Maꞈtehˬ 28 - Akha

Yeˬsuˇ gʼoꞈ dehꞈ laˇ-euˬ

¹ Jawˇ nah dzeuˇ-awˇ, tiˬ jaw laꞈ kʼoeˇ aˇ dahˬ beh-eu nah uˬ bya bya taw paw, Maˬliˇ Maˬgaˬdaˬlaˇ hawˇ-eu Maˬliˇ yawˬ gʼaˬ yawˬ lmˬ bymˇ-ahˇ haw-iˇ-euˬ meh.

² Ja pyuˬ ni miˇ luˆ yaw kʼaˆ-ehˇ luˆ laˇ-awˇ, SahˬpaˬMiˬyehˇ-euˬ mˬ taˆ gʼaˬ kʼehˇ tiˬ gʼaˬ mˬ kʼoeˇ taˆ neh zaꞈ le-awˇ, kʼaˬ lo lo ma kʼoeˇ siˬ ngawˬ dzeh-awˇ, kʼaˬ lo kʼoeˇ siˬ kʼoeˇ taˆ nuiˇ le-euˬ meh.

³ Aˬ yawꞈ-euˬ gʼawˇ mawˇ-aˬ, mˬ myawꞈ myawꞈ-eu loꞈ-ehˇ yaw shehꞈ bya-awˇ, aˬ yawꞈ-euˬ mehˬ tsoeˬ-aˬ, ngehˇ loꞈ-ehˇ pyuˇ deuˬ ni gʼeh-eu meh.

⁴ Lmˬ bymˇ-ahˇ loꞈ-eu deuˬ guˆ dui dui-eu miˇ neh, yaw dzuˬ dzuˬ dui dui-awˇ, shiˇ taˬ-euˬ tsawˇ haˬ loꞈ-ehˇ pyeuꞈ-iˇ-euˬ meh.

⁵ Mˬ taˆ gʼaˬ kʼehˇ kʼoeˇ gʼaˬ zaˬ miˬ zaˬ kʼoeˇ nyiˬ gʼaˬ-ahˇ heu loꞈ-ehˇ ehˇ nehˬ-euˬ meh. “Naw nyaꞈ taˬ guˆ. Laꞈ yaꞈ kʼoeˇ taˆ bi taꞈ sehꞈ-euˬ Yeˬsuˇ kʼoeˇ gʼaˬ-ahˇ naw nyaꞈ poˆ luꞈ-eu ngaˇ siˬ nya ma.

⁶ Aˬ yawꞈ heu gaˇ maˬ paˇ jawˇ meh. Aˬ yawꞈ neh ehˇ taˬ-euˬ loꞈ-ehˇ, Miˬyehˇ neh aˬ yawꞈ-ahˇ paˇ bi gʼoꞈ dehꞈ laˇ gʼaˬ-euˬ meh. Heu gaˇ laˇ-awˇ, aˬ yawꞈ-ahˇ baꞈ taˬ-euˬ tsahˇ-ahˇ haw laˇ sheˇ.

⁷ Nymˬ-mˇ aˬ yawꞈ-euˬ zaˬ lahˇ deuˬ jawˇ gaˇ yaw kawˇ-ehˇ iˇ-awˇ, heu loꞈ-ehˇ ehˇ nehˬ-iˇ-awˬ. ‘Aˬ yawꞈ shiˇ-euˬ gʼoꞈ dehꞈ laˇ-awˇ, nymˬ-mˇ naw maꞈ-euˬ mehˬ hu Gaˬliˬlehˇ miˇ kʼahˬ-ahˇ iˇ dzeuˇ-euˬ meh. Naw maꞈ aˬ yawꞈ-ahˇ kʼoeˇ gaˇ ya mawˇ tehꞈ-a’ lehˇ ehˇ nehˬ-iˇ-awˬ. Ngaˬ neh naw maꞈ-ahˇ ehˇ nehˬ-euˬ dawˬ heu deuˬ yaw duˬ duˬ-ehˇ noeˬ taˬ-awˬ.”

⁸ Kʼoeˇ ngeh, aˬ yawꞈ nyaꞈ guˆ kʼawꞈ guˆ, laˬ kʼaˬ kʼawꞈ cehˇ-eu laꞈ kʼoeˇ, nyi naˬ nyi naˬ-ehˇ maˬ jawˇ ni, aˬ yawꞈ-euˬ zaˬ lahˇ deuˬ-ahˇ dzawˇ nehˬ-iˇ-eu gʼaˇ duˬ cehˆ coeˬ coeˬ kʼoꞈ gʼeh-euˬ meh.

⁹ Ja pyuˬ ni, aˬ yawꞈ nyaꞈ-ahˇ Yeˬsuˇ tahˬ puˬ-awˇ, “Naw nyaꞈ kʼoeˇ taˆ nui saˇ oꞈ-eu jeˬ jaˆ luꞈ-uˇ” lehˇ ehˇ-eu meh. Aˬ yawꞈ nyaꞈ aˬ yawꞈ jawˇ gaˇ jiˆ leˇ-awˇ, aˬ yawꞈ-euˬ aˬ kuiˇ-ahˇ byaˇ cuꞈ-awˇ uˬ duˬ tahˬ-euˬ meh.

¹⁰ Yeˬsuˇ aˬ yawꞈ nyaꞈ-ahˇ ehˇ nehˬ-eu, “Taˬ guˆ. Ngaˬ-euˬ mehˇ nmˇ loꞈ-ehˇ gʼeh-eu deuˬ jawˇ gaˇ iˇ-awˇ, heu loꞈ-ehˇ ehˇ nehˬ-iˇ-awˬ. ‘Gaˬliˬlehˇ miˇ kʼahˬ-ahˇ iˇ-awˬ. Kʼoeˇ gaˇ ngaˬ-ahˇ ya mawˇ tehꞈ-a’ lehˇ ehˇ nehˬ-iˇ-awˬ.”

Lmˬ bymˇ-ahˇ loꞈ-eu maˬ ngeuˇ-eu jeˬ dzawˇ-eu

¹¹ Zaˬ miˬ zaˬ kʼoeˇ nyiˬ gʼaˬ gʼoꞈ-iˇ luꞈ ngeh, lmˬ bymˇ-ahˇ loꞈ luꞈ-eu yehˇ tiˬ deuˬ meuˬ-ahˇ gʼoꞈ-iˇ-awˇ, kʼaˇ pyeuꞈ laˇ-euˬ jeˬ dawˬ tawˆ luꞈ, piˇ ma aˬ yuiꞈ deuˬ-ahˇ dzawˇ nehˬ-euˬ meh.

¹² Piˇ ma aˬ yuiꞈ kʼoeˇ deuˬ aˬ yuiꞈ aˬ tsu deuˬ nehˬ-ehˇ bawˬ kʼoeˬ-awˇ, yehˇ kʼoeˇ deuˬ-ahˇ pyuˇ gʼawˬ mya ni biꞈ-euˬ meh.

¹³ Yehˇ kʼoeˇ deuˬ-ahˇ aˬ yawꞈ maꞈ heu loꞈ-ehˇ mehˬ gahˇ nehˬ-euˬ meh. “Naw maꞈ heu loꞈ-ehˇ ehˇ-awˬ. Uˬ ciꞈ paw naw maꞈ yuꞈ kʼaˆ luꞈ ngeh, aˬ yawꞈ-euˬ zaˬ lahˇ deuˬ oe-awˇ, aˬ yawꞈ-euˬ gʼawˇ mawˇ-ahˇ baꞈ kʼoeˬ le-euˬ meh lehˇ ehˇ-awˬ.

¹⁴ Gaˇ kawˆ heu sahˬ paˬ-ahˇ gaˬ keuˆ leˇ naˇ, naw maꞈ tiˬ jeˬ-iˬ maˬ lehˬ-a lehˇ, nga maꞈ ja piˇ nehˬ ma. Naw maꞈ tiˬ jeˬ-iˬ kʼahˬ maˬ ya lahˇ-aˇ.”

¹⁵ Lmˬ bymˇ-ahˇ loꞈ piˇ-euˬ yehˇ kʼoeˇ deuˬ pyuˇ yuˇ dzaˬ-awˇ, aˬ yawꞈ maꞈ-ahˇ mehˬ gahˇ nehˬ taˬ-euˬ loꞈ-ehˇ ja byah-euˬ meh. Kʼoeˇ miˇ neh, iˬ nah keuˆ ni Yuˇdaˆ tsawˇ haˬ deuˬ gaˇ kawˆ kʼoeˇ ja byah luꞈ-eu meh.

Yeˬsuˇ dawˬ biꞈ yaꞈ-euˬ

¹⁶ Zaˬ lahˇ tseˇ tiꞈ gʼaˬ-aˬ, Yeˬsuˇ neh aˬ yawꞈ maꞈ-ahˇ tsaꞈ dzoeˇ taˬ-euˬ Gaˬliˬlehˇ miˇ kʼahˬ-ahˇ jaˆ-eu gawˬ duˇ tiˬ duˇ-ahˇ le-euˬ meh.

¹⁷ Aˬ yawꞈ maꞈ aˬ yawꞈ-ahˇ mawˇ ngeh, uˬ duˬ tahˬ-euˬ meh. Ehˇ kʼawꞈ, tiˬ paˆ na deuˬ yaw muiˬ-ehˇ maˬ jah-a.

¹⁸ Yeˬsuˇ aˬ yawꞈ maꞈ-euˬ dawˬ peh jiˆ le-awˇ, heu loꞈ-ehˇ ehˇ nehˬ-euˬ meh. “Mˬ hawˇ-eu miˇ tsaˬ kʼoeˇ taˆ kʼaˇ jaˆ-eu baoˬ dawˬ tawˆ luꞈ, ngaˬ-ahˇ biꞈ jiˇ laꞈ-euˬ meh.

¹⁹ Kʼoeˇ miˇ neh, miˇ tsaˬ tsawˇ jeuˬ dawˬ tawˆ luꞈ jawˇ gaˇ iˇ doe-awˇ, ngaˬ-euˬ zaˬ lahˇ pyeuꞈ laˇ ni mˇ-iˇ-awˬ. Aˬda Miˬyehˇ, Zaˬmaˇ Miˬyehˇ hawˇ-eu, Muiˬ-eu Shawˇ-eu Yaw sahˇ Miˬyehˇ-euˬ tsawˇ myahˇ uˬ moˆ, aˬ yawꞈ maꞈ-ahˇ iˇ cuꞈ shawˇ nehˬ-awˬ.

²⁰ Ngaˬ neh naw maꞈ-ahˇ dawˬ kʼaˇ biꞈ taˬ-euˬ yawˬ jeˬ na luꞈ, aˬ yawꞈ maꞈ naˇ haˬ-awˇ caw teh ni mehˬ nehˬ tsoˆ nehˬ-awˬ. Miˇ tsaˬ heu aˇ saˬ saˬ ngeh keuˆ ni, naw maꞈ nehˬ-ehˇ aˬ myah luꞈ ngaˇ jawˇ ma.”