Lormav 8 - Akha

Yaw sahˇ Miˬyehˇ laꞈ kʼoeˇ dehꞈ-eu

¹ Kʼoeˇ miˇ neh, Yeˬsuˇ Ka li laꞈ kʼoeˇ jawˇ luꞈ-eu tsawˇ haˬ deuˬ-aˬ, nymˬ-mˇ yaˇ kʼaˬ daˇ nehˬ-eu jeˬ-ahˇ maˬ ya daˬ-a.

² Aˬ jeˬ miˇ neh ehˇ naˇ, aˬ dui-ahˇ Yeˬsuˇ Ka li laꞈ kʼoeˇ bi dehꞈ laꞈ-euˬ Yaw sahˇ Miˬyehˇ-euˬ baoˬ-aˬ, iˬ baˇ hawˇ-eu shiˇ-eu jeˬ-euˬ zahˇ sahˇ kʼoꞈ uˬ moˆ aˬ dui-ahˇ bi buˬ-iˇ laꞈ-euˬ meh.

³ Shiˬ shaˬ jiˇ-euˬ nui noeˬ gʼaˬ baˬ-eu miˇ neh, Zahˇ dawˬ kʼoꞈ dawˬ neh maˬ mˇ byah nya-euˬ jeˬ-ahˇ Miˬyehˇ mˇ byah-euˬ meh. Iˬ baˇ-ahˇ bi sha dzeh-eu gʼaˇ duˬ, aˬ yawꞈ-euˬ Zaˬmaˇ-ahˇ iˬ baˇ ahˇ-eu tsawˇ haˬ zaˬ-euˬ shiˬ shaˬ jiˇ gʼawˇ mawˇ pi-awˇ bi oe-euˬ laꞈ kʼoeˇ, shiˬ shaˬ jiˇ nui noeˬ laꞈ kʼoeˇ ahˇ-eu iˬ baˇ-ahˇ yaˇ kʼaˬ bi daˇ le-euˬ meh.

⁴ Shiˬ shaˬ jiˇ nui noeˬ mehˬ nah maˬ caw teh-ehˇ, Yaw sahˇ Miˬyehˇ mehˬ nah caw teh-awˇ dehꞈ luꞈ-eu aˬ dui-euˬ laꞈ kʼoeˇ, Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ yaw tsaˬ yaw dawˇ jeˬ nui kʼahˇ tiˬ shiˇ byah laˇ nya ni, Miˬyehˇ kʼoeˇ loꞈ-ehˇ mˇ-euˬ meh.

⁵ Shiˬ shaˬ jiˇ-euˬ nui noeˬ neh kʼaˇ bi dehꞈ-euˬ loꞈ-ehˇ dehꞈ-eu tsawˇ haˬ deuˬ-aˬ, shiˬ shaˬ jiˇ-euˬ nui kʼahˇ neh bi uˆ lahˇ-euˬ tsawˇ haˬ deuˬ pyeuꞈ-eu meh. Yaw sahˇ Miˬyehˇ neh kʼaˇ bi dehꞈ-euˬ loꞈ-ehˇ dehꞈ-eu tsawˇ haˬ deuˬ-aˬ, Yaw sahˇ Miˬyehˇ-euˬ nui kʼahˇ neh bi uˆ lahˇ-euˬ tsawˇ haˬ deuˬ pyeuꞈ-eu meh.

⁶ Shiˬ shaˬ jiˇ-euˬ nui noeˬ neh bi uˆ lahˇ-euˬ jeˬ-aˬ, shiˇ-eu jeˬ-ahˇ aˇ saˬ saˬ leˇ-eu meh. Yaw sahˇ Miˬyehˇ neh bi uˆ lahˇ-euˬ tsawˇ haˬ deuˬ-aˬ, dehꞈ-eu jeˬ hawˇ-eu nui saˇ oꞈ-eu jeˬ-ahˇ aˇ saˬ saˬ leˇ-eu meh.

⁷ Tsawˇ haˬ ti gʼaˬ yawˬ ha-euˬ shiˬ shaˬ jiˇ nui noeˬ neh bi uˆ lahˇ shaw naˇ, Miˬyehˇ-ahˇ muiˇ-eu tsawˇ haˬ pyeuꞈ laˇ-eu meh. Aˬ jeˬ miˇ neh ehˇ naˇ, Miˬyehˇ-euˬ zahˇ dawˬ kʼoꞈ dawˬ-ahˇ aˬ yawꞈ maˬ caw teh-a. Caw teh-eu gʼaˇ duˬ maˇ maˇ ni maˬ gʼeh nya-a.

⁸ Yawˬ ha-euˬ shiˬ shaˬ jiˇ nui noeˬ ehˇ dawˬ naˇ haˬ-eu tsawˇ haˬ-aˬ, Miˬyehˇ nui kʼahˇ shiˇ-eu tsawˇ haˬ maˬ pyeuꞈ laˇ nya-a.

⁹ Nui ma laꞈ kʼoeˇ Miˬyehˇ-euˬ Yaw sahˇ maˇ maˇ ni jawˇ naˇ, yawˬ ha-euˬ shiˬ shaˬ jiˇ nui noeˬ neh kʼaˇ bi dehꞈ-euˬ loꞈ-ehˇ maˬ dehꞈ ni, Yaw sahˇ Miˬyehˇ-euˬ ehˇ dawˬ naˇ haˬ-awˇ dehꞈ tehꞈ-a. Yawˬ ha laꞈ kʼoeˇ Ka liˬ-euˬ Yaw sahˇ maˬ jawˇ-eu tsawˇ haˬ aˬ geu gʼaˬ maˬ kaˬ, aˬ yawꞈ-ahˇ maˬ taꞈ-a.

¹⁰ Ehˇ kʼawꞈ, naw maꞈ laꞈ kʼoeˇ Ka li jawˇ naˇ, iˬ baˇ baˬ da neh naw maꞈ-euˬ gʼawˇ mawˇ shiˇ-euˬ kʼawꞈ, yaw tsaˬ yaw dawˇ jeˬ ba da neh naw maꞈ-euˬ saꞈ laˇ dehꞈ luꞈ-eu meh.

¹¹ Yeˬsuˇ-ahˇ shiˇ-euˬ gaˇ bi gʼoꞈ dehꞈ laˇ-euˬ Miˬyehˇ-euˬ Yaw sahˇ kʼoeˇ naw maꞈ-euˬ laꞈ kʼoeˇ jawˇ naˇ, Ka li-ahˇ shiˇ-euˬ gaˇ bi gʼoꞈ dehꞈ laˇ-euˬ kʼoeˇ gʼaˬ naw maꞈ-euˬ laꞈ kʼoeˇjawˇ-eu aˬ yawꞈ-euˬ Yaw sahˇ Miˬyehˇ-ahˇ gʼoe-awˇ, shiˇ nya-eu naw maꞈ-euˬ gʼawˇ mawˇ-ahˇ dehꞈ-eu jeˬ biꞈ nehˬ laꞈ tehꞈ-a.

¹² Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, aˬ dui-aˬ, dziˇ dzoˆ naꞈ-eu tsawˇ haˬ ma. Ehˇ kʼawꞈ, shiˬ shaˬ jiˇ-euˬ nui kʼahˇ mˇ-eu gʼaˇ duˬ naꞈ-eu maˬ ngeuˇ.

¹³ Aˬ jeˬ miˇ neh ehˇ naˇ, shiˬ shaˬ jiˇ nui noeˬ mehˬ nah naw maꞈ dehꞈ gʼeh naˇ, ya shiˇ tehꞈ-a. Ehˇ kʼawꞈ, Yaw sahˇ miˬyehˇ-ahˇ gʼoe-eu laꞈ kʼoeˇ iˬ baˇ mˇ-eu nui ma-ahˇ laˆ sehꞈ naˇ, ya dehꞈ tehꞈ-a.

¹⁴ Miˬyehˇ-euˬ Yaw sahˇ sheuˬ gʼeh-eu mehˬ nah dehꞈ gʼeh-eu tsawˇ haˬ deuˬ-aˬ, Miˬyehˇ-euˬ zaˬ meh.

¹⁵ Aˬ jeˬ miˇ neh ehˇ naˇ, Miˬyehˇ neh naw maꞈ-ahˇ biꞈ-euˬ Yaw sahˇ Miˬyehˇ-aˬ, naw maꞈ-ahˇ zaˬ kʼaˆ maˬ bi geuꞈ-eu uˬ taꞈ, naw maꞈ guˆ-iˇ ni maˬ jahˇ-a. Naw maꞈ Miˬyehˇ-euˬ zaˬ pyeuꞈ laˇ ni jahˇ-eu meh. Yaw sahˇ Miˬyehˇ-euˬ baoˬ-ahˇ gʼoe-eu laꞈ kʼoeˇ Miˬyehˇ-ahˇ “Aˬda-oˇ, ngaˬ Da-oˇ” lehˇ aˬ dui kuˇ-eu ma.

¹⁶ Aˬ dui Miˬyehˇ-euˬ zaˬ pyeuꞈ-eu gaˇ kawˆ, Yaw sahˇ Miˬyehˇ hawˇ-eu aˬ dui-euˬ saꞈ laˇ tiˬ kawˆ loꞈ-ehˇ saˇ kiˇ kamˬ-eu meh.

¹⁷ Aˬ dui-aˬ, aˬ yawꞈ-euˬ zaˬ pyeuꞈ-eu miˇ neh, aˬ yawꞈ-euˬ jeˬ biˇ oꞈ-eu tsawˇ haˬ ma. Miˬyehˇ neh Ka li-ahˇ biꞈ-eu lehˇ lehˬ hmˬ taˬ-euˬ jeˬ biˇ kʼawꞈ, Ka li nehˬ-ehˇ tiˬ kawˆ loꞈ-ehˇ aˬ duiˬ za ma. Aˬ jeˬ miˇ neh ehˇ naˇ, kʼehˬ-eu kʼaˆ-eu jeˬ-ahˇ Ka li nehˬ-ehˇ tiˬ kawˆ loꞈ-ehˇ aˬ dui daˬ naˇ, aˬ yawꞈ nehˬ-ehˇ tiˬ kawˆ loꞈ-ehˇ yaw shehꞈ kʼahˬ sehˇ za tehꞈ-a.

Aˬ dui yaw shehꞈ kʼahˬ sehˇ za tehꞈ-a

¹⁸ Heu ziˇ laꞈ kʼoeˇ aˬ dui ya daˬ luꞈ-eu heu-aˬ, aˬ kaˇ aˬ dui-ahˇ biꞈ laꞈ-eu yaw shehꞈ kʼahˬ sehˇ-ahˇ shaˇ cehˆ haw naˇ, tiˬ pawꞈ-iˬ ehˇ nyaꞈ maˬ nyeuˆ-aˇ lehˇ ngaˇ noeˬ duˬ taˬ-euˬ ma.

¹⁹ Miˬyehˇ neh aˬ yawꞈ-euˬ zaˬ deuˬ pah mehˬ nehˬ laꞈ gaˇ, kʼaˇ beh taˬ-euˬ jeˬ dawˬ tawˆ luꞈ noeˬ tmˬ dui dui-eu laꞈ kʼoeˇ loꞈ luꞈ-eu meh.

²⁰ Kʼaˇ beh taˬ-euˬ yawˬ jeˬ na luꞈ, laˆ cawˆ-eu jeˬ-ahˇ ya daˬ-eu meh. Ehˇ kʼawꞈ, aˬ yawˇ yawꞈ kʼoeˇ loꞈ-ehˇ ya daˬ-eu maˬ ngeuˇ-a. Miˬyehˇ nui ma tsaˬ-eu miˇ neh kʼoeˇ loꞈ-ehˇ pyeuꞈ luꞈ-eu meh. Ehˇ kʼawꞈ, noeˬ tmˬ duˬ heu loꞈ-ehˇ jaˆ-a siˬ.

²¹ Kʼaˇ beh taˬ-euˬ yawˬ jeˬ na luꞈ peuˬ-iˇ cawˆ-iˇ-eu jeˬ-euˬ baoˬ uˬ moˆ zaˬ kʼaˆ maˬ ya geuꞈ ni dzeuˇ-iˇ-awˇ, Miˬyehˇ-euˬ zaˬ deuˬ nehˬ-ehˇ tiˬ kawˆ loꞈ-ehˇ yaw shehꞈ kʼahˬ sehˇ huiˬ-eu buˬ-iˇ law-iˇ-eu jeˬ-ahˇ za-eu aˇ nah keuˆ le tehꞈ-a.

²² Kʼaˇ beh taˬ-euˬ yawˬ jeˬ na luꞈ iˬ nah keuˆ ni shaˬ zahˬ naꞈ-awˇ, zaˬ baw ngeh naˇ-eu miˇ neh mahˇ-eu loꞈ-ehˇ ya mahˇ luꞈ-eu aˬ dui siˬ nya-eu ma.

²³ Beh taˬ-euˬ jeˬ tehꞈ-ehˇ kʼoeˇ loꞈ-ehˇ mahˇ luꞈ-eu maˬ ngeuˇ-a. Miˬyehˇ neh biꞈ leꞈ-euˬ laꞈ sawˬ za beh beh-euˬ deuˬ pyeuꞈ-eu Yaw sahˇ Miˬyehˇ za-euˬ aˬ dui maꞈ kʼawꞈ, aˬ dui-ahˇ aˬ yawꞈ-euˬ zaˬ bi pyeuꞈ laˇ-awˇ, aˬ dui-euˬ nui ma gʼawˇ mawˇ dawˬ tawˆ luꞈ bi buˬ-iˇnehˬ laꞈ-eu gʼaˇ duˬ Miˬyehˇ-ahˇ loꞈ luꞈ ngeh, nui ma laꞈ kʼoeˇ mahˇ mahˇ-ehˇ shaˬ luꞈ-eu ma.

²⁴ A dui-euˬ noeˬ tmˬ-eu jeˬ baˬ da neh, ka kʼoꞈ-eu jeˬ za-euˬ ma. Noeˬ tmˬ-eu jeˬ-ahˇ ya mawˇ gʼaˬ shaw naˇ, kʼoeˇ-aˬ, noeˬ tmˬ-eu jeˬ maˬ paˇ ngeuˇ meh. Ya mawˇ luꞈ-eu jeˬ-ahˇ noeˬ tmˬ-eu aˬ suˇ gʼaˬ jawˇ ta.

²⁵ Ehˇ kʼawꞈ, maˬ mawˇ-euˬ jeˬ-ahˇ aˬ dui noeˬ tmˬ-eu ngeuˇ naˇ, nui ma gʼawˬ mahˇ ni taˬ-awˇ ya dawˬ meh.

²⁶ Kʼoeˇ gaˇ duˇ ni, aˬ dui gʼaˬ baˬ-eu miˇ neh Yaw sahˇ Miˬyehˇ caw ba le-euˬ meh. Aˬ dui guiˬ lahˬ aˬ joˆ-ehˇ ya shaˇ-eu gaˇ kawˆ aˬ dui maˬ siˬ nya-eu miˇ neh, Yaw sahˇ Miˬyehˇ aˬ dui-euˬ dah zaˇ kʼaˬ meh neh maˬ ja mehˬ nya-eu jeˬ mahˇ mahˇ-ehˇ Miˬyehˇ-ahˇ shaˇ-eu meh.

²⁷ Tsawˇ haˬ zaˬ-euˬ nui ma-ahˇ haw mawˇ nya-eu Miˬyehˇ-aˬ, Yaw sahˇ Miˬyehˇ noeˬ luꞈ-eu jeˬ-ahˇ siˬ nya-eu meh. Aˬ jeˬ miˇ neh ehˇ naˇ, Yaw sahˇ Miˬyehˇ-aˬ, Miˬyehˇ-euˬ tsawˇ haˬ deuˬ-euˬ dah zaˇ, Miˬyehˇ-euˬ nui ma-ahˇ tsaˬ ni guiˬ lahˬ shaˇ-eu meh.

²⁸ Miˬyehˇ-euˬ nui kʼahˇ mˇ-eu gʼaˇ duˬ kuˇ doˆ taˬ-euˬ aˬ yawꞈ-ahˇ gaˬ-eu tsawˇ haˬ deuˬ gʼaˇ duˬ, yawˬ jeˬ na luꞈ laꞈ kʼoeˇ yaw muiˬ jeˬ doˆ laˇ ni Miˬyehˇ mˇ luꞈ meh lehˇ aˬ dui siˬ nya ma.

²⁹ Miˬyehˇ-euˬ Zaˬmaˇ-aˬ, mehˇ nmˇ gʼawˬ mya ni laꞈ kʼoeˇ aˬ yuiꞈ yuiꞈ saˬ gʼaˬ loꞈ-ehˇ pyeuꞈ laˇ-awˇ, Miˬyehˇ neh tseˇ doˆ gʼaˬ-euˬ tsawˇ haˬ deuˬ Zaˬmaˇ-ahˇ duˇ laˇ ni Miˬyehˇ neh sheuˬ ceuˆ doˆ taˬ-euˬ meh.

³⁰ Aˬ yawꞈ neh sheuˬ ceuˆ doˆ taˬ-euˬ tsawˇ haˬ deuˬ-ahˇ aˬ yawꞈ kuˇ-euˬ meh. Aˬ yawꞈ neh kuˇ-euˬ tsawˇ haˬ deuˬ aˬ yawꞈ-ahˇ tsaˬ leˇ tsahˇ leˇ nya ni aˬ yawꞈ jahˇ-euˬ meh. Aˬ yawꞈ-ahˇ tsaˬ leˇ tsahˇ leˇ gʼaˬ-euˬ tsawˇ haˬ deuˬ-ahˇ aˬ yawꞈ-euˬ yaw shehꞈ kʼahˬ sehˇ biꞈ nehˬ-euˬ meh.

Yeˬsuˇ Ka li laꞈ kʼoeˇ ya mawˇ-eu Miˬyehˇ-euˬ yaw shehꞈ kʼahˬ sehˇ

³¹ Gaˇ kawˆ heu-ahˇ taꞈ leˇ-awˇ, aˬ dui aˬ joˆ-ehˇ ehˇ nmˇ. Miˬyehˇ aˬ dui jawˇ paw pyawˬ naˇ, aˬ dui-ahˇ aˬ suˇ gʼaˬ paˇ ciˬ daˬ laˇ peuˬ nmˇ.

³² Yawˬ ha-euˬ Zaˬmaˇ-ahˇ keuˆ ni ciˇ kʼoꞈ maˬ kʼoꞈ ni aˬ dui dawˬ tawˆ luꞈ gʼaˇ duˬ biꞈ nehˬ leꞈ-euˬ Miˬyehˇ-aˬ, aˬ yawꞈ kʼaˇ jaˆ-eu jeˬ dawˬ tawˆ luꞈ aˬ dui-ahˇ maˬ biꞈ laꞈ-aˇ loˇ.

³³ Miˬyehˇ neh tseˇ doˆ-euˬ tsawˇ haˬ deuˬ iˬ baˇ maˬ ahˇ-a lehˇ Miˬyehˇ neh ehˇ tsehˆ gʼaˬ-euˬ-aˬ, aˬ suˇ gʼaˬ paˇ teh ngehˬ leˇ-eu jawˇ nmˇ.

³⁴ Toˆ-ehˇ ngeuˇ naˇ, aˬ yawꞈ maꞈ iˬ baˇ ahˇ meh lehˇ aˬ suˇ gʼaˬ paˇ ehˇ nmˇ. Tiˬ gʼaˬ-iˬ maˬ paˇ ehˇ-aˇ. Shiˇ gʼaˬ-euˬ gaˇ Miˬyehˇ neh paˇ bi gʼoꞈ dehꞈ laˇ-awˇ, Miˬyehˇ-euˬ aˇ maˇ paw jawˇ-awˇ aˬ dui-euˬ gʼaˇ duˬ Miˬyehˇ-ahˇ shaˇ luꞈ-eu gʼaˬ pyeuꞈ-eu Yeˬsuˇ Ka li kʼawꞈ, kʼoeˇ loꞈ-ehˇ maˬ ehˇ-aˇ.

³⁵ Yeˬsuˇ Ka liˬ-euˬ gʼoeˇ-eu gaˬ-eu jeˬ-ahˇ aˬ dui ya gʼawˬ-iˇ ni, aˬ geu jeˬ laˆ pyaˆ laˇ nya ta. Shaˬ zahˬ mˇ-eu jeˬ loˇ. Noeˬ dui noeˬ duiˇ-eu jeˬ loˇ. Kʼehˬ-eu kʼaˆ-eu jeˬ loˇ. Mehꞈ-eu shuꞈ-eu jeˬ loˇ. Iˇ shaˬ shaˬ-eu jeˬ loˇ. Guˆ-eu gaˆ-eu jeˬ loˇ. Miˬ zaˬ mi cehˇ loˇ.

³⁶ Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ jaˆ-eu meh. “Nawˬ-euˬ ba da neh sehꞈ laˇ gaˇ, nah ga ni nga maꞈ daˬ-euˬ ma. Sehꞈ-eu lehˇ gʼeh-eu yawˇ loꞈ-ehˇ, nga maꞈ-ahˇ jahˇ nehˬ laꞈ-euˬ meh.”

³⁷ Maˬ ngeuˇ. Aˬ dui-ahˇ gaˬ-eu gʼaˬ baˬ da neh kʼoeˇ deuˬ dawˬ tawˆ luꞈ-ahˇ aˬ dui yaw muiˬ paˬ-ehˇ gʼaˬ leˇ-euˬ ma.

³⁸ Aˬ jeˬ miˇ neh ehˇ naˇ, aˬ yawꞈ-euˬ gʼoeˇ-eu gaˬ-eu jeˬ-ahˇ aˬ dui ya gʼawˬ-iˇ ni tiˬ jeˬ-iˬ maˬlaˆ pyaˆ laˇ nya-aˇ lehˇ ngaˇ siˬ duˬ taˬ-euˬ ma. Shiˇ-eu jeˬ maˬ ehˇ, dehꞈ-eu jeˬ maˬ ehˇ, mˬ taˆ gʼaˬ kʼehˇ deuˬ maˬ ehˇ, mˬ kʼoeˇ taˆ uˆ lahˇ luꞈ-eu deuˬ maˬ ehˇ, mˬ taˆ-euˬ baoˬ deuˬ maˬ ehˇ, heu ziˇ maˬ ehˇ, aˬ kaˇ kaˇ ziˇ maˬ ehˇ,

³⁹ Mˬ taˆ miˇ kʼahˬ maˬ ehˇ, miˇ oˆ miˇ kʼahˬ maˬ ehˇ, tiˬ jeˬ-iˬ maˬ laˆ pyaˆ laˇ nya-a. Kʼaˇ beh taˬ-euˬ jeˬ dawˬ tawˆ luꞈ laꞈ kʼoeˇ, Miˬyehˇ-euˬ gʼoeˇ-eu gaˬ-eu jeˬ-ahˇ aˬ dui ya gʼawˬ-iˇ ni laˆ pyaˆ laˇ nya-eu tiˬ jeˬ-iˬ maˬ jaˆ-a. Gʼoeˇ-eu gaˬ-eu kʼoeˇ-aˬ, aˬ dui-euˬ Sahˬpaˬ Yeˬsuˇ Ka li baˬ da neh aˬ dui-euˬ pyeuꞈ tsehˆ tsehˆ-euˬ ma.