Luˇkaꞈ 21 - Akha

Miˬ coeˬ miˬ ma tiˬ gʼaˬ pyuˇ damˬ-eu

¹ Yeˬsuˇ haw gʼeh ngeh, smˇ muiˬ smˇ baw deuˬ pyuˇ daˬ dawˆ duˬ-ahˇ pyuˇ daˬ dawˆ luꞈ gaˇ ya mawˇ-euˬ meh.

² Kʼoeˇ ngeh, shaˬ dui dui-eu miˬ coeˬ miˬ ma tiˬ gʼaˬ guiˬ shuiˇ maˇ byaˆ nyiˬ byaˆ dawˆ ahˇ luꞈ gaˇ aˬ yawꞈ ya mawˇ-euˬ meh.

³ Yeˬsuˇ ehˇ-eu, “Shaˬ dui dui-eu miˬ coeˬ miˬ ma heu gʼaˬ aˬ yawꞈ maꞈ dawˬ tawˆ luꞈ myaˆ maˬ tseˇ damˬ-euˬ meh lehˇ, ngaˇ naw maꞈ-ahˇ ehˇ-eu ma.

⁴ Aˬ jeˬ miˇ neh ehˇ naˇ, aˬ yawꞈ maꞈ-aˬ, gʼawˬ mya ni jaˆ-eu laꞈ kʼoeˇ yuˇ doˆ-awˇ Miˬyehˇ-ahˇ damˬ-euˬ meh. Ehˇ kʼawꞈ, aˬ yawꞈ-aˬ, shaˬ dui dui-eu laꞈ kʼoeˇ, aˬ yawꞈ yaw dehꞈ dehꞈ-eu gʼaˇ duˬ maˬ dzeˇ ni damˬ jiˇ-euˬ meh.”

Uˬ duˬ tahˬ nymˇ nymˇ ma ya cawˆ-iˇ meh lehˇ Yeˬsuˇ ehˇ-eu

⁵ Tsawˇ haˬ tiˬ paˆ na deuˬ, Uˬ duˬ tahˬ nymˇ nymˇ ma-ahˇ muiˬ dui dui-eu kʼaˬ lo gawˬ-awˇ tsoˆ taˬ-euˬ gaˇ kawˆ hawˇ-eu, kʼoeˇ gaˇ Miˬyehˇ-ahˇ aˬ joˆ-ehˇ lawˇ nehˬ shehˇ nehˬ luꞈ-eu gaˇ kawˆ ja poeˬ-eu meh. Ehˇ kʼawꞈ, aˬ yawꞈ maꞈ-ahˇ Yeˬsuˇ heu loꞈ-ehˇ ehˇ nehˬ-euˬ meh.

⁶ “Nymˬ-mˇ naw maꞈ heu deuˬ dawˬ tawˆ luꞈ ya mawˇ luꞈ meh. Heu gaˇ kʼaˇ gawˬ taˬ-euˬ kʼaˬ lo heu deuˬ tiˬ siˬ kʼoeˇ taˆ tiˬ siˬ maˬ jaˆ ziꞈ nya ni byaˆ-iˇ jiˇ-eu aˇ nah keuˆ le tehꞈ-a.”

Shaˬ zahˬ hawˇ-eu Kʼehˬ-eu kʼaˆ-eu

⁷ Aˬ yawꞈ maꞈ Yeˬsuˇ-ahˇ naˇ haˬ-eu, “Saˬ laˬ-oˇ, kʼoeˇ loꞈ-ehˇ gʼeh-eu jeˬ aˬ myah keuˆ le ta. Kʼoeˇ loꞈ-ehˇ keuˆ le-eu lehˇ gʼeh ngeh, aˬ joˆ-ehˇ pyeuꞈ laˇ gaˇ haw-awˇ ya siˬ ta.”

⁸ Yeˬsuˇ ehˇ-eu, “Aˬ cawˬ neh gaˇ ma maˬ bi sheuˬ bahˬ ni yaw gahˇ gahˇ-ehˇ dehꞈ-awˬ. Aˬ jeˬ miˇ neh ehˇ naˇ, ngaˬ-euˬ gʼaˇ duˬ ngehˬ dah le-euˬ ma lehˇ ehˇ-eu tsawˇ haˬ gʼawˬ mya gʼaˬ doˆ le-awˇ, ‘Ngaˇ aˬ yawꞈ ma. Aˇ nah aˇ yamˬ kʼoeˇ yamˬ keuˆ le-euˬ meh’ lehˇ ehˇ tehꞈ-a. Aˬ yawꞈ maꞈ-euˬ mehˬ nah naw maꞈ taˬ caw teh.

⁹ Guiˇ deuˆ-eu teˇ saˇ hawˇ-eu miˇ kʼahˬ suˬ saˬ-eu gaˇ kawˆ naw maꞈ ya gaˬ ngeh, taˬ tsawˬ guˆ-iˇ. Kʼoeˇ loꞈ-ehˇ gʼeh-eu jeˬ yaw beh keuˆ le tehꞈ-a. Ehˇ kʼawꞈ, aˇ saˬ saˬ-eu aˇ yamˬ keuˆ le-euˬ maˬ ngeuˇ-a siˬ.”

¹⁰ Kʼoeˇ naˇ, aˬ yawꞈ maꞈ-ahˇ aˬ yawꞈ paˇ ehˇ nehˬ-eu, “Miˇ kʼahˬ tiˬ kʼahˬ tiˇ kʼahˬ guiˇ deuˆ-awˇ, tsawˇ jeuˬ tiˬ jeuˬ tiˇ jeuˬ ceh tehꞈ-a.

¹¹ Miˇ luˆ luˆ dui dui-awˇ, yawˬ gaˇ na luꞈ mehꞈ-eu shuꞈ-eu jeˬ hawˇ-eu, yaw jaw naˇ-eu naˇ gawˇ gawˇ ma keuˆ le tehꞈ-a. Guˆ dui dui laˇ paˬ-ehˇ gʼeh-eu jeˬ hawˇ-eu huiˬ dui dui-eu bi siˬ bi mawˇ-eu jeˬ mˬ-ahˇ neh doˆ le tehꞈ-a.

¹² Ehˇ kʼawꞈ, kʼoeˇ loꞈ-ehˇ gʼeh-eu deuˬ maˬ keuˆ le mi naˆ-ehˇ, aˬ cawˬ naw maꞈ-ahˇ nyehꞈ-awˇ, kʼehˬ nehˬ kʼaˆ nehˬ laꞈ tehꞈ-a. Yaˇ kʼaˬ bi daˇ-eu gʼaˇ duˬ, naw maꞈ-ahˇ uˬ duˬ tahˬ nymˇ doe ni nyehꞈ gʼeh-awˇ, paꞈ kuˆ doe bi nyehꞈ uˇ tehꞈ-a. Naw maꞈ ngaˬ-euˬ tsawˇ myahˇ-ahˇ gʼoe-eu baˬ da neh, sahˬ paˬ sahˬ ma deuˬ-euˬ mehˬ shi, aˬ cawˬ naw maꞈ-ahˇ tsahˇ gʼeh tehꞈ-a.

¹³ Kʼoeˇ-aˬ, naw maꞈ Laˬ kʼaˬ cehˇ-eu Guiˬ lahˬ dawˬ gaˇ kawˆ saˇ kiˇ kamˬ-eu gʼaˇ duˬ muiˬ-eu aˇ yamˬ meh.

¹⁴ Naw maꞈ aˬ cawˬ-ahˇ aˬ joˆ-ehˇ ya ngehˬ ya tmˇ kʼoꞈ nehˬ-eu gaˇ kawˆ, aˇ yamˬ maˬ keuˆ laˇ mi naˆ-ehˇ kʼahˬ maˬ lahˇ ni jawˇ-awˬ.

¹⁵ Aˬ jeˬ miˇ neh ehˇ naˇ, naw maꞈ-ahˇ muiˇ-eu deuˬ maˬ ja gʼaˬ nya-eu dawˬ hawˇ-eu zaˬ siˬ tsawˇ gahˇ, naw maꞈ-ahˇ ngaˇ biꞈ ma.

¹⁶ Naw maꞈ-euˬ aˬ da aˬ ma, mehˇ nmˇ, aˬ yuiꞈ aˬ nyiˇ hawˇ-eu cawˬ deuˬ neh, naw maꞈ-ahˇ aˬ cawˬ-euˬ aˬ laꞈ laꞈ kʼoeˇ bi a nehˬ gaˇ keuˆ-awˇ, tiˬ paˆ na deuˬ-aˬ, sehꞈ gaˇ keuˆ ni ya daˬ tehꞈ-a.

¹⁷ Naw maꞈ ngaˬ-euˬ tsawˇ myahˇ-ahˇ gʼoe-eu miˇ neh, tsawˇ haˬ dawˬ tawˆ luꞈ naw maꞈ-ahˇ bye tehꞈ-a..

¹⁸ Ehˇ kʼawꞈ, naw maꞈ-euˬ uˬ duˬ tsehˇ kahˇ tiˬ kahˇ tehꞈ-ehˇ kʼawꞈ, cawˆ-iˇ gaˇ maˬ keuˆ-aˇ.

¹⁹ Naw maꞈ ziꞈ dah ni kamˬ coeˇ naˇ, dehꞈ-eu jeˬ-ahˇ za tehꞈ-a.

Yeˬluˇsaˬlehˬ meuˬ ya cawˆ-iˇ meh lehˇ Yeˬsuˇ ehˇ-eu

²⁰ “Yeˬluˇsaˬlehˬ meuˬ-ahˇ guiˇ maꞈ deuˬ jawˬ lahˇ le-euˬ gaˇ ya mawˇ ngeh, meuˬ kʼoeˇ meuˬ ya cawˆ-iˇ-eu aˇ yamˬ keuˆ le-euˬ gaˇ siˬ nya-awˬ.

²¹ Kʼoeˇ ngeh, Yuˇdaˆ miˇ kʼahˬ-ahˇ jawˇ-eu tsawˇ haˬ deuˬ gawˬ jawˬ paw ya cehˆ daˆ-awˇ, meuˬ laꞈ kʼoeˇ jawˇ-eu tsawˇ haˬ deuˬ meuˬ laꞈ nyiˇ ya cehˆ doˆ meh. Dahˇ taˆ jawˇ-eu tsawˇ haˬ deuˬ meuˬ-ahˇ maˬ ya uˇ le-a.

²² Aˬ jeˬ miˇ neh ehˇ naˇ, kʼoeˇ-aˬ, Jaˇliꞈ laꞈ kʼoeˇ kʼaˇ ehˇ taˬ-euˬ jeˬ bi byah laˇ-eu gʼaˇ duˬ, kʼehˬ-eu kʼaˆ-eu aˇ nah deuˬ pyeuꞈ-eu meh.

²³ Aˇ nah aˇ yamˬ kʼoeˇ keuˆ le ngeh, aˬ nyiˇ pi luꞈ-eu zaˬ miˬ zaˬ deuˬ hawˇ-eu, zaˬ nahˬ aˬ ma deuˬ shaˬ zahˬ naꞈ dui dui tehꞈ-a. Aˬ jeˬ miˇ neh ehˇ naˇ, noeˬ shaˬ dui dui-eu jeˬ miˇ kʼahˬ heu kʼahˬ kʼoeˇ taˆ keuˆ le-awˇ, Miˬyehˇ nui ma pehˇ-eu jeˬ tsawˇ jeuˬ heu jeuˬ kʼoeˇ taˆ teuˇ le tehꞈ-a.

²⁴ Aˬ yawꞈ maꞈ mi cehˇ kʼehˬ-ahˇ ya shiˇ-awˇ, aˬ cawˬ miˇ kʼahˬ doe ni bi nyehꞈ byoˆ gʼeh tehꞈ-a. Yeˬluˇsaˬlehˬ meuˬ-aˬ, aˬ cawˬ tsawˇ jeuˬ neh bi nawˬ pahˬ tehꞈ-a. Aˬ cawˬ tsawˇ jeuˬ kʼoeˇ deuˬ-euˬ aˇ yamˬ maˬ jiˇ kʼoeˇ keuˆ ni, bi nawˬ pahˬ taˬ tehꞈ-a.

Tsawˇhaˬ-euˬ Zaˬmaˇ zaꞈ ka le-eu gaˇ kawˆ

²⁵ “Nahˇ ma, ba la, aˬ guiˇ laꞈ kʼoeˇ, bi siˬ bi mawˇ-eu gʼawˬ mya jeˬ pyeuꞈ doˆ laˇ tehꞈ-a. Miˇ tsaˬ tsawˇ jeuˬ deuˬ iˬ ma laˆ shaˆ iˇ luˆ dzeh-awˇ teˇ saˇ mahˇ gaˇ guˆ dui dui-awˇ, zahˬ leˇ tsoˆ leˇ tehꞈ-a.

²⁶ Miˇ tsaˬ kʼoeˇ taˆ keuˆ le teuˇ le-eu lehˇ gʼeh-eu jeˬ-ahˇ tsawˇ haˬ zaˬ deuˬ noeˬ mawˇ-awˇ, myaꞈ leˇ tehꞈ-a. Aˬ jeˬ miˇ neh ehˇ naˇ, mˬ taˆ-euˬ baoˬ deuˬ luˆ laˇ nyeh laˇ jiˇ tehꞈ-a.

²⁷ Kʼoeˇ naˇ, Tsawˇhaˬ-euˬ Zaˬmaˇ mˬ dmˇ dziˬ-awˇ, baoˬ hawˇ-eu yaw shehꞈ kʼahˬ sehˇ huiˬ dui dui-eu laꞈ kʼoeˇ oe gaˇ ya mawˇ tehꞈ-a.

²⁸ Heu loꞈ-ehˇ gʼeh-eu deuˬ pyeuꞈ dahˬ beh laˇ ngeh, uˬ duˬ baꞈ diˇ-awˇ haw-awˬ. Aˬ jeˬ miˇ neh ehˇ naˇ, naw maꞈ-ahˇ ka kʼoꞈ le-eu aˇ yamˬ peh laˇ-euˬ meh.”

Siˬ guˬ aˇ bawˇ-ahˇ haw-awˇ yamˬ law toꞈ-awˬ

²⁹ Kʼoeˇ naˇ, yaw jeˬ maˬ jeˬ heu hmˬ, aˬ yawꞈ maꞈ-ahˇ Yeˬsuˇ ja mehˬ nehˬ-euˬ meh. “Siˬ guˬ aˇ bawˇ hawˇ-eu, aˇ bawˇ dawˬ tawˆ luꞈ-ahˇ haw-awˬ.

³⁰ Aˇ bawˇ baw nmˬ nmˬ laˇ gaˇ naw maꞈ ya mawˇ ngeh, jawˇ la doˆ le shaw-iˬ meh lehˇ naw maꞈ siˬ nya meh.

³¹ Kʼoeˇ loꞈ-ehˇ duˇ ni, gaˇ kawˆ kʼoeˇ deuˬ pyeuꞈ doˆ laˇ ngeh, Miˬyehˇ Miˇkʼahˬ keuˆ le-eu dawˬ peh peh laˇ-euˬ meh lehˇ naw maꞈ siˬ nya-awˬ.

³² “Nymˬ-mˇ dehꞈ luꞈ-eu tsawˇ haˬ heu deuˬ maˬ shiˇ jiˇ mi naˆ-ehˇ, gaˇ kawˆ heu deuˬ dawˬ tawˆ luꞈ pyeuꞈ laˇ tehꞈ-a lehˇ, naw maꞈ-ahˇngaˇ maˇ jawˆ ni ehˇ-eu ma.

³³ Mˬ hawˇ-eu miˇ maˬ jaˆ coeˇ-ehˇ byoˆ-iˇ kʼawꞈ, ngaˬ-euˬ dawˬ tiˬ jawˇ-iˬ maˬ byoˆ-iˇ-aˇ.

Yaw beuˇ beuˇ-ehˇ loꞈ-awˬ

³⁴ “Naw maꞈ yaw beuˇ beuˇ-ehˇ jawˇ-awˬ. Maˬ ngeuˇ naˇ, dzaˬ boˆ dawˇ boˆ boˆ-eu jeˬ, dzaˬ yehꞈ dawˇ yehꞈ-eu jeˬ hawˇ-eu, yaw dehꞈ dehꞈ-eu gaˇ kawˆ kʼahˬ lahˇ-eu jeˬ naw maꞈ-euˬ nui ma-ahˇ ciˬ tehˬ taˬ-awˇ maˬ noeˬ maˬ duˇ-ehˇ jawˇ luꞈ ngeh, lahˇ ju-ahˇ paꞈ leˇ-eu loꞈ-ehˇ, aˇ nah kʼoeˇ nah naw maꞈ kʼoeˇ taˆ ja pyuˬ ni bi keuˆ le nmˬ-mˇ.

³⁵ Aˬ jeˬ miˇ neh ehˇ naˇ, miˇ tsaˬ heu kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ kʼoeˇ taˆ aˇ nah kʼoeˇ nah keuˆ le tehꞈ-a.

³⁶ Keuˆ le teuˇ le-eu gaˇ kawˆ kʼoeˇ deuˬ dawˬ tawˆ luꞈ-ahˇ, naw maꞈ dehꞈ dzeuˇ jawˇ dzeuˇ nya ni gʼaˬ tiˬ byah ahˇ-awˇ, Tsawˇhaˬ-euˬ Zaˬmaˇ mehˬ shi ya yawꞈ gaˇ dehꞈ keuˆ nya ni, aˬ myah luꞈ yaw beuˇ beuˇ-ehˇ jawˇ-awˇ guiˬ lahˬ shaˇ-awˬ.”

³⁷ Yeˬsuˇ-aˬ, yawˬ nah na luꞈ nah gʼahˇ paw Uˬ duˬ tahˬ nymˇ nymˇ ma laꞈ kʼoeˇ mehˬ nehˬ-euˬ meh. Ehˇ kʼawꞈ, uˬ ciꞈ ciꞈ le ngeh, Saˬloˬ gawˬ jawˬ-ahˇ yaꞈ leˇ-eu meh.

³⁸ Uˬ shawˬ yaw naꞈ-ehˇ tsawˇ haˬ dawˬ tawˆ luꞈ Uˬ duˬ tahˬ nymˇ nymˇ ma-ahˇ le-awˇ, aˬ yawꞈ mehˬ nehˬ tsoˆ nehˬ gaˇ naˇ haˬ leˇ-eu meh.