Maˬlaˬkiˇ 1 - Akha

¹ Heu-aˬ, Iˇsaˬleˬlaˆ tsawˇ jeuˬ-ahˇ bi dzawˇ gaˬ-eu gʼaˇ duˬ, Sahˬpaˬ Miˬyehˇ neh Maˬlaˬkiˇ-ahˇ biꞈ-euˬ dawˬ deuˬ meh.

Iˇsaˬleˬlaˆ-ahˇ Sahˬpaˬ Miˬyehˇ gaˬ-eu

² “Naw maꞈ-ahˇ ngaˇ aˬ myah luꞈ gaˬ-euˬ ma” lehˇ, Sahˬpaˬ Miˬyehˇ ehˇ ngeh, “Nawˇ nga maꞈ-ahˇ gaˬ-eu aˬ joˆ-ehˇ bi siˬ laꞈ teˬ” lehˇ, aˬ yawꞈ-euˬ tsawˇ haˬ deuˬ ehˇ-eu meh. Sahˬpaˬ Miˬyehˇ ehˇ-eu, “Iˇsawˇ hawˇ-eu Yaˬkoˆ aˬ nyaꞈ tiˬ mehˇ nmˇ meh. Ehˇ kʼawꞈ, Yaˬkoˆ hawˇ-eu aˬ yawꞈ-euˬ zaˬ deuˬ uˆ deuˬ-ahˇ ngaˇ gaˬ-euˬ ma.

³ Iˇsawˇ hawˇ-eu aˬ yawꞈ-euˬ zaˬ deuˬ uˆ deuˬ-ahˇ ngaˇ bye-euˬ ma. Iˇsawˇ jawˇ-eu gawˬ jawˬ gawˬ duˇ miˇ kʼahˬ deuˬ-ahˇ ngaˇ ngehˬ maˬ gʼeh ni byehˇ byoˆ nehˬ-awˇ, bawˇ tsahˬ jeˬ zaˬ jawˇ duˬ bi pyeuꞈ-iˇ-euˬ ma.”

⁴ Iˇsawˇ-euˬ zaˬ deuˬ uˆ deuˬ pyeuꞈ-eu Eˬdoˬ tsawˇ haˬ deuˬ, “Nga maꞈ-euˬ meuˬ deuˬ cawˆ-iˇ-euˬ meh. Ehˇ kʼawꞈ, nga maꞈ paˇ gawˬ muiˬ geuꞈ ma” lehˇ ehˇ laˇ naˇ, Sahˬpaˬ Miˬyehˇ heu loꞈ-ehˇ ehˇ tehꞈ-a. “Aˬ yawꞈ maꞈ paˇ gawˬ muiˬ kʼawꞈ, ngaˇ tiˬ poˆ paˇ laˆ byaˆ dzeh ma. Aˬ yawꞈ maꞈ-ahˇ aˬ cawˬ haiˬ-eu miˇ kʼahˬ lehˇ kuˇ-awˇ, mˬ maˬ maˬ byaˆ zaˇ ziˇ Sahˬpaˬ Miˬyehˇ nui ma pehˇ-eu miˇ kʼahˬ lehˇ ehˇ tehꞈ-a.”

⁵ Kʼoeˇ loꞈ-ehˇ pyeuꞈ laˇ gaˇ Iˇsaˬleˬlaˆ taawˇ haˬ deuˬ ya mawˇ duˬ-awˇ, “Sahˬpaˬ Miˬyehˇ-aˬ, Iˇsaˬleˬlaˆ miˇ kʼahˬ laꞈ nyiˇ paw kʼawꞈ baoˬ ahˇ law hawˇ nga” lehˇ ehˇ tehꞈ-a.

Piˇ ma deuˬ-ahˇ Sahˬpaˬ Miˬyehˇ iˬ baˇ taˬ-eu

⁶ Piˇ ma deuˬ-ahˇ Sahˬpaˬ Miˬyehˇ heu loꞈ-ehˇ ehˇ-eu meh. “Zaˬ deuˬ aˬ da-ahˇ yaw zeu baw-eu siˬ nya-awˇ, zaˬ kʼaˆ deuˬ baw leˬ-ahˇ yaw zeu baw-eu siˬ nya meh. Ngaˇ naw maꞈ-euˬ aˬ da ma. Aˬ jeˬ miˇ neh ngaˬ-ahˇ yaw zeu maˬ baw te. Naw maꞈ ngaˬ-ahˇ yehˬ bawˬ sehˇ lu-ehˇ gʼeh-eu uˬ taꞈ, ‘Nga maꞈ nawˬ-ahˇ aˬ joˆ-ehˇ jahˇ-awˇ yehˬ bawˬ sehˇ lu-ehˇ gʼeh taˬ-euˬ jaˆ ta’ lehˇ, naw maꞈ paˇ ehˇ-eu meh.

⁷ Lawˇ duˬ kʼoeˇ taˆ maˬ muiˬ maˬ shawˇ-eu jeˬ lawˇ-eu laꞈ kʼoeˇ, naw maꞈ ngaˬ-ahˇ yehˬ bawˬ sehˇ lu-ehˇ gʼeh-euˬ meh. ‘Nga maꞈ maˬ muiˬ maˬ shawˇ-eu aˬ geu jeˬ lawˇ taˬ’ lehˇ naw maꞈ paˇ ehˇ nga siˬ. Naw maꞈ ngaˬ-euˬ lawˇ duˬ-ahˇ aˬ joˆ-ehˇ jahˇ-awˇ yehˬ bawˬ-ehˇ gʼeh-euˬ gaˇ kawˆ, naw maꞈ-ahˇ ngaˇ ehˇ nehˬ nyaˇ.

⁸ Myaˆ behꞈ behꞈ-eu jeˬ zaˬ, naˇ gawˇ ahˇ-eu jeˬ zaˬ, kuiˇ kuˆ laꞈ kuˆ kuˆ-eu jeˬ zaˬ heu deuˬ naw maꞈ ngaˬ-ahˇ lawˇ nehˬ laˇ ngeh, tiˬ jeˬ-iˬ maˬ bahˬ-aˇ lehˇ noeˬ te loˇ. Miˇ kʼahˬ-ahˇ uˆ lahˇ-eu sahˬ paˬ sahˬ ma deuˬ-ahˇ kʼoeˇ loꞈ-ehˇ gʼeh-eu jeˬ zaˬ biꞈ leˇ haw sheˇ. Aˬ yawꞈ maꞈ nui kʼahˇ shiˇ-awˇ laˬ kʼaˬ tiˬ cehˇ ha geuꞈ nehˬ laꞈ tehꞈ-a loˇ.”

⁹ Piˇ ma deuˬ-oˇ, nymˬ-mˇ poˆ jawˇ-aˬ, Miˬyehˇ aˬ dui-ahˇ yaw muiˬ jeˬ mˇ nehˬ laꞈ ni shaˇ haw-awˬ. Naw maꞈ-euˬ shaˇ dawˬ-ahˇ aˬ yawꞈ maˬ naˇ haˬ nehˬ laꞈ-aˇ. Kʼoeˇ-aˬ, naw maꞈ-euˬ yaw lehˬ baˬ da neh meh.

¹⁰ Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Naw maꞈ ngaˬ-euˬ lawˇ duˬ kʼoeˇ taˆ miˬ dzaˬ ciˆ doꞈ-awˇ gaˇ dahˇ maˬ tsoeˬ-eu jeˬ maˬ ya mˇ ni, naw maꞈ laꞈ kʼoeˇ tiˬ gʼaˬ na Uˬ duˬ tahˬ nymˇ nymˇ ma-euˬ laˇ gʼoˆ piˬ tehˬ leˇ gaˇ ngaˇ geuꞈ mawꞈ-eu ma. Naw maꞈ-ahˇ ngaˇ nui ma maˬ tsaˬ nya. Naw maꞈ neh yuˇ laꞈ-euˬ lawˇ-eu shehˇ-eu jeˬ ngaˇ maˬ ha geuꞈ.

¹¹ Mˬ dzeˇ miˇ dzeˇ keuˆ ni jawˇ-eu tsawˇ haˬ deuˬ ngaˬ-ahˇ yaw zeu baw luꞈ meh. Yawˬ gaˇ na luꞈ aˬ yawꞈ maꞈ ngaˬ-ahˇ tsiˇ yaw saw jeˬ doꞈ damˬ-awˇ, ngaˇ nui ma tsaˬ-eu lawˇ-eu shehˇ-eu jeˬ mˇ luꞈ meh. Aˬ yawꞈ maꞈ dawˬ tawˆ luꞈ ngaˬ-ahˇ yaw zeu baw meh.

¹² Ehˇ kʼawꞈ, naw maꞈ ngaˬ-ahˇ yaw zeu maˬ baw-a. Ngaˬ-euˬ lawˇ duˬ gaˇ dahˇ maˬ tsoeˬ-a lehˇ naw maꞈ ehˇ-awˇ, naw maꞈ maˬ haw nahˇ-eu dzaˇ deuˬ lawˇ luꞈ-eu meh.

¹³ ‘Gaˇ heu maˬ mˇ nahˇ-ehˇ pyeuꞈ laˇ taˬ nyaˬ’ lehˇ naw maꞈ ehˇ-awˇ, ngaˬ-ahˇ naˇ mehˇ mˇ juꞈ haw-eu meh. Kʼoeˬ-euˬ jeˬ zaˬ, kuiˇ kuˆ laꞈ kuˆ kuˆ-eu jeˬ zaˬ hawˇ-eu, naˇ gawˇ ahˇ-eu jeˬ zaˬ deuˬ tsahˇ-awˇ, naw maꞈ ngaˬ-ahˇ lawˇ nehˬ laˇ-euˬ meh. Kʼoeˇ loꞈ-ehˇ gʼeh-eu lawˇ-eu shehˇ-eu jeˬ-ahˇ ngaˇ ha geuꞈ tehꞈ-a lehˇ naw maꞈ noeˬ te loˇ.

¹⁴ Jeˬ zaˬ kuˆ laꞈ kʼoeˇ, ngaˬ-ahˇ biꞈ ma lehˇ ehˇ taˬ-euˬ jeˬ shawˇ jawˇ kʼawꞈ, maˬ shawˇ-eu jeˬ zaˬ tsahˇ-awˇ ngaˬ-ahˇ lawˇ nehˬ laˇ-euˬ mehˇ shuiˇ shuiˇ-eu tsawˇ haˬ-aˬ, yaˬ kʼehˇ yaˬ gaˇ ya daˬ tehꞈ-a. Aˬ jeˬ miˇ neh ehˇ naˇ, ngaˇ-aˬ, huiˬ dui dui-eu sahˬ paˬ pyeuꞈ-awˇ, miˇ tsaˬ tsawˇ jeuˬ dawˬ tawˆ luꞈ ngaˬ-ahˇ guˆ-eu meh.”