Luˇta 3 - Akha

Cehˇ baw duˬ-ahˇ, Bawˇza jawˇ gaˇ Luˇta iˇ-euˬ

¹ Aˇ yamˬ ui cuiˆ myahˇ laˇ gʼaˬ ngeh jawˇ, Luˇta-ahˇ Nawˇmi heu loꞈ-ehˇ ehˇ nehˬ-euˬ meh. “Nawˇ nymˇ jiˇ baw laˇ ni, nawˬ-eu gʼaˇ duˬ kʼaˬ dzeˇ zaˬ tiˬ gʼaˬ ngaˇ shaˇ caw nehˬ ma.

² Nawˬ neh zaˬ miˬ zaˬ deuˬ-euˬ mehˬ nah caw caw-ehˇ cehˇ nmˇ gʼoˆ-iˇ-euˬ deh yaˇ kʼoeˇ kawˬ-euˬ yaw sahˇ pyeuꞈ-eu Bawˇza-aˬ, aˬ dui pehˬ-euˬ aˬ yuiꞈ aˬ nyiˇ tsaˬ-eu nawˇ kʼawꞈ siˬ nya meh. Ngaˇ ehˇ gaˇ naˇ haˬ sheˇ.

³ Nymˇ ciꞈ aˬ yawꞈ cehˇ baw shawˇ luꞈ tehꞈ-a. Teu miˇ neh, nawˇ iˇ cuꞈ dzuiꞈ shawˇ-awˬ. Tsiˇ yaw saw jeˬ lehꞈ-awˇ, mehˬ tsoeˬ yaw shuiꞈ dm paˇ-awˬ. Kʼoeˇ naˇ, aˬ yawꞈ cehˇ baw luꞈ gaˇ iˇ-awˬ. Ehˇ kʼawꞈ, aˬ yawꞈ maˬ dzaˬ maˬ dawˇ dehˆ kʼoeˇ keuˆ ni, nawˇ kʼoeˇ gaˇ iˇ keuˆ taˬ-euˬ aˬ yawꞈ-ahˇ taˬ bi siˬ.

⁴ Aˬ yawꞈ yuꞈ leˇ ngeh, aˬ geu tsahˇ-ahˇ yuꞈ-eu nga lehˇ yaw muiˬ paˬ-ehˇ haw taˬ-awˬ. Aˬ yawꞈ yuꞈ kʼaˆ naˇ, aˬ yawꞈ dawˬ peh le-awˇ, aˬ yawꞈ dm luꞈ-eu aˇ bui bui dahˬ gʼeu diˇ-awˇ, aˬ yawꞈ-euˬ aˬ kuiˇ dawˬ peh yuꞈ leˇ-awˬ. Nawˇ aˬ joˆ-ehˇ ya jahˇ-eu gaˇ kawˆ, aˬ yawꞈ nawˬ-ahˇ ehˇ nehˬ laꞈ tehꞈ-a.”

⁵ Luˇta ehˇ-eu, “Nawˇ kʼaˇ ehˇ-eu loꞈ-ehˇ ngaˇ mˇ ma.”

⁶ Kʼoeˇ naˇ, cehˇ baw duˬ-ahˇ Luˇta iˇ-awˇ, Nawˇmi neh aˬ yawꞈ-ahˇ kʼaˇ ehˇ nehˬ-euˬ loꞈ-ehˇ mˇ-euˬ meh.

⁷ Bawˇza dzaˬ dehˆ dawˇ dehˆ gʼaˬ ngeh, nui ma juˆ lehˆ ni pyeuꞈ laˇ-awˇ, cehˇ bymˇ dawˬ peh le-awˇ yuꞈ-euˬ meh. Aˬ yawꞈ yuꞈ kʼaˆ gʼaˬ ngeh, Luˇta ciˬ cuˇ ni le-awˇ, aˇ bui bui dahˬ sheu diˇ-awˇ, aˬ yawꞈ-euˬ aˬ kuiˇ dawˬ peh yuꞈ-euˬ meh.

⁸ Sehˇ gʼahˇ ceh laˇ ngeh, aˬ yawꞈ uˬ noeˬ noeˬ laˇ-awˇ, yuꞈ zaˇ poˆ laˆ paˇ ngeh, aˬ yawꞈ-euˬ aˬ kuiˇ dawˬ peh zaˬ miˬ zaˬ tiˬ gʼaˬ yuꞈ luꞈ gaˇ ya mawˇ-awˇ, tsawˬ guˆ-iˇ-awˇ,

⁹ “Aˬ suˇ gʼaˬ te” lehˇ naˇ haˬ-euˬ meh. Luˇta ehˇ-eu, “Ngaˇ-aˬ, iˇ shaˬ zaˬ Luˇta ma. Nawˇ-aˬ, ngaˬ-ahˇ haw piˇ-eu tsaˬ-eu ngaˬ-euˬ aˬ yuiꞈ aˬ nyiˇ meh. Teu miˇ neh, gʼawˬ shaˬ gaˬ-awˇ, ngaˬ-ahˇ sheuˬ nehˬ laꞈ-awˬ.”

¹⁰ Bawˇza ehˇ-eu, “Sahˬpaˬ Miˬyehˇ nawˬ-ahˇ guiˬ lahˬ biꞈ luꞈ-uˇ. Nawˬ-euˬ kʼaˬ dzeˇ zaˬ-euˬ aˇ jeuˬ aˇ ca-ahˇ, nawˇ saˇ jaˇ ziꞈ dui dui-eu gaˇ kawˆ, nymˬ-mˇ nawˇ mˇ-eu heu naˆ maˬ tseˇ, nawˬ-euˬ zahˇ shaˇ aˬ ma-ahˇ nawˬ neh mˇ nehˬ-euˬ gaˇ deuˬ, saˇ kiˇ pyeuꞈ luꞈ meh. Iˬ nah keuˆ ni, smˇ muiˬ muiˬ gaˇ maˬ ehˇ, iˇ shaˬ shaˬ gaˇ maˬ ehˇ, zaˬ guˬ tiˬ gʼaˬ na-ahˇ dahˬ dzaˬ-iˇ ma lehˇ nawˇ maˬ noeˬ-a.

¹¹ Luˇta-oˇ, Nawˇ tiˬ jeˬ-iˬ taˬ paˇ noeˬ shaˬ. Meuˬ heu meuˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ, nawˇ-aˬ, muiˬ-eu zaˬ miˬ zaˬ tiˬ gʼaˬ meh lehˇ siˬ nya luꞈ meh. Nawˇ kʼaˇ shaˇ-eu jeˬ ngaˇ mˇ nehˬ ma.

¹² Nawˇ ehˇ-eu tsaˬ meh. Ngaˇ-aˬ, nawˬ-ahˇ aˬ yuiꞈ aˬ nyiˇ peh-eu miˇ neh, nawˬ-ahˇ haw piˇ-eu tsaˬ meh. Ehˇ kʼawꞈ, ngaˇ naˆ maˬ tseˇ, nawˬ-ahˇ aˬ yuiꞈ aˬ nyiˇ peh-eu tsawˇ haˬ tiˬ gʼaˬ jawˇ-a siˬ.

¹³ Nymˇ ciꞈ heu gaˇ jawˇ tawˬ-awˬ. Tsawˇ haˬ kʼoeˇ gʼaˬ nawˬ-ahˇ haw piˇ nehˬ mawꞈ nga loˇ lehˇ ni shawˬ uˬ shawˬ ngaˇ naˇ haˬ-iˇ ma. Nawˬ-ahˇ aˬ yawꞈ haw piˇ nehˬ mawꞈ lawˬ naˇ, muiˬ dzehˬ tehꞈ-a. Ehˇ kʼawꞈ, aˬ yawꞈ nawˬ-ahˇ maˬ haw piˇ nehˬ mawꞈ naˇ, ngaˇ nawˬ-ahˇ aˬ diˇ aˬ maˇ haw piˇ nehˬ ma lehˇ, dehꞈ luꞈ-eu Miˬyehˇ mehˬ shi, ngaˇ nawˬ-ahˇ saˇ jaˇ dzaˬ-eu ma. Uˬ shawˬ paw keuˆ ni heu gaˇ yuꞈ tawˬ-awˬ.”

¹⁴ Kʼoeˇ naˇ, uˬ shawˬ paw keuˆ ni, Bawˇza-euˬ aˬ kuiˇ dawˬ peh luˇ ta yuꞈ-euˬ meh. Ehˇ kʼawꞈ, aˬ cawˬ aˬ yawꞈ-ahˇ maˬ bi mawˇ-eu gʼaˇ duˬ, uˬ bya maˬ bya laˇ mi naˆ-ehˇ tuˇ-euˬ meh. Aˬ jeˬ miˇ neh ehˇ naˇ, aˬ yawꞈ kʼoeˇ gaˇ jawˇ-eu gaˇ kawˆ, tsawˇ haˬ tiˬ gʼaˬ-ahˇ-iˬ, Bawˇza maˬ bi siˬ mawꞈ-a.

¹⁵ “Nawˬ-euˬ pehˇ kʼahˬ pehˇ mahˇ lehˆ-awˇ, heu gaˇ kʼawˬ-awˬ” lehˇ, Luˇta-ahˇ Bawˇza ehˇ nehˬ-euˬ meh. Luˇta pehˇ kʼahˬ lehˆ-awˇ kʼawˬ ngeh, cehˇ tiˬ joꞈ dzehˬ ni shehˆ ahˇ nehˬ-awˇ, baꞈ pu kʼoeˇ taˆ baꞈ daˆ nehˬ-euˬ meh. Kʼoeˇ ngeh, Luˇta cehˇ kʼoeˇ daˬ-awˇ, meuˬ-ahˇ gʼoꞈ leˇ-euˬ meh.

¹⁶ Aˬ yawꞈ iˇ kahˇ gʼoꞈ keuˆ leˇ ngeh, “Gʼoꞈ keuˆ laˇ maˬ loˇ tsu-oˬ” lehˇ aˬ yawꞈ-euˬ boeˇ miˬ aˬ ma aˬ yawꞈ-ahˇ naˇ haˬ-euˬ meh. Bawˇza neh kʼaˇ mˇ nehˬ-euˬ jeˬ dawˬ tawˆ luꞈ, Nawˇmi-ahˇ Luˇta dzawˇ nehˬ-euˬ meh.

¹⁷ Luˇta paˇ ehˇ-eu, “Nawˇ jawˇ gaˇ ngaˇ yawꞈ ngehꞈ-ehˇ maˬ ya gʼoꞈ leˇ-a lehˇ paˇ ehˇ-awˇ, cehˇ heu deuˬ biꞈ laꞈ-euˬ meh.”

¹⁸ Nawˇmi ehˇ-eu, “Tiˬ jeˬ-iˬ maˬ ngeuˇ-aˇ Luˇta-oˇ. Uˬ duˬ aˬ joˆ-ehˇ duˬ laˇ nga lehˇ haw taˬ-awˬ. Gaˇ kawˆ heu uˬ duˬ maˬ laˆ duˬ kʼoeˇ keuˆ ni, iˬ nah Bawˇza maˬ paˇ naˬ-aˇ.”