Luˇkaꞈ 13 - Akha

Iˬ baˇ maˬ noeˬ poˆ naˇ ya shiˇ tehꞈ-a

¹ Kʼoeˇ ngeh, Gaˬliˬlehˇ tsawˇ haˬ tiˬ deuˬ sahˬ paˬ Piˇlaˆ neh bi sehꞈ-awˇ, aˬ yawꞈ maꞈ-euˬ shiˬ hawˇ-eu aˬ yawꞈ maꞈ neh lawˇ-euˬ jeˬ zaˬ-euˬ shiˬ tiˬ gaˇ bi yoeˇ keuˬ-euˬ gaˇ kawˆ, kʼoeˇ gaˇ jawˇ-eu tsawˇ haˬ tiˬ paˆ na deuˬ Yeˬsuˇ-ahˇ ja mehˬ nehˬ-euˬ meh.

² Yeˬsuˇ aˬ yawꞈ maꞈ-ahˇ ehˇ nehˬ-eu, “Gaˬliˬlehˇ tsawˇ haˬ kʼoeˇ deuˬ kʼoeˇ loꞈ-ehˇ bi sehꞈ-euˬ miˇ neh, bi sehꞈ-euˬ tsawˇ haˬ kʼoeˇ deuˬ-aˬ, Gaˬliˬlehˇ tsawˇ haˬ dawˬ tawˆ luꞈ naˆ maˬ tseˇ iˬ baˇ huiˬ dzehˬ-eu meh lehˇ naw maꞈ noeˬ te loˇ.

³ Kʼoeˇ loꞈ-ehˇ maˬ ngeuˇ-a lehˇ, naw maꞈ-ahˇ ngaˇ ehˇ-eu ma. Naw maꞈ kʼawꞈ, iˬ baˇ maˬ noeˬ poˆ naˇ, kʼoeˇ loꞈ-ehˇ ya shiˇ tehꞈ-a.

⁴ Siˇlamˬ pu-ahˇ jaˆ-eu goˇ dui dui-eu nymˇ coˬ-iˇ-awˇ bi deh tehˬ sehꞈ-euˬ tsawˇ haˬ kʼoeˇ tseˇ yehꞈ gʼaˬ gaˇ kawˆ aˬ joˆ-ehˇ ehˇ nmˇ. Aˬ yawꞈ maꞈ-aˬ, Yeˬluˇsaˬlehˬ meuˬ-ahˇ jawˇ-eu tsawˇ haˬ dawˬ tawˆ luꞈ naˆ maˬ tseˇ bahˬ-eu muˆ-eu tsawˇ haˬ deuˬ meh lehˇ naw maꞈ noeˬ te loˇ.

⁵ Kʼoeˇ loꞈ-ehˇ maˬ ngeuˇ-a lehˇ, naw maꞈ-ahˇ ngaˇ ehˇ-eu ma. Naw maꞈ kʼawꞈ, iˬ baˇ maˬ noeˬ poˆ naˇ, kʼoeˇ loꞈ-ehˇ ya shiˇ tehꞈ-a.”

Aˇ siˬ maˬ siˬ-eu siˬ guˬ aˇ bawˇ gaˇ kawˆ yaw jeˬ ma jeˬ

⁶ Kʼoeˇ naˇ, Yeˬsuˇ aˬ yawꞈ maꞈ-ahˇ yaw jeˬ ma jeˬ heu hmˬ ja mehˬ-euˬ meh. “Tsawˇ haˬ tiˬ gʼaˬ aˬ yawꞈ-euˬ aˬ gaꞈ yaˇ kmˇ laꞈ kʼoeˇ siˬ guˬ aˇ bawˇ tiˬ bawˇ ka dehꞈ taˬ-euˬ meh. Aˇ siˬ-ahˇ haw le ngeh, tiˬ siˬ-iˬ maˬ siˬ ni jaˆ-eu meh.

⁷ Kʼoeˇ ngeh, a gaꞈ yaˇ kmˇ bo saˆ-eu gʼaˬ-ahˇ aˬ yawꞈ ehˇ nehˬ-eu, ‘Smˇ kʼoꞈ keuˆ ni siˬ guˬ heu bawˇ aˇ siˬ siˬ le nga loˇ lehˇ ngaˇ haw le-euˬ kʼawꞈ, tiˬ siˬ-iˬ siˬ le zaˇ maˬ mawˇ-a. Teu miˇ neh tuˇ dzeh-awˬ. Miˇ tsaˬ yawꞈ ngehꞈ-ehˇ jaˆ cawˆ-eu tehꞈ ngaˇ.’

⁸ Ehˇ kʼawꞈ, aˬ gaꞈ yaˇ kmˇ bo saˆ-eu gʼaˬ ehˇ-eu, ‘Baw leˬ-oˇ, tiˬ kʼoꞈ bi jaˆ haw siˬ. Ngaˇ dawˬ pehˬ jawˬ jawˬ-ehˇ duˬ-awˇ jeˬ yehˇ dawˆ ahˇ nehˬ haw la.

⁹ Naꞈ yaꞈ kʼoꞈ aˇ siˬ siˬ le naˇ, guiˬ lahˬ baw tehꞈ-a. Ehˇ kʼawꞈ, aˇ siˬ maˬ siˬ le naˇ, kʼoeˇ ngeh jawˇ tuˇ dzeh tehꞈ-a.”’

Jawˇ nah ngeh nah Yeˬsuˇ zaˬ miˬ zaˬ tiˬ gʼaˬ-ahˇ naˇ gawˇ laˆ taˬ nehˬ-euˬ

¹⁰ Jawˇ nah ngeh nah, Yuˇdaˆ tsawˇ haˬ-euˬ uˬ duˬ tahˬ nymˇ laꞈ kʼoeˇ Yeˬsuˇ mehˬ nehˬ tsoˆ nehˬ luꞈ-eu meh.

¹¹ Tseˇ yehꞈ kʼoꞈ byah ni nehꞈ uˇ-awˇ naˇ luꞈ-eu zaˬ miˬ zaˬ tiˬ gʼaˬ jawˇ-eu meh. Aˬ yawꞈ daˇ tsuiꞈ kʼoꞈ-iˇ-awˇ, maˬ mˇ dawˇ nya ni pyeuꞈ-iˇ-euˬ meh.

¹² Yeˬsuˇ aˬ yawꞈ-ahˇ ya mawˇ ngeh, kuˇ-awˇ, “Zaˬ miˬ zaˬ-oˇ, nawˬ-euˬ naˇ gawˇ-ahˇ nawˇ buˬ-iˇ-euˬ meh” lehˇ ehˇ nehˬ-euˬ meh.

¹³ Zaˬ miˬ zaˬ kʼoeˇ gʼaˬ kʼoeˇ taˆ aˬ yawꞈ aˬ laꞈ cawˬ daˆ nehˬ ngeh, tiˬ poˆ tehꞈ-ehˇ daˇ tsuiꞈ paˇ dawˇ kʼoꞈ laˇ-awˇ, zaˬ miˬ zaˬ kʼoeˇ gʼaˬ Miˬyehˇ-ahˇ ja ceuˬ-euˬ meh.

¹⁴ Uˬ duˬ tahˬ nymˇ kʼoeˇ nymˇ-ahˇ uˆ lahˇ-eu aˬ yuiꞈ geuꞈ-eu gʼaˬ, Yeˬsuˇ Jawˇ nah ngeh nah naˇ gawˇ laˆ taˬ nehˬ-euˬ gaˇ nui ma pehˇ-awˇ ehˇ-eu, “Gaˇ mˇ nya-eu aˇ nah koꞈ nah jaˆ meh. Kʼoeˇ koꞈ nah laꞈ kʼoeˇ laˇ-awˇ naˇ gawˇ bi laˆ saˆ laˇ-awˬ. Jawˇ nah-ahˇ teu loꞈ-ehˇ taˬ jahˇ.”

¹⁵ Sahˬpaˬ Yeˬsuˇ aˬ yawꞈ-ahˇ ehˇ kʼoꞈ nehˬ-eu, “Awꞈ-aꞈ tahˬ kʼoˬ-ahˇ duˇ-eu tsawˇ haˬ deuˬ-oˇ, naw maꞈ Jawˇ nah ngeh nah yawˬ ha-euˬ jeˬ zaˬ jeˬ kuˆ-ahˇ paꞈ taˬ-euˬ mawˇ neˇ hawˇ-eu mahˬ tahˬ laˆ puiˇ-awˇ, iˇ cuꞈ maˬ tsahˇ dawˇ-iˇ loˇ.

¹⁶ Toˆ-ehˇ ngeuˇ naˇ, nehꞈ Saˬdaˬ neh tseˇ yehꞈ kʼoꞈ keuˆ ni bi paꞈ tawꞈ taˬ-euˬ Aˬbyaˬhaˬ-euˬ aˬ buˇ heu gʼaˬ-ahˇ, Jawˇ nah ngeh nah puiˇ pyehˬ-awˇ bi buˬ-iˇ-eu maˬ tsaˬ-a loˇ.”

¹⁷ Yeˬsuˇ kʼoeˇ loꞈ-ehˇ ehˇ ngeh, aˬ yawꞈ-ahˇ muiˇ-eu tsawˇ haˬ dawˬ tawˆ luꞈ shaꞈ dawˇ-iˇ-euˬ meh. Ehˇ kʼawꞈ, tsawˇ haˬ dawˬ tawˆ luꞈ Yeˬsuˇ neh kʼaˇ mˇ-euˬ zahˬ leˇ paˬ-ehˇ gʼeh-eu jeˬ-ahˇ laˬ kʼaˬ cehˇ-eu meh.

Gʼawˬ paꞈ aˇ nuiˆ gaˇ kawˆ yaw jeˬ ma jeˬ

¹⁸ Yeˬsuˇ ehˇ-eu, “Miˬyehˇ Miˇkʼahˬ aˬ jeˬ-ahˇ duˇ ta. Aˬ jeˬ-ahˇ shaˇ cehˆ haw paˬ nga.

¹⁹ Kʼoeˇ-aˬ, tsawˇ haˬ tiˬ gʼaˬ neh yawˬ ha-euˬ yaˇ kmˇ-ahˇ sehˬ-euˬ gʼawˬ paꞈ aˇ nuiˆ -ahˇ duˇ-eu meh. Gʼawˬ paꞈ aˇ nuiˆ kʼoeˇ dehꞈ laˇ-awˇ aˇ bawˬ bawˬ ma ma laˇ ngeh, kʼoeˇ taˆ zaw-eu aˇ jiˇ deuˬ uˬ laꞈ-ahˇ bahˬ bahˬ le-eu meh.”

Dehˬ tseˬ gaˇ kawˆ yaw jeˬ ma jeˬ

²⁰ Yeˬsuˇ paˇ ehˇ-eu, “Miˬyehˇ Miˇkʼahˬ aˬ jeˬ-ahˇ shaˇ cehˆ haw paˬ nga.

²¹ Kʼoeˇ-aˬ, zaˬ miˬ zaˬ tiˬ gʼaˬ dehˬ tseˬ ui cuiˆ yuˇ-awˇ, cehˇ meu smˇ puˬ-ahˇ keuˬ-awˇ, dawˬ tawˆ luꞈ bi poˬ laˇ jiˇ gaˇ duˇ-eu meh.

Gʼoˆ kʼehˬ yaw suꞈ

²² Yeˬsuˇ-aˬ, Yeˬluˇsaˬlehˬ meuˬ-ahˇ le luꞈ-eu meh. Gaˇ pehˇ kʼaˇ jaˆ-eu meuˬ deuˬ pu deuˬ-ahˇ aˬ yawꞈ uˇ leˇ-awˇ mehˬ nehˬ tsoˆ nehˬ-euˬ meh.

²³ Tsawˇ haˬ tiˬ gʼaˬ Yeˬsuˇ-ahˇ ehˇ-eu, “Sahˬpaˬ-oˇ, ka kʼoꞈ-eu jeˬ za-eu tsawˇ haˬ ui cuiˆ tehꞈ-a loˇ.” Aˬ yawꞈ maꞈ-ahˇ Yeˬsuˇ ehˇ nehˬ-eu,

²⁴ “Gʼoˆ kʼehˬ yaw suꞈ-ahˇ ya uˇ leˇ ni leh jeh dui dui-awˬ. Tsawˇ haˬ gʼawˬ mya gʼaˬ kʼoeˇ gaˇ uˇ leˇ-eu lehˇ leh jeh kʼawꞈ, maˬ ya uˇ leˇ-a lehˇ, naw maꞈ-ahˇ ngaˇ ehˇ-eu ma.

²⁵ Nymˇ sahˇ gʼaˬ tuˇ le-awˇ laˇ gʼoˆ piˬ tehˬ shaw naˇ, naw maꞈ laꞈ nyiˇ paw yawꞈ-awˇ, laˇ gʼoˆ-ahˇ kʼoˆ kʼoˆ-ehˇ, ‘Sahˬpaˬ-oˇ, laˇ gʼoˆ pah nehˬ laꞈ sheˇ’ lehˇ ehˇ ehˇ-ehˇ ya shaˬ tehꞈ-a. Kʼoeˇ ngeh, ‘Naw maꞈ aˬ gaˇ jawˇ-eu oe-euˬ ngaˇ maˬ siˬ’ lehˇ, aˬ yawꞈ ehˇ tehꞈ-a.

²⁶ ‘Nga maꞈ nawˬ nehˬ-ehˇ dzaˬ taꞈ dawˇ taꞈ-euˬ tsawˇ haˬ deuˬ ma tawˇ. Nawˇ nga maꞈ jawˇ gaˇ mehˬ nehˬ tsoˆ nehˬ le-euˬ meh tawˇ’ lehˇ, naw maꞈ paˇ ehˇ tehꞈ-a.

²⁷ Ehˇ kʼawꞈ, aˬ yawꞈ naw maꞈ-ahˇ, ‘Naw maꞈ aˬ gaˇ jawˇ-eu laˇ-euˬ maˬ siˬ lehˇ ngaˇ ehˇ gʼaˬ-euˬ maˬ ngeuˇ-a loˇ. Yaw haiˬ jeˬ mˇ-eu tsawˇ haˬ deuˬ-oˇ, ngaˇ jawˇ gaˇ neh doˆ-iˇ-awˬ’ lehˇ ehˇ tehꞈ-a.

²⁸ Aˬbyaˬhaˬ, Iˇtsaˆ, Yaˬkoˆ hawˇ-eu Miˬyehˇ gʼaˇ duˬ ngehˬ dah-euˬ tsawˇ haˬ dawˬ tawˆ luꞈ, Miˬyehˇ Miˇkʼahˬ laꞈ kʼoeˇ jawˇ luꞈ gaˇ naw maꞈ ya mawˇ-awˇ, naw maꞈ-ahˇ laꞈ nyiˇ teh dzeh nehˬ laꞈ ngeh, naw maꞈ ngoeˇ ngoeˇ-ehˇ, nui ma pehˇ-eu laꞈ kʼoeˇ seuˬ teuꞈ teuꞈ-ehˇ ya shaˬ tehꞈ-a.

²⁹ Miˇ ma oeˬ coeˇ oeˬ pyawˬ-ahˇ kʼaˇ jawˇ-eu tsawˇ haˬ dawˬ tawˆ luꞈ uiˬ laˇ-awˇ, Miˬyehˇ Miˇkʼahˬ-ahˇ hawˬ jawˬ jawˬ taꞈ tehꞈ-a.

³⁰ Kʼoeˇ ngeh jawˇ, nymˬ-mˇ aˬ cawˬ mehˬ nah jawˇ luꞈ-eu tsawˇ haˬ tiˬ paˆ na deuˬ aˬ cawˬ mehˬ hu ya jawˇ-awˇ, nymˬ-mˇ aˬ cawˬ mehˬ hu jawˇ luꞈ-eu tsawˇ haˬ tiˬ paˆ na deuˬ aˬ cawˬ mehˬ nah ya jawˇ tehꞈ-a.”

Yeˬluˇsaˬlehˬ meuˬ gʼaˇ duˬ Yeˬsuˇ noeˬ shaˬ-eu

³¹ Kʼoeˇ ngeh, Paˬliˬsehˇ tiˬ paˆ na deuˬ Yeˬsuˇ jawˇ gaˇ laˇ-awˇ, “Heu gaˇ taˬ paˇ jawˇ. Sahˬ paˬ Heˬloˆ nawˬ-ahˇ sehꞈ mawꞈ-eu meh” lehˇ ehˇ-eu meh.

³² Yeˬsuˇ aˬ yawꞈ maꞈ-ahˇ ehˇ nehˬ-eu, “‘Iˬ nah hawˇ-eu ni shawˬ laꞈ kʼoeˇ, nehꞈ teh doˆ-eu gaˇ hawˇ-eu naˇ gawˇ laˆ taˬ nehˬ-eu gaˇ, ngaˇ mˇ luꞈ-eu ma. Ehˇ kʼawꞈ, saˇ pehˬ ngeh nah mˇ luiˆ jiˇ ma’ lehˇ, kʼaˬ yehˇ kʼoeˇ mawˇ-ahˇ ehˇ nehˬ-iˇ-awˬ.

³³ Ehˇ kʼawꞈ, iˬ nah, ni shawˬ hawˇ-eu, saˇ pehˬ laꞈ kʼoeˇ, ngaˬ-euˬ gaˇ ngaˇ mˇ luiˆ ma. Aˬ jeˬ miˇ neh ehˇ naˇ, Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ-ahˇ bi sehꞈ-eu-aˬ, Yeˬluˇsaˬlehˬ meuˬ-ahˇ maˬ ngeuˇ naˇ nui gaˇ bi sehꞈ-eu maˬ tsaˬ-aˇ.

³⁴ “Yeˬluˇsaˬlehˬ-oˇ, Yeˬluˇsaˬlehˬ-oˇ, Miˬyehˇ gʼaˇ duˬ ngehˬ dah-eu tsawˇ haˬ deuˬ-ahˇ nawˇ sehꞈ-awˇ, Miˬyehˇ neh kʼehˇ gʼeh leꞈ-euˬ tsawˇ haˬ deuˬ-ahˇ kʼaˬ lo neh biˬ-euˬ meh. Ya ciˆ ya ma-euˬ aˬ dahˇ neh ya ciˆ ya zaˬ deuˬ-ahˇ uˆ kaˬ-eu loꞈ-ehˇ, nawˬ-euˬ zaˬ deuˬ-ahˇ ngaˇ aˇ myaˆ poˆ uˆ kaˬ nehˬ mawꞈ-euˬ nga. Ehˇ kʼawꞈ, nawˇ ngaˬ-ahˇ kʼoeˇ loꞈ-ehˇ maˬ bi uˆ kaˬ nehˬ laꞈ-aˬ.

³⁵ Haw taˬ-awˬ. Nawˬ-euˬ Uˬ duˬ tahˬ nymˇ nymˇ ma-ahˇ Miˬyehˇ byehˇ dzeh nehˬ laꞈ tehꞈ-a. ‘Sahˬpaˬ Miˬyehˇ-euˬ tsawˇ myahˇ uˬ moˆ oe-euˬ gʼaˬ guiˬ lahˬ huiˬ luꞈ-uˇ’ lehˇ naw maꞈ ya ehˇ-eu aˇ yamˬ maˬ keuˆ laˇ kʼoeˇ keuˆ ni, naw maꞈ ngaˬ-ahˇ maˬ paˇ ya mawˇ meh.”