahˇ heu loꞈ-ehˇ ehˇ nehˬ-euˬ meh. “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Iˇsaˬleˬlaˆ tsawˇ haˬ deuˬ laꞈ kʼoeˇ kʼawꞈ, heu naˆ naˆ-ehˇ jah-eu tsawˇ haˬ ngaˇ maˬ mawˇ haw-aˬ.

¹¹ Ngaˇ naw maꞈ-ahˇ heu loꞈ-ehˇ ehˇ-eu ma. Nahˇ ma doˆ kʼehˬ ga kʼehˬ paw jawˇ-eu tsawˇ haˬ gʼawˬ mya ni uiˬ laˇ-awˇ, mˬ taˆ Miˇ kʼahˬ laꞈ kʼoeˇ, Aˬbyaˬhaˬ, Iˇtsaˆ, Yaˬkoˆ aˬ ha maꞈ nehˬ-ehˇ hawˬ jawˬ jawˬ taꞈ tehꞈ-a.

¹² Ehˇ kʼawꞈ, miˇ kʼahˬ kʼoeˇ kʼahˬ-ahˇ ya jawˇ leˇ ma lehˇ noeˬ-euˬ tsawˇ haˬ deuˬ-aˬ, zahˇ tsui ni gʼeh-eu gʼoˆ baˬ laꞈ nyiˇ miˇ kʼahˬ-ahˇ bi biˬ ahˇ tehꞈ-a. Kʼoeˇ gaˇ jawˇ-eu tsawˇ haˬ deuˬ ngoeˇ ngoeˇ-ehˇ, shaˬ zahˬ mˇ-eu seuˬ teuꞈ dui dui tehꞈ-a.”

¹³ Kʼoeˇ naˇ, yaw huiˬ yaw mahˇ kʼoeˇ gʼaˬ-ahˇ, “Gʼoꞈ-iˇ-awˬ. Nawˬ neh kʼaˇ jah-euˬ jeˬ keuˆ le luꞈ-uˇ” lehˇ, Yeˬsuˇ ehˇ nehˬ-euˬ meh. Kʼoeˇ ngeh, zaˬ kʼaˆ kʼoeˇ gʼaˬ tiˬ poˆ tehꞈ-ehˇ jawˇ saˇ doˆ laˇ-euˬ meh.

Yeˬsuˇ tsawˇ haˬ gʼawˬ mya gʼaˬ-ahˇ naˇ gawˇ laˆ taˬ nehˬ-euˬ

¹⁴ Beˬtuˆluˆ-euˬ nymˇ-ahˇ Yeˬsuˇ iˇ ngeh, Beˬtuˆluˆ-euˬ aˬ mawˬ zaˬ miˬ zaˬ gʼaˬ pyaˬ-awˇ ga luꞈ gaˇ ya mawˇ-euˬ meh.

¹⁵ Aˬ yawꞈ-euˬ aˬ laꞈ-ahˇ Yeˬsuˇ toeˬ ciˆ ngeh, pyaˬ-eu taˬ leˇ-awˇ, tuˇ laˇ-awˇ, Yeˬsuˇ gʼaˇ duˬ dzaˬ dzaˬ dawˇ dawˇ laˆ dawˆ nehˬ-euˬ meh.

¹⁶ Kʼoeˇ ngeh nah uˬ ciꞈ ciꞈ le ngeh, nehꞈ uˇ-eu tsawˇ haˬ gʼawˬ mya ni Yeˬsuˇ jawˇ gaˇ sheuˬ laꞈ-euˬ meh. Aˬ yawꞈ dawˬ tehꞈ-ehˇ ngehˬ-awˇ, nehꞈ kʼoeˇ deuˬ-ahˇ teh doˆ nehˬ jiˇ-euˬ meh. Naˇ-eu tsawˇ haˬ dawˬ tawˆ luꞈ-ahˇ kʼawꞈ, aˬ yawꞈ laˆ taˬ nehˬ-euˬ meh.

¹⁷ Aˬ yawꞈ kʼoeˇ loꞈ-ehˇ mˇ-euˬ-aˬ,“Aˬ dui jawˇ saˇ maˬ doˆ-eu jeˬ-ahˇ aˬ yawꞈ yuˇ dzeh-awˇ, aˬ dui-euˬ naˇ gawˇ-ahˇ aˬ yawꞈ pi dzeh-euˬ meh” lehˇ, Miˬyehˇ gʼaˇ duˬ ngehˬ dah-eu Iˇsaˬyaˇ neh ehˇ taˬ-euˬ dawˬ kʼoeˇ dawˬ bi byah laˇ-eu gʼaˇ duˬ pyeuꞈ-eu meh.

Yeˬsuˇ-euˬ mehˬ nah caw teh gʼeh mawꞈ-eu deuˬ

¹⁸ Yeˬsuˇ jawˇ-eu tiˬ jawˬ tsawˇ haˬ aˇ maꞈ maꞈ ma uiˬ laˇ taˬ-eu gaˇ Yeˬsuˇ ya mawˇ ngeh, “Lah-euˬ nui baˬ paw tsehˆ-iˇ kaˇ-euˇ” lehˇ, aˬ yawꞈ-euˬ zaˬ lahˇ deuˬ-ahˇ aˬ yawꞈ ehˇ nehˬ-euˬ meh.

¹⁹ Kʼoeˇ ngeh, Zahˇ dawˬ kʼoꞈ dawˬ mehˬ-eu saˬ laˬ tiˬ gʼaˬ aˬ yawꞈ jawˇ gaˇ oe-awˇ, “Saˬ laˬ-oˇ, nawˇ kʼaˇ iˇ gaˇ ngaˇ caw teh le ma” lehˇ ehˇ-eu meh.

²⁰ Tsawˇ haˬ kʼoeˇ gʼaˬ-ahˇ Yeˬsuˇ ehˇ nehˬ-eu, “Byaˬ hiˇ-aˬ bahˬ baw meh. Aˇ jiˇ kʼawꞈ bahˬ baw meh. Ehˇ kʼawꞈ, Tsawˇ haˬ-euˬ Zaˬmaˇ -aˬ, uˬ duˬ baꞈ daˇ-awˇ naˬ kʼaˇ tiˬ gaˇ-iˬ maˬ za-a.”

²¹ Yeˬsuˇ-euˬ zaˬ lahˇ tiˬ gʼaˬ paˇ ehˇ-eu, “Sahˬ paˬ-oˇ, ngaˬ da shiˇ-euˬ jeˬ huˬ bi baꞈ pahˬ-iˇ laꞈ-awˬ.”

²² Yeˬsuˇ ehˇ-eu, “Ngaˬ-euˬ mehˬ nah caw teh laˇ-awˬ. Shiˇ-euˬ tsawˇ haˬ deuˬ-ahˇ shiˇ-euˬ deuˬ neh bi baꞈ pahˬ luꞈ-uˇ.”

Yeˬsuˇ jaˬ lehˇ lehˇ ma-ahˇ bi naˬ leˇ-euˬ

²³ Yeˬsuˇ lawˬ-ahˇ dziˬ leˇ-awˇ iˇ ngeh, aˬ yawꞈ-euˬ zaˬ lahˇ deuˬ kʼawꞈ, aˬ yawꞈ nehˬ-ehˇ lawˬ dziˬ-awˇ iˇ gʼeh-euˬ meh.

²⁴ Kʼoeˇ ngeh, lah kʼoeˇ taˆ jaˬ lehˇ lehˇ ma baw laˇ-awˇ, iˇ luˆ dzeh dui dui-eu miˇ neh, lawˬ ga nuiꞈ-iˇ paˬ-ehˇ pyeuꞈ laˇ-euˬ meh. Ehˇ kʼawꞈ, Yeˬsuˇ yuꞈ kʼaˆ taˬ-euˬ meh.

²⁵ Zaˬ lahˇ deuˬ aˬ yawꞈ-ahˇ laˆ noeˬ-awˇ ehˇ-eu, “Sahˬ paˬ-oˇ, nga maꞈ-ahˇ ka kʼoꞈ nehˬ laꞈ-awˬ. Ga nuiꞈ sehꞈ jiˇ shaw-iˬ miˇ-a.”

²⁶ Yeˬsuˇ ehˇ-eu, “Jah-eu gʼaˬ baˬ dui dui-eu tsawˇ haˬ deuˬ-oˇ, Aˬ jeˬ miˇ neh teu naˆ naˆ-ehˇ guˆ te.” Kʼoeˇ naˇ, aˬ yawꞈ tuˇ-awˇ, jaˬ lehˇ hawˇ-eu lah-ahˇ dehˬ ngeh, ciˬ cuˇ ni pyeuꞈ-iˇ-euˬ meh.

²⁷ Tsawˇ haˬ kʼoeˇ deuˬ zahˬ dui dui leˇ-awˇ, tiˬ gʼaˬ tiˇ gʼaˬ ehˇ-eu, “Tsawˇ haˬ teu gʼaˬ aˬ joˆ-ehˇ gʼeh-eu tsawˇ haˬ nga. Jaˬ lehˇ hawˇ-eu iˇ cuꞈ-ahˇ keuˆ ni aˬ yawꞈ-euˬ dawˬ-ahˇ naˇ haˬ-eu nga.”

Nehꞈ uˇ-eu tsawˇ haˬ-ahˇ laˆ taˬ nehˬ-euˬ

²⁸ Lah kʼoeˇ paw baˬ-ahˇ jaˆ-eu Gaˬliˬlehˇ miˇ kʼahˬ-ahˇ Yeˬsuˇ iˇ keuˆ ngeh, nehꞈ uˇ-eu tsawˇ haˬ nyiˬ gʼaˬ lmˬ bymˇ lo kʼahˬ-ahˇ neh doˇ le-awˇ, Yeˬsuˇ-ahˇ tahˬ puˬ le-euˬ meh. Tsawˇ haˬ kʼoeˇ nyiˬ gʼaˬ kʼaˬ-eu miˇ neh, gaˇ ma kʼoeˇ kahˇ-ahˇ tsawˇ haˬ tiˬ gʼaˬ-iˬ maˬ cah tsehˆ peuˬ-a.

²⁹ Aˬ yawꞈ nyaꞈ Yeˬsuˇ-ahˇ ya mawˇ-eu nehˬ-ehˇ, “Miˬyehˇ-euˬ Zaˬmaˇ-oˇ, nawˇ nga nyaꞈ-ahˇ a jeˬ taꞈ te. Aˇ yamˬ maˬ keuˆ laˇ mi naˆ-ehˇ nga nyaꞈ-ahˇ kʼehˬ nehˬ kʼaˆ nehˬ le-eu lehˇ oe teˬ loˇ” lehˇ, guˇ guˇ-ehˇ ehˇ-eu meh.

³⁰ Aˬ yawꞈ maꞈ jawˇ gaˇ neh yaw kʼaˆ-ehˇ maˬ kaˬ gaˇ, aˬ zaꞈ tiˬ maꞈ gaˆ dzaˬ luꞈ-eu meh.

³¹ “Nawˇ nga maꞈ-ahˇ teh dzeh ma lehˇ ngeuˇ naˇ, aˬ zaꞈ kʼoeˇ maꞈ laꞈ kʼoeˇ bi uˇ-iˇ laꞈ” lehˇ, nehꞈ kʼoeˇ deuˬ Yeˬsuˇ-ahˇ shaˇ-eu meh.

³² “Doˆ-iˇ-awˬ” lehˇ, nehꞈ kʼoeˇ deuˬ-ahˇ Yeˬsuˇ dawˬ biꞈ ngeh, nehꞈ kʼoeˇ deuˬ doˆ-iˇ-awˇ, aˬ zaꞈ kʼoeˇ maꞈ laꞈ kʼoeˇ uˇ-iˇ-euˬ meh. Aˬ zaꞈ kʼoeˇ maꞈ maꞈ lah-ehˇ, baˬ gʼa yaw shaˬ paw coeˬ ka gʼeh-awˇ, lah-ahˇ ga puꞈ sehꞈ jiˇ-euˬ meh.

³³ Aˬ zaꞈ bo luꞈ-eu tsawˇ haˬ deuˬ meuˬ-ahˇ cehˆ coeˬ coeˬ kʼoꞈ gʼeh-awˇ, kʼaˇ pyeuꞈ laˇ-euˬ yawˬ jeˬ naˬ luꞈ hawˇ-eu, nehꞈ uˇ-eu tsawˇ haˬ kʼoeˇ nyiˬ gʼaˬ-ahˇ aˬ joˆ-ehˇ jahˇ nehˬ-euˬ gaˇ kawˆ deuˬ dzawˇ mehˬ nehˬ leˇ-euˬ meh.

³⁴ Kʼoeˇ ngeh meuˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ Yeˬsuˇ jawˇ gaˇ doˆ le-awˇ, Yeˬsuˇ-ahˇ aˬ yawꞈ maꞈ ya mawˇ ngeh, “Nga maꞈ-eu miˇ kʼahˬ laꞈ kʼoeˇ neh doˆ-iˇ nehˬ laꞈ” lehˇ shaˇ-euˬ meh.