Maꞈtehˬ 23 - Akha

Zahˇ dawˬ kʼoꞈ dawˬ mehˬ-eu deuˬ hawˇ-eu Paˬliˬsehˇ deuˬ-ahˇ Yeˬsuˇ dehˬ-eu

¹ Kʼoeˇ naˇ, tsawˇ haˬ aˇ maꞈ maꞈ ma hawˇ-eu aꞈ yawꞈ-euˬ zaˬ lahˇ deuˬ-ahˇ Yeˬsuˇ heu loꞈ-ehˇ ehˇ nehˬ-euˬ meh.

² “Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˇsehˇ deuˬ-aˬ, Moˇseˬ-euˬ Zahˇ dawˬ kʼoꞈ dawˬ-ahˇ dawˬ tsuiꞈ yuˇ doˆ-eu aˬ kawˬ-aˬ za taˬ-euˬ tsawˇ haˬ deuˬ meh.

³ Kʼoeˇ miˇ neh, aˬ yawꞈ maꞈ kʼaˇ ehˇ-eu yawˬ jeˬ na luꞈ-ahˇ, naw maꞈ naˇ haˬ-awˇ ya caw teh meh. Ehˇ kʼawꞈ, aˬ yawꞈ maꞈ mˇ gaˇ shaˇ gaˇ naw maꞈ taˬ dzaw geuꞈ. Aˬ jeˬ miˇ neh ehˇ naˇ, aˬ yawꞈ maꞈ mehˬ-eu tsoˆ-eu loꞈ-ehˇ, aˬ yawꞈ maꞈ maˬ mˇ maˬ shaˇ-a.

⁴ Maˬ pi coeˇ-eu kʼaˆ behˆ, aˬ cawˬ-ahˇ aˬ yawꞈ maꞈ ciˬ pi-awˇ, aˬ yawꞈ maꞈ-aˬ, laꞈ noeˇ tiˬ noeˇ neh tehꞈ-ehˇ kʼawꞈ, caw dehˬ caw toˆ nehˬ mawꞈ-eu nui ma maˬ ahˇ-a.

⁵ Aˬ yawꞈ maꞈ kʼaˇ mˇ kʼaˇ shaˇ-eu yawˬ jeˬ na luꞈ, aˬ cawˬ haw mawˇ ni mˇ-eu meh. Aˬ yawꞈ maꞈ-euˬ naˇ kʼawˇ hawˇ-eu laꞈ du-ahˇ paꞈ tawꞈ taˬ-euˬ, Jaˇliꞈ aˇ deuˆ boꞈ myahˬ taˬ-euˬ shaˬ kʼoˆ pawˬ behˆ kʼoeˇ deuˬ aˇ naˆ ni guꞈ huiˬ taˬ-euˬ nga lehˇ haw sheˇ. Aˬ yawꞈ maꞈ-euˬ pehˇ kʼahˬ pehˇ dahˬ-ahˇ tsoꞈ-eu dawˬ sheuˇ aˇ mah ni ahˇ nga lehˇ haw sheˇ.

⁶ Bawˬ-iˬ gʼeh ngeh, aˬ cawˬ taˬ huiˬ-eu nuiˇ duˬ-ahˇ aˬ yawꞈ maꞈ nuiˇ mawꞈ-awˇ, uˬ duˬ tahˬ nymˇ laꞈ kʼoeˇ aˬ cawˬ taˬ huiˬ-eu nuiˇ mahˬ-ahˇ nuiˇ mawꞈ-eu meh.

⁷ Lehˆ lehˆ kawˆ doe ni cah ngeh, aˬ cawˬ yaw zeu baw-eu laꞈ kʼoeˇ dawˬ ngehˬ cawˬ nehˬ gaˇ geuꞈ mawꞈ-awˇ, ‘saˬ laˬ’ lehˇ bi kuˇ mawꞈ-eu meh.

⁸ Naw maꞈ-ahˇ ‘saˬ laˬ’ lehˇ taˬ bi kuˇ. Aˬ jeˬ miˇ neh ehˇ naˇ, naw maꞈ dawˬ tawˆ luꞈ mehˇ nmˇ loꞈ-ehˇ gʼeh-awˇ, sa laˬ tiˬ gʼaˬ jawˇ-eu tehꞈ meh.

⁹ Miˇ tsaˬ kʼoeˇ taˆ jawˇ-eu tsawˇ haˬ tiˬ gʼaˬ-ahˇ-iˬ, ‘Aˬ da’ lehˇ maˬ ya kuˇ-a. Aˬ jeˬ miˇ neh ehˇ naˇ, naw maꞈ-euˬ Aˬ da tiˬ gʼaˬ jawˇ-eu tehꞈ meh. Aˬ yawꞈ-aˬ, mˬ kʼoeˇ taˆ jawˇ-eu Aˬ da meh.

¹⁰ Naw maꞈ-ahˇ ‘Aˬ yuiꞈ aˬ tsu’ lehˇ maˬ ya bi kuˇ-a. Aˬ jeˬ miˇ neh ehˇ naˇ, naw maꞈ-euˬ aˬ yuiꞈ aˬ tsu tiˬ gʼaˬ jawˇ-eu tehꞈ meh. Aˬ yawꞈ-aˬ, Ka li meh.

¹¹ Naw maꞈ laꞈ kʼoeˇ aˬ cawˬ naˆ maˬ tseˇ huiˬ dzehˬ-eu gʼaˬ-aˬ, aˬ cawˬ-euˬ zaˬ kʼaˆ ya geuꞈ tehꞈ-a.

¹² Yawˬ haˇ yawˬ ha taˬ huiˬ-eu tsawˇ haˬ-aˬ, taˬ nyiˇ nehˬ gaˇ ya daˬ-awˇ, yaw haˇ yawˬ ha taˬ nyiˇ-eu tsawˇ haˬ-aˬ, taˬ huiˬ nehˬ-eu jeˬ-ahˇ za tehꞈ-a.

Aˬ yawꞈ maꞈ ya noeˬ shaˬ tehꞈ-a

¹³ “Awꞈ-aꞈ tahˬ kʼoˬ-ahˇ duˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ-oˇ, naw maꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, tsawˇ haˬ zaˬ-euˬ mehˬ shi, Mˬtaˆ Miˇkʼahˬ-ahˇ uˇ leˇ-eu laˇ gʼoˆ-ahˇ naw maꞈ gʼoˆ sehˬ sehˬ taˬ-awˇ, yawˬ ha maˬ uˇ leˇ-eu uˬ taꞈ, uˇ leˇ-eu lehˇ leh jeh-eu tsawˇ haˬ deuˬ-ahˇ kʼawꞈ, naw maꞈ maˬ bi uˇ leˇ-a.

¹⁵ Awꞈ-aꞈ tahˬ kʼoˬ-ahˇ duˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ-oˇ, naw maꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, naw maꞈ-euˬ uˬ duˬ tahˬ-eu zahˇ sahˇ kʼoꞈ laꞈ kʼoeˇ tsawˇ haˬ yaw shuiꞈ tiˬ gʼaˬ bi uˇ laˇ-eu gʼaˇ duˬ, miˇ kʼahˬ poˆ laˆ cah paˇ-awˇ, laˆ shaˆ nui baˬ iˇ tsehˆ iˇ tsehˆ-ehˇ naw maꞈ leh jeh-eu meh. Ehˇ kʼawꞈ, tsawˇ haˬ kʼoeˇ gʼaˬ-ahˇ naw maꞈ mehˬ paˇ nehˬ gʼaˬ ngeh jawˇ, naw maꞈ loꞈ-ehˇ shiˬ buiˇ lah ma-ahˇ uˇ leˇ-eu paw, gʼaˬ nyiˬ bymˇ paˇ kʼaˆ dzehˬ laˇ ni jahˇ nehˬ gaˇ duˇ-eu meh.

¹⁶ Aˬ cawˬ-ahˇ gaˇ ma mehˬ-eu myaˆ behꞈ deuˬ-oˇ, naw maꞈ ya noeˬ shaˬ dui dui tehꞈ-a. ‘Tsawˇ haˬ tiˬ gʼaˬ na, Uˬ duˬ tahˬ nymˇ nymˇ ma-ahˇ gʼoe-awˇ kamˬ naˇ, aˬ yawꞈ neh kamˬ-euˬ loꞈ-ehˇ maˬ mˇ kʼawꞈ, tiˬ jeˬ-iˬ maˬ ngeuˇ-a. Ehˇ kʼawꞈ, Uˬ duˬ tahˬ nymˇ nymˇ ma laꞈ kʼoeˇ jaˆ-eu shuiˇ-ahˇ gʼoe-awˇ kamˬ naˇ, aˬ yawꞈ neh kʼaˇ kamˬ taˬ-euˬ loꞈ-ehˇ maˬ mˇ-ehˇ maˬ gʼeh nya-a’ lehˇ naw maꞈ mehˬ-eu meh.

¹⁷ Myaˆ behꞈ behꞈ-eu aˬ dzawˬ aˇ gah deuˬ-oˇ, aˬ geu jeˬ huiˬ dzehˬ ta. Shuiˇ huiˬ dzehˬ ta loˇ. Shuiˇ-ahˇ Miˬyehˇ gʼaˇ duˬ bi muiˬ bi shawˇ laˇ-euˬ Uˬ duˬ tahˬ nymˇ nymˇ ma huiˬ dzehˬ ta loˇ.

¹⁸ ‘Tsawˇ haˬ tiˬ gʼaˬ na, lawˇ duˬ-ahˇ gʼoe-awˇ kamˬ naˇ, aˬ yawꞈ neh kamˬ taˬ-euˬ loꞈ-ehˇ maˬ mˇ kʼawꞈ tiˬ jeˬ-iˬ maˬ ngeuˇ-a. Ehˇ kʼawꞈ, lawˇ duˬ kʼoeˇ taˆ lawˇ-euˬ jeˬ-ahˇ gʼoe-awˇ kamˬ naˇ, aˬ yawꞈ neh kamˬ taˬ-euˬ loꞈ-ehˇ maˬ mˇ-ehˇ maˬ gʼeh nya-a’ lehˇ, naw maꞈ paˇ mehˬ-eu meh.

¹⁹ Naw maꞈ aˇ naˆ naˆ-ehˇ myaˆ behꞈ behꞈ te. Aˬ geu jeˬ huiˬ dzehˬ ta. Lawˇ-euˬ jeˬ huiˬ dzehˬ ta loˇ. Lawˇ-euˬ jeˬ-ahˇ Miˬyehˇ gʼaˇ duˬ bi muiˬ bi shawˇ laˇ-eu lawˇ duˬ kʼoeˇ hmˬ huiˬ dzehˬ ta loˇ.

²⁰ Kʼoeˇ miˇ neh, tsawˇ haˬ tiˬ gʼaˬ lawˇ duˬ-ahˇ gʼoe-awˇ kamˬ naˇ, lawˇ duˬ hawˇ-eu lawˇ duˬ kʼoeˇ taˆ kʼaˇ lawˇ taˬ-euˬ jeˬ dawˬ tawˆ luꞈ-ahˇ gʼoe-awˇ kamˬ-eu meh.

²¹ Uˬ duˬ tahˬ nymˇ nymˇ ma-ahˇ gʼoe-awˇ kamˬ naˇ, Uˬ duˬ tahˬ nymˇ nymˇ ma hawˇ-eu kʼoeˇ-euˬ laꞈ kʼoeˇ jawˇ-eu Miˬyehˇ-ahˇ gʼoe-awˇ kamˬ-eu meh.

²² Tsawˇ haˬ tiˬ gʼaˬ na mˬ-ahˇ gʼoe-awˇ kamˬ naˇ, Miˬyehˇ-euˬ nuiˇ mahˬ hawˇ-eu, nuiˇ mahˬ kʼoeˇ-euˬ kʼoeˇ taˆ nuiˇ-eu gʼaˬ-ahˇ gʼoe-awˇ kamˬ-eu jeˬ pyeuꞈ-eu meh.

²³ “Awꞈ-aꞈ tahˬ kʼoˬ-ahˇ duˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ-oˇ, naw maꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, naw maꞈ-aˬ, deh ma yaˇ sawˇ, jaˬ gu lu myahˬ, yaˇ sawˇ, heu deuˬ-ahˇ keuˆ ni Miˬyehˇ-ahˇ tseˇ bymˇ tiˬ bymˇ damˬ-eu meh. Ehˇ kʼawꞈ, Zahˇ dawˬ kʼoꞈ dawˬ laꞈ kʼoeˇ mehˬ taˬ-euˬ huiˬ dui dui-eu dawˬ deuˬ pyeuꞈ-eu, yaw tsaˬ yaw dawˇ jeˬ, gʼawˬ shaˬ gaˬ-eu jeˬ, yaw sui yaw dawˇ jeˬ, heu deuˬ-ahˇ naw maꞈ maˬ caw teh-a. Zahˇ dawˬ kʼoꞈ dawˬ kʼoeˇ deuˬ-ahˇ naw maꞈ naˇ haˬ geuꞈ-eu uˬ taꞈ, nui deuˬ-ahˇ kʼawꞈ maˬ ngehˇ ni caw teh paˬ-ehˇ gʼeh-eu meh.

²⁴ Gaˇ ma mehˬ-eu myaˆ behꞈ deuˬ-oˇ, naw maꞈ aˬ gaꞈ dzaˇ uiˇ dawˇ ngeh, puˬ teˇ muˆ tiˬ mawˇ-iˬ maˬ bi ahˇ ni dzeˇ dzeh-awˇ dawˇ kʼawꞈ, law taw mawˇ lah-ehˇ myoꞈ ahˇ gaˇ duˇ-eu meh.

²⁵ Awꞈ-aꞈ tahˬ kʼoˬ-ahˇ duˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ-oˇ, naw maꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, naw maꞈ-euˬ kʼmˬ maˬ hawˇ-eu hawˬ gʼawˆ deuˬ, laꞈ nyiˇ paw yaw muiˬ paˬ-ehˇ joˆ shawˇ taˬ-euˬ kʼawꞈ, laꞈ kʼoeˇ paw-aˬ, nawˬ dzaˬ kʼaˆ dzaˬ-eu jeˬ hawˇ-eu, nui kʼahˇ huiˬ-eu laꞈ kʼoeˇ laˆ za taˬ-euˬ jeˬ tiˬ byah ni ahˇ-eu meh.

²⁶ Myaˆ behꞈ-ahˇ duˇ-eu Paˬliˬsehˇ deuˬ-oˇ, kʼmˬ maˬ-euˬ laꞈ kʼoeˇ paw lehꞈ-eu jeˬ-ahˇ jeˬ huˬ joˆ shawˇ-awˬ. Kʼoeˇ sawˇ miˇ tsa laꞈ nyiˇ paw kʼawꞈ shawˇ laˇ tehꞈ-a.

²⁷ Awꞈ-aꞈ tahˬ kʼoˬ-ahˇ duˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ-oˇ, naw maꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, naw maꞈ-aˬ, laꞈ nyiˇ paw haw muiˬ-awˇ, laꞈ kʼoeˇ paw shaˬ yoeˬ hawˇ-eu yaw buꞈ tehꞈ-ehˇ ahˇ-eu lu boe lehꞈ pyuˇ taˬ-euˬ lmˬ bymˇ-ahˇ duˇ-eu meh.

²⁸ Kʼoeˇ loꞈ-ehˇ duˇ ni, aˬ cawˬ mehˬ shi naw maꞈ laꞈ nyiˇ paw yaw tsaˬ yaw dawˇ tsawˇ haˬ pyeuꞈ kʼawꞈ, laꞈ kʼoeˇ paw jaˬ myawꞈ mehˇ shuiˇ hawˇ-eu iˬ baˇ tiˬ byah ni ahˇ-eu meh.

Aˬ yawꞈ maꞈ kʼehˬ-eu kʼaˆ-eu jeˬ-ahˇ ya daˬ tehꞈ-a

²⁹ “Awꞈ-aꞈ tahˬ kʼoˬ-ahˇ duˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ-oˇ, naw maꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, Miˬyehˇ gʼaˇ duˬ ngehˬ dah-eu deuˬ baꞈ pahˬ taˬ-euˬ lmˬ bymˇ-ahˇ naw maꞈ gawˬ muiˬ-awˇ, yaw tsaˬ yaw dawˇ dawˇ-ehˇ dehꞈ yaꞈ-euˬ tsawˇ haˬ deuˬ-euˬ lmˬ bymˇ-ahˇ, haw muiˬ ni naw maꞈ laꞈ saˆ-eu meh.

³⁰ Naw maꞈ-euˬ aˬ poeˬ aˬ bawˇ deuˬ dehꞈ-euˬ ziˇ-ahˇ naw maꞈ ya dehꞈ-euˬ law nmˇ-aˬ, aˬ yawꞈ maꞈ loꞈ-ehˇ maˬ dehꞈ ni, Miˬyehˇ gʼaˇ duˬ ngehˬ dah-eu tsawˇ haˬ deuˬ-ahˇ maˬ sehꞈ lehˇ naw maꞈ ehˇ-eu meh.

³¹ Kʼoeˇ miˇ neh, naw maꞈ-aˬ, Miˬyehˇ gʼaˇ duˬ ngehˬ dah-eu deuˬ-ahˇ sehꞈ-euˬ tsawˇ haˬ deuˬ-euˬ zaˬ deuˬ uˆ deuˬ ma lehˇ, yawˬ haˇ yawˬ ha saˇ kiˇ kamˬ gaˇ duˇ-eu meh.

³² Toˆ-ehˇ ngeuˇ naˇ, naw maꞈ-euˬ aˬ poeˬ aˬ bawˇ deuˬ neh mˇ bahˬ yaꞈ-euˬ jeˬ-ahˇ, naw maꞈ mˇ saˬ mˇ li li-awˬ.

³³ Aˇ lawˇ uiˇ naˆ-euˬ zaˬ deuˬ-oˇ, shiˬ buiˇ lah ma-ahˇ maˬ ya uˇ-iˇ ni ya dzeuˇ-iˇ ma lehˇ naw maꞈ noeˬ te loˇ.

³⁴ Miˬyehˇ gʼaˇ duˬ ngehˬ dah-eu deuˬ, zaˬ siˬ tsawˇ gahˇ ahˇ-eu deuˬ hawˇ-eu, saˬ laˬ deuˬ-ahˇ naw maꞈ jawˇ gaˇ bi oe ma lehˇ ngaˇ ehˇ-eu ma. Aˬ yawꞈ maꞈ tiˬ paˆ na deuˬ-ahˇ naw maꞈ sehꞈ tehꞈ-a. Tiˬ paˆ na deuˬ-ahˇ laꞈ yaꞈ kʼoeˇ taˆ taꞈ sehꞈ-awˇ, tiˬ paˆ na deuˬ-ahˇ uˬ duˬ tahˬ nymˇ laꞈ kʼoeˇ yahˬ caˆ neh juiꞈ tehꞈ-a. Meuˬ tiˬ meuˬ saˇ-iˬ tiˬ meuˬ doe ni, aˬ yawꞈ maꞈ-ahˇ naw maꞈ teh tehꞈ-a.

³⁵ Aˇ saˬ saˬ laˇ ngeh jawˇ, maˬ bahˬ maˬ muˆ-eu tsawˇ haˬ deuˬ-ahˇ sehꞈ-euˬ baˬ da neh, naw maꞈ kʼoeˇ taˆ kʼehˬ-eu kʼaˆ-eu jeˬ keuˆ le tehꞈ-a. Iˬ baˇ maˬ ahˇ-eu Aˬbeˬlaˆ-ahˇ sehꞈ-euˬ gaˇ neh aˇ dahˬ beh-awˇ, Uˬ duˬ tahˬ nymˇ nymˇ ma hawˇ-eu lawˇ duˬ yaw kaˬ-ahˇ naw maꞈ neh sehꞈ-euˬ Beˬleˬkiˇ-euˬ aˬ li Zaˬkaˬliˇ-ahˇ keuˆ ni, naw maꞈ neh kʼaˇ sehꞈ-euˬ maˬ bahˬ maˬ muˆ-eu tsawˇ haˬ deuˬ-euˬ shiˬ baˬ da neh, naw maꞈ kʼoeˇ taˆ kʼehˬ-eu kʼaˆ-eu jeˬ keuˆ le tehꞈ-a.

³⁶ Ngaˇ naw maꞈ-ahˇ maˇ jawˆ ni ehˇ nehˬ nyaˇ. Tsawˇ haˬ kʼoeˇ deuˬ-ahˇ sehꞈ-euˬ iˬ baˇ baˬ da neh kʼehˬ-eu kʼaˆ-eu kʼoeˇ, heu ziˇ-ahˇ keuˆ le tehꞈ-a.

Yeluˇsaˬlehˬ meuˬ gʼaˇ duˬ Yeˬsuˇ noeˬ shaˬ-eu

³⁷ “Yeˬluˇsaˬlehˬ-oˇ, Yeˬluˇsaˬlehˬ-oˇ, Miˬyehˇ gʼaˇ duˬ ngehˬ dah-eu tsawˇ haˬ deuˬ-ahˇ nawˇ sehꞈ-awˇ, Miˬyehˇ neh kʼehˇ gʼeh leꞈ-euˬ tsawˇ haˬ deuˬ-ahˇ nawˇ kʼaˬ lo neh biˬ-euˬ meh. Ya ciˆ ya ma-euˬ aˬ dahˇ uˬ moˆ ya ciˆ ya zaˬ deuˬ-ahˇ uˆ kaˬ nehˬ-eu loꞈ-ehˇ, nawˬ-euˬ zaˬ deuˬ-ahˇ ngaˇ aˇ myaˆ poˆ uˆ kaˬ nehˬ mawꞈ-eu nga. Ehˇ kʼawꞈ, nawˇ ngaˬ-ahˇ kʼoeˇ loꞈ-ehˇ maˬ bi uˆ kaˬ nehˬ laꞈ-a.

³⁸ Haw taˬ-awˬ. Nawˬ-euˬ Uˬ duˬ tahˬ nymˇ nymˇ ma-ahˇ Miˬyehˇ byehˇ dzeh nehˬ laꞈ-awˇ, yawꞈ ngehꞈ yawꞈ kuˬ-ehˇ bi jaˆ tehꞈ -a.

³⁹ ‘SahˬpaˬMiˬyehˇ-euˬ tsawˇ myahˇ uˬ moˆ oe-euˬ gʼaˬ guiˬ lahˬ huiˬ luꞈ-uˇ’ lehˇ, naw maꞈ ya ehˇ-eu aˇ yamˬ maˬ keuˆ laˇ kʼoeˇ keuˆ ni, naw maꞈ ngaˬ-ahˇ maˬ paˇ ya mawˇ meh.”