Luˇkaꞈ 23 - Akha

Yeˬsuˇ-ahˇ sahˬ paˬ Piˇlaˆ mehˬ shi sheuˬ gʼeh-euˬ

¹ Kʼoeˇ naˇ, tsawˇ haˬ dawˬ tawˆ luꞈ baˬ maꞈ puˇ jeˬ-ehˇ tuˇ laˇ jiˇ-awˇ, Yeˬsuˇ-ahˇ sahˬ paˬ Piˇlaˆ jawˇ gaˇ sheuˬ gʼeh-euˬ meh.

² Aˬ yawꞈ maꞈ Yeˬsuˇ-ahˇ iˬ baˇ poˆ-awˇ ehˇ-eu, “Tsawˇ haˬ heu gʼaˬ nga maꞈ-euˬ tsawˇ jeuˬ-ahˇ gaˇ ma sheuˬ bahˬ-awˇ, sahˬ paˬ Gehˇsaˬ-ahˇ kawˬ taˬ doˆ nehˬ lehˇ nga maꞈ-ahˇ laˆ tsoeˬ-eu uˬ taꞈ, yawˬ haˇ yawˬ ha Ka li lehˇ kuˇ-eu sahˬ paˬ ma lehˇ ehˇ-eu nga maꞈ mawˇ-euˬ ma.”

³ Sahˬ paˬ Piˇlaˆ aˬ yawꞈ-ahˇ naˇ haˬ-eu, “Nawˇ Yuˇdaˆ tsawˇ haˬ-euˬ sahˬ paˬ ngeuˇ ma loˇ.” Yeˬsuˇ ehˇ-eu, “Nawˇ ehˇ luꞈ ngaˇ tawˇ.”

⁴ Kʼoeˇ naˇ, piˇ ma aˬ yuiꞈ deuˬ hawˇ-eu tsawˇ haˬ aˇ maꞈ maꞈ ma-ahˇ sahˬ paˬ Piˇlaꞈ ehˇ nehˬ-eu, “Tsawˇ haˬ heu gʼaˬ lehˬ-eu ca-eu ngaˇ maˬ mawˇ-aˬ.”

⁵ Ehˇ kʼawꞈ, Yeˬsuˇ-ahˇ yaw lehˬ poˆ-eu tsawˇ haˬ kʼoeˇ deuˬ yaw kʼaˆ-ehˇ paˇ leh jeh laˇ-awˇ ehˇ-eu, “Yuˇdaˆ miˇ kʼahˬ kʼahˬ lah ni miˇ kʼahˬ zaˬ deuˬ luiˬ gʼa laˇ ni aˬ yawꞈ mehˬ luꞈ tsoˆ luꞈ-eu meh. Gaˬliˬlehˇ miˇ kʼahˬ-ahˇ mehˬ dahˬ beh-awˇ, nymˬ-mˇ heu gaˇ mehˬ keuˆ laˇ-euˬ meh.”

Yeˬsuˇ-ahˇ sahˬ paˬ Heˬloˆ jawˇ gaˇ bi sheuˬ gʼeh-euˬ

⁶ Dawˬ kʼoeˇ dawˬ-ahˇ sahˬ paˬ Piˇlaˆ ya gaˬ ngeh, “Tsawˇ haˬ heu gʼaˬ Gaˬliˬlehˇ tsawˇ haˬ-a loˇ” lehˇ naˇ haˬ-euˬ meh.

⁷ Yeˬsuˇ-aˬ, sahˬ paˬ Heˬloˆ uˆ lahˇ-eu miˇ kʼahˬ-ahˇ jawˇ-eu tsawˇ haˬ pyeuꞈ-eu gaˇ kawˆ sahˬ paˬ Piˇlaˆ ya siˬ ngeh, Yeˬluˇsaˬlehˬ meuˬ-ahˇ laˇ taˬ-awˇ jawˇ-eu sahˬ paˬ Heˬloˆ jawˇ gaˇ bi sheuˬ gʼeh-euˬ meh.

⁸ Yeˬsuˇ-ahˇ ya mawˇ ngeh, Heˬloˆ laˬ kʼaˬ cehˇ dui dui-eu meh. Aˬ jeˬ miˇ neh ehˇ naˇ, aˬ yawꞈ Yeˬsuˇ-euˬ gaˇ kawˆ ya gaˬ haw-awˇ, aˬ yawꞈ-ahˇ mawˇ mawꞈ-eu meh. Yeˬsuˇ zahˬ leˇ paˬ-ehˇ gʼeh-eu jeˬ mˇ mehˬ laꞈ gaˇ ya mawˇ tehꞈ-a lehˇ aˬ yawꞈ noeˬ tmˬ taˬ-euˬ meh.

⁹ Kʼoeˇ miˇ neh, aˬ yawꞈ Yeˬsuˇ-ahˇ dawˬ gʼawˬ mya dawˬ naˇ haˬ-euˬ meh. Ehˇ kʼawꞈ, Yeˬsuˇ tiˬ dawˬ-iˬ maˬ ngehˬ kʼoꞈ nehˬ-a.

¹⁰ Piˇ ma aˬ yuiꞈ deuˬ hawˇ-eu, Zahˇ dawˬ kʼoꞈ dawˬ mehˬ-eu saˬ laˬ deuˬ mehˬ hu paw yawꞈ leˇ-awˇ, Yeˬsuˇ-ahˇ iˬ baˇ poˆ-eu dawˬ yaw kʼaˆ-ehˇ ngehˬ-euˬ meh.

¹¹ Heˬloˆ hawˇ-eu aˬ yawꞈ-euˬ yehˇ deuˬ Yeˬsuˇ-ahˇ yehˬ bawˬ sehˇ lu-ehˇ ehˇ-awˇ naˬ gʼa-euˬ meh. Kʼoeˇ loꞈ-ehˇ jahˇ gʼaˬ ngeh, sahˬ paˬ sahˬ ma deuˬ dm-eu muiˬ dui dui-eu mehˬ tsoeˬ bi dm-awˇ, sahˬ paˬ Piˇlaˆ jawˇ gaˇ bi sheuˬ kʼoꞈ gʼeh-euˬ meh.

¹² Kʼoeˇ ngeh nah, sahˬ paˬ Heˬloˆ hawˇ-eu sahˬ paˬ Piˇlaˆ aˬ nyaꞈ gʼoeˇ leˇ-euˬ meh. Dzeuˇ laˇ ngeh aˬ yawꞈ nyaꞈ tiˬ gʼaˬ tiˇ gʼaˬ muiˇ-euˬ meh.

Yeˬsuˇ-ahˇ sehꞈ-eu gʼaˇ duˬ daˇ tsehˆ-euˬ

¹³ Piˇ ma aˬ yuiꞈ deuˬ, aˬ yuiꞈ aˬ tsu deuˬ hawˇ-eu, miˇ kʼahˬ zaˬ deuˬ-ahˇ sahˬ paˬ Piˇlaˆ neh kuˇ uiˬ-euˬ meh.

¹⁴ Aˬ yawꞈ maꞈ-ahˇ aˬ yawꞈ ehˇ nehˬ-eu, “Tsawˇ haˬ heu gʼaˬ miˇ kʼahˬ zaˬ deuˬ-ahˇ gaˇ ma sheuˬ bahˬ-euˬ meh lehˇ naw maꞈ ehˇ-awˇ ngaˇ jawˇ gaˇ sheuˬ laꞈ-euˬ meh. Naw maꞈ-euˬ mehˬ shi aˬ yawꞈ-ahˇ ngaˇ naˇ haˬ-awˇ pyehˆ tseˇ haw ngeh, naw maꞈ ehˇ-eu loꞈ-ehˇ lehˬ-eu ca-eu ngaˇ maˬ mawˇ-aˬ.

¹⁵ Sahˬ paˬ Heˬ loˆ kʼawꞈ, aˬ yawꞈ-euˬ yaw lehˬ yaw ca maˬ poˆ mawˇ nya-eu miˇ neh, aˬ dui jawˇ gaˇ paˇ bi sheuˬ kʼoꞈ ha le-euˬ meh. Aˬ yawꞈ shiˇ paˬ-ehˇ mˇ lehˬ taˬ-euˬ tiˬ jeˬ-iˬ maˬ jaˆ-a.

¹⁶ Kʼoeˇ miˇ neh, aˬ yawꞈ-ahˇ yahˬ caˆ neh bi juiꞈ-awˇ pyehˬ nehˬ ma.”

¹⁸ Tsawˇ haˬ aˇ maꞈ maꞈ lah-ehˇ guˇ-eu, “Aˬ yawꞈ-ahˇ sehꞈ-awˇ Baˬlaˬbaˇ-ahˇ pyehˬ doˆ nehˬ laꞈ-awˬ.”

¹⁹ Baˬlaˬbaˇ-aˬ, meuˬ laꞈ kʼoeˇ miˇ kʼahˬ zaˬ deuˬ luiˬ gʼa laˇ ni jahˇ-euˬ uˬ taꞈ, tsawˇ haˬ sehꞈ-euˬ miˇ neh, tawˬ-ahˇ bi dawˆ taˬ-euˬ meh.

²⁰ Sahˬ paˬ Piˇlaˆ-aˬ, Yeˬsuˇ-ahˇ pyehˬ nehˬ mawꞈ-eu miˇ neh, aˬ yawꞈ maꞈ-ahˇ tiˬ poˆ paˇ shaˇ-euˬ meh.

²¹ Ehˇ kʼawꞈ, aˬ yawꞈ maꞈ paˇ guˇ-eu, “Laꞈ yaꞈ kʼoeˇ taˆ taꞈ sehꞈ-awˬ. Laꞈ yaꞈ kʼoeˇ taˆ taꞈ sehꞈ-awˬ.”

²² Sahˬ paˬ Piˇlaˆ aˬ yawꞈ maꞈ-ahˇ smˬ poˆ tiˬ poˆ paˇ shaˇ-awˇ ehˇ-eu, “Aˬ yawꞈ mˇ lehˬ mˇ ca-euˬ aˬ jeˬ jaˆ ta. Aˬ yawꞈ ya shiˇ paˬ-ehˇ mˇ lehˬ taˬ-euˬ tiˬ jeˬ-iˬ ngaˇ maˬ ya mawˇ-aˬ. Aˬ yawꞈ-ahˇ ngaˇ yahˬ caˆ neh bi juiꞈ-awˇ pyehˬ nehˬ ma.”

²³ Ehˇ kʼawꞈ, Yeˬsuˇ-ahˇ laꞈ yaꞈ kʼoeˇ taˆ bi taꞈ sehꞈ-eu gʼaˇ duˬ, aˬ yawꞈ maꞈ gʼaˬ kʼaˇ jaˆ-eu shaˇ shaˇ-ehˇ guˇ-eu miˇ neh, aˇ saˬ saˬ laˇ ngeh aˬ yawꞈ maꞈ neh guˇ gʼaˬ-euˬ meh.

²⁴ Kʼoeˇ miˇ neh, aˬ yawꞈ maꞈ geuꞈ mawꞈ-eu loꞈ-ehˇ sahˬ paˬ Piˇlaˆ yaˇ kʼaˬ daˇ tsehˆ nehˬ-euˬ meh.

²⁵ Miˇ kʼahˬ zaˬ luiˬ gʼa laˇ ni jahˇ-euˬ uˬ taꞈ, tsawˇ haˬ-ahˇ sehꞈ-euˬ miˇ neh tawˬ-ahˇ bi nyehꞈ uˇ taˬ-euˬ gʼaˬ-ahˇ-aˬ, aˬ yawꞈ maꞈ shaˇ-eu loꞈ-ehˇ pyehˬ doˆ nehˬ-euˬ meh. Ehˇ kʼawꞈ, Yeˬsuˇ-ahˇ-aˬ, aˬ yawꞈ maꞈ-euˬ nui noeˬ bi jahˇ-eu gʼaˇ duˬ, aˬ yawꞈ maꞈ-euˬ aˬ laꞈ laꞈ kʼoeˇ a nehˬ-euˬ meh.

Yeˬsuˇ-ahˇ laꞈ yaꞈ kʼoeˇ taˆ taꞈ sehꞈ-euˬ

²⁶ Aˬ yawꞈ maꞈ aˬ yawꞈ-ahˇ sheuˬ gʼeh luꞈ ngeh, pu paw neh meuˬ-ahˇ laˇ luꞈ-eu Kuˇleˬniˬ meuˬ-ahˇ jawˇ-eu Siˇmoˬ-ahˇ nyehꞈ-awˇ, laꞈ yaꞈ baꞈ daˆ nehˬ-awˇ, Yeˬsuˇ-euˬ mehˬ nah bi cah-euˬ meh.

²⁷ Tsawˇ haˬ aˇ maꞈ maꞈ ma hawˇ-eu, Yeˬsuˇ gʼaˇ duˬ noeˬ shaˬ-awˇ tsawˇ ngoeˇ ngoeˇ luꞈ-eu zaˬ miˬ zaˬ deuˬ, Yeˬsuˇ mehˬ nah caw teh luꞈ-eu meh.

²⁸ Ehˇ kʼawꞈ, aˬ yawꞈ maꞈ-ahˇ Yeˬsuˇ nahˇ gʼoꞈ gʼoꞈ haw-awˇ ehˇ-eu, “Yeˬluˇsaˬlehˬ meuˬ-euˬ zaˬ miˬ deuˬ-oˇ, ngaˬ-euˬ gʼaˇ duˬ tsawˇ ngoeˇ taˬ ngoeˇ. Naw maꞈ gʼaˇ duˬ hawˇ-eu naw maꞈ-euˬ zaˬ deuˬ gʼaˇ duˬ tsawˇ ngoeˇ ngoeˇ-awˬ.

²⁹ Aˬ jeˬ miˇ neh ehˇ naˇ, ‘Maˬ baw aˬ ma hawˇ-eu aˬ nyiˇ maˬ pi haw-euˬ uˬ maˆ hawˇ-eu, zaˬ nahˬ neh tiˬ jawˇ-iˬ maˬ bi dawˇ haw-euˬ aˬ coeˇ deuˬ guiˬ lahˬ huiˬ-eu meh’ lehˇ ya ehˇ-eu aˇ nah keuˆ le luꞈ meh.

³⁰ Kʼoeˇ ngeh jawˇ, gawˬ jawˬ-ahˇ ‘Nga maꞈ kʼoeˇ taˆ byaˆ tehˬ leꞈ-awˬ’ lehˇ ya ehˇ-awˇ, gawˬ duˇ-ahˇ ‘Nga maꞈ kʼoeˇ taˆ pymˬ tehˬ leꞈ-awˬ’ lehˇ ya ehˇ gaˇ keuˆ tehꞈ-a.

³¹ Aˬ jeˬ miˇ neh ehˇ naˇ, aˇ bawˇ yaw jmˬ-ahˇ aˬ yawꞈ maꞈ heu naˆ ni jahˇ nehˬ naˇ, aˇ bawˇ yaw gui-ahˇ aˇ naˆ ni paˇ jahˇ nehˬ nmˇ.”

³² Yaw haiˬ jeˬ mˇ-euˬ tsawˇ haˬ nyiˬ gʼaˬ-ahˇ kʼawꞈ, Yeˬsuˇ nehˬ-ehˇ taꞈ sehꞈ-eu lehˇ sheuˬ gʼeh-euˬ meh.

³³ Uˬ duˬ kʼmˬ lehˇ kuˇ-eu jawˇ duˬ-ahˇ le keuˆ ngeh, Yeˬsuˇ-ahˇ laꞈ yaꞈ kʼoeˇ taˆ taꞈ tehˬ-euˬ meh. Yaw haiˬ jeˬ mˇ bahˬ-euˬ tsawˇ haˬ kʼoeˇ nyiˬ gʼaˬ-ahˇ kʼawꞈ, aˬ yawꞈ-euˬ aˇ maˇ paw tiˬ gʼaˬ, aˇ caˇ paw tiˬ gʼaˬ lehˇ, laꞈ yaꞈ kʼoeˇ taˆ taꞈ tehˬ-euˬ meh.

³⁴ Yeˬsuˇ ehˇ-eu, “Aˬda-oˇ, aˬ yawꞈ maꞈ-ahˇ iˬ baˇ pyehˬ nehˬ-awˬ. Aˬ jeˬ miˇ neh ehˇ naˇ, aˬ yawꞈ maꞈ neh mˇ-euˬ jeˬ-ahˇ aˬ yawꞈ maꞈ maˬ siˬ nya-a.” Aˬ yawꞈ maꞈ shehˆ tsaˬ tsaˬ-awˇ, Yeˬsuˇ-euˬ mehˬ tsoeˬ biˇ geuꞈ-euˬ meh.

³⁵ Tsawˇ haˬ gʼawˬ mya ni kʼoeˇ gaˇ yawꞈ-awˇ haw luꞈ ngeh, Yuˇdaˆ tsawˇ haˬ aˬ yuiꞈ aˬ tsu deuˬ Yeˬsuˇ-ahˇ naˬ gʼa naˬ gʼa-ehˇ ehˇ-eu, “Aˬ yawꞈ aˬ cawˬ-ahˇ ka kʼoꞈ-euˬ meh. Aˬ yawꞈ-aˬ, Miˬyehˇ neh Tseˇ doˆ-euˬ Gʼaˬ lehˇ ehˇ-eu Ka li ngeuˇ naˇ, yawˬ haˇ yawˬ ha ka kʼoꞈ luꞈ-uˇ.”

³⁶ Yehˇ deuˬ kʼawꞈ, aˬ yawꞈ-ahˇ yehˬ bawˬ sehˇ lu-ehˇ ehˇ niˇ gʼa-eu meh. Aˬ yawꞈ maꞈ aˬ yawꞈ jawˇ gaˇ le-awˇ, cehˇ myawˆ ni gʼeh-eu aˬ gaꞈ dzaˇ uiˇ ciˬ nehˬ-awˇ ehˇ-eu,

³⁷ “Nawˇ Yuˇdaˆ tsawˇ haˬ-euˬ sahˬ paˬ ngeuˇ naˇ, yawˬ haˇ yawˬ ha ka kʼoꞈ-awˬ tawˇ.”

³⁸ Aˬ yawꞈ-euˬ kʼoeˇ taˆ heu loꞈ-ehˇ boꞈ myahˬ taˬ-euˬ meh. “Tsawˇ haˬ heu gʼaˬ Yuˇdaˆ tsawˇ haˬ-euˬ sahˬ paˬ meh.”

³⁹ Kʼoeˇ gaˇ bi taꞈ tehˬ taˬ-euˬ tsawˇ haˬ yaw haiˬ kʼoeˇ tiˬ gʼaˬ Yeˬsuˇ-ahˇ yehˬ bawˬ sehˇ lu-ehˇ ehˇ-eu, “Nawˇ Ka li maˬ ngeuˇ loˇ. Yawˬ haˇ yawˬ ha ka kʼoꞈ-awˇ, nga nyaꞈ-ahˇ kʼawꞈ ka kʼoꞈ nehˬ laꞈ-awˬ tawˇ.”

⁴⁰ Ehˇ kʼawꞈ, aˬ yawꞈ-euˬ cawˬ kʼoeˇ gʼaˬ aˬ yawꞈ-ahˇ dehˬ-awˇ ehˇ-eu, “Nawˇ Miˬyehˇ-ahˇ maˬ guˆ nya loˇ. Nawˇ gʼeh aˬ yawꞈ loꞈ-ehˇ bi sehꞈ-eu gʼaˇ duˬ bi daˇ tsehˆ taˬ-euˬ tsawˇ haˬ maˬ ngeuˇ te loˇ.

⁴¹ Aˇ nyaꞈ-aˬ, mˇ bahˬ-euˬ miˇ neh oꞈ-eu geuˇ-eu loꞈ-ehˇ ya daˬ luꞈ-eu ma. Ehˇ kʼawꞈ, tsawˇ haˬ heu gʼaˬ tiˬ jeˬ-iˬ mˇ bahˬ taˬ-euˬ maˬ jaˆ-a.”

⁴² Kʼoeˇ naˇ, aˬ yawꞈ ehˇ-eu, “Yeˬsuˇ-oˇ, nawˇ Sahˬ paˬ loꞈ-ehˇ zaꞈ le ngeh, ngaˬ-ahˇ taˬ ngehˇ nehˬ laꞈ.”

⁴³ Yeˬsuˇ aˬ yawꞈ-ahˇ ehˇ nehˬ-eu, “Iˬ nah nawˇ ngaˬ nehˬ-ehˇ Baˬlaˬdiˇsuˆ -ahˇ ya jawˇ tehꞈ-a lehˇ, ngaˇ nawˬ-ahˇ maˇ jawˆ ni ehˇ-eu ma.”

Yeˬsuˇ saꞈ tsehˆ leˇ-euˬ

⁴⁴ Nah loˆ ceh laˇ ngeh neh dahˬ beh-awˇ, uˬ ciꞈ uˬ taw paw naˬ liˬ smˇ laꞈ-ahˇ keuˆ ni, miˇ kʼahˬ kʼoeˇ kʼahˬ kʼahˬ lah-ehˇ zahˇ tsui ni jaˆ-eu meh.

⁴⁵ Aˬ jeˬ miˇ neh ehˇ naˇ, nahˇ ma yaw shehꞈ maˬ bya ni naˬ leˇ-euˬ meh. Uˬ duˬ tahˬ nymˇ nymˇ ma laꞈ kʼoeˇ taw taˬ-euˬ saˬ paˇ lawˆ kaˬ nyiˬ paˆ paˆ-iˇ-euˬ meh.

⁴⁶ Kʼoeˇ ngeh, Yeˬsuˇ yaw kʼaˆ-ehˇ guˇ-awˇ, “Aˬda-oˇ, ngaˬ-euˬ saꞈ laˇ-ahˇ nawˬ-euˬ aˬ laꞈ laꞈ kʼoeˇ a nehˬ-eu ma” lehˇ ehˇ-eu meh. Kʼoeˇ loꞈ-ehˇ guˇ gʼaˬ ngeh, aˬ yawꞈ saꞈ tsehˆ leˇ-euˬ meh.

⁴⁷ Kʼoeˇ loꞈ-ehˇ pyeuꞈ laˇ-euˬ gaˇ, yehˇ kʼoeˇ deuˬ kʼoeˇ taˆ aˬ yuiꞈ geuꞈ-eu gʼaˬ ya mawˇ ngeh, Miˬyehˇ-euˬ guiˬ lahˬ-ahˇ ja ceuˬ-awˇ, “Tsawˇ haˬ heu gʼaˬ aˬ diˇ aˬ maˇ iˬ baˇ maˬ ahˇ law hawˇ ngaˬ” lehˇ ehˇ-eu eh.

⁴⁸ Kʼoeˇ gaˇ haw laˇ-eu lehˇ kʼaˇ uiˬ laˇ-euˬ tsawˇ haˬ dawˬ tawˆ luꞈ, kʼoeˇ loꞈ-ehˇ pyeuꞈ laˇ-euˬ gaˇ ya mawˇ ngeh, noeˬ shaˬ dui dui-eu laꞈ kʼoeˇ yawˬ ha-euˬ kʼahˬ-ahˇ teˇ teˇ-ehˇ gʼoꞈ-iˇ-euˬ meh.

⁴⁹ Yeˬsuˇ-euˬ cawˬ deuˬ hawˇ-eu, Gaˬliˬlehˇ miˇ kʼahˬ-ahˇ neh aˬ yawꞈ-euˬ mehˬ nah caw teh laꞈ-euˬ zaˬ miˬ zaˬ kʼoeˇ deuˬ, ui cuiˆ gaˇ mahˇ kaˬ gaˇ yawꞈ-awˇ haw-euˬ meh.

Yeˬsuˇ-ahˇ baꞈ pahˬ-euˬ

⁵⁰ Yuˇdaˆ tsawˇ haˬ-euˬ meuˬ pyeuꞈ-eu Aˬliˇmaꞈtehˬ meuˬ-ahˇ, Yoˇsehˆ lehˇ myahˇ-euˬ tsawˇ haˬ tiˬ gʼaˬ jawˇ-eu meh. Aˬ yawꞈ-aˬ, yaw tsaˬ yaw dawˇ tsawˇ haˬ pyeuꞈ-awˇ, Baꞈdzah laꞈ kʼoeˇ ahˇ-eu tsawˇ haˬ tiˬ gʼaˬ meh.

⁵¹ Ehˇ kʼawꞈ, Baꞈdzah neh kʼoeˇ loꞈ-ehˇ daˇ tsehˆ-awˇ mˇ-euˬ gaˇ, aˬ yawꞈ nui ma maˬ tsaˬ-a. Aˬ yawꞈ-aˬ, Miˬyehˇ Miˇkʼahˬ keuˆ le gaˇ loꞈ luꞈ-eu tsawˇ haˬ meh.

⁵² Aˬ yawꞈ sahˬ paˬ Piˇlaˆ jawˇ gaˇ le-awˇ, Yeˬsuˇ-euˬ gʼawˇ mawˇ shaˇ leˇ-euˬ meh.

⁵³ Kʼoeˇ naˇ, Yeˬsuˇ-euˬ gʼawˇ mawˇ-ahˇ baꞈ ka-awˇ, shawˇ jehˆ ni gʼeh-eu saˬ paˇ neh mawˇ tawˆ tawˆ-awˇ, tsawˇ haˬ tiˬ gʼaˬ-iˬ maˬ baꞈ pahˬ haw-euˬ, kʼaˬ lo-ahˇ taꞈ byoe-awˇ jahˇ taˬ-euˬ lmˬ bymˇ laꞈ kʼoeˇ baꞈ pahˬ-iˇ-euˬ meh.

⁵⁴ Kʼoeˇ ngeh nah-aˬ, Jawˇ nah gʼaˇ duˬ lehˬ hmˬ laˆ saˆ dah-eu aˇ nah pyeuꞈ-awˇ, Jawˇ nah keuˆ le shaw-iˬ-eu meh.

⁵⁵ Gaˬliˬlehˇ miˇ kʼahˬ-ahˇ neh Yeˬsuˇ-euˬ mehˬ nah caw teh laꞈ-euˬ tsawˇ haˬ deuˬ Yoˇsehˆ nehˬ-ehˇ iˇ-awˇ, lmˬ bymˇ hawˇ-eu Yeˬsuˇ-ahˇ kʼoeˇ gaˇ aˬ joˆ-ehˇ baꞈ pahˬ yaꞈ-euˬ gaˇ mawˇ duˬ yaꞈ-euˬ meh.

⁵⁶ Kʼoeˇ naˇ, aˬ yawꞈ maꞈ gʼoꞈ leˇ-awˇ, Yeˬsuˇ-euˬ gʼawˇ mawˇ-ahˇ laˆ saˆ-eu gʼaˇ duˬ tsiˇ yaw saw gʼawˬ mya jeˬ lehˬ hmˬ leˇ-euˬ meh. Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ, Jawˇ nah kʼoeˇ nah-ahˇ aˬ yawꞈ maꞈ gʼaˬ naˬ naˬ-euˬ meh.