Luˇkaꞈ 18 - Akha

Miˬ coeˬ miˬ ma hawˇ-eu yaˇ kʼaˬ daˇ-eu gʼaˬ gaˇ kawˆ yaw jeˬ ma jeˬ

¹ Zaˬ lahˇ deuˬ aˬ myah luꞈ guiˬ lahˬ shaˇ-awˇ, tiˬ jawˇ-iˬ nui ma maˬ ya cawˆ-eu gʼaˇ duˬ, Yeˬsuˇ yaw jeˬ ma jeˬ ja-awˇ, mehˬ nehˬ tsoˆ nehˬ-euˬ meh.

² “Meuˬ tiˬ meuˬ laꞈ kʼoeˇ, Miˬyehˇ-ahˇ maˬ guˆ-ehˇ, tsawˇ haˬ-ahˇ kʼawꞈ yaw zeu maˬ baw-eu yaˇ kʼaˬ daˇ-eu tsawˇ haˬ tiˬ gʼaˬ jawˇ-eu meh.

³ Meuˬ kʼoeˇ meuˬ laꞈ kʼoeˇ, miˬ coeˬ miˬ ma tiˬ gʼaˬ jawˇ-eu meh. Miˬ coeˬ miˬ ma kʼoeˇ gʼaˬ yaˇ kʼaˬ daˇ-eu gʼaˬ jawˇ gaˇ tiˬ kʼehˬ maˬ taˬ ni laˇ laˇ-ehˇ, ‘Ngaˬ-ahˇ gʼawˬ shaˬ gaˬ-awˇ, ngaˬ nehˬ-ehˇ yaˇ kʼaˬ ja luꞈ-eu gʼaˬ-ahˇ yaˇ kʼaˬ daˇ nehˬ laꞈ sheˇ’ lehˇ shaˇ-eu meh.

⁴ Yaˇ kʼaˬ daˇ-eu tsawˇ haˬ kʼoeˇ gʼaˬ yaˇ kʼaˬ maˬ daˇ nehˬ ni tiˬ kʼehˬ jawˇ-euˬ meh. Ehˇ kʼawꞈ, aˇ saˬ saˬ laˇ ngeh, aˬ yawˇ yawꞈ heu loꞈ-ehˇ ehˇ-eu meh. ‘Ngaˇ Miˬyehˇ-ahˇ maˬ guˆ-ehˇ, tsawˇ haˬ-ahˇ yaw zeu maˬ baw kʼawꞈ,

⁵ aˬ yawꞈ ngaˇ jawˇ gaˇ laˇ laˇ-ehˇ bahˬ gʼa-eu miˇneh, aˬ yawꞈ-euˬ gaˇ kawˆ daˇ tsehˆ nehˬ shaw-iˬ ma. Maˬ ngeuˇ naˇ, aˬ yawꞈ laˇ laˇ-ehˇ bahˬ gʼa-eu miˇ neh tehꞈ-ehˇ kʼawꞈ, maˬ paˇ dehꞈ-iˇ-eu miˇ-a.”’

⁶ Sahˬpaˬ Yeˬsuˇ ehˇ-eu, “Maˬ sui maˬ dawˇ-eu yaˇ kʼaˬ daˇ-eu tsawˇ haˬ kʼoeˇ gʼaˬ ehˇ-eu gaˬ maˬ loˇ.

⁷ Toˆ-ehˇ ngeuˇ naˇ, uˬ ciꞈ nah gʼahˇ maˬ ehˇ caw ba nehˬ laꞈ lehˇ shaˇ luꞈ-eu, Miˬyehˇ neh tseˇ doˆ-euˬ tsawˇ haˬ deuˬ-euˬ gʼaˇ duˬ, Miˬyehˇ yaˇ kʼaˬ maˬ daˇ nehˬ-aˇ loˇ. Aˬ yawꞈ nyi naˬ nyi naˬ-ehˇ jawˇ tehꞈ-a loˇ.

⁸ Aˬ yawꞈ maꞈ-euˬ gʼaˇ duˬ aˬ yawꞈ yaw kawˇ-ehˇ yaˇ kʼaˬ daˇ tehꞈ-a lehˇ, naw maꞈ-ahˇ ngaˇ ehˇ-eu ma. Ehˇ kʼawꞈ, Tsawˇhaˬ-euˬ Zaˬmaˇ zaꞈ le ngeh, miˇ tsaˬ kʼoeˇ taˆ jah-eu jeˬ jaˆ luꞈ gaˇ ya mawˇ tehꞈ-a loˇ.”

Paˬliˬsehˇ hawˇ-eu kawˬ taꞈ-eu tsawˇ haˬ gaˇ kawˆ yaw jeˬ ma jeˬ

⁹ Yawˬ haˇ yawˬ ha yaw tsaˬ yaw dawˇ ma lehˇ sawˇ-awˇ, aˬ cawˬ-ahˇ taˬ nyiˇ-eu tsawˇ haˬ deuˬ-ahˇ, Yeˬsuˇ yaw jeˬ ma jeˬ heu hmˬ ja mehˬ nehˬ-euˬ meh.

¹⁰ “Tiˬ poˆ-aˬ, tsawˇ haˬ nyiˬ gʼaˬ Uˬ duˬ tahˬ nymˇ nymˇ ma-ahˇ daˆ leˇ-awˇ, guiˬ lahˬ shaˇ leˇ-euˬ meh. Tiˬ gʼaˬ-aˬ, Paˬliˬsehˇ meh. Tiˬ gʼaˬ-aˬ, kawˬ taꞈ-eu tsawˇ haˬ meh.

¹¹ “Paˬliˬsehˇ kʼoeˇ gʼaˬ tiˬ paw yawꞈ-awˇ, ‘Miˬyehˇ-oˇ, ngaˇ-aˬ, aˬ cawˬ-ahˇ maˬ duˇ-eu miˇ neh nawˬ-euˬ guiˬ lahˬ-ahˇ ja ceuˬ-eu ma. Aˬ cawˬ loꞈ-ehˇ kʼoeˬ dzaˬ kʼaˆ dzaˬ-eu, maˬ sui maˬ dawˇ-eu, aˬ cawˬ miˬ zaˬ-ahˇ bahˬ-eu heu deuˬ ngaˇ maˬ mˇ. Kʼoeˇ uˬ taꞈ, kʼoeˇ gaˇ yawꞈ luꞈ-eu kawˬ taꞈ-eu tsawˇ haˬ heu gʼaˬ-ahˇ ngaˇ maˬ duˇ-eu miˇ neh, nawˬ-euˬ guiˬ lahˬ-ahˇ ja ceuˬ-eu ma.

¹² Ngaˇ-aˬ, tiˬ jaw laꞈ kʼoeˇ nyiˬ nah maˬ dzaˬ-eu zahˇ tawˬ luꞈ-awˇ, ngaˇ kʼaˇ za-euˬ yawˬ jeˬ na luꞈ laꞈ kʼoeˇ, tseˇ bymˇ tiˬ bymˇ nawˬ-ahˇ damˬ luꞈ ma’ lehˇ shaˇ-euˬ meh.

¹³ Ehˇ kʼawꞈ, kawˬ taꞈ-eu tsawˇ haˬ kʼoeˇ gʼaˬ-aˬ, ui cuiˆ yaw taw yawꞈ-awˇ, myaˆ pyawˬ mˬ paw maˬ ciˬ diˇ peuˬ ni, noeˬ shaˬ dui dui-eu miˇ neh kʼahˬ-ahˇ teˇ teˇ-ehˇ, ‘Miˬyehˇ-oˇ, ngaˇ iˬ baˇ zaˬ ma. Gʼawˬ shaˬ gaˬ nehˬ laꞈ-awˬ’ lehˇ shaˇ-euˬ meh.

¹⁴ Ngaˇ naw maꞈ-ahˇ ehˇ nehˬ nyaˇ. Kawˬ taꞈ-eu tsawˇ haˬ kʼoeˇ gʼaˬ gʼoꞈ ka-iˇ ngeh, Paˬliˬsehˇ kʼoeˇ gʼaˬ naˆ maˬ tseˇ Miˬyehˇ mehˬ shi guiˬ lahˬ za dzehˬ-awˇ, tsaˬ dzehˬ dawˇ dzehˬ-eu tsawˇ haˬ pyeuꞈ laˇ-euˬ meh. Aˬ jeˬ miˇ neh ehˇ naˇ, yawˬ haˇ yawˬ ha taˬ huiˬ-eu tsawˇ haˬ-aˬ, taˬ nyiˇ gaˇ ya daˬ-awˇ, yawˬ haˇ yawˬ ha taˬ nyiˇ-eu tsawˇ haˬ-aˬ, aˬ cawˬ taˬ huiˬ nehˬ-eu jeˬ-ahˇ za tehꞈ-a.”

Zaˬ deuˬ-ahˇ Yeˬsuˇ dawˬ ngehˬ gʼeh nehˬ-euˬ

¹⁵ Kʼoeˇ ngeh, Yeˬsuˇ neh bi toeˬ ciˆ-eu gʼaˇ duˬ, zaˬ deuˬ-ahˇ aˬ yawꞈ maꞈ sheuˬ laꞈ-euˬ meh. Zaˬ lahˇ deuˬ aˬ yawꞈ maꞈ-ahˇ dehˬ-euˬ meh.

¹⁶ Ehˇ kʼawꞈ, Yeˬsuˇ zaˬ kʼoeˇ deuˬ-ahˇ kuˇ-awˇ ehˇ-eu, “Zaˬ deuˬ-ahˇ maˬ laˆ tsoeˬ ni ngaˇ jawˇ gaˇ bi laˇ-awˬ. Aˬ jeˬ miˇ neh ehˇ naˇ, Miˬyehˇ Miˇkʼahˬ-aˬ, aˬ yawꞈ maꞈ loꞈ-ehˇ gʼeh-eu deuˬ-ahˇ oꞈ-eu meh.

¹⁷ Zaˬ yaw nyiˇ tiˬ gʼaˬ loꞈ-ehˇ nui ma taˬ-awˇ Miˬyehˇ Miˇkʼahˬ-ahˇ maˬ ha geuꞈ-eu tsawˇ haˬ aˬ geu gʼaˬ maˬ kaˬ, kʼoeˇ gaˇ maˬ ya uˇ leˇ-aˇ lehˇ, naw maꞈ-ahˇ ngaˇ maˇ jawˆ ni ehˇ-eu ma.”

Smˇ muiˬ smˇ baw hawˇ-eu Miˬyehˇ Miˇkʼahˬ

¹⁸ Myaˆ pyawˬ naˇ mehˇ jaˆ-eu aˬ yuiꞈ aˬ tsu tiˬ gʼaˬ Yeˬsuˇ-ahˇ naˇ haˬ-eu, “Muiˬ-eu saˬ laˬ-oˇ, mˬ maˬ maˬ byaˆ zaˇ ziˇ dehꞈ-eu jeˬ-ahˇ za nya ni, ngaˇ aˬ geu jeˬ ya mˇ ta.”

¹⁹ Yeˬsuˇ aˬ yawꞈ-ahˇ ehˇ nehˬ-eu, “Aˬ jeˬ miˇ neh nawˇ ngaˬ-ahˇ muiˬ-eu gʼaˬ lehˇ kuˇ te. Miˬyehˇ maˬ ngeuˇ naˇ, yaw muiˬ tiˬ gʼaˬ-iˬ maˬ jawˇ-a.

²⁰ Zahˇ dawˬ kʼoꞈ dawˬ heu deuˬ-ahˇ nawˇ siˬ nya meh. ‘Aˬ cawˬ-euˬ miˬ zaˬ yo zaˬ-ahˇ taˬ bahˬ taˬ muˆ. Tsawˇ haˬ taˬ sehꞈ. Smˇ kʼoeˬ taˬ kʼoeˬ. Aˬ cawˬ gaˇ kawˆ maˬ ngeuˇ gaˇ keuˆ ni saˇ kiˇ taˬ kamˬ. Yawˬ ha-euˬ aˬ da aˬ ma-ahˇ yaw zeu baw-awˬ’ lehˇ ehˇ taˬ-euˬ meh.”

²¹ Tsawˇ haˬ kʼoeˇ gʼaˬ ehˇ-eu, “Zahˇ dawˬ kʼoꞈ dawˬ heu deuˬ dawˬ tawˆ luꞈ-ahˇ, nyiˇ ngeh neh ngaˇ caw teh luꞈ-eu ma.”

²² Dawˬ kʼoeˇ dawˬ-ahˇ ngeh, Yeˬsuˇ aˬ yawꞈ-ahˇ ehˇnehˬ-eu, “Nawˇ tiˬ jeˬ loˬ nga siˬ. Nawˇ kʼaˇ jaˆ-eu jeˬ ahˬ jiˇ-awˇ, shaˬ zaˬ zahˬ zaˬ deuˬ-ahˇ biˇ nehˬ-awˬ. Mˬ kʼoeˇ taˆ nawˬ-euˬ pyuˇ shuiˇ myawˬ gahˬ jaˆ laˇ tehꞈ-a. Kʼoeˇ naˇ, gʼoꞈ poˆ laˇ-awˇ, ngaˬ-euˬ mehˬ nah caw teh laˇ-awˬ.”

²³ Ehˇ kʼawꞈ, dawˬ kʼoeˇ dawˬ-ahˇ tsawˇ haˬ kʼoeˇ gʼaˬ ya gaˬ ngeh, noeˬ shaˬ-euˬ meh. Aˬ jeˬ miˇ neh ehˇ naˇ, aˬ yawꞈ smˇ muiˬ muiˬ dui dui-eu meh.

²⁴ Yeˬsuˇ aˬ yawꞈ-ahˇ haw-awˇ ehˇ-eu, “Pyuˇ shuiˇ jaˆ myaˬ-eu tsawˇ haˬ-aˬ, Miˬyehˇ Miˇkʼahˬ-ahˇ uˇ leˇ-eu aˇ naˆ ni shaˬ-eu nga.

²⁵ Smˇ muiˬ smˇ baw tiˬ gʼaˬ Miˬyehˇ Miˇkʼahˬ-ahˇ uˇ leˇ-eu-aˬ, law taw tiˬ mawˇ aˬ gʼawꞈ gʼawꞈ naˬ-ahˇ uˇ leˇ-eu naˆ maˬ tseˇ kʼaˆ dzehˬ-eu meh.”

²⁶ Dawˬ kʼoeˇ dawˬ-ahˇ ya gaˬ-euˬ tsawˇ haˬ deuˬ ehˇ-eu, “Toˆ-ehˇ ngeuˇ naˇ, ka kʼoꞈ-eu jeˬ-ahˇ za nya-eu tsawˇ haˬ aˬ suˇ gʼaˬ jawˇ nmˇ.”

²⁷ Yeˬsuˇ ehˇ-eu, “Tsawˇ haˬ zaˬ maˬ jahˇ nya-eu jeˬ-ahˇ Miˬyehˇ jahˇ nya meh.”

²⁸ Kʼoeˇ ngeh, Beˬtuˆluˆ ehˇ-eu, “Haw sheˇ. Nga maꞈ kʼaˇ jaˆ-eu yawˬ jeˬ na luꞈ byehˇ dzeh yaꞈ jiˇ-awˇ, nawˬ-euˬ mehˬ nah caw teh laˇ-euˬ maˬ ngeuˇ nga loˇ.”

²⁹ Yeˬsuˇ aˬ yawꞈ maꞈ-ahˇ ehˇ kʼoꞈ nehˬ-eu, “Ngaˇ naw maꞈ-ahˇ maˇ jawˆ ni ehˇ-eu ma. Miˬyehˇ Miˇkʼahˬ gʼaˇ duˬ yawˬ ha-euˬ nymˇ, miˬ zaˬ, mehˇ nmˇ, aˬ buˇ aˬ li, heu deuˬ-ahˇ byehˇ dzeh yaꞈ-euˬ tsawˇ haˬ aˬ geu gʼaˬ maˬ kaˬ,

³⁰ nymˬ-mˇ dehꞈ luꞈ-eu heu ziˇ laꞈ kʼoeˇ, gʼawˬ mya bymˇ paˇ za kʼoꞈ-eu uˬ taꞈ, aˬ kaˇ kaˇ ziˇ laꞈ kʼoeˇ, mˬ maˬ maˬ byaˆ zaˇ ziˇ dehꞈ-eu jeˬ za tehꞈ-a.”

Yeˬsuˇ aˬ yawꞈ ya shiˇ-eu gaˇ kawˆ smˬ poˆ tiˬ poˆ paˇ ehˇ-eu

³¹ Zaˬ lahˇ tseˇ nyiꞈ gʼaˬ-ahˇ Yeˬsuˇ kuˇ doˆ-awˇ, heu loꞈ-ehˇ ehˇ nehˬ-euˬ meh. “Aˬ dui maꞈ Yeˬluˇsaˬlehˬ meuˬ-ahˇ le luꞈ-eu ma. Tsawˇhaˬ-euˬ Zaˬmaˇ gaˇ kawˆ Miˬyehˇ gʼaˇ duˬ ngehˬ dah-eu deuˬ neh kʼaˇ boꞈ taˬ-euˬ yawˬ jeˬ na luꞈ, kʼoeˇ gaˇ byah laˇ jiˇ tehꞈ-a.

³² Aˬ yawꞈ-ahˇ aˬ cawˬ tsawˇ jeuˬ-euˬ aˬ laꞈ laꞈ kʼoeˇ a nehˬ-awˇ, bi naˬ gʼa-awˇ, yehˬ bawˬ sehˇlu-ehˇ bi gʼeh-awˇ, duˬ kʼaˬ bi kʼa daˆ tehꞈ-a.

³³ Aˬ yawꞈ maꞈ aˬ yawꞈ-ahˇ yahˬ caˆ neh juiꞈ-awˇ sehꞈ tehꞈ-a. Ehˇ kʼawꞈ, smˬ nah byah laˇ naˇ, Miˬyehˇ aˬ yawꞈ-ahˇ paˇ bi gʼoꞈ dehꞈ laˇ tehꞈ-a.”

³⁴ Gaˇ kawˆ kʼoeˇ deuˬ-ahˇ zaˬ lahˇ deuˬ tiˬ pawꞈ-iˬ maˬ gʼoˆ shaw nya-a. Dawˬ kʼoeˇ deuˬ-euˬ dawˬ tsuiꞈ aˬ yawꞈ maꞈ gʼaˇ duˬ dehˬ kaˬ taˬ-euˬ gaˇ duˇ-awˇ, Yeˬsuˇ ehˇ mawꞈ-eu jeˬ-ahˇ aˬ yawꞈ maꞈ maˬ siˬ nya-a.

Myaˆ behꞈ hawˬ shaˇ tiˬ gʼaˬ-ahˇ myaˆ nuiˆ bi mawˇ laˇ-euˬ

³⁵ Aˬ yawꞈ Yeˬliˇkoˇ meuˬ dawˬ peh le keuˆ ngeh, myaˆ behꞈ tiˬ gʼaˬ gaˇ ma gaˇ dzeˇ nuiˇ-awˇ, hawˬ shaˇ shaˇ luꞈ-eu meh.

³⁶ Tsawˇ haˬ aˇ maꞈ maꞈ ma le-eu teˇ saˇ-ahˇ aˬ yawꞈ ya gaˬ ngeh, “Aˬ jeˬ gʼeh ta” lehˇ naˇ haˬ-eu meh.

³⁷ “Naˬzaˬlehˇ tsawˇ haˬ Yeˬsuˇ le luꞈ-eu nga” lehˇ, aˬ cawˬ aˬ yawꞈ-ahˇ ehˇ nehˬ-euˬ meh.

³⁸ “Daˬbiˇ-euˬ Zaˬmaˇ Yeˬsuˇ-oˇ, ngaˬ-ahˇ gʼawˬ shaˬ gaˬ nehˬ laꞈ-awˬ” lehˇ, aˬ yawꞈ guˇ-euˬ meh.

³⁹ Mehˬ hu paw cah luꞈ-eu deuˬ aˬ yawꞈ-ahˇ, “Ciˬ cuˇ ni jawˇ-awˬ” lehˇ dehˬ kʼawꞈ, aˬ yawꞈ maˬ naˇ haˬ ni, “Daˬbiˇ-euˬ Zaˬmaˇ-oˇ, ngaˬ-ahˇ gʼawˬ shaˬ gaˬ nehˬ laꞈ-awˬ” lehˇ, yaw beh poˆ naˆ maˬ tseˇ paˇ guˇ kʼaˆ laˇ-euˬ meh.

⁴⁰ Kʼoeˇ ngeh, Yeˬsuˇ naˬ leˇ-awˇ, tsawˇ haˬ kʼoeˇ gʼaˬ-ahˇ aˬ yawꞈ jawˇ gaˇ bi sheuˬ laꞈ-eu gʼaˇ duˬ dawˬ biꞈ-euˬ meh. Tsawˇ haˬ kʼoeˇ gʼaˬ dawˬ peh laˇ keuˆ ngeh, Yeˬsuˇ aˬ yawꞈ-ahˇ ehˇ nehˬ-eu,

⁴¹ “Nawˬ-euˬ gʼaˇ duˬ ngaˇ aˬ jeˬ bi jahˇ nehˬ mawꞈ-eu nya.” Aˬ yawꞈ ehˇ-eu, “Saˬ laˬoˇ, ngaˬ-euˬ myaˆ nuiˆ mawˇ laˇ ni bi jahˇ nehˬ mawꞈ miˇ-a.”

⁴² Yeˬsuˇ aˬ yawꞈ-ahˇ ehˇ nehˬ-eu, “Myaˇ nuiˆ mawˇ laˇ-awˬ. Nawˬ-euˬ jah-eu nui ma nawˬ-ahˇ bi taˬ leˇ-euˬ meh.”

⁴³ Tsawˇ haˬ kʼoeˇ gʼaˬ tiˬ poˆ tehꞈ-ehˇ myaˆ nuiˆ mawˇ laˇ-awˇ, Miˬyehˇ-euˬ guiˬ lahˬ-ahˇ ja ceuˬ ja ceuˬ-ehˇ, Yeˬsuˇ-euˬ mehˬ nah caw teh gʼeh-euˬ meh. Tsawˇ haˬ dawˬ tawˆ luꞈ kʼoeˇ gaˇ ya mawˇ ngeh, Miˬyehˇ-ahˇ ja ceuˬ-euˬ meh.