Maꞈtehˬ 17 - Akha

Yeˬsuˇ gʼawˇ mawˇ paˇ-euˬ

¹ Koꞈ nah dzeuˇ-iˇ ngeh, Beˬtuˆluˆ hawˇ-eu, Yaˬkoˆ hawˇ-eu Yoˇhaˬ aˬ nyaꞈ nmˇ-ahˇ Yeˬsuˇ sheuˬ-awˇ, aˬ yawꞈ maꞈ tehꞈ-ehˇ gawˬ jawˬ yaw goˇ-ahˇ daˆ leˇ-euˬ meh.

² A ha smˇ gʼaˬ-euˬ mehˬ shi, Yeˬsuˇ gʼawˇ mawˇ paˇ-euˬ meh. Aˬ yawꞈ-euˬ myaˆ pyawˬ nahˇ ma loꞈ-ehˇ yaw shehꞈ bya-awˇ, aˬ yawꞈ-euˬ mehˬ tsoeˬ pyuˇ deuˬ ni gʼeh-awˇ naˇ guiˇ guiˇ laˇ-eu meh.

³ Kʼoeˇ naˇ, Moˇseˬ hawˇ-eu Eˇliˇyaˆ aˬ nyaꞈ Yeˬsuˇ nehˬ-ehˇ dawˬ ngehˬ cawˬ luꞈ gaˇ, aˬ ha smˇ gʼaˬ ya mawˇ-euˬ meh.

⁴ Kʼoeˇ ngeh, Beˬtuˆluˆ Yeˬsuˇ-ahˇ ehˇ nehˬ-eu, “Saˬlaˬ-oˇ, aˬ dui maꞈ heu gaˇ jawˇ-eu aˇ naˆ ni muiˬ-eu nga. Nawˇ nui maˬ tsaˬ naˇ, ngaˇ sehˬ gʼawˆ smˬ gʼawˆ gʼawˆ ma. Nawˬ-euˬ gʼaˇ duˬ tiˬ gʼawˆ, Moˇseˬ gʼaˇ duˬ tiˬ gʼawˆ, Eˇliˇyaˆ gʼaˇ duˬ tiˬ gʼawˆ gʼawˆ ma.”

⁵ Beˬtuˆluˆ kʼoeˇ loꞈ-ehˇ ehˇ luꞈ ngeh, yaw shehꞈ bya-eu mˬ dmˇ aˬ yawꞈ maꞈ kʼoeˇ taˆ zaꞈ le-awˇ, “Heu-aˬ, ngaˇ gaˬ dui dui-awˇ nui kʼahˇ shiˇ dui dui-eu ngaˬ-euˬ zaˬ maˇ ma. Aˬ yawꞈ-euˬ dawˬ-ahˇ naˇ haˬ geuꞈ-awˬ” lehˇ, mˬ dmˇ laꞈ kʼoeˇ dawˬ ngehˬ doˆ laˇ-euˬ meh.

⁶ Teˇ saˇ kʼoeˇ-ahˇ zaˬ lahˇ deuˬ ya gaˬ ngeh, guˆ dui dui-iˇ-awˇ, miˇ tsa awˆ byaˆ-euˬ meh.

⁷ Yeˬsuˇ aˬ yawꞈ maꞈ-ahˇ toeˬ ciˆ le-awˇ, “Tuˇ-awˬ. Taˬ guˆ” lehˇ ehˇ nehˬ-euˬ meh.

⁸ Aˬ yawꞈ maꞈ gʼawˇ leuˇ haw ngeh, Yeˬsuˇ uˬ taꞈ nui gʼaˬ maˬ paˇ jawˇ-euˬ gaˇ ya mawˇ-euˬ meh.

⁹ Aˬ yawꞈ maꞈ gawˬ jawˬ-ahˇ neh zaꞈ ka le luꞈ ngeh, aˬ ha smˇ gʼaˬ-ahˇ Yeˬsuˇ ehˇ nehˬ-eu, “Tsawˇhaˬ-euˬ Zaˬmaˇ shiˇ-awˇ, Miˬyehˇ neh maˬ bi gʼoꞈ dehꞈ laˇ kʼoeˇ keuˆ ni, naw maꞈ neh yaw sahˇ laꞈ kʼoeˇ ya mawˇ-euˬ gaˇ kawˆ heu, aˬ cawˬ tiˬ gʼahˬ-ahˇ-iˬ taˬ ja nehˬ.”

¹⁰ Kʼoeˇ naˇ, zaˬ lahˇ deuˬ Yeˬsuˇ-ahˇ naˇ haˬ-eu, “Eˇliˇyaˆ jeˬ huˬ oe meh lehˇ, Zahˇ dawˬ kʼoꞈ dawˬ mehˬ-eu saˬ laˬ deuˬ aˬ jeˬ miˇ neh ehˇ ta.”

¹¹ Yeˬsuˇ ehˇ-eu, “Aˬ diˇ aˬ maˇ Eˇliˇyaˆ jeˬ huˬ oe-awˇ, yawˬ jeˬ na luꞈ lehˬ hmˬ laˆ saˆ dah le tehꞈ-a.

¹² Eˇliˇyaˆ aˬ diˇ oe keuˆ gʼaˬ-euˬ meh lehˇ, naw maꞈ-ahˇ ngaˇ ehˇ-eu ma. Ehˇ kʼawꞈ, aˬ cawˬ aˬ yawꞈ-ahˇ maˬ siˬ nya-ehˇ, kʼaˇ jahˇ mawꞈ-eu jahˇ nehˬ-euˬ meh. Kʼoeˇ loꞈ-ehˇ duˇ ni, Tsawˇhaˬ-euˬ Zaˬmaˇ-ahˇ kʼawꞈ, aˬ yawꞈ maꞈ yehˬ bawˬ sehˇ lu-ehˇ jahˇ nehˬ-eu lehˇ gʼeh-eu meh.”

¹³ Kʼoeˇ ngeh, aˬ yawꞈ Iˇ cuꞈ shawˇ-eu Yoˇhaˬ gaˇ kawˆ ehˇ luꞈ-eu meh lehˇ, zaˬ lahˇ deuˬ gʼoˆ shaw-euˬ meh.

Nehꞈ uˇ-eu aˬ li tiˬ li-ahˇ laˆ taˬ nehˬ-euˬ

¹⁴ Aˬ yawꞈ maꞈ tsawˇ haˬ aˇ maꞈ jawˇ gaˇ gʼoꞈ keuˆ le ngeh, tsawˇ haˬ tiˬ gʼaˬ Yeˬsuˇ mehˬ shi pawˬ tsuiꞈ pawˬ dmˬ dmˬ le-awˇ, heu loꞈ-ehˇ ehˇ-eu meh.

¹⁵ “Sahˬ paˬ-oˇ, ngaˬ li-ahˇ gʼawˬ shaˬ tiˬ poˆ gaˬ nehˬ laꞈ-awˬ. Aˬ yawꞈ mawˇ bawˬ coˬ dui dui-eu baˬ da neh, tiˬ kʼehˬ maˬ taˬ ni miˬ dzaˬ hawˇ-eu iˇ cuꞈ-ahˇ coˬ ahˇ-eu meh.

¹⁶ Nawˬ-euˬ zaˬ lahˇ deuˬ jawˇ gaˇ sheu ha laˇ kʼawꞈ, aˬ yawꞈ maꞈ maˬ laˆ taˬ nehˬ nya-a.”

¹⁷ Yeˬsuˇ ehˇ-eu, “Jah-eu nui ma maˬ ahˇ-eu naˬ lehˬ lehˬ-eu ziˇ heu ziˇ-ahˇ dehꞈ luꞈ-eu tsawˇ haˬ deuˬ-oˇ, naw maꞈ nehˬ-ehˇ aˇ myah keuˆ ni ngaˇ pa ya jawˇ ta. Aˇ myah keuˆ ni paˇ ya oˇ ta. Aˬ li kʼoeˇ li-ahˇ heu gaˇ sheuˬ laꞈ-awˬ.”

¹⁸ Nehꞈ kʼoeˇ mawˇ-ahˇ Yeˬsuˇ dehˬ ngeh, aˬ li kʼoeˇ li-euˬ gʼawˇ mawˇ laꞈ kʼoeˇ neh doˆ-iˇ-awˇ, aˬ li kʼoeˇ li tiˬ poˆ tehꞈ-ehˇ taˬ leˇ-euˬ meh.

¹⁹ Kʼoeˇ naˇ, Yeˬsuˇ tehꞈ-ehˇ jawˇ luꞈ gaˇ zaˬ lahˇ deuˬ oe-awˇ ciˬ cuˇ ni naˇ haˬ-eu, “Nga maꞈ aˬ jeˬ miˇ neh nehꞈ maˬ teh doˆ nya ta.”

²⁰ Yeˬsuˇ ehˇ-eu, “Naw maꞈ jah-eu maˬ loꞈ-eu miˇ neh meh. Ngaˇ naw maꞈ-ahˇ maˇ jawˆ ni ehˇ nehˬ nyaˇ. Naw maꞈ jah-eu jeˬ gʼawˬ paꞈ aˇ nuiˆ hui ni ahˇ naˇ, gawˬ jawˬ heu jawˬ-ahˇ kʼoeˇ paw dzeˇ jiˆ-iˇ-awˬ lehˇ ehˇ nehˬ ngeh, jiˆ-iˇ tehꞈ-a. Naw maꞈ maˬ jahˇ nya-eu tiˬ jeˬ-iˬ maˬ baw-aˇ.”

Yeˬsuˇ aˬ yawꞈ ya shiˇ-eu gaˇ kawˆ tiˬ poˆ paˇ ehˇ-eu

²² Zaˬ lahˇ deuˬ Gaˬliˬlehˇ miˇ kʼahˬ-ahˇ uiˬ laˇ-awˇ jawˇ ngeh,Yeˬsuˇ ehˇ-eu, “Tsawˇhaˬ-euˬ Zaˬmaˇ-ahˇ aˬ cawˬ-euˬ aˬ laꞈ laꞈ kʼoeˇ a nehˬ-eu aˇ yamˬ keuˆ laˇ-euˬ meh.

²³ Aˬ cawˬ aˬ yawꞈ-ahˇ sehꞈ tehꞈ-a. Ehˇ kʼawꞈ, smˬ nah keuˆ laˇ naˇ, Miˬ yehˇ aˬ yawꞈ paˇ bi gʼoꞈ dehꞈ laˇ tehꞈ-a.” Kʼoeˇ ngeh, zaˬ lahˇ deuˬ nui ma cawˆ dui dui-eu meh.

Uˬ duˬ tahˬ nymˇ nymˇ ma-euˬ kawˬ doˆ-eu

²⁴ Yeˬsuˇ hawˇ-eu aˬ yawꞈ-euˬ zaˬ lahˇ deuˬ Gaˬbeˬneˬoˬ meuˬ-ahˇ oe keuˆ ngeh, Uˬ duˬ tahˬ nymˇ nymˇ ma-euˬ kawˬ taꞈ-eu tsawˇ haˬ deuˬ Beˬtuˆluˆ jawˇ gaˇ oe-awˇ, “Naw maꞈ-euˬ saˬ laˬ Uˬ duˬ tahˬ nymˇ nymˇ ma-euˬ kawˬ maˬ doˆ-a loˇ” lehˇ naˇ haˬ ngeh,

²⁵ “Doˆ meh” lehˇ, Beˬtuˆluˆ ehˇ kʼoꞈ nehˬ-euˬ meh. Beˬtuˆluˆ iˇ kahˇ laꞈ kʼoeˇ uˇ leˇ ngeh, aˬ yawꞈ-ahˇ Yeˬsuˇ jeˬ huˬ ngehˬ cawˬ-awˇ ehˇ-eu, “Siˇmoˬ-oˇ, nawˇ aˬ joˆ-ehˇ noeˬ-eu nya. Sahˬ paˬ geuꞈ-awˇ miˇ kʼahˬ-ahˇ uˆ lahˇ-eu deuˬ aˬ suˇ gʼaˬ-ahˇ kawˬ taꞈ ta. Yawˬ ha-euˬ miˇ kʼahˬ zaˬ deuˬ-ahˇ taꞈ ta loˇ. Aˬ cawˬ miˇ kʼahˬ-ahˇ neh jawˇ le-euˬ tsawˇ haˬ deuˬ-ahˇ taꞈ ta loˇ.”

²⁶ Beˬtuˆluˆ ehˇ-eu, “Aˬ cawˬ miˇ kʼahˬ-ahˇ neh jawˇ le-euˬ tsaawˇ haˬ deuˬ-ahˇ taꞈ-eu meh.” Yeˬsuˇ ehˇ-eu, “Toˆ-ehˇ maˇ-iˬ, miˇ kʼahˬ zaˬ deuˬ kawˬ doˆ-eu maˬ loˬ-a lehˇ nawˇ ehˇ mawꞈ-eu nga ehˇ lawˬ.

²⁷ Ehˇ kʼawꞈ, tsawˇ haˬ heu deuˬ-ahˇ coeˬ leˇ ni aˇ nyaꞈ maˬ jahˇ mawꞈ nya. Kʼoeˇ miˇ neh, lah-ahˇ iˇ-awˇ ngaˬ juiꞈ juiꞈ-iˇ-awˬ. Juiꞈ paꞈ beh beh-euˬ ngaˬ shaˬ kʼoeˇ mawˇ gʼeu doˆ-awˬ. Aˇ nyaꞈ gʼaˇ duˬ Uˬ duˬ tahˬ nymˇ nymˇ ma-euˬ kawˬ doˆ tsehˆ nya ni poeˬ-eu pyuˇ maˇ byaˆ tiˬ byaˆ, ngaˬ shaˬ kʼoeˇ mawˇ-euˬ kʼaˬ meh-ahˇ tsmˬ gaˇ nawˇ ya mawˇ tehꞈ-a. Maˇ byaˆ kʼoeˇ byaˆ yuˇ-awˇ, aˬ yawꞈ maꞈ-ahˇ kawˬ doˆ nehˬ-awˬ.”