Luˇta 1 - Akha

Aˬliˇmaˬlehˇ hawˇ-eu aˬ yawꞈ-euˬ miˬ sawˇ zaˬ Mawˇbaˆ miˇ kʼahˬ-ahˇ jawˇ-iˇ-euˬ

¹ Aˇ hu ba, Iˇsaˬleˬlaˆ miˇ kʼahˬ laꞈ kʼoeˇ sahˬpaˬ tiˬ gʼaˬ-iˬ maˬ jawˇ le mi naˆ-ehˇ, mehꞈ-eu shuꞈ-eu jeˬ tiˬ poˆ keuˆ le-euˬ meh. Kʼoeˇ ngeh, Behˬlehˬhehˬ meuˬ-ahˇ jawˇ-eu tsawˇ haˬ tiˬ gʼaˬ aˬ yawꞈ-euˬ nymˇ dahˬ hawˇ-eu aˬ yawꞈ-euˬ aˬ li nyiˬ gʼaˬ sheuˬ-awˇ, Mawˇbaˆ miˇ kʼahˬ-ahˇ tiˬ kʼehˬ cehˆ jawˇ-iˇ-euˬ meh.

² Tsawˇ haˬ kʼoeˇ gʼaˬ-euˬ tsawˇ myahˇ Aˬliˇmaˬlehˇ pyeuꞈ-awˇ, aˬ yawꞈ-euˬ nymˇ dahˬ-aˬ, Nawˇmi meh. Aˬ yawꞈ-euˬ aˬ li nyiˬ gʼaˬ-aˬ, Maˬhaˬloˬ hawˇ-eu, Ciˇlahˬ meh. Aˬ yawꞈ maꞈ-aˬ, Eˇpaˬlaˇ aˇ jeuˬ aˇ ca pyeuꞈ-eu meh. Mawˇbaˆ miˇ kʼahˬ-ahˇ aˬ yawꞈ maꞈ iˇ-awˇ jawˇ-euˬ meh.

³ Kʼoeˇ gaˇ jawˇ luꞈ ngeh, Aˬliˇmaˬlehˇ shiˇ-awˇ, Nawˇmi hawˇ-eu, aˬ yawꞈ-euˬ aˬ li nyiˬ gʼaˬ tehꞈ-ehˇ jawˇ yaꞈ-euˬ meh.

⁴ Aˬ li kʼoeˇ nyiˬ li, Awˇpaˬ hawˇ-eu Luˇta lehˇ myahˇ-euˬ Mawˇbaˆ tsawˇ jeuˬ zaˬ miˬ aˬ buˇ nyiˬ gʼaˬ-ahˇ sheuˬ-euˬ meh. Aˬ yawꞈ maꞈ kʼoeˇ gaˇ jawˇ-eu tseˇ kʼoꞈ ehˇ gʼaˬ ni byah laˇ-euˬ meh.

⁵ Kʼoeˇ ngeh, Maˬhaˬloˬ hawˇ-eu Ciˇlahˬ paˇ shiˇ-awˇ, Nawˇmi tiˬ gʼaˬ tehꞈ-ehˇ, kʼaˬ dzeˇ zaˬ maˬ baw, zaˬ maˬ jawˇ ni, dzeˇ yaꞈ-euˬ meh.

Nawˇmi hawˇ-eu Luˇta Behˬlehˬhehˬ meuˬ-ahˇ gʼoꞈ jawˇ leˇ-euˬ

⁶ Mawˇbaˆ miˇ kʼahˬ laꞈ kʼoeˇ Nawˇmi jawˇ luꞈ ngeh, Sahˬpaˬ Miˬyehˇ aˬ yawꞈ-euˬ tsawˇ jeuˬ-ahˇ guiˬ lahˬ biꞈ-awˇ, dzaˬ la gʼo cehˇ gʼawˬ mya ni bi za le-euˬ gaˇ kawˆ ya gaˬ-euˬ meh. Kʼoeˇ miˇ neh, aˬ yawꞈ-euˬ kuiˬ ma nyiˬ gʼaˬ nehˬ-ehˇ, Mawˇbaˆ miˇ kʼahˬ-ahˇ neh doˆ-iˇ-eu lehˇ, aˬ yawꞈ lehˬ hmˬ-euˬ meh.

⁷ Yuˇdaˆ miˇ kʼahˬ-ahˇ gʼoꞈ leˇ-eu gʼaˇ duˬ, aˬ yawꞈ maꞈ tiˬ kawˆ loꞈ-ehˇ doˆ laˇ-euˬ meh.

⁸ Ehˇ kʼawꞈ, aˬ yawꞈ maꞈ gaˇ pehˇ le luꞈ ngeh, aˬ yawꞈ nyaꞈ-ahˇ Nawˇmi heu loꞈ-ehˇ ehˇ nehˬ-euˬ meh. “Iˇ kahˇ paw gʼoꞈ-iˇ-awˇ naw nyaꞈ-euˬ aˬ ma nehˬ-ehˇ jawˇ yaꞈ-awˬ. Ngaˬ-ahˇ maˬ ehˇ, shiˇ dzeuˇ gʼaˬ-euˬ ngaˬ li nyiˬ gʼaˬ-ahˇ maˬ ehˇ, naw nyaꞈ yaw muiˬ jeˬ mˇ nehˬ laꞈ-euˬ loꞈ-ehˇ, naw nyaꞈ-ahˇ Sahˬpaˬ Miˬyehˇ yaw muiˬ jeˬ mˇ nehˬ luꞈ-uˇ.

⁹ Naw nyaꞈ nyiˬ gʼaˬ luꞈ smˇ miˇ paˇ ya iˇ-awˇ, nymˇ jiˇ baw laˇ ngeh keuˆ ni, Sahˬpaˬ Miˬyehˇ gʼawˬ shaˬ gaˬ nehˬ laꞈ luꞈ-uˇ.” Kʼoeˇ naˇ, aˬ yawꞈ nyaꞈ-ahˇ bi jawˇ yaꞈ-awˇ gʼoꞈ-iˇ-eu gʼaˇ duˬ, aˬ yawꞈ nyaꞈ-ahˇ Nawˇmi mehˬ cuˇ cuˇ-euˬ meh. Kʼoeˇ ngeh aˬ yawꞈ nyaꞈ ngoeˇ-eu meh.

¹⁰ Aˬ yawꞈ nyaꞈ ehˇ-eu, “Nga nyaꞈ heu gaˇ maˬ jawˇ yaꞈ mawꞈ nya. Nawˬ-euˬ mehˬ nah caw teh laˇ-awˇ, nawˬ-euˬ tsawˇ jeuˬ tsawˇ ca nehˬ-ehˇ jawˇ laˇ ma.”

¹¹ Ehˇ kʼawꞈ, aˬ yawꞈ nyaꞈ-ahˇ Nawˇmi ehˇ nehˬ-eu, “Ngaˬ-euˬ aˬ tsu deuˬ-oˇ, naw nyaꞈ gʼoꞈ-iˇ-eu tsaˬ tehꞈ-a. Aˬ jeˬ miˇ neh ngaˬ-euˬ mehˬ nah caw teh laˇ mawꞈ-eu nya. Naw nyaꞈ-ahˇ bi sheuˬ-eu aˬ li paˇ jawˇ laˇ nya ni, ngaˇ zaˬ ciˬ zaˬ cu mˇ-eu aˇ yamˬ maˬ paˇ ngeuˇ ma.

¹² Naw nyaꞈ gʼoꞈ-iˇ-awˬ. Ngaˇ mawˬ laˇ gʼaˬ-euˬ miˇ neh, aˬ cawˬ-ahˇ paˇ dahˬ dzaˬ-iˇ-eu aˇ yamˬ kʼawꞈ maˬ paˇ ngeuˇ meh. Nymˇ ciꞈ neh, aˬ cawˬ-ahˇ ngaˇ paˇ dahˬ dzaˬ-iˇ-awˇ, aˬ li nyiˬ li paˇ jawˇ le law hawˇ kʼawꞈ,

¹³ aˬ yawꞈ nyaꞈ-ahˇ paˇ mˇ dzaˬ laˇ-eu lehˇ, aˬ yawꞈ nyaꞈ huiˬ loˆ laˇ ngeh keuˆ ni, naw nyaꞈ dawˬ coeˇ tehꞈ-a loˇ. Kʼoeˇ ngeh keuˆ ni, aˬ cawˬ-ahˇ maˬ mˇ dzaˬ-iˇ ni naw nyaꞈ jawˇ coeˇ tehꞈ-a loˇ. Ngaˬ-euˬ aˬ tsu deuˬ-oˇ, kʼoeˇ loꞈ-ehˇ maˬ pyeuꞈ laˇ nya-eu gaˇ kawˆ naw nyaꞈ siˬ nya meh. Sahˬpaˬ Miˬyehˇ ngaˬ-ahˇ byehˇ dzeh yaꞈ-euˬ miˇ neh, naw nyaꞈ-ahˇ ngaˇ gʼawˬ shaˬ gaˬ dui dui miˇ-a.”

¹⁴ Kʼoeˇ ngeh, aˬ yawꞈ nyaꞈ tiˬ poˆ paˇ ngoeˇ-euˬ meh. Kʼoeˇ naˇ, Awˇpaˬ gʼaˬ, Nawˇmi-ahˇ mehˬ cuˇ cuˇ nehˬ yaꞈ-awˇ, gʼoꞈ-iˇ-euˬ meh. Ehˇ kʼawꞈ, Luˇta gʼaˬ Nawˇmi-ahˇ maˬ byehˇ coeˇ-a.

¹⁵ Nawˇmi ehˇ-eu, “Luˇta-oˇ, nawˬ uiˬ Awˇpaˬ-aˬ, yawˬ ha-euˬ tsawˇ jeuˬ tsawˇ ca hawˇ-eu, yawˬ ha-euˬ Miˬyehˇ jawˇ gaˇ gʼoꞈ-iˇ-euˬ maˬ ngeuˇ-a loˇ. Nawˇ gʼeh aˬ yawꞈ nehˬ-ehˇ gʼoꞈ-iˇ-awˬ.”

¹⁶ Ehˇ kʼawꞈ, Luˇta ehˇ-eu, “Ngaˬ-ahˇ maˬ bi gʼoꞈ-iˇ laꞈ-ehˇ, nawˬ nehˬ-ehˇ bi laˇ nehˬ laꞈ-awˬ. Nawˇ kʼaˇ iˇ gaˇ ngaˇ iˇ-awˇ, nawˇ kʼaˇ jawˇ gaˇ ngaˇ jawˇ ma. Nawˬ-euˬ tsawˇ jeuˬ tsawˇ ca-aˬ, ngaˬ-euˬ tsawˇ jeuˬ tsawˇ caˬ pyeuꞈ-awˇ, nawˬ-euˬ Miˬyehˇ kʼawꞈ, ngaˬ-euˬ Miˬyehˇ pyeuꞈ luꞈ-uˇ.

¹⁷ Nawˇ kʼaˇ shiˇ gaˇ ngaˇ shiˇ-awˇ, kʼoeˇ gaˇ aˬ cawˬ ngaˬ-ahˇ baꞈ pahˬ luꞈ-uˇ. Shiˇ-awˇ shiˇ gʼawˬ-euˬ jeˬ maˬ ngeuˇ-ehˇ, nawˬ-ahˇ ngaˇ gʼawˬ-iˇ naˇ, kʼaˆ dui dui-eu Sahˬpaˬ Miˬyehˇ-euˬ kʼehˬ-eu kʼaˆ-eu jeˬ, ngaˬ-ahˇ keuˆ le luꞈ-uˇ.”

¹⁸ Aˬ yawꞈ-euˬ mehˬ nah caw teh laˇ-eu gʼaˇ duˬ, Luˇta noeˬ tsehˆ taˬ-euˬ gaˇ Nawˇmi ya siˬ ngeh, tiˬ jeˬ-iˬ maˬ paˇ ehˇ ni, ciˬ cuˇ ni jawˇ-euˬ meh.

¹⁹ Kʼoeˇ naˇ, Behˬlehˬhehˬ meuˬ-ahˇ keuˆ ni, aˬ yawꞈ nyaꞈ le gʼeh leꞈ-euˬ meh. Aˬ yawꞈ nyaꞈ kʼoeˇ gaˇ le keuˆ ngeh, meuˬ meuˬ lah ni luiˬ gʼa laˇ-awˇ, “Tsawˇ haˬ heu gʼaˬ Nawˇmi maˬ ngeuˇ nga loˇ” lehˇ zaˬ miˬ zaˬ deuˬ ehˇ-eu meh.

²⁰ Kʼoeˇ ngeh, zaˬ miˬ zaˬ kʼoeˇ deuˬ-ahˇ Nawˇmi ehˇ nehˬ-eu, “Ngaˬ-ahˇ Nawˇmi‘Nawˇmi’ lehˇ ehˇ-eu Heˬbyehˇ dawˬ-euˬ dawˬ tsuiꞈ-aˬ, ‘laˬ kʼaˬ cehˇ-eu’ lehˇ ehˇ mawꞈ-eu meh.* lehˇ taˬ paˇ kuˇ. Maˬlahˬ‘Maˬlahˬ’, lehˇ ehˇ-eu Heˬbyehˇ dawˬ-euˬ dawˬ tsuiꞈ-aˬ, ‘shaˬ zahˬ’ naꞈ-eu lehˇ ehˇ mawꞈ-eu meh.* lehˇ kuˇ-awˬ. Aˬ jeˬ miˇ neh ehˇ naˇ, Baoˬ huiˬ-eu Miˬyehˇ ngaˬ-ahˇ shaˬ zahˬ bi keuˆ le-euˬ meh.

²¹ Heu gaˇ neh ngaˇ doˆ-iˇ ngeh, yawˬ jeˬ na luꞈ jaˆ-euˬ ma. Ehˇ kʼawꞈ ni, ngaˇ tiˬ jeˬ-iˬ maˬ ahˇ ni, yawꞈ ngehꞈ-ehˇ, Sahˬpaˬ Miˬyehˇ ngaˬ-ahˇ bi gʼoꞈ laˇ-euˬ meh. Baoˬ huiˬ-eu Sahˬpaˬ Miˬyehˇ neh byehˇ dzeh nehˬ laꞈ-awˇ, bi shaˬ bi zahˬ laꞈ-euˬ ngaˇ loꞈ-ehˇ gʼeh-eu tsawˇ haˬ-ahˇ, aˬ jeˬ miˇ neh Nawˇmi lehˇ kuˇ te.”

²² Heu-aˬ, Nawˇmi hawˇ-eu Mawˇbaˆ tsawˇ jeuˬ pyeuꞈ-eu aˬ yawꞈ-euˬ kuiˬ ma Luˇta aˬ nyaꞈ, Mawˇbaˆ miˇ kʼahˬ-ahˇ neh aˬ joˆ-ehˇ gʼoꞈ keuˆ laˇ-euˬ gaˇ kawˆ pyeuꞈ-eu meh. Aˬ yawꞈ nyaꞈ Behˬlehˬhehˬ meuˬ-ahˇ gʼoꞈ keuˆ laˇ-euˬ aˇ yamˬ kʼoeˇ yamˬ-aˬ, lawˬ loeˇ keuˆ dahˬ beh le-euˬ aˇ yamˬ pyeuꞈ-eu meh.