Luˇkaꞈ 8 - Akha

Yeˬsuˇ nehˬ-ehˇ iˇ-euˬ zaˬ miˬ zaˬ deuˬ

¹ Kʼoeˇ naˇ, gʼawˬ myahˇ maˬ gʼeh-ehˇ, tiˬ meuˬ saˇ-iˬ tiˬ meuˬ, tiˬ pu saˇ-iˬ tiˬ pu, Yeˬsuˇ iˇ-awˇ, Miˬyehˇ Miˇkʼahˬ gaˇ kawˆ Laˬ kʼaˬ cehˇ-eu Guiˬ lahˬ dawˬ mehˬ mehˬ-ehˇ cah-euˬ meh. Zaˬ lahˇ tseˇ nyiꞈ gʼaˬ kʼawꞈ, aˬ yawꞈ nehˬ-ehˇ iˇ-euˬ meh.

² Zaˬ miˬ zaˬ tiˬ deuˬ kʼawꞈ, aˬ yawꞈ nehˬ-ehˇ iˇ-euˬ meh. Zaˬ miˬ zaˬ kʼoeˇ deuˬ-aˬ, Yeˬsuˇ neh nehꞈ bi teh doˆ-euˬ deuˬ hawˇ-eu, naˇ gawˇ gʼawˬ mya jeˬ bi laˆ taˬ-euˬ deuˬ pyeuꞈ-eu meh. Aˬ yawꞈ maꞈ-aˬ, nehꞈ shiꞈ mawˇ uˇ-eu bi teh doˆ-euˬ gʼaˬ pyeuꞈ-eu Maˬgaˬdaˬlaˇ lehˇ kuˇ-euˬ Maˬliˇ tiˬ gʼaˬ,

³ Heˬloˆ-euˬ saˇ naˇ-ahˇ gaˇ mˇ-eu Kuˇzaˬ-euˬ nymˇ dahˬ Yoˇaˬnaˆ tiˬ gʼaˬ, Suˬsaˇnaˬ tiˬ gʼaˬ hawˇ-eu, nui deuˬ gʼawˬ mya gʼaˬ meh. Zaˬ miˬ zaˬ kʼoeˇ deuˬ-aˬ, yawˬ ha kʼaˇ jaˆ-eu jeˬ yuˇ doˆ-awˇ, Yeˬsuˇ hawˇ-eu aˬ yawꞈ-euˬ zaˬ lahˇ deuˬ-ahˇ caw ba nehˬ-euˬ meh.

Siˬ yoeˬ sehˬ-eu gaˇ kawˆ yaw jeˬ ma jeˬ

⁴ Meuˬ tiˬ meuˬ saˇ-iˬ tiˬ meuˬ-ahˇ jawˇ-eu tsawˇ haˬ deuˬ Yeˬsuˇ jawˇ gaˇ laˇ-awˇ, tsawˇ haˬ aˇ maꞈ maꞈ ma uiˬ laˇ ngeh, Yeˬsuˇ yaw jeˬ ma jeˬ heu hmˬ ja mehˬ nehˬ-euˬ meh.

⁵ “Tiˬ poˆ-aˬ, tsawˇ haˬ tiˬ gʼaˬ siˬ yoeˬ sehˬ-iˇ-euˬ meh. Aˬ yawꞈ siˬ yoeˬ sehˬ ngeh, siˬ yoeˬ tiˬ paˆ na deuˬ gaˇ ma-ahˇ ga-iˇ-awˇ, aˬ cawˬ neh bi nawˬ-euˬ uˬ taꞈ, kʼoeˇ taˆ zaw-eu aˇ jiˇ deuˬ neh bi gʼoˆ dzaˬ jiˇ-euˬ meh.

⁶ Siˬ yoeˬ tiˬ paˆ na deuˬ-aˬ, kʼaˬ lo lo yaˇ-ahˇ ga-iˇ-awˇ, dehꞈ laˇ-euˬ meh. Ehˇ kʼawꞈ, miˇ tsaˬ yaw gui miˇ neh, nyoeˬ-iˇ koˆ-iˇ-euˬ meh.

⁷ Siˬ yoeˬ tiˬ paˆ na deuˬ-aˬ, aˬ gah gah yaˇ-ahˇ ga-iˇ-awˇ, aˬ gah baw duˆ neh bi uˆ tehˬ-euˬ meh.

⁸ Siˬ yoeˬ tiˬ paˆ na deuˬ-aˬ, miˇ tsaˬ miˇ muiˬ muiˬ gaˇ ga-iˇ-awˇ, muiˬ le loˆ le-euˬ miˇ neh, tiˬ yaˇ bymˇ za le-euˬ meh.” Yeˬsuˇ teˇ saˇ ui cuiˆ yaw kʼaˆ-ehˇ guˇ-awˇ ehˇ-eu, “Naˬ bawˇ kʼaˇ tsoꞈ-eu deuˬ naˇ haˬ-awˬ.”

Aˬ jeˬ miˇ neh yaw jeˬ ma jeˬ ya ja mehˬ ta

⁹ Yaw jeˬ ma jeˬ kʼoeˇ hmˬ-euˬ dawˬ tsuiꞈ, Yeˬsuˇ-ahˇ zaˬ lahˇ deuˬ naˇ haˬ-euˬ meh.

¹⁰ Yeˬsuˇ aˬ yawꞈ maꞈ-ahˇ ehˇ nehˬ-eu, “Miˬyehˇ Miˇkʼahˬ gaˇ kawˆ aˬ cawˬ maˬ gʼoˆ shaw nya-eu zaꞈ taˬ-euˬ jeˬ-ahˇ gʼoˆ shaw nya-eu tsawˇ gahˇ deuˬ, naw maꞈ-ahˇ biꞈ taˬ gʼaˬ-euˬ meh. Ehˇ kʼawꞈ, nui deuˬ-aˬ, ya mawˇ-euˬ kʼawꞈ maˬ siˬ nya-ehˇ, ya gaˬ-euˬ kʼawꞈ maˬ gʼoˆ shaw nya-eu miˇ neh, yaw jeˬ ma jeˬ ja-awˇ ya mehˬ nehˬ-eu meh.

Siˬ yoeˬ sehˬ-eu gaˇ kawˆ-euˬ dawˬ tsuiꞈ ja mehˬ nehˬ-euˬ

¹¹ “Yaw jeˬ ma jeˬ heu hmˬ-euˬ dawˬ tsuiꞈ-aˬ, heu loꞈ-ehˇ meh. Siˬ yoeˬ-aˬ, Miˬyehˇ-euˬ dawˬ meh.

¹² Gaˇ ma-ahˇ ga-iˇ-euˬ siˬ yoeˬ lehˇ ehˇ-eu-aˬ, Miˬyehˇ-euˬ dawˬ kawˬ-ahˇ ya gaˬ-euˬ kʼawꞈ, Nehꞈsahˬpaˬ oe-awˇ, aˬ yawꞈ maꞈ-euˬ nui ma laꞈ kʼoeˇ ahˇ-eu dawˬ kʼoeˇ yuˇ doˆ gʼeh-euˬ miˇ neh, aˬ yawꞈ maꞈ maˬ jah-ehˇ, ka kʼoꞈ-eu jeˬ maˬ za-eu tsawˇ haˬ deuˬ-ahˇ ehˇ mawꞈ-eu meh.

¹³ Kʼaˬ lo lo yaˇ-ahˇ ga-iˇ-euˬ siˬ yoeˬ lehˇ ehˇ-eu-aˬ, Miˬyehˇ-euˬ dawˬ kawˬ ya gaˬ ngeh, laˬ kʼaˬ tiˬ cehˇ ha geuꞈ-euˬ kʼawꞈ, duˬ ciˇ maˬ toeˬ ziꞈ nya-eu miˇ neh, tiˬ kʼehˇ laˇ kʼehˬ tehꞈ-ehˇ jah-awˇ, muˇ juˇ juˇ-eu jeˬ keuˆ le ngeh, coˬ-iˇ-eu meh.

¹⁴ Aˬ gah gah yaˇ-ahˇ ga-iˇ-euˬ siˬ yoeˬ lehˇ ehˇ-eu-aˬ, Miˬyehˇ dawˬ kawˬ-ahˇ ya gaˬ-euˬ kʼawꞈ, shiˬ shaˬ jiˇ-ahˇ taꞈ-eu kʼahˬ lahˇ-eu nui ma, pyuˇ shuiˇ myawˬ gahˬ-ahˇ gaˬ-eu nui ma hawˇ-eu, byawˬ gʼa mo gʼa gaˇ gaˬ-eu nui kʼahˇ neh bi uˆ tehˬ-awˇ, aˇ siˬ maˬ siˬ le nya-eu tsawˇ haˬ deuˬ-ahˇ ehˇ mawꞈ-eu meh.

¹⁵ Miˇ tsaˬ miˇ muiˬ muiˬ gaˇ ga-iˇ-euˬ siˬ yoeˬ lehˇ ehˇ-eu-aˬ, Miˬyehˇ dawˬ kawˬ-ahˇ ya gaˬ ngeh, dawˇ coe ni gʼeh-eu muiˬ-eu jaˬ-eu nui ma laꞈ kʼoeˇ jeˬ hmˬ taˬ-awˇ, aˇ siˬ siˬ le ngeh keuˆ ni dawˬ kʼoeˇ deuˬ-ahˇ ziꞈ dah ni nyehꞈ tehˬ taˬ-eu tsawˇ haˬ deuˬ-ahˇ ehˇ mawꞈ-eu meh.

Tsiˇ kʼmˬ doꞈ-awˇ kʼaˆ puˬ moꞈ tsahˬ-eu

¹⁶ “Tsawˇ haˬ tiˬ gʼaˬ-iˬ tsiˇ kʼmˬ doꞈ-awˇ kʼaˆ puˬ neh maˬ moꞈ tsahˬ-aˇ. Jaˆ ciˬ uˬ moˆ kʼawꞈ maˬ ciˬ taˬ-aˇ. Ehˇ kʼawꞈ, kʼaˇ uˇ laˇ-eu tsawˇ haˬ deuˬ mawˇ nya ni, ciˇ kʼmˬ doꞈ taˬ duˬ-ahˇ ciˬ daˆ taˬ tehꞈ-a.

¹⁷ “Kʼaˇ zaꞈ taˬ-euˬ yawˬ jeˬ na luꞈ, bya cehˆ ni gʼeh gaˇ yuˇ doˆ laꞈ-awˇ, kʼaˇ dehˬ kaˬ taˬ-euˬ yawˬ jeˬ na luꞈ mawˇ awˇ, yaw bya-ahˇ yuˇ doˆ laꞈ tehꞈ-a.

¹⁸ “Naw maꞈ ya gaˬ-euˬ gaˇ kawˆ heu-ahˇ yaw muiˬ paˬ-ehˇ noeˬ gahˇ-awˬ. Aˬ jeˬ miˇ neh ehˇ naˇ, jaˆ-eu tsawˇ haˬ-ahˇ paˇ biꞈ lahˬ nehˬ-awˇ, maˬ jaˆ-eu tsawˇ haˬ-ahˇ-aˬ, yawˬ ha neh jaˆ ma lehˇ kʼaˇ noeˬ taˬ-euˬ dawˬ tawˆ luꞈ yuˇ jiˇ nehˬ tehꞈ-a.”

Yeˬsuˇ-euˬ aˬ ma hawˇ-eu mehˇ nmˇ deuˬ

¹⁹ Yeˬsuˇ-euˬ aˬ ma hawˇ-eu mehˇ nmˇ deuˬ aˬ yawꞈ jawˇ gaˇ oe keuˆ-euˬ meh. Ehˇ kʼawꞈ, tsawˇ haˬ tiˬ teuˇ jawˇ-eu miˇ neh, aˬ yawꞈ jawˇ gaˇ maˬ jiˆ peh leˇ nya-a. Aˬ cawˬ Yeˬsuˇ-ahˇ ehˇ nehˬ-eu,

²⁰ “Nawˬ ma hawˇ-eu nawˬ-euˬ mehˇ nmˇ deuˬ nawˬ-ahˇ dawˬ ngehˬ cawˬ mawꞈ nya lehˇ, laꞈ nyiˇ yawꞈ luꞈ meh.”

²¹ Yeˬsuˇ aˬ yawꞈ maꞈ-ahˇ ehˇ nehˬ-eu, “Miˬyehˇ dawˬ kawˬ-ahˇ gaˬ-awˇ naˇ haˬ geuꞈ-eu tsawˇ haˬ deuˬ-aˬ, ngaˬ ma hawˇ-eu ngaˬ-euˬ mehˇ nmˇ pyeuꞈ-eu ma.”

Yeˬsuˇ jaˬ lehˇ lehˇ ma-ahˇ bi naˬ leˇ-euˬ

²² Tiˬ nah-aˬ, Yeˬsuˇ aˬ yawꞈ-euˬ zaˬ lahˇ deuˬ nehˬ-ehˇ lawˬ-ahˇ dziˬ-awˇ, “Lah nui baˬ-ahˇ tsehˆ-iˇ kaˇ-euˇ” lehˇ ehˇ-awˇ iˇ-euˬ meh.

²³ Aˬ yawꞈ maꞈ lawˬ dziˬ-awˇ iˇ luꞈ ngeh, Yeˬsuˇ yuꞈ kʼaˆ-euˬ meh. Ja pyuˬ ni, lah kʼoeˇ taˆ jaˬ lehˇ lehˇ ma baw gʼeh leꞈ-awˇ, lawˬ laꞈ kʼoeˇ iˇ cuꞈ dahˬ byah laˇ luꞈ-eu miˇ neh, aˬ yawꞈ maꞈ ga nuiꞈ-iˇ paˬ-ehˇ pyeuꞈ laˇ taˬ-euˬ meh.

²⁴ Aˬ yawꞈ maꞈ Yeˬsuˇ-ahˇ laˆ noeˬ-iˇ-awˇ, “Saˬ laˬ-oˇ, saˬ laˬ-oˇ, nga maꞈ ya shiˇ jiˇ-eu keuˆ le-euˬ miˇ-a” lehˇ ehˇ nehˬ-euˬ meh. Kʼoeˇ ngeh, aˬ yawꞈ noeˬ laˇ-awˇ, jaˬ lehˇ hawˇ-eu iˇ luˆ dzeh gaˇ dehˬ ngeh, naˬ leˇ jiˇ-awˇ, ciˬ cuˇ ni pyeuꞈ-iˇ-euˬ meh.

²⁵ “Naw maꞈ-euˬ jah-eu nui ma aˬ lehˬ” lehˇ, aˬ yawꞈ maꞈ-ahˇ aˬ yawꞈ dehˬ-euˬ meh. Kʼoeˇ ngeh, aˬ yawꞈ maˬ guˆ-awˇ zahˬ leˇ-eu laꞈ kʼoeˇ, tiˬ gʼaˬ tiˇ gʼaˬ ehˇ-eu, “Tsawˇ haˬ heu gʼaˬ aˬ suˇ gʼaˬ nga. Jaˬ lehˇ hawˇ-eu iˇ cuꞈ-ahˇ aˬ yawꞈ dawˬ biꞈ ngeh, aˬ yawꞈ-euˬ dawˬ-ahˇ naˇ haˬ-eu nga.”

Nehꞈ uˇ-eu tsawˇ haˬ tiˬ gʼaˬ-ahˇ Yeˬsuˇ laˆ taˬ nehˬ-euˬ

²⁶ Yeˬsuˇ hawˇ-eu aˬ yawꞈ-euˬ zaˬ lahˇ deuˬ, Gaˬliˬlehˇ miˇ kʼahˬ-euˬ nui baˬ paw jaˆ-eu Geˬlaˬsaˬ miˇ kʼahˬ -ahˇ lawˬ dziˬ-awˇ iˇ-euˬ meh.

²⁷ Aˬ yawꞈ lawˬ laꞈ kʼoeˇ neh lawˇ dzeˇ-ahˇ doˆ leˇ-eu nehˬ-ehˇ, meuˬ kʼoeˇ meuˬ-ahˇ jawˇ-eu nehꞈ uˇ-eu tsawˇ haˬ tiˬ gʼaˬ-ahˇ tahˬ puˬ-euˬ meh. Tsawˇ haˬ kʼoeˇ gʼaˬ mehˬ tsoeˬ maˬ dm-ehˇ, iˇ kahˇ-ahˇ maˬ jawˇ ni, lmˬ bymˇ lo kʼahˬ-ahˇ tehꞈ-ehˇ jawˇ luꞈ-eu myahˇ dui dui laˇ-euˬ meh.

²⁸ Tsawˇ haˬ kʼoeˇ gʼaˬ Yeˬsuˇ-ahˇ ya mawˇ ngeh, guˇ guˇ-ehˇ Yeˬsuˇ-euˬ mehˬ shi ga byaˆ-awˇ, “Huiˬ dui Mahˇ dui dui-eu Miˬyehˇ-euˬ Zaˬmaˇ pyeuꞈ-eu Yeˬsuˇ-oˇ, nawˇ ngaˬ-ahˇ aˬ jeˬ taꞈ te. Ngaˬ-ahˇ taˬ kʼehˬ taˬ kʼaˆ nehˬ laꞈ lehˇ nawˬ-ahˇ shaˇ-eu ma” lehˇ, guˇ guˇ-ehˇ ehˇ-eu meh.

²⁹ Nehꞈ yaw jawꞈ kʼoeˇ mawˇ-ahˇ tsawˇ haˬ kʼoeˇ gʼaˬ laꞈ kʼoeˇ neh doˆ-iˇ-eu gʼaˇ duˬ Yeˬsuˇ dawˬ biꞈ-euˬ miˇ neh, aˬ yawꞈ kʼoeˇ loꞈ-ehˇ ehˇ-eu meh. Aˬ yawꞈ-ahˇ shmˇ caˆ neh kuiˇ cuꞈ laꞈ cuꞈ cuꞈ-awˇ paꞈ tawꞈ taˬ-euˬ kʼawꞈ, nehꞈ kʼoeˇ mawˇ aˬ yawꞈ laꞈ kʼoeˇ tiˬ kʼehˬ maˬ taˬ ni uˇ le ngeh, shmˇ caˆ kʼoeˇ deuˬ teuˆ tsehˆ jiˇ-awˇ, nehꞈ kʼoeˇ mawˇ neh bawˇ tsahˬ bawˇ dahˇ paw bi teh byoˆ gʼeh-eu meh.

³⁰ “Nawˬ-euˬ tsawˇ myahˇ aˬ joˆ-ehˇ myahˇ teˬ” lehˇ Yeˬsuˇ naˇ haˬ ngeh, “Ngaˬ-euˬ tsawˇ myahˇ ‘Yehˇ yehˇ maꞈ’ lehˇ myahˇ-euˬ ma” lehˇ aˬ yawꞈ ehˇ-eu meh. Nehꞈ gʼawˬ mya ni aˬ yawꞈ laꞈ kʼoeˇ uˇ luꞈ-eu miˇ neh, aˬ yawꞈ kʼoeˇ loꞈ-ehˇ ehˇ-eu meh.

³¹ Nehꞈ kʼoeˇ deuˬ Yeˬsuˇ-ahˇ shaˇ-eu, “Naꞈ dui dui-eu shiˬ buiˇ lah ma -ahˇ taˬ bi uˇ-iˇ nehˬ laꞈ.” lehˇ, nehꞈ kʼoeˇ deuˬ Yeˬsuˇ-ahˇ shaˇ-eu meh.

³² Aˬ yawꞈ maꞈ jawˇ-eu dawˬ peh gawˬ jawˬ baˬ gʼa-ahˇ, myaˬ dui dui-eu aˬ zaꞈ tiˬ maꞈ gaˆ luꞈ-eu meh. Aˬ zaꞈ kʼoeˇ maꞈ-euˬ laꞈ kʼoeˇ bi uˇ-iˇ laꞈ lehˇ, nehꞈ kʼoeˇ deuˬ Yeˬsuˇ-ahˇ shaˇ ngeh, aˬ yawꞈ maꞈ-ahˇ aˬ zaꞈ kʼoeˇ deuˬ laꞈ kʼoeˇ bi uˇ-iˇ-euˬ meh.

³³ Nehꞈ kʼoeˇ deuˬ tsawˇ haˬ kʼoeˇ gʼaˬ-euˬ laꞈ kʼoeˇ neh doˆ-iˇ-awˇ, aˬ zaꞈ kʼoeˇ deuˬ laꞈ kʼoeˇ uˇ-iˇ-euˬ meh. Kʼoeˇ ngeh, aˬ zaꞈ kʼoeˇ maꞈ maꞈ lah-ehˇ, gawˬ jawˬ baˬ gʼa gʼa pyaꞈ-ahˇ sehˇ ka gʼeh-awˇ, lah-ahˇ ga puꞈ sehꞈ jiˇ-euˬ meh.

³⁴ Aˬ zaꞈ bo luꞈ-eu tsawˇ haˬ deuˬ kʼoeˇ gaˇ mawˇ ngeh, cehˆ coeˬ coeˬ kʼoꞈ gʼeh-awˇ, meuˬ doe pu doe ni gaˇ kawˆ kʼoeˇ ja byah-iˇ-euˬ meh.

³⁵ Tsawˇ haˬ gʼawˬ mya ni aˬ joˆ-ehˇ pyeuꞈ laˇ-euˬ gaˇ haw le-eu lehˇ oe-awˇ, Yeˬsuˇ-euˬ dawˬ peh oe keuˆ ngeh, nehꞈ bi teh doˆ-euˬ tsawˇ haˬ kʼoeˇ gʼaˬ paˇ muiˬ kʼoꞈ laˇ-awˇ, mehˬ tsoeˬ yaw muiˬ-ehˇ dm-awˇ Yeˬsuˇ-euˬ aˬ kuiˇ dawˬ peh nuiˇ luꞈ gaˇ ya mawˇ-euˬ miˇ neh, aˬ yawꞈ maꞈ guˆ dui dui-iˇ-euˬ meh.

³⁶ Kʼaˇ pyeuꞈ laˇ-euˬ jeˬ-ahˇ ya mawˇ-euˬ tsawˇ haˬ deuˬ neh, nehꞈ uˇ-eu tsawˇ haˬ kʼoeˇ gʼaˬ-ahˇ aˬ joˆ-ehˇ laˆ taˬ nehˬ-euˬ gaˇ kawˆ kʼoeˇ, aˬ yawꞈ maꞈ-ahˇ dzawˇ mehˬ nehˬ-euˬ meh.

³⁷ Miˇ kʼahˬ kʼoeˇ kʼahˬ-ahˇ kʼaˇ jawˇ-eu tsawˇ haˬ dawˬ tawˆ luꞈ guˆ dui dui-awˇ, Yeˬsuˇ-ahˇ aˬ yawꞈ maꞈ-euˬ miˇ kʼahˬ laꞈ kʼoeˇ neh doˆ-iˇ nehˬ laꞈ lehˇ shaˇ-eu meh. Kʼoeˇ ngeh, Yeˬsuˇ lawˬ dziˬ-awˇ doˆ-iˇ-euˬ meh.

³⁸ Nehꞈ teh doˆ nehˬ-euˬ tsawˇ haˬ kʼoeˇ gʼaˬ Yeˬsuˇ-ahˇ ehˇ-eu, “Ngaˬ-ahˇ nawˬ nehˬ-ehˇ bi oe laꞈ.” Ehˇ kʼawꞈ, Yeˬsuˇ aˬ yawꞈ-ahˇ heu loꞈ-ehˇ ehˇ nehˬ-awˇ bi gʼoꞈ-iˇ-euˬ meh.

³⁹ “Iˇ kahˇ-ahˇ gʼoꞈ-iˇ-awˇ, Miˬyehˇ neh nawˬ-ahˇ aˬ joˆ-ehˇ jahˇ nehˬ laꞈ-euˬ gaˇ kawˆ ja mehˬ-iˇ-awˬ.” Kʼoeˇ ngeh, tsawˇ haˬ kʼoeˇ gʼaˬ gʼoꞈ-iˇ-awˇ, aˬ yawꞈ gʼaˇ duˬ Yeˬsuˇ neh aˇ naˆ ni mˇ nehˬ-euˬ gaˇ kawˆ, meuˬ doe-iˇ ni dzawˇ gaˬ-euˬ meh.

Yaˬiˇluˆ-euˬ aˬ buˇ hawˇ-eu Yeˬsuˇ-euˬ pehˇ kʼahˬ-ahˇ toeˬ ciˆ-euˬ zaˬ miˬ zaˬ

⁴⁰ Yeˬsuˇ lah nui baˬ-ahˇ gʼoꞈ keuˆ-iˇ ngeh, tsawˇ haˬ aˇ maꞈ aˬ yawꞈ-ahˇ laˬ kʼaˬ tiˬ cehˇ ha-euˬ meh. Aˬ jeˬ miˇ neh ehˇ naˇ, aˬ yawꞈ maꞈ aˬ yawꞈ-ahˇ dawˬ luꞈ gaˇ tsaˬ leˇ-euˬ meh.

⁴¹ Kʼoeˇ ngeh, Yaˬiˇluˆ lehˇ myahˇ-euˬ tsawˇ haˬ tiˬ gʼaˬ oe keuˆ-euˬ meh. Aˬ yawꞈ-aˬ, Yuˇdaˆ tsawˇ haˬ-euˬ uˬ duˬ tahˬ nymˇ-ahˇ uˆ lahˇ-eu aˬ yuiꞈ aˬ tsu tiˬ gʼaˬ pyeuꞈ-eu meh. Yeˬsuˇ-euˬ aˬ kuiˇ dawˬ peh awˆ byaˆ-awˇ, aˬ yawꞈ-euˬ iˇ kahˇ-ahˇ oe nehˬ laꞈ lehˇ shaˇ-eu meh.

⁴² Aˬ jeˬ miˇ neh ehˇ naˇ, tseˇ nyiꞈ kʼoꞈ kʼawˆ laˇ-euˬ aˬ yawꞈ-euˬ aˬ buˇ shiˇ leˇ luꞈ-eu meh. Aˬ yawꞈ-aˬ, aˬ buˇ kʼoeˇ buˇ jawˇ-eu tehꞈ meh. Yeˬsuˇ kʼoeˇ gaˇ iˇ luꞈ ngeh, tsawˇ haˬ aˇ maꞈ aˬ yawꞈ jawˇ gaˇ tah uˇ laˇ luꞈ-eu meh.

⁴³ Tseˇ nyiꞈ kʼoꞈ keuˆ ni shiˬ doˆ-eu naˇ gawˇ-ahˇ maˬ tsehˆ leˇ ni ya daˬ luꞈ-eu zaˬ miˬ zaˬ tiˬ gʼaˬ jawˇ-eu meh. Aˬ yawꞈ kʼaˇ jaˆ-eu jeˬ dawˬ tawˆ luꞈ ahˬ dzeh jiˇ-awˇ, jaˆ gʼaˬ yaˇ-eu saˬ laˬ gʼoˬ deuˬ neh bi yaˇ-euˬ kʼawꞈ, tiˬ gʼaˬ-iˬ maˬ yaˇ taˬ nehˬ nya-a.

⁴⁴ Aˬ yawꞈ Yeˬsuˇ-euˬ mehˬ nah miˇ ni caw teh leˇ-awˇ, Yeˬsuˇ-euˬ pehˇ kʼahˬ pehˇ dahˬ-ahˇ toeˬ ciˆ ngeh, aˬ yawꞈ shiˬ doˆ-eu tiˬ poˆ tehꞈ-ehˇ tsiˇ leˇ-euˬ meh.

⁴⁵ Kʼoeˇ ngeh, “Ngaˬ-ahˇ toeˬ ciˆ-euˬ aˬ suˇ gʼaˬ-a” lehˇ Yeˬsuˇ ehˇ-eu meh. Tsawˇ haˬ tiˬ gʼaˬ-iˬ Yeˬsuˇ-ahˇ toeˬ ciˆ-euˬ ma lehˇ maˬ ehˇ-a. Beˬtuˆluˆ ehˇ-eu, “Sahˬpaˬ-oˇ, nawˬ-euˬ tiˬ jawˬ tsawˇ haˬ tiˬ teuˇ jawˇ-awˇ, nawˇ jawˇ gaˇ tah uˇ laˇ luꞈ nga tawˇ.”

⁴⁶ Ehˇ kʼawꞈ, Yeˬsuˇ ehˇ-eu, “Tsawˇ haˬ tiˬ gʼaˬ ngaˬ-ahˇ toeˬ ciˆ-euˬ meh. Aˬ jeˬ miˇ neh ehˇ naˇ, ngaˬ-euˬ laꞈ kʼoeˇ ahˇ-eu baoˬ doˆ-iˇ-euˬ ngaˬ-ahˇ siˬ laˇ nya.”

⁴⁷ Gaˇ kawˆ kʼoeˇ maˬ paˇ zaꞈ taˬ nya ngaˇ lehˇ zaˬ miˬ zaˬ kʼoeˇ gʼaˬ-ahˇ siˬ duˬ leˇ ngeh, yaw dzuˬ dzuˬ-eu laꞈ kʼoeˇ laˇ-awˇ, Yeˬsuˇ-euˬ aˬ kuiˇ dawˬ peh awˆ byaˆ-euˬ meh. Kʼoeˇ naˇ, aˬ jeˬ miˇ neh Yeˬsuˇ-ahˇ aˬ yawꞈ toeˬ ciˆ-euˬ gaˇ kawˆ hawˇ-eu, aˬ yawꞈ-euˬ naˇ gawˇ tiˬ poˆ tehꞈ-ehˇ taˬ leˇ-euˬ gaˇ kawˆ, tsawˇ haˬ kʼoeˇ myaˆ ni gʼeh-eu mehˬ shi ehˇ doˆ-euˬ meh.

⁴⁸ “Aˬ buˇ-oˇ, nawˬ-euˬ jah-eu nui ma nawˬ-ahˇ bi taˬ leˇ-euˬ meh. Nui ma saˇ lehˆ ni gʼoꞈ-iˇ-awˬ” lehˇ, zaˬ miˬ zaˬ kʼoeˇ gʼaˬ-ahˇ Yeˬsuˇ ehˇ nehˬ-euˬ meh.

⁴⁹ Yeˬsuˇ kʼoeˇ loꞈ-ehˇ ehˇ luꞈ ngeh, Yuˇdaˆ tsawˇ haˬ-euˬ uˬ duˬ tahˬ nymˇ-ahˇ uˆ lahˇ-eu aˬ yuiꞈ aˬ tsu-euˬ nymˇ-ahˇ neh tsawˇ haˬ tiˬ gʼaˬ laˇ-awˇ, Yaˬiˇluˆ-ahˇ ehˇ-eu, “Nawˬ buˇ shiˇ tsehˆ gʼaˬ-euˬ meh. Saˬ laˬ-ahˇ maˬ paˇ laˆ bahˬ kʼawꞈ gʼaˬ meh.”

⁵⁰ Ehˇ kʼawꞈ, dawˬ kʼoeˇ dawˬ-ahˇ Yeˬsuˇ ya gaˬ ngeh, Yaˬiˇluˆ-ahˇ ehˇnehˬ-eu, “Kʼahˬ taˬ lahˇ. Jah-eu nui ma ahˇ naˇ gʼaˬ-aˇ. Aˬ yawꞈ jawˇ saˇ doˆ laˇ tehꞈ-a.”

⁵¹ Nymˇ kʼoeˇ nymˇ-ahˇ aˬ yawꞈ iˇ keuˆ ngeh, nui deuˬ maˬ bi uˇ leˇ ni, Beˬtuˆluˆ, Yoˇhaˬ, Yaˬkoˆ aˬ ha smˇ gʼaˬ hawˇ-eu, aˬ buˇ kʼoeˇ buˇ-euˬ aˬ da aˬ ma-ahˇ tehꞈ-ehˇ sheuˬ-awˇ uˇ leˇ-euˬ meh.

⁵² Kʼoeˇ gaˇ jawˇ-eu tsawˇ haˬ deuˬ aˬ buˇ kʼoeˇ buˇ gʼaˇ duˬ tsawˇ ngoeˇ ngoeˇ-awˇ, noeˬ shaˬ luꞈ-eu meh. Yeˬsuˇ aˬ yawꞈ maꞈ-ahˇ ehˇ nehˬ-eu, “Taˬ ngoeˇ. Aˬ yawꞈ shiˇ-euˬ maˬ ngeuˇ-a. Yuꞈ kʼaˆ taˬ-euˬ tehꞈ meh.”

⁵³ Kʼoeˇ ngeh, aˬ yawꞈ maꞈ dawˬ tawˆ luꞈ, aˬ yawꞈ-ahˇ uiˇ-eu meh. Aˬ jeˬ miˇ neh ehˇ naˇ, aˬ yawꞈ shiˇ tsehˆ taˬ-euˬ aˬ yawꞈ maꞈ siˬ duˬ-eu meh.

⁵⁴ Ehˇ kʼawꞈ, aˬ buˇ kʼoeˇ buˇ-euˬ aˬ laꞈ-ahˇ aˬ yawꞈ nyehꞈ tehˬ-awˇ, “Aˬ buˇ-oˇ, tuˇ-awˬ” lehˇ, teˇ saˇ yaw kʼaˆ kʼaˆ-ehˇ ehˇ nehˬ-euˬ meh.

⁵⁵ Aˬ buˇ kʼoeˇ buˇ paˇ dehꞈ kʼoꞈ laˇ-awˇ, ja pyuˬ ni tuˇ laˇ-euˬ meh. Aˬ yawꞈ-ahˇ tiˬ jeˬ paˬ bi dzaˬ-eu gʼaˇ duˬ, aˬ yawꞈ maꞈ-ahˇ Yeˬsuˇ dawˬ biꞈ-euˬ meh.

⁵⁶ Aˬ yawꞈ-euˬ aˬ da aˬ ma zahˬ dui dui leˇ-euˬ meh. Ehˇ kʼawꞈ, pyeuꞈ laˇ-euˬ gaˇ kawˆ kʼoeˇ tiˬ gʼaˬ-ahˇ-iˬ maˬ bi ja mehˬ-eu gʼaˇ duˬ, aˬ yawꞈ maꞈ-ahˇ Yeˬsuˇ dawˬ biꞈ-euˬ meh.