Lormav 14 - Akha

Ka li zaˬ cawˬ cawˬ iˬ baˇ taˬ poˆ

¹ Jah-eu gʼaˬ baˬ-eu tsawˇ haˬ-ahˇ ha geuꞈ-awˬ. Ehˇ kʼawꞈ, aˬ yawꞈ neh noeˬ taˬ-euˬ jeˬ-ahˇ tsawˇ pyehˇ taˬ pyehˇ.

² Jah-eu tsawˇ haˬ tiˬ gʼaˬ na yawˬ jeˬ na luꞈ dzaˬ nya ma lehˇ noeˬ-eu meh. Ehˇ kʼawꞈ, jah-eu gʼaˬ baˬ-eu tsawˇ haˬ-aˬ, shaˬ jiˇ maˬ dzaˬ ni gʼawˬ paꞈ gʼawˬ nyoeˇ tehꞈ-ehˇ dzaˬ-eu meh.

³ Yawˬ jeˬ na luꞈ dzaˬ-eu tsawˇ haˬ-aˬ, maˬ dzaˬ-eu tsawˇ haˬ-ahˇ taˬ nyiˇ-eu maˬ tsaˬ-a. Yawˬ jeˬ na luꞈ maˬ dzaˬ-eu gʼaˬ kʼawꞈ, dzaˬ-eu gʼaˬ-ahˇ iˬ baˇ poˆ-eu maˬ tsaˬ-a. Aˬ jeˬ miˇ neh ehˇ naˇ, aˬ yawꞈ-ahˇ Miˬyehˇ ha geuꞈ taˬ-euˬ meh.

⁴ Aˬ cawˬ-euˬ zaˬ kʼaˆ-ahˇ yaw lehˬ poˆ paˬ-ehˇ nawˇ aˬ suˇ gʼaˬ te. Aˬ yawꞈ tsaˬ-eu lehˬ-eu gaˇ kawˆ, aˬ yawꞈ-euˬ baw leˬ gʼaˬ ngehˬ tehꞈ-a. Aˬ yawꞈ-aˬ tsaˬ-eu tsawˇ haˬ pyeuꞈ tehꞈ-a. Aˬ jeˬ miˇ neh ehˇ naˇ, aˬ yawꞈ tsaˬ ni Sahˬpaˬ Miˬyehˇ jahˇ nya-eu meh.

⁵ Tsawˇ haˬ tiˬ gʼaˬ na, aˇ nah nui deuˬ naˆ maˬ tseˇ huiˬ-eu aˇ nah jaˆ meh lehˇ noeˬ-awˇ, tiˬ gʼaˬ na, aˇ nah dawˬ tawˆ luꞈ tiˬ kawˆ meh lehˇ noeˬ-eu meh. Aˬ geu gʼaˬ maˬ kaˬ, yawˬ ha neh tsaˬ ma lehˇ noeˬ-euˬ jeˬ-ahˇ ziꞈ dah ni tuˆ tehˬ-eu tsaˬ meh.

⁶ Aˇ nah tiˬ nah na-ahˇ lah-eu daw-eu tsawˇ haˬ-aˬ, Sahˬpaˬ Miˬyehˇ-ahˇ taˬ huiˬ-eu laꞈ kʼoeˇ lah-eu daw-eu meh. Yawˬ jeˬ na luꞈ dzaˬ-eu tsawˇ haˬ kʼawꞈ, Sahˬpaˬ Miˬyehˇ-ahˇ taˬ huiˬ-eu laꞈ kʼoeˇ dzaˬ-eu meh. Aˬ jeˬ miˇ neh ehˇ naˇ, aˬ yawꞈ Sahˬpaˬ Miˬyehˇ-euˬ guiˬ lahˬ-ahˇ ja ceuˬ-awˇ dzaˬ-eu meh. Yawˬ jeˬ na luꞈ maˬ dzaˬ-eu tsawˇ haˬ kʼawꞈ, Sahˬpaˬ Miˬyehˇ-ahˇ taˬ huiˬ-eu miˇ neh maˬ dzaˬ-eu meh. Kʼoeˇ-euˬ gʼaˇ duˬ Sahˬpaˬ miˬyehˇ-euˬ guiˬ lahˬ-ahˇ aˬ yawꞈ ja ceuˬ-eu meh.

⁷ Aˬ dui tiˬ gʼaˬ-iˬ yawˬ ha gʼaˇ duˬ tehꞈ-ehˇ dehꞈ-eu maˬ ngeuˇ. Tiˬ gʼaˬ-iˬ yawˬ ha gʼaˇ duˬ tehꞈ-ehˇ shiˇ-eu kʼawꞈ maˬ ngeuˇ.

⁸ Aˬ dui ya dehꞈ naˇ, Sahˬpaˬ Miˬyehˇ gʼaˇ duˬ dehꞈ-eu jeˬ pyeuꞈ-awˇ, ya shiˇ naˇ, Sahˬpaˬ Miˬyehˇ gʼaˇ duˬ shiˇ-eu jeˬ pyeuꞈ-eu ma. Kʼoeˇ miˇ neh aˬ dui-aˬ, dehꞈ-eu maˬ ehˇ, shiˇ-eu maˬ ehˇ, Sahˬpaˬ Miˬyehˇ-euˬ pyeuꞈ-eu ma.

⁹ Aˬ jeˬ miˇ neh ehˇ naˇ, dehꞈ luꞈ-eu deuˬ hawˇ-eu shiˇ-euˬ deuˬ dawˬ tawˆ luꞈ kʼoeˇ taˆ Sahˬpaˬ geuꞈ-awˇ uˆ lahˇ-eu gʼaˇ duˬ, Ka li shiˇ-awˇ gʼoꞈ dehꞈ laˇ gʼaˬ-euˬ meh.

¹⁰ Toˆ-ehˇ ngeuˇ naˇ, naw maꞈ shaˬ jiˇ maˬ dzaˬ ni gʼawˬ paꞈ gʼawˬ nyoeˇ tehꞈ-ehˇ dzaˬ-eu tsawˇ haˬ deuˬ yawˬ ha-euˬ cawˬ Ka li zaˬ deuˬ-ahˇ aˬ jeˬ miˇ neh iˬ baˇ poˆ te. Kʼoeˇ loꞈ-ehˇ duˇ ni, naw maꞈ yawˬ jeˬ na luꞈ dzaˬ-eu tsawˇ haˬ deuˬ kʼawꞈ, yawˬ ha-euˬ cawˬ Ka li zaˬ deuˬ-ahˇ aˬ jeˬ miˇ neh taˬ nyiˇ te. Aˬ dui dawˬ tawˆ luꞈ Miˬyehˇ mehˬ shi yawꞈ leˇ-awˇ yaˇ kʼaˬ ya bi daˇ meh.

¹¹ Jaˇliꞈ laꞈ kʼoeˇ ehˇ taˬ-euˬ, “Sahˬpaˬ Miˬyehˇ ehˇ-eu, Dehꞈ-eu Miˬyehˇ pyeuꞈ-eu ngaˬ-ahˇ, yawˬ gʼaˬ na luꞈ pawˬ dmˬ dmˬ-awˇ, ngaˇ maˇ maˇ ni Miˬyehˇ meh lehˇ, saˇ kiˇ kamˬ-eu dawˬ ngehˬ tehꞈ-a.”

¹² Aˬ dui yawˬ gʼaˬ na luꞈ, yawˬ ha neh kʼaˇ mˇ kʼaˇ shaˇ-euˬ jeˬ Miˬyehˇ-ahˇ ya ja doˆ nehˬ tehꞈ-a.

Ka li zaˬ cawˬ cawˬ coˬ-iˇ ni taˬ jahˇ

¹³ Kʼoeˇ miˇ neh, aˬ dui tiˬ gʼaˬ tiˇ gʼaˬ iˬ baˇ poˆ-eu jeˬ-ahˇ byehˇ dzeh kaˇ-euˇ. Yawˬ ha-euˬ cawˬ Ka li zaˬ deuˬ sahˬ tiꞈ tiꞈ-awˇ iˬ baˇ laꞈ kʼoeˇ bi coˬ ahˇ-eu gʼaˇ duˬ tiˬ jeˬ-iˬ maˬ mˇ lehˇ, naw maꞈ noeˬ tsehˆ-eu tsaˬ meh.

¹⁴ Ngaˇ Sahˬpaˬ Yeˬsuˇ nehˬ-ehˇ taꞈ-eu laꞈ kʼoeˇ dzaˬ-eu dawˇ-eu jeˬ-aˬ, maˬ muiˬ maˬ shawˇ-eu tiˬ jeˬ-iˬ maˬ jaˆ-aˇ lehˇ jah duˬ taˬ-euˬ ma. Ehˇ kʼawꞈ, tsawˇ haˬ tiˬ gʼaˬ na, dzaˬ dzaˬ dawˇ dawˇ tiˬ jeˬ na maˬ shawˇ-a lehˇ jah-eu ngeuˇ naˇ, dzaˬ dzaˬ dawˇ dawˇ kʼoeˇ aˬ yawꞈ gʼaˇ duˬ maˬ shawˇ-eu jeˬ pyeuꞈ laˇ-euˬ meh.

¹⁵ Nawˬ neh dzaˬ-euˬ dzaˇ tiˬ jeˬ paˬ baˬ da neh nawˬ-euˬ cawˬ Ka li zaˬ tiˬ gʼaˬ na nui ma maˬ saˇ duˬ jaˆ naˇ, nawˇ gʼoeˇ-eu gaˬ-eu laꞈ kʼoeˇ dehꞈ-eu maˬ paˇ ngeuˇ meh. Ka li shiˇ dah-awˇ ka kʼoꞈ nehˬ-euˬ tsawˇ haˬ-ahˇ nawˬ neh dzaˬ-euˬ dzaˬ dzaˬ dawˇ dawˇ neh maˬ ya laˆ cawˆ-a.

¹⁶ Nawˬ neh yaw muiˬ meh lehˇ noeˬ-euˬ jeˬ aˬ cawˬ ja doeˇ duˬ taˬ bi pyeuꞈ.

¹⁷ Aˬ jeˬ miˇ neh ehˇ naˇ, Miˬyehˇ Miˇkʼahˬ-aˬ, dzaˬ-eu dawˇ-eu jeˬ maˬ ngeuˇ-a. Kʼoeˇ-aˬ, yaw tsaˬ yaw dawˇ jeˬ, Miˬyehˇ laꞈ kʼoeˇ nui saˇ oꞈ-eu jeˬ hawˇ-eu, Muiˬ-eu Shawˇ-eu Yaw sahˇ Miˬyehˇ neh biꞈ-euˬ laˬ kʼaˬ cehˇ-eu jeˬ pyeuꞈ-eu meh.

¹⁸ Ka li gʼaˇ duˬ kʼoeˇ loꞈ-ehˇ mˇ-eu tsawˇ haˬ-ahˇ Miˬyehˇ nui ma tsaˬ-awˇ, tsawˇ haˬ zaˬ kʼawꞈ nui kʼahˇ shiˇ-eu meh.

¹⁹ Kʼoeˇ miˇ neh, tiˬ gʼaˬ tiˇ gʼaˬ tsaˬ leˇ dzoeˇ leˇ-eu jeˬ hawˇ-eu, tiˬ gʼaˬ tiˇ gʼaˬ caw dehˬ caw toˆ-eu jeˬ-ahˇ aˬ dui noeˬ tsoˆ taˬ-eu tsaˬ meh.

²⁰ Dzaˬ dzaˬ dawˇ dawˇ baˬ da neh Miˬyehˇ neh mˇ taˬ-euˬ jeˬ-ahˇ taˬ laˆ cawˆ. Dzaˬ-eu jeˬ dawˬ tawˆ luꞈ yaw shawˇ meh. Ehˇ kʼawꞈ, aˬ cawˬ gʼaˇ duˬ iˬ baˇ bi doˆ laˇ-eu jeˬ-ahˇ dzaˬ-eu maˬ tsaˬ-a.

²¹ Shaˬ jiˇ dzaˬ-eu, jiˇ baˬ dawˇ-eu, yawˬ ha-euˬ cawˬ Ka li zaˬ tiˬ gʼaˬ na iˬ baˇ mˇ ni jahˇ-eu, heu loꞈ-ehˇ gʼeh-eu deuˬ-ahˇ yahˇ-eu muiˬ meh.

²² Gaˇ kawˆ heu-ahˇ taꞈ leˇ-awˇ, yawˬ ha neh kʼaˇ jah duˬ taˬ-euˬ jeˬ yawˬ ha hawˇ-eu Miˬyehˇ yaw kaˬ-ahˇ jaˆ-eu meh. Yawˬ ha neh tsaˬ ma lehˇ noeˬ-euˬ jeˬ kʼaˬ duˬ ni mˇ-eu tsawˇ haˬ-aˬ, laˬ kʼaˬ cehˇ-eu jeˬ oꞈ-eu meh.

²³ Ehˇ kʼawꞈ, yawˬ ha dzaˬ-eu jeˬ-ahˇ yawˬ ha-euˬ nui ma laꞈ kʼoeˇ maˬ shaw naˇ, jah-eu laꞈ kʼoeˇ mˇ-eu maˬ ngeuˇ-eu miˇ neh Miˬyehˇ yaˇ kʼaˬ daˇ gaˇ ya daˬ tehꞈ-a. Maˬ jah-eu laꞈ kʼoeˇ kʼaˇ mˇ-euˬ yawˬ jeˬ na luꞈ iˬ baˇ meh.