Maˬkuˆ 12 - Akha

Aˬ gaꞈ yaˇ kmˇ mˇ paˆ paˆ-eu deuˬ gaˇ kawˆ yaw jeˬ ma jeˬ

¹ Kʼoeˇ naˇ, Yeˬsuˇ aˬ yawꞈ maꞈ-ahˇ yaw jeˬ ma jeˬ heu hmˬ ja mehˬ nehˬ-euˬ meh. “Tsawˇ haˬ tiˬ gʼaˬ aˬ gaꞈ gaꞈ yaˇ tiˬ yaˇ ka-awˇ, yaˇ kmˇ mˇ jawˬ-awˇ, aˬ gaꞈ dzaˇ uiˇ nawˬ-eu duˬ kʼahˬ jahˇ-awˇ, yaˇ kmˇ-ahˇ loꞈ-eu nymˇ goˇ tiˬ nymˇ tsoˆ-euˬ meh. Kʼoeˇ naˇ, yaˇ kmˇ mˇ-eu deuˬ-ahˇ mˇ paˆ bi paˆ yaꞈ-awˇ, yawˬ kʼahˬ yawˬ miˇ yawˬ-ahˇ iˇ-euˬ meh.

² Aˬ gaꞈ aˇ siˬ pyaˆ yamˬ tsaˬ laˇ ngeh, yaˇ kmˇ mˇ paˆ paˆ-euˬ deuˬ jawˇ gaˇ aˬ yawꞈ-euˬ zaˬ kʼaˆ tiꞈ gʼaˬ kʼehˇ gʼeh-awˇ, aˬ yawꞈ-ahˇ oꞈ-eu aˬ gaꞈ aˇ siˬ bi pi laˬ-iˇ-euˬ meh.

³ Yaˇ kmˇ mˇ paˆ paˆ-eu deuˬ neh zaˬ kʼaˆ kʼoeˇ gʼaˬ-ahˇ nyehꞈ-awˇ diˬ-awˇ, tiˬ jeˬ-iˬ maˬ biꞈ ni bi gʼoꞈ leˇ-euˬ meh.

⁴ Kʼoeˇ naˇ, yaˇ kmˇ-euˬ yaw sahˇ kʼoeˇ gʼaˬ zaˬ kʼaˆ yawˬ gʼaˬ yawˬ paˇ kʼehˇ gʼeh-euˬ meh. Zaˬ kʼaˆ kʼoeˇ gʼaˬ-ahˇ kʼawꞈ, aˬ yawꞈ maꞈ neh uˬ duˬ-ahˇ diˬ-awˇ, shaꞈ dawˇ dui dui-eu jeˬ jahˇ nehˬ-euˬ meh.

⁵ Yaˇ kmˇ-euˬ yaw sahˇ kʼoeˇ gʼaˬ zaˬ kaˆ tiˬ gʼaˬ paˇ kʼehˇ gʼeh ngeh, aˬ yawꞈ maꞈ neh bi sehꞈ-euˬ meh. Zaˬ kʼaˆ nui deuˬ gʼawˬ mya gʼaˬ-ahˇ kʼawꞈ, diˬ-eu deuˬ-ahˇ diˬ-awˇ, sehꞈ-eu deuˬ-ahˇ sehꞈ-euˬ meh.

⁶ Kʼoeˇ ngeh poˆ jawˇ, aˬ yawꞈ kʼehˇ gʼeh paˬ-ehˇ gʼeh-eu tsawˇ haˬ-aˬ, aˬ yawꞈ gaˬ dui dui-eu aˬ yawꞈ-euˬ aˬ li tiˬ gʼaˬ dzehˇ-eu tehꞈ meh. Aˇ saˬ saˬ ngeh poˆ, aˬ yawꞈ-euˬ aˬ li kʼoeˇ gʼaˬ-ahˇ yaˇ kmˇ mˇ paˆ paˆ-eu tsawˇ haˬ kʼoeˇ deuˬ jawˇ gaˇ kʼehˇ gʼeh-euˬ meh. ‘Ngaˬ li-ahˇ maˇ diˇ-aˬ, aˬ yawꞈ maꞈ yaw zeu baw tehꞈ-a lehˇ ngaˇ siˬ duˬ ma’ lehˇ aˬ yawꞈ ehˇ-eu meh.

⁷ Ehˇ kʼawꞈ, aˬ gaꞈ yaˇ kmˇ mˇ paˆ paˆ-eu tsawˇ haˬ kʼoeˇ deuˬ tiˬ gʼaˬ tiˇ gʼaˬ ehˇ-eu, ‘Heu gʼaˬ-aˬ, aˬ gaꞈ yaˇ kmˇ yaw sahˇ gʼaˬ-euˬ aˬ li ngaˇ. Oe-awˬ, aˬ dui ma aˬ yawꞈ-ahˇ sehꞈ kaˇ-euˇ. Aˬ yawꞈ-ahˇ oꞈ-eu jeˬ biˇ aˬ dui maꞈ za tehꞈ-a’ lehˇ ehˇ-eu meh.

⁸ Aˬ li kʼoeˇ gʼaˬ-ahˇ aˬ yawꞈ maꞈ nyehꞈ-awˇ sehꞈ-awˇ, yaˇ kmˇ laꞈ nyiˇ baꞈ dzeh-euˬ meh.

⁹ “Kʼoeˇ ngeh jawˇ, aˬ gaꞈ yaˇ kmˇ-euˬ yaw sahˇ kʼoeˇ gʼaˬ aˬ joˆ-ehˇ jahˇ nmˇ. Aˬ yawꞈ oe-awˇ, aˬ gaꞈ yaˇ kmˇ mˇ paˆ paˆ-eu tsawˇ haˬ kʼoeˇ deuˬ-ahˇ sehꞈ-awˇ, aˬ gaꞈ yaˇ kmˇ kʼoeˇ yawˬ deuˬ yawˬ-ahˇ a nehˬ-awˇ paˇ bi mˇ paˆ tehꞈ-a.

¹⁰ Jaˇliꞈ laꞈ kʼoeˇ heu loꞈ-ehˇ boꞈ taˬ-euˬ naw maꞈ maˬ gui haw-aˬ loˇ. ‘Nymˇ gawˬ-eu deuˬ maˬ geuꞈ nahˇ-ehˇ, baꞈ dzeh taˬ-euˬ kʼaˬ lo kʼoeˇ siˬ, kʼaˬ lo dawˬ tawˆ maˬ tseˇ poeˬ-eu, laꞈ coeˇ lo ziꞈ pyeuꞈ laˇ-euˬ meh.

¹¹ Sahˬpaˬ Miˬyehˇ kʼoeˇ loˇ jahˇ-euˬ, aˇ naˆ ni zahˬ leˇ duˬ jaˆ nga.”’

¹² Yuˇdaˆ tsawˇ haˬ aˬ yuiꞈ aˬ tsu deuˬ Yeˬsuˇ-ahˇ nyehꞈ-eu lehˇ leh jeh-eu meh. Aˬ jeˬ miˇ neh ehˇ naˇ, aˬ yawꞈ yaw jeˬ ma jeˬ heu hmˬ ja-eu-aˬ, aˬ yawꞈ maꞈ-ahˇ ehˇ mawꞈ-eu meh lehˇ, aˬ yawꞈ maꞈ siˬ nya-eu meh. Ehˇ kʼawꞈ, aˬ yawꞈ maꞈ tsawˇ haˬ aˇ maꞈ-ahˇ guˆ-eu miˇ neh, aˬ yawꞈ-ahˇ maˬ nyehꞈ ni doˆ-iˇ-euˬ meh.

Kawˬ doˆ-eu gaˇ kawˆ Yeˬsuˇ-ahˇ naˇ haˬ-euˬ

¹³ Kʼoeˇ naˇ, Yuˇdaˆ tsawˇ haˬ aˬ yuiꞈ aˬ tsu kʼoeˇ deˬ neh, Paˬliˬsehˇ deuˬ hawˇ-eu Heˬloˆ aˇ muˇ laꞈ kʼoeˇ uˇ-eu tsawˇ haˬ deuˬ-ahˇ kʼehˇ gʼeh-awˇ, Yeˬsuˇ dawˬ bi ngehˬ bahˬ ni, dawˬ lahˇ ju bi kʼmˇ-iˇ-euˬ meh.

¹⁴ Aˬ yawꞈ maꞈ Yeˬsuˇ jawˇ gaˇ oe-awˇ ehˇ-eu, “Saˬ laˬ-oˇ, nawˇ-aˬ, tsawˇ haˬ zaˬ deuˬ noeˬ doeˇ laˇ gaˇ maˬ guˆ ni dawˇ coe ni ngehˬ-eu tmˇ-eu tsawˇ haˬ meh lehˇ nga maꞈ siˬ nya ma. Nawˇ tsawˇ haˬ-euˬ myaˆ pyawˬ naˇ mehˇ-ahˇ maˬ haw ni, tsawˇ haˬ zaˬ gʼaˇ duˬ Miˬyehˇ-euˬ nui kʼahˇ aˬ joˆ-ehˇ jaˆ-eu gaˇ kawˆ dawˇ coe ni mehˬ-eu meh. Loˇmaˆ Sahˬ pahˬ-ahˇ kawˬ doˆ nehˬ-eu aˬ dui-euˬ Zahˇ dawˬ kʼoꞈ dawˬ-ahˇ bahˬ meh loˇ, maˬ bahˬ-a loˇ lehˇ tiˬ poˆ ehˇ nehˬ laꞈ sheˇ.

¹⁵ Nga maꞈ doˆ nehˬ-eu tsaˬ meh loˇ. Maˬ tsaˬ-a loˇ.” Ehˇ kʼawꞈ, aˬ yawꞈ maꞈ nui ma laꞈ kʼoeˇ aˬ joˆ-ehˇ noeˬ-awˇ dawˬ ngehˬ luꞈ-eu Yeˬsuˇ mawˇ jiˇ-awˇ ehˇ-eu, “Aˬ jeˬ miˇ neh naw maꞈ ngaˬ-ahˇ lahˇ ju kʼmˇ-eu lehˇ leh jeh te. Pyuˇ mehˇ byaˆ tiˬ byaˆ hehˇ laꞈ-awˬ. Ngaˇ haw la.”

¹⁶ Aˬ yawꞈ maꞈ mehˇ byaˆ tiˬ byaˆ yuˇ laꞈ ngeh, aˬ yawꞈ ehˇ-eu, “Heu gaˇ ahˇ-eu heu aˬ suˇ gʼaˬ-euˬ aˇ baˇ hawˇ-eu tsawˇ myahˇ nga.” Aˬ yawꞈ maꞈ ehˇ-eu, “Loˇmaˆ Sahˬ paˬ-euˬ aˇ baˇ nga.”

¹⁷ Aˬ yawꞈ maꞈ-ahˇ Yeˬsuˇ ehˇnehˬ-eu, “Toˆ-ehˇ ngeuˇ naˇ, Loˇmaˆ Sahˬ paˬ-euˬ myawˬ Loˇmaˆ Sahˬ paˬ-ahˇ biꞈ-awˇ, Miˬyehˇ-euˬ myawˬ Miˬyehˇ-ahˇ biꞈ-awˬ.” Kʼoeˇ ngeh, aˬ yawꞈ maꞈ Yeˬsuˇ-ahˇ zahˬ dui dui leˇ-euˬ meh.

Gʼoꞈ dehꞈ laˇ-eu gaˇ kawˆ Yeˬsuˇ-ahˇ naˇ haˬ-euˬ

¹⁸ Kʼoeˇ naˇ, shiˇ-euˬ tsawˇ haˬ deuˬ maˬ gʼoꞈ dehꞈ laˇ nya-aˇ lehˇ ehˇ-eu Saˬduˬgehˇ deuˬ Yeˬsuˇ jawˇ gaˇ laˇ-awˇ, heu loꞈ-ehˇ naˇ haˬ-euˬ meh.

¹⁹ “Saˬ laˬ-oˇ, Moˇseˬ neh nga maꞈ gʼaˇ duˬ boꞈ taˬ yaꞈ-euˬ zahˇ dawˬ kʼoꞈ dawˬ heu loꞈ-ehˇ jaˆ-eu meh. ‘Tsawˇ haˬ tiˬ gʼaˬ miˬ zaˬ sheuˬ-awˇ, zaˬ maˬ jawˇ le mi naˆ-ehˇ shiˇ naˇ, aˬ yawꞈ-euˬ tsuiꞈ maˬ ya bi dahˬ-iˇ ni zaˬ bi jawˇ le-eu gʼaˇ duˬ, aˬ yawꞈ-euˬ miˬ zaˬ-ahˇ aˬ yawꞈ-euˬ aˬ nyiˇ paˇ ya bi sheuˬ meh’ lehˇ boꞈ taˬ-euˬ meh.

²⁰ Mehˇ nmˇ shiꞈ gʼaˬ jawˇ-eu meh. Aˬ yuiꞈ yuiꞈ saˬ gʼaˬ miˬ zaˬ sheuˬ-awˇ, zaˬ maˬ jawˇ le mi naˆ-ehˇ shiˇ-euˬ meh.

²¹ Aˬ yawꞈ-euˬ miˬ zaˬ-ahˇ aˬ yawꞈ laꞈ oˆ saˬ-i gʼeh-eu aˬ nyiˇ gʼaˬ paˇ sheuˬ-awˇ, kʼoeˇ gʼaˬ kʼawꞈ zaˬ maˬ jawˇ le ni shiˇ-euˬ meh. Mehˇ nmˇ smˇ gʼaˬ tiˬ gʼaˬ kʼawꞈ, kʼoeˇ loꞈ-ehˇ gʼeh-awˇ shiˇ-euˬ meh.

²² Tiˬ gʼaˬ saˇ-iˬ tiˬ gʼaˬ kʼoeˇ loꞈ-ehˇ pyeuꞈ ka leꞈ-awˇ, mehˇ nmˇ shiꞈ gʼaˬ luꞈ zaˬ miˬ zaˬ kʼoeˇ gʼaˬ-ahˇ sheuˬ-awˇ, zaˬ maˬ jawˇ le mi naˆ-ehˇ shiˇ jiˇ-euˬ meh. Aˇ saˬ saˬ laˇ ngeh, zaˬ miˬ zaˬ kʼoeˇ gʼaˬ kʼawꞈ shiˇ-euˬ meh.

²³ Shiˇ-euˬ tsawˇ haˬ deuˬ-ahˇ Miˬyehˇ bi gʼoꞈ dehꞈ laˇ ngeh nah, zaˬ miˬ zaˬ kʼoeˇ gʼaˬ aˬ geu gʼaˬ-euˬ miˬ zaˬ geuꞈ nmˇ. Shiꞈ mehˇ nmˇ luꞈ aˬ yawꞈ-ahˇ sheuˬ-euˬ meh.”

²⁴ Aˬ yawꞈ maꞈ-ahˇ Yeˬsuˇ ehˇ nehˬ-eu, “Naw maꞈ lehˬ dui dui ngaˇ. Aˬ jeˬ miˇ neh lehˬ-eu nga lehˇ siˬ nya ma loˇ. Naw maꞈ Jaˇliꞈ maˬ siˬ nya-eu uˬ taꞈ, Miˬyehˇ-euˬ baoˬ-ahˇ kʼawꞈ maˬ siˬ nya-eu miˇ neh, lehˬ-eu ngaˇ.

²⁵ Shiˇ-euˬ tsawˇ haˬ deuˬ-ahˇ Miˬyehˇ bi gʼoꞈ dehꞈ laˇ ngeh, mˬ taˆ gʼaˬ kʼehˇ loꞈ-ehˇ pyeuꞈ-awˇ, sheuˬ dahˬ dzaˬ-eu maˬ paˇ baw meh.

²⁶ Shiˇ-euˬ tsawˇ haˬ gʼoꞈ dehꞈ laˇ-eu gaˇ kawˆ-ahˇ taꞈ leˇ-awˇ, Moˇseˬ-euˬ Sahˬ boꞈ laꞈ kʼoeˇ boꞈ taˬ-euˬ miˬ dzaˬ doꞈ-eu baw duˆ gaˇ kawˆ naw maꞈ ma gui haw-aˬ loˇ. ‘Ngaˇ-aˬ, Aˬbyaˬhaˬ, Iˇtsaˆ, Yaˬkoˆ-euˬ Miˬyehˇ ma’ lehˇ, Moˇseˬ-ahˇ Miˬyehˇ ehˇ nehˬ-euˬ gaˇ kawˆ, kʼoeˇ gaˇ boꞈ taˬ-euˬ maˬ ngeuˇ-a loˇ.

²⁷ Aˬ yawꞈ-aˬ, dehꞈ luꞈ-eu deuˬ-euˬ Miˬyehˇ meh. Shiˇ-euˬ deuˬ-euˬ Miˬyehˇ maˬ ngeuˇ-a. Naw maꞈ lehˬ dui dui ngaˇ.”

Zahˇ dawˬ kʼoꞈ dawˬ huiˬ dzehˬ-eu dawˬ

²⁸ Kʼoeˇ ngeh, Zahˇ dawˬ kʼoꞈ dawˬ mehˬ-eu saˬ laˬ tiˬ gʼaˬ kʼoeˇ gaˇ laˇ-awˇ, aˬ yawꞈ maꞈ tiˬ gʼaˬ tiˇ gʼaˬ kʼoeˇ loꞈ-ehˇ ja ceh ceh luꞈ gaˇ ya gaˬ-euˬ meh. Saˬduˬgehˇ deuˬ neh naˇ haˬ-euˬ dawˬ-ahˇ Yeˬsuˇ yaw muiˬ paˬ-ehˇ ehˇ kʼoꞈ nehˬ nya gaˇ aˬ yawꞈ ya mawˇ ngeh, aˬ yawꞈ kʼawꞈ heu loꞈ-ehˇ tiˬ dawˬ naˇ haˬ-euˬ meh. “Saˬ laˬ-oˇ, Zahˇ dawˬ kʼoꞈ dawˬ laꞈ kʼoeˇaˬ geu dawˬ aˬ cawˬ naˆ maˬ tseˇ huiˬ dzehˬ ta.”

²⁹ Yeˬsuˇ ehˇ-eu, “Aˬ cawˬ naˆ maˬ tseˇ huiˬ dzehˬ-eu dawˬ-aˬ, heu dawˬ meh. ‘Iˇsaˬleˬlaˆ tsawˇ haˬ deuˬ-oˇ, naˇ haˬ-awˬ. Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ tehꞈ-ehˇ Sahˬpaˬ meh.

³⁰ Nawˬ-euˬ nui ma dawˬ tawˆ luꞈ, nawˬ-euˬ saꞈ laˇ dawˬ tawˆ luꞈ, nawˬ-euˬ nui noeˬ nui duˇ dawˬ tawˆ luꞈ, nawˬ-euˬ gʼaˬ dawˬ tawˆ luꞈ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gaˬ-awˬ.’

³¹ Aˬ cawˬ naˆ maˬ tseˇ huiˬ dzehˬ-eu nyiˬ dawˬ tiˬ dawˬ-aˬ, heu loꞈ-ehˇ meh. ‘Nawˬ-euˬ gʼawˇ mawˇ-ahˇ gaˬ-eu loꞈ-ehˇ, nawˬ-euˬ dawˬ peh jawˇ-eu tsawˇ haˬ-ahˇ gaˬ-awˬ.’ Heu nyiˬ dawˬ naˆ maˬ tseˇ huiˬ dzehˬ-eu zahˇ dawˬ kʼoꞈ dawˬ maˬ paˇ jaˆ meh.”

³² Zahˇ dawˬ kʼoꞈ dawˬ mehˬ-eu saˬ laˬ kʼoeˇ gʼaˬ Yeˬsuˇ-ahˇ ehˇ nehˬ-eu, “Nawˇ ehˇ-eu tsaˬ meh saˬ laˬ-oˇ. Sahˬpaˬ Miˬyehˇ tehꞈ-ehˇ Miˬyehˇ pyeuꞈ-awˇ, miˬyehˇ nui gʼaˬ maˬ jawˇ-a lehˇ ehˇ-eu teu tsaˬ meh.

³³ Yawˬ ha-euˬ nui ma dawˬ tawˆ luꞈ, saꞈ laˇ dawˬ tawˆ luꞈ, gʼaˬ dawˬ tawˆ luꞈ, Miˬyehˇ-ahˇ ya gaˬ-awˇ, yawˬ haˇ yawˬ ha gaˬ-eu loꞈ-ehˇ, yawˬ ha dawˬ peh jawˇ-eu tsawˇ haˬ-ahˇ ya gaˬ meh. Miˬyehˇ-ahˇ, jeˬ zaˬ mawˇ lah-ehˇ miˬ dzaˬ-ahˇ dzah puiˆ-awˇ lawˇ nehˬ-eu hawˇ-eu, nui jeˬ damˬ nehˬ-eu naˆ maˬ tseˇ, zahˇ dawˬ kʼoꞈ dawˬ heu nyiˬ dawˬ-ahˇ naˇ haˬ geuꞈ-eu muiˬ dzehˬ meh.”

³⁴ Tsawˇ haˬ kʼoeˇ gʼaˬ yaw muiˬ paˬ-ehˇ shaˇ noeˬ-awˇ kʼoeˇ loꞈ-ehˇ ehˇ gaˇ Yeˬsuˇ ya mawˇ ngeh, heu loꞈ-ehˇ ehˇ nehˬ-euˬ meh. “Nawˇ-aˬ, Miˬyehˇ Miˇkʼahˬ-ahˇ yaw kʼaˆ-ehˇ maˬ paˇ kaˬ ngaˇ.” Kʼoeˇ naˇ, tsawˇ haˬ tiˬ gʼaˬ-iˬ Yeˬsuˇ-ahˇ tiˬ jeˬ-iˬ maˬ paˇ naˇ haˬ peuˬ ni pyeuꞈ-iˇ-euˬ meh.

Ka li aˬ suˇ gʼaˬ-a

³⁵ Yeˬsuˇ Uˬ duˬ tahˬ nymˇ nymˇ ma laꞈ kʼoeˇ mehˬ nehˬ tsoˆ nehˬ luꞈ ngeh, heu loꞈ-ehˇ ehˇ-eu meh. “Ka li-aˬ, Daˬbiˇ-euˬ zaˬ meh lehˇ Zahˇ dawˬ kʼoꞈ dawˬ mehˬ-eu saˬ laˬ deuˬ aˬ joˆ-ehˇ ehˇ nya ta.

³⁶ Daˬbiˇ-ahˇ Muiˬ-eu shawˇ-eu Yaw sahˇ Miˬyehˇ neh bi noeˬ doˆ-awˇ, heu loꞈ-ehˇ bi ehˇ-euˬ meh. ‘Nawˬ-ahˇ muiˇ-eu tsawˇ haˬ deuˬ-ahˇ, nawˬ-euˬ aˬ kuiˇ pehˬ zaˬ uˬ moˆ, ngaˇ maˬ nyehꞈ uiˬ jiˇ kʼoeˇ keuˆ ni, ngaˬ-euˬ aˇ maˇ paw nuiˇ-awˬ lehˇ, ngaˬ-euˬ Sahˬpaˬ kuˇ hawˇ kamˇ-ahˇ, SahˬpaˬMiˬyehˇ ehˇ nehˬ-euˬ meh.’

³⁷ Daˬbiˇ-euˬ mawˇ do kʼawꞈ, aˬ yawꞈ-ahˇ Sahˬ paˬ lehˇ kuˇ-euˬ meh. Toˆ-ehˇ ngeuˇ naˇ, Ka li-aˬ, Daˬbiˇ-euˬ zaˬ aˬ joˆ-ehˇ pyeuꞈ nya ta.” Yeˬsuˇ neh mehˬ nehˬ tsoˆ nehˬ-euˬ dawˬ-ahˇ, tsawˇ haˬ aˇ maꞈ maꞈ ma laˬ kʼaˬ tiˬ cehˇ naˇ haˬ luꞈ-eu meh.

Zahˇ dawˬ kʼoꞈ dawˬ mehˬ-eu deuˬ-ahˇ Yeˬsuˇ dehˬ-euˬ

³⁸ Aˬ yawꞈ mehˬ-eu tsoˆ-eu laꞈ kʼoeˇ, heu loꞈ-ehˇ ehˇ-eu meh. “Pehˇ kʼahˬ pehˇ mahˇ dm dm-ehˇ cah-awˇ, lehˆ kawˆ doe ni aˬ cawˬ yaw zeu baw nehˬ-eu jeˬ-ahˇ geuꞈ mawꞈ-eu, Zahˇ dawˬ kʼoꞈ dawˬ mehˬ-eu saˬ laˬ deuˬ-ahˇ yahˇ-awˬ.

³⁹ Aˬ yawꞈ maꞈ-aˬ, uˬ duˬ tahˬ nymˇ laꞈ kʼoeˇ hawˇ-eu bawˬ-iˬ gʼeh-eu jawˇ duˬ deuˬ-ahˇ, aˬ cawˬ taꞈ-ehˇ muiˬ dzehˬ-eu nuiˇ duˬ-ahˇ nuiˇ mawꞈ-eu meh.

⁴⁰ Miˬ coeˬ miˬ ma deuˬ-euˬ nymˇ-ahˇ aˬ yawꞈ maꞈ nawˬ dzaˬ kʼaˆ dzaˬ-awˇ, aˬ cawˬ neh yaw muiˬ ngaˇ lehˇ bi haw-eu gʼaˇ duˬ guiˬ lahˬ gʼawˬ myahˇ ni shaˇ-eu meh. Doeˇ dui dui-eu kʼehˬ-eu kʼaˆ-eu jeˬ-ahˇ aˬ yawꞈ maꞈ ya daˬ tehꞈ-a.”

Miˬ coeˬ miˬ ma tiˬ gʼaˬ pyuˇ damˬ-euˬ

⁴¹ Pyuˇ daˬ dawˆ duˬ-euˬ mehˬ shi Yeˬsuˇ nuiˇ-awˇ,tsawˇ haˬ gʼawˬ mya ni pyuˇ daˬ dawˆ laˇ gaˇ haw luꞈ-eu meh. Smˇ muiˬ smˇ baw gʼawˬ mya gʼaˬ laˇ-awˇ, pyuˇ gʼawˬ mya ni damˬ-eu meh.

⁴² Kʼoeˇ naˇ, shaˬ dui dui-eu miˬ coeˬ miˬ ma tiˬ gʼaˬ laˇ-awˇ, tiˬ pehˆ poeˬ-eu guiˬ shuiˇ mehˇ byaˆ nyiˬ byaˆ damˬ-euˬ meh.

⁴³ Kʼoeˇ ngeh, aˬ yawꞈ-euˬ zaˬ lahˇ deuˬ-ahˇ aˬ yawꞈ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Shaˬ dui dui-eu miˬ coeˬ miˬ ma heu gʼaˬ-aˬ, pyuˇ daˬ kʼaˇ dawˆ laˇ-euˬ tsawˇ haˬ dawˬ tawˆ luꞈ laꞈ kʼoeˇ, aˬ cawˬ myaˆ maˬ tseˇ damˬ-euˬ gʼaˬ pyeuꞈ-eu meh.

⁴⁴ Aˬ jeˬ miˇ neh ehˇ naˇ, nui deuˬ-aˬ, gʼawˬ mya ni jaˆ-eu laꞈ kʼoeˇ yuˇ doˆ-awˇ damˬ-euˬ meh. Ehˇ kʼawꞈ, aˬ yawꞈ-aˬ, shaˬ dui dui-eu laꞈ kʼoeˇ, aˬ yawꞈ yaw dehꞈ dehꞈ-eu gʼaˇ duˬ maˬ dzeˇ ni, kʼaˇ ahˇ-eu dawˬ tawˆ luꞈ damˬ jiˇ-euˬ meh.”