Luˇkaꞈ 9 - Akha

Gʼaˬ kʼehˇ tseˇ nyiꞈ gʼaˬ-ahˇ Yeˬsuˇ tseˇ doˆ-euˬ

¹ Zaˬ lahˇ tseˇ nyiꞈ gʼaˬ-ahˇ Yeˬsuˇ kuˇ uiˬ-awˇ, nehꞈ teh doˆ nya-eu baoˬ hawˇ-eu naˇ gawˇ laˆ taˬ nya-eu baoˬ biꞈ nehˬ-euˬ meh.

² Kʼoeˇ naˇ, Miˬyehˇ Miˇkʼahˬ gaˇ kawˆ dawˬ mehˬ mehˬ-eu gʼaˇ duˬ hawˇ-eu, naˇ gawˇ laˆ saˆ-eu gʼaˇ duˬ, aˬ yawꞈ maꞈ-ahˇ kʼehˇ gʼeh-euˬ meh.

³ Aˬ yawꞈ maꞈ-ahˇ aˬ yawꞈ ehˇ nehˬ-eu, “Naw maꞈ gaˇ ma doˆ-iˇ ngeh, tiˬ jeˬ-iˬ maˬ yuˇ ni iˇ-awˬ. Gawˬ yoeˬ maˬ ehˇ, pehˇ tahˬ maˬ ehˇ, dzaˬ dzaˬ dawˇ dawˇ maˬ ehˇ, pyuˇ maˬ ehˇ, mehˬ tsoeˬ dzeˇ paˇ maˬ ehˇ, tiˬ jeˬ-iˬ maˬ yuˇ ni iˇ-awˬ.

⁴ Naw maꞈ nymˇ tiˬ nymˇ-ahˇ nymˇ daˆ daˆ leˇ shaw naˇ, jawˇ duˬ kʼoeˇ tsahˇ-ahˇ kʼaˇ jawˇ kʼoeˇ keuˆ ni, nymˇ daˆ taˬ daˆ paˇ.

⁵ Naw maꞈ-ahˇ maˬ kʼaˇ ha geuꞈ nehˬ laꞈ-eu meuˬ deuˬ-ahˇ neh naw maꞈ doˆ-iˇ ngeh, aˬ kuiˇ pehˬ zaˬ-ahˇ lehꞈ-eu kʼaˬ lehˇ sawˆ kʼaˇ nehˬ yaꞈ-awˬ. Kʼoeˇ-aˬ, aˬ yawꞈ maꞈ-euˬ yaw lehˬ siˬ leˇ ni mˇ-eu saˇ kiˇ meh.”

⁶ Zaˬ lahˇ deuˬ tiˬ pu saˇ-iˬ tiˬ pu dawˬ mehˬ mehˬ-iˇ-awˇ, yawˬ gaˇ na luꞈ naˇ gawˇ laˆ taˬ nehˬ-euˬ meh.

Heˬloˆ zahˬ leˇ-euˬ

⁷ Gaˇ kawˆ kʼoeˇ deuˬ-ahˇ Gaˬliˬlehˇ miˇ kʼahˬ-ahˇ uˆ lahˇ luꞈ-eu Heˬloˆ ya gaˬ ngeh, zahˬ leˇ-euˬ meh. Aˬ jeˬ miˇ neh ehˇ naˇ, “Iˇ cuꞈ shawˇ-eu Yoˇhaˬ gʼoꞈ dehꞈ laˇ-euˬ ngaˇ” lehˇ, tsawˇ haˬ tiˬ paˆ na deuˬ ja luꞈ-eu meh.

⁸ Tiˬ paˆ na deuˬ-aˬ, “Eˇliˇyaˆ doˆ le-euˬ ngaˇ” lehˇ ehˇ-awˇ, tiˬ paˆ na deuˬ-aˬ, “Aˇ hu ba-euˬ Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ na gʼoꞈ dehꞈ laˇ-euˬ ngaˇ” lehˇ ehˇ-eu meh.

⁹ Heˬloˆ ehˇ-eu, “Yoˇhaˬ-ahˇ ngaˬ neh uˬ duˬ toˆ tsehˆ-euˬ ma tawˇ. Aˬ suˇ gʼaˬ-euˬ gaˇ kawˆ zahˬ leˇ paˬ-ehˇ paˇ gaˬ le ta.” Kʼoeˇ naˇ, Yeˬsuˇ-ahˇ ya mawˇ ni aˬ yawꞈ leh jeh-euˬ meh.

Yeˬsuˇ tsawˇ haˬ ngaˬ heˇ gʼaˬ-ahˇ bi dzaˬ-euˬ

¹⁰ Gʼaˬ kʼehˇ deuˬ gʼoꞈ laˇ-awˇ, aˬ yawꞈ maꞈ neh mˇ yaꞈ shaˇ yaꞈ-euˬ gaˇ kawˆ Yeˬsuˇ-ahˇ dzawˇ nehˬ laˇ-euˬ meh. Aˬ yawꞈ maꞈ-ahˇ aˬ yawꞈ sheuˬ ceuˆ doˆ-awˇ, Behˬdzeˇdaˬ meuˬ-ahˇ sheuˬ gʼeh-euˬ meh.

¹¹ Gaˇ kawˆ kʼoeˇ tsawˇ haˬ aˇ maꞈ maꞈ ma ya siˬ ngeh, aˬ yawꞈ-euˬ mehˬ nah caw teh gʼeh-euˬ meh. Tsawˇ haˬ aˇ maꞈ maꞈ ma-ahˇ aˬ yawꞈ ha geuꞈ-awˇ, Miˬyehˇ Miˇkʼahˬ gaˇ kawˆ ja mehˬ-awˇ, naˇ gawˇ laˆ taˬ nehˬ paˬ-ehˇ gʼeh-eu tsawˇ haˬ deuˬ-ahˇ laˆ taˬ nehˬ-euˬ meh.

¹² Nahˇ ma ga ahˇ mawꞈ laˇ ngeh, zaˬ lahˇ tseˇ nyiꞈ gʼaˬ aˬ yawꞈ jawˇ gaˇ laˇ-awˇ ehˇ-eu, “Dawˬ peh jaˆ-eu pu deuˬ hawˇ-eu deh ma doe ni iˇ-awˇ, dzaˬ dzaˬ dawˇ dawˇ hawˇ-eu naˬ duˬ jawˇ duˬ bi shaˇ poˆ-iˇ-eu gʼaˇ duˬ, tsawˇ haˬ heu deuˬ-ahˇ pyehˬ nehˬ yamˬ tsaˬ laˇ-euˬ maˬ ngeuˇ-a loˇ. Aˬ jeˬ miˇ neh ehˇ naˇ, jawˇ duˬ heu tsahˇ-aˬ, pu-ahˇ gaˇ mahˇ kaˬ-eu meh.”

¹³ Ehˇ kʼawꞈ, Yeˬsuˇ aˬ yawꞈ maꞈ-ahˇ ehˇ-eu, “Naw maꞈ aˬ yawꞈ maꞈ-ahˇ tiˬ jeˬ paˬ biꞈ-awˇ bi dzaˬ-awˬ.” Aˬ yawꞈ maꞈ ehˇ-eu, “Nga maꞈ kaˬ muˇ ngaˬ siˬ hawˇ-eu ngaˬ shaˬ nyiˬ mawˇ ahˇ-eu tehꞈ ma. Tsawˇ haˬ heu deuˬ dawˬ tawˆ luꞈ gʼaˇ duˬ dzaˬ dzaˬ dawˇ dawˇ zeuˇ laˬ-iˇ-awˬ loˇ.”

¹⁴ Kʼoeˇ gaˇ jawˇ luꞈ-eu tsawˇ haˬ kʼoeˇ deuˬ, ngaˬ heˇ gʼaˬ ehˇ gʼaˬ ni byah-eu meh. Yeˬsuˇ zaˬ lahˇ deuˬ-ahˇ ehˇ nehˬ-eu, “Tsawˇ haˬ teu deuˬ-ahˇ, tiˬ muˇ-euˬ ngaˬ tseˇ gʼaˬ byah ni, aˇ muˇ aˇ muˇ-ehˇ bi nuiˇ-awˬ.”

¹⁵ Aˬ yawꞈ neh kʼaˇ ehˇ-euˬ loꞈ-ehˇ zaˬ lahˇ deuˬ jahˇ-awˇ, tsawˇ haˬ dawˬ tawˆ luꞈ-ahˇ bi nuiˇ taˬ-euˬ meh.

¹⁶ Kaˬ muˇ kʼoeˇ ngaˬ siˬ hawˇ-eu ngaˬ shaˬ kʼoeˇ nyiˬ mawˇ-ahˇ Yeˬsuˇ yuˇ-awˇ, mˬ paw gʼawˇ leuˇ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh. Kʼoeˇ naˇ, ngawˬ pyehˬ-awˇ, zaˬ lahˇ deuˬ-ahˇ biꞈ-awˇ, tsawˇ haˬ aˇ maꞈ-ahˇ bi biˇ nehˬ-euˬ meh.

¹⁷ Aˬ yawꞈ maꞈ dawˬ tawˆ luꞈ tiˬ dehˆ dzaˬ gʼaˬ-awˇ, maˬ dzaˬ jiˇ coeˇ-ehˇ dzeˇ laˇ-euˬ deuˬ gʼoˆ uiˬ ngeh, kʼaˆ puˬ tseˇ nyiꞈ puˬ byah laˇ-euˬ meh.

Yeˬsuˇ-aˬ Ka li meh lehˇ Beˬtuˆluˆ ehˇ-eu

¹⁸ Tiˬ poˆ-aˬ, Yeˬsuˇ tiˬ gʼaˬ tehꞈ-ehˇ guiˬ lahˬ shaˇ luꞈngeh, zaˬ lahˇ deuˬ aˬ yawꞈ jawˇ gaˇ laˇ-euˬ meh. Yeˬsuˇ aˬ yawꞈ maꞈ-ahˇ ehˇ-eu, “Aˬ cawˬ ngaˬ-ahˇ aˬ suˇ gʼaˬ nga lehˇ ehˇ luꞈ ta.”

¹⁹ Aˬ yawꞈ maꞈ aˬ yawꞈ-ahˇ ehˇ-eu, “Tsawˇ haˬ tiˬ paˆ na deuˬ nawˬ-ahˇ Iˇ cuꞈ shawˇ-eu Yoˇ haˬ nga lehˇ ehˇ-eu meh. Tiˬ paˆ na deuˬ-aˬ, Eˇliˇyaˆ nga lehˇ ehˇ-awˇ, tiˬ paˆ na deuˬ-aˬ, aˇ hu baˬ-euˬ Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ na paˇ gʼoꞈ dehꞈ laˇ-euˬ ngaˇ lehˇ ehˇ-eu meh.”

²⁰ Yeˬsuˇ aˬ yawꞈ maꞈ-ahˇ ehˇ nehˬ-eu, “Naw maꞈ toe. Ngaˇ aˬ suˇ gʼaˬ nga lehˇ ehˇ nmˇ.” Beˬtuˆluˆ ehˇ-eu, “Nawˇ-aˬ, Miˬyehˇ neh bi oe-euˬ Ka li meh.”

Yeˬsuˇ aˬ yawꞈ ya shiˇ-eu gaˇ kawˆ ehˇ-eu

²¹ Gaˇ kawˆ kʼoeˇ aˬ cawˬ tiˬ gʼaˬ-ahˇ-iˬ maˬ dzawˇ mehˬ nehˬ-eu gʼaˇ duˬ, aˬ yawꞈ maꞈ-ahˇ Yeˬsuˇ dawˬ yaw kʼaˆ kʼaˆ-ehˇ biꞈ-euˬ meh.

²² Aˬ yawꞈ ehˇ-eu, “Tsawˇhaˬ-euˬ Zaˬmaˇ-aˬ, gʼawˬ mya jeˬ-ahˇ ya daˬ dui dui-awˇ, tsawˇ mawˬ tsawˇ kʼaˆ deuˬ, piˇ ma aˬ yuiꞈ deuˬ hawˇ-eu, Zahˇ dawˬ kʼoꞈ dawˬ mehˬ-eu saˬ laˬ deuˬ neh bi byehˇ dzeh tehꞈ-a. Aˬ cawˬ neh bi sehꞈ gaˇ keuˆ ni ya daˬ tehꞈ-a. Ehˇ kʼawꞈ, smˬ nah byah laˇ naˇ, Miˬyehˇ neh aˬ yawꞈ-ahˇ paˇ bi gʼoꞈ dehꞈ laˇ tehꞈ-a.”

²³ Kʼoeˇ naˇ, aˬ yawꞈ maꞈ dawˬ tawˆ luꞈ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Tsawˇ haˬ aˬ geu gʼaˬ maˬ kaˬ, ngaˬ-euˬ mehˬ nah caw teh laˇ mawꞈ naˇ, yawˬ ha-euˬ nui kahˇ ya byehˇ dzeh-awˇ, yawˬ nah na luꞈ yawˬ ha-euˬ laꞈ yaꞈ baꞈ-awˇ ngaˬ-euˬ mehˬ nah ya laˇ meh.

²⁴ Aˬ jeˬ miˇ neh ehˇ naˇ, yawˬ ha-euˬ saꞈ laˇ dehꞈ-eu jeˬ-ahˇ ka kʼoꞈ-eu lehˇ kʼaˇ leh jeh-eu tsawˇ haˬ aˬ geu gʼaˬ maˬ kaˬ, saꞈ laˇ dehꞈ-eu jeˬ-ahˇ smˬ-iˇ tehꞈ-a. Ehˇ kʼawꞈ, ngaˬ-euˬ gʼaˇ duˬ yawˬ ha-euˬ saꞈ laˇ dehꞈ-eu jeˬ smˬ-iˇ-euˬ tsawˇ haˬ aˬ geu gʼaˬ maˬ kaˬ, saꞈ laˇ dehꞈ-eu jeˬ za tehꞈ-a.

²⁵ Tsawˇ haˬ tiˬ gʼaˬ miˇ tsaˬ tahˬ kʼawˇ heu dawˬ tawˆ luꞈ za jiˇ-euˬ kʼawꞈ, saꞈ laˇ dehꞈ-eu jeˬ smˬ naˇ, aˬ yawꞈ gʼaˇ duˬ aˬ jeˬ jiˇ jeuˬ paˇ ahˇ ta.

²⁶ Tsawˇ haˬ tiˬ gʼaˬ na, ngaˬ-ahˇ maˬ ehˇ, ngaˬ neh mehˬ nehˬ tsoˆ nehˬ-euˬ jeˬ-ahˇ maˬ ehˇ, shaꞈ dawˇ naˇ, Tsawˇhaˬ-euˬ Zaˬmaˇ kʼawꞈ, aˬ yawꞈ Aˬda-euˬ yaw shehꞈ kʼahˇ sehˇ dm-awˇ muiˬ-eu shawˇ-eu mˬ taˆ gʼaˬ kʼehˇ deuˬ nehˬ-ehˇ zaꞈ le ngeh, tsawˇ haˬ kʼoeˇ gʼaˬ-ahˇ shaꞈ dawˇ tehꞈ-a.

²⁷ Heu gaˇ jawˇ-eu tsawˇ haˬ tiˬ paˆ na deuˬ maˬ shiˇ dzeuˇ jiˇ mi naˆ-ehˇ, Miˬyehˇ Miˇkʼahˬ-ahˇ ya mawˇ tehꞈ-a lehˇ, ngaˇ naw maꞈ-ahˇ maˇ jawˆ ni ehˇ-eu ma.”

Yeˬsuˇ gʼawˇ mawˇ paˇ-euˬ

²⁸ Yeˬsuˇ kʼoeˇ loꞈ-ehˇ ehˇ gʼaˬ-awˇ yehꞈ nah byah laˇ ngeh, Beˬtuˆluˆ, Yoˇhaˬ, Yaˬkoˆ aˬ ha smˇ gʼaˬ-ahˇ tehꞈ-ehˇ sheuˬ-awˇ, gawˬ jawˬ-ahˇ guiˬ lahˬ shaˇ leˇ-euˬ meh.

²⁹ Aˬ yawꞈ guiˬ lahˬ shaˇ luꞈ ngeh, a yawꞈ-euˬ myaˆ pyawˬ paˇ laˇ-awˇ, aˬ yawꞈ-euˬ mehˬ tsoeˬ pyuˇ deuˬ ni gʼeh-awˇ, naˇ guiˇ guiˇ laˇ-eu meh;

³⁰ Kʼoeˇ ngeh, tsawˇ haˬ nyiˬ gʼaˬ aˬ yawꞈ-ahˇ dawˬ ngehˬ cawˬ luꞈ-eu meh. Moˇseˬ hawˇ-eu Eˇliˇyaˆ aˬ nyaꞈ meh.

³¹ Aˬ yawꞈ nyaꞈ mˬ taˆ-euˬ yaw shehꞈ kʼahˬ sehˇ laꞈ kʼoeˇ oe-awˇ, gʼawˬ myahˇ maˬ gʼeh-ehˇ Yeˬsuˇ Yeˬluˇsaˬlehˬ meuˬ-ahˇ ya shiˇ-awˇ, Miˬyehˇ-euˬ nui kʼahˇ byah laˇ ni ya mˇ-eu gaˇ kawˆ, Yeˬsuˇ nehˬ-ehˇ ja cawˬ luꞈ-eu meh.

³² Beˬtuˆluˆ aˬ ha maꞈ yuꞈ kʼaˆ jiˇ taˬ-euˬ meh. Aˬ yawꞈ maꞈ noeˬ laˇ ngeh, Yeˬsuˇ-euˬ yaw shehꞈ kʼahˬ sehˇ-ahˇ maˬ ehˇ, aˬ yawꞈ nehˬ-ehˇ yawꞈ luꞈ-eu tsawˇ haˬ nyiˬ gʼaˬ-ahˇ maˬ ehˇ, ya mawˇ-euˬ meh.

³³ Tsawˇ haˬ kʼoeˇ nyiˬ gʼaˬ Yeˬsuˇ-ahˇ gʼawˬ-iˇ ngeh, Beˬtuˆluˆ Yeˬsuˇ-ahˇ ehˇ nehˬ-eu, “Saˬ laˬ-oˇ, aˬ dui maꞈ heu gaˇ jawˇ-eu aˇ naˆ ni muiˬ-eu nga. Nga maꞈ sehˬ gʼawˆ smˬ gʼawˆ gʼawˆ ma. Nawˬ-euˬ gʼaˇ duˬ tiˬ gʼawˆ, Moˇseˬ gʼaˇ duˬ tiˬ gʼawˆ, Eˇliˇyaˆ gʼaˇ duˬ tiˬ gʼawˆ gʼawˆ ma.” Beˬtuˆluˆ-aˬ, yawˬ ha neh ehˇ-euˬ jeˬ-ahˇ yawˬ ha maˬ siˬ nya-a.

³⁴ Beˬtuˆluˆ kʼoeˇ loꞈ-ehˇ ehˇ luꞈ ngeh, aˬ yawꞈ maꞈ-ahˇ mˬ dmˇ joe shmˇ le-euˬ meh. Mˬ dmˇ kʼoeˇ oe tehˬ leꞈ ngeh, aˬ yawꞈ maꞈ guˆ-euˬ meh.

³⁵ Mˬ dmˇ laꞈ kʼoeˇ ehˇ doˆ laꞈ-eu, “Heu-aˬ, ngaˬ neh tseˇ doˆ-euˬ ngaˇ gaˬ dui dui-eu ngaˬ-euˬ Zaˬmaˇ ma. Aˬ yawꞈ-euˬ dawˬ-ahˇ naˇ haˬ geuꞈ-awˬ.”

³⁶ Kʼoeˇ loꞈ-ehˇ ngehˬ doˆ laˇ ngeh, Yeˬsuˇ tiˬ gʼaˬ tehꞈ-ehˇ jawˇ luꞈ gaˇ aˬ ha smˇ gʼaˬ ya mawˇ-euˬ meh. Kʼoeˇ naˇ, aˬ yawꞈ maꞈ neh ya mawˇ-euˬ gaˇ kawˆ kʼoeˇ, aˇ nah aˇ yamˬ kʼoeˇ yamˬ laꞈ kʼoeˇ aˬ cawˬ tiˬ gʼaˬ-ahˇ-iˬ maˬ ehˇ nehˬ ni, ciˬ cuˇ ni jawˇ-euˬ meh.

Nehꞈ yaw jawꞈ uˇ-eu aˬ li tiˬ li-ahˇ laˆ taˬ nehˬ-euˬ

³⁷ Yawˬ nah yawˬ, aˬ yawꞈ maꞈ gawˬ jawˬ-ahˇ neh gʼoꞈ ka le ngeh, tsawˇ haˬ aˇ maꞈ maꞈ ma Yeˬsuˇ jawˇ gaˇ laˇ-euˬ meh.

³⁸ Tsawˇ haˬ aˇ maꞈ laꞈ kʼoeˇ Yeˬsuˇ-ahˇ tiˬ gʼaˬ guˇ guˇ-ehˇ ehˇ-eu, “Saˬ laˬ-oˇ, ngaˬ li-ahˇ tiˬ poˆ haw nehˬ laꞈ lehˇ shaˇ-eu ma. Ngaˇ zaˬ heu tiˬ gʼaˬ jawˇ-eu tehꞈ ma.

³⁹ Aˬ yawꞈ-ahˇ nehꞈ uˇ-iˇ ngeh, yaw kʼaˆ-ehˇ guˇ doˆ laˇ-awˇ, kʼaˬ meh-ahˇ buiˇ muiꞈ doˆ le ngeh keuˆ ni shaˬ guˬ shaˬ caˆ gʼeu gʼeu-ehˇ bi teuˆ-awˇ, yaw kʼaˆ-ehˇ laˆ tahˬ laˆ naˇ nehˬ-eu uˬ taꞈ, yaw awˬ-ehˇ maˬ doˆ-iˇ-a.

⁴⁰ Nehꞈ kʼoeˇ mawˇ teh doˆ nehˬ laꞈ lehˇ nawˬ-euˬ zaˬ lahˇ deuˬ-ahˇ ngaˇ shaˇ-euˬ kʼawꞈ, maˬ teh doˆ nehˬ laꞈ nya-a.”

⁴¹ Yeˬsuˇ ehˇ-eu, “Jah-eu nui ma maˬ ahˇ-eu naˬ lehˬ lehˬ-eu ziˇ heu ziˇ-ahˇ dehꞈ luꞈ-eu tsawˇ haˬ deuˬ-oˇ, naw maꞈ nehˬ-ehˇ ngaˇ aˇ myah keuˆ ni paˇ ya jawˇ ta. Naw maꞈ-ahˇ ngaˇ aˇ myah keuˆ ni paˇ ya oˇ ta. Nawˬ li-ahˇ heu gaˇ sheuˬ laꞈ-awˬ.”

⁴² Aˬ li kʼoeˇ li laˇ luꞈ ngeh, nehꞈ kʼoeˇ mawˇ aˬ yawꞈ-ahˇ nyehꞈ lah-awˇ, shaˬ guˬ shaˬ caˆ bi gʼeu-euˬ meh. Nehꞈ yaw jawꞈ kʼoeˇ mawˇ-ahˇ Yeˬsuˇ dehˬ-awˇ, aˬ li kʼoeˇ li-ahˇ laˆ taˬ nehˬ-awˇ, aˬ yawꞈ-euˬ aˬ da-ahˇ a kʼoꞈ nehˬ-euˬ meh.

⁴³ Kʼoeˇ ngeh, tsawˇ haˬ dawˬ tawˆ luꞈ Miˬyehˇ-euˬ baoˬ hui dui dui gaˇ zahˬ leˇ-euˬ meh. Yeˬsuˇ neh kʼaˇ mˇ kʼaˇ shaˇ-euˬ yawˬ jeˬ na luꞈ-ahˇ tsawˇ haˬ kʼoeˇ deuˬ zahˬ leˇ-awˇ jawˇ luꞈ ngeh, zaˬ lahˇ deuˬ-ahˇ Yeˬsuˇ heu loꞈ-ehˇ ehˇ nehˬ-euˬ meh.

Yeˬsuˇ aˬ yawꞈ ya shiˇ-eu gaˇ kawˆ tiˬ poˆ paˇ ehˇ-eu

⁴⁴ “Dawˬ heu dawˬ-ahˇ naˬ bawˇ yaw muiˬ paˬ-ehˇ ciˬ kʼmˇ taˬ de. Tsawˇhaˬ-euˬ Zaˬmaˇ-ahˇ aˬ cawˬ-euˬ aˬ laꞈ laꞈ kʼoeˇ a nehˬ tehꞈ-a.”

⁴⁵ Ehˇ kʼawꞈ, dawˬ kʼoeˇ dawˬ-euˬ dawˬ tsuiꞈ-ahˇ zaˬ lahˇ deuˬ maˬ gʼoˆ shaw nya-a. Dawˬ kʼoeˇ dawˬ-aˬ, aˬ yawꞈ maꞈ maˬ gʼoˆ shaw nya ni zaꞈ taˬ-euˬ jeˬ pyeuꞈ-eu meh. Aˬ yawꞈ-ahˇ kʼawꞈ, aˬ yawꞈ maꞈ dawˬ tsuiꞈ maˬ naˇ haˬ peuˬ-a.

Aˬ geuˬ gʼaˬ aˬ cawˬ naˆ maˬ tseˇ huiˬ ta

⁴⁶ Aˬ yawꞈ maꞈ laꞈ kʼoeˇ aˬ geu gʼaˬ aˬ cawˬ naˆ maˬ tseˇ huiˬ dzehˬ-eu gaˇ kawˆ, zaˬ lahˇ deuˬ tsawˇ pyehˇ pyehˇ-eu meh.

⁴⁷ Aˬ yawꞈ maꞈ-euˬ nui noeˬ Yeˬsuˇ haw mawˇ-euˬ miˇ neh, zaˬ yaw nyiˇ tiˬ gʼaˬ-ahˇ aˬ yawꞈ-euˬ dawˬ peh sheuˬ taˬ-awˇ,

⁴⁸ aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “Ngaˬ-euˬ tsawˇ myahˇ uˬ moˆ zaˬ yaw nyiˇ heu gʼaˬ-ahˇ kʼaˇ ha geuꞈ-eu tsawˇ haˬ-aˬ, ngaˬ-ahˇ ha geuꞈ gaˇ duˇ-eu meh. Ngaˬ-ahˇ kʼaˇ ha geuꞈ-eu tsawˇ haˬ-aˬ, ngaˬ-ahˇ kʼehˇ gʼeh leꞈ-euꞈ gʼaˬ-ahˇ kʼawꞈ ha geuꞈ gaˇ duˇ-eu meh. Aˬ jeˬ miˇ neh ehˇ naˇ, naw maꞈ laꞈ kʼoeˇ aˬ cawˬ naˆ maˬ tseˇ nyiˇ dzehˬ-eu gʼaˬ-aˬ, aˬ cawˬ naˆ maˬ tseˇ huiˬ dzehˬ-eu gʼaˬ pyeuꞈ-eu meh.”

Naw maꞈ jawˇ paw pyawˬ-eu tsawˇhaˬ

⁴⁹ Yoˇhaˬ ehˇ-eu, “Saˬlaˬ-oˇ, tsawˇ haˬ tiˬ gʼaˬ nawˬ-euˬ tsawˇ myahˇ uˬ moˆ nehꞈ teh doˆ luꞈ gaˇ nga maꞈ ya mawˇ-awˇ, kʼoeˇ loꞈ-ehˇ maˬ bi jahˇ ni laˆ tsoeˬ nehˬ-euˬ ma. Aˬ jeˬ miˇ neh ehˇ naˇ, aˬ yawꞈ-aˬ, aˬ dui aˇ muˇ mehˬ nah caw teh-eu tsawˇ haˬ maˬ ngeuˇ-a.”

⁵⁰ Ehˇ kʼawꞈ, aˬ yawꞈ-ahˇ Yeˬsuˇ ehˇ nehˬ-eu, “Tsawˇ haˬ kʼoeˇ gʼaˬ-ahˇ taˬ laˆ tsoeˬ. Aˬ jeˬ miˇ neh ehˇ naˇ, naw maꞈ-ahˇ muiˇ-eu deuˬ jawˇ paw maˬ pyawˬ-eu tsawˇ haˬ-aˬ, naw maꞈ jawˇ paw pyawˬ-eu tsawˇ haˬ meh.”

Saˬmaˬliˆ pu tiˬ pu Yeˬsuˇ-ahˇ maˬ ha geuꞈ-eu

⁵¹ Yeˬsuˇ-ahˇ mˬ kʼoeˇ taˆ bi ha kʼoꞈ daˇ leꞈ-eu aˇ yamˬ dawˬ peh peh laˇ ngeh, Yeˬluˇsaˬlehˬ meuˬ-ahˇ le-eu gʼaˇ duˬ aˬ yawꞈ noeˬ tsehˆ-euˬ meh.

⁵² Aˬ yawꞈ-euˬ mehˬ hu tsawˇ haˬ tiˬ deuˬ-ahˇ aˬ yawꞈ kʼehˇ gʼeh-euˬ meh. Tsawˇ haˬ kʼoeˇ deuˬ aˬ yawꞈ-euˬ gʼaˇ duˬ yuꞈ zaˇ jawˇ zaˇ laˆ saˆ taˬ leˇ-eu lehˇ, Saˬmaˬliˆ tsawˇ haˬ-euˬ pu tiˬ pu-ahˇ uˇ leˇ-euˬ meh.

⁵³ Ehˇ kʼawꞈ, aˬ yawꞈ Yeˬluˇsaˬlehˬ meuˬ-ahˇ le luꞈ-eu miˇ neh, pu zaˬ deuˬ aˬ yawꞈ-ahˇ maˬ ha geuꞈ-a.

⁵⁴ Aˬ yawꞈ-euˬ zaˬ lahˇ Yaˬkoˆ hawˇ-eu Yoˇhaˬ aˬ nyaꞈ kʼoeˇ gaˇ ya mawˇ ngeh, heu loꞈ-ehˇ ehˇ-eu meh. “Sahˬ paˬ-oˇ, mˬ kʼoeˇ taˆ neh miˬ dzaˬ bi ga le-awˇ, aˬ yawꞈ maꞈ-ahˇ puiˆ dzaˬ jiˇ ni nga nyaꞈ jahˇ-awˬ loˇ.”

⁵⁵ Yeˬsuˇ aˬ yawꞈ nyaꞈ jawˇ paw ciˬ pyawˇ-awˇ dehˬ-euˬ meh.

⁵⁶ Kʼoeˇ naˇ, yawˬ pu yawˬ-ahˇ aˬ yawꞈ maꞈ le-euˬ meh.

Yeˬsuˇ-euˬ mehˬ nah caw teh gʼeh mawꞈ-eu deuˬ

⁵⁷ Aˬ yawꞈ maꞈ gaˇ pehˇ-ahˇ le luꞈ ngeh, tsawˇ haˬ tiˬ gʼaˬ Yeˬsuˇ-ahˇ ehˇ-eu, “Nawˇ kʼaˇ iˇ gaˇ nawˬ-euˬ mehˬ nah ngaˇcaw teh ma.”

⁵⁸ Yeˬsuˇ aˬ yawꞈ-ahˇ ehˇ nehˬ-eu, “Byaˬ hiˇ-aˬ, bahˬ baw meh. Aˇ jiˇ kʼawꞈ bahˬ baw meh. Ehˇ kʼawꞈ, Tsawˇhaˬ-euˬ Zaˬmaˇ-aˬ, uˬ duˬ baꞈ daˇ-awˇ naˬ kʼaˇ tiˬ gaˇ-iˬ maˬ za-a.”

⁵⁹ Kʼoeˇ naˇ, yawˬ gʼaˬ yawˬ-ahˇ aˬ yawꞈ ehˇ nehˬ-eu, “Ngaˬ-euˬ mehˬ nah caw teh laˇ-awˬ.” Ehˇ kʼawꞈ, tsawˇ haˬ kʼoeˇ gʼaˬ, Ehˇ kʼawꞈ, tsawˇ haˬ kʼoeˇ gʼaˬ ehˇ-eu, “Sahˬpaˬ-oˇ, ngaˬ da shiˇ-euˬ jeˬ huˬ bi baꞈ pahˬ-iˇ laꞈ-awˬ.”

⁶⁰ Yeˬsuˇ aˬ yawꞈ-ahˇ ehˇ nehˬ-eu, “Shiˇ-euˬ tsawˇ haˬ deuˬ-ahˇ shiˇ-euˬ deuˬ neh bi baꞈ pahˬ luꞈ-uˇ. Ehˇ kʼawꞈ, nawˇ-aˬ, Miˬyehˇ Miˬkʼahˬ gaˇ kawˆ mehˬ-iˇ-awˬ.”

⁶¹ Yawˬ gʼaˬ yawˬ paˇ ehˇ-eu, “Sahˬpaˬ-oˇ, nawˬ-euˬ mehˬ nah ngaˇ caw teh laˇ ma. Ehˇ kʼawꞈ, ngaˬ-ahˇ tiˬ poˆ bi gʼoꞈ-iˇ laꞈ-awˇ, ngaˬ- euˬ nymˇ kʼahˬ zaˬ deuˬ-ahˇ dawˬ tsaꞈ dawˬ dzawˇ tiˬ poˆ bi mˇ-iˇ laꞈ.”

⁶² Yeˬsuˇ aˬ yawꞈ-ahˇ ehˇ nehˬ-eu, “Nyoˬ tsehˬ laꞈ yoeˬ-ahˇ tuˆ tehˬ-awˇ nahˇ gʼoꞈ gʼoꞈ haw-eu tsawˇ haˬ-aˬ, Miˬyehˇ Miˇkʼahˬ-ahˇ maˬ geuˇ-a.”