Lormav 10 - Akha

¹ Aˬ yuiꞈ aˬ nyiˇ Ka li zaˬ deuˬ-oˇ, ngaˬ-euˬ nui ma laꞈ kʼoeˇ ngaˬ-euˬ tsawˇ jeuˬ ka kʼoꞈ-eu jeˬ bi za mawꞈ dui dui nya. Aˬ yawꞈ maꞈ gʼaˇ duˬ ngaˇ guiˬ lahˬ shaˇ dui dui luꞈ ma.

² Aˬ yawꞈ maꞈ Miˬyehˇ nui ma tsaˬ ni mˇ mawꞈ dui dui meh. Ehˇ kʼawꞈ, aˬ yawꞈ maꞈ mˇ-eu kʼoeˇ gaˇ ma maˬ tsaˬ-a.

³ Tsawˇ haˬ zaˬ aˬ yawꞈ-ahˇ tsaˬ leˇ tsahˇ leˇ nya ni Miˬyehˇ neh shaˇ dahˇ taˬ-euˬ gaˇ ma-ahˇ aˬ yawꞈ maꞈ maˬ siˬ nya-ehˇ, yawˬ haˇ yawˬ ha gaˇ ma tiˬ kahˇ shaˇ dahˇ-eu lehˇ leh jeh-eu meh. Kʼoeˇ miˇ neh, tsawˇ haˬ zaˬ aˬ yawꞈ-ahˇ tsaˬ leˇ tsahˇ leˇ ni Miˬyehˇ neh shaˇ dahˇ-euˬ gaˇ ma-ahˇ aˬ yawꞈ maꞈ maˬ ha geuꞈ-a.

⁴ Jah-eu tsawˇ haˬ yawˬ gʼaˬ na luꞈ Miˬyehˇ-ahˇ tsaˬ leˇ tsahˇ leˇ nya ni, Ka li neh Zahˇ dawˬ kʼoꞈ dawˬ-ahˇ aˇ saˬ bi saˬ-euˬ meh.

Ka kʼoꞈ-eu jeˬ tsawˇ haˬ dawˬ tawˆ luꞈ gʼaˇ duˬ meh

⁵ Zahˇ dawˬ kʼoꞈ dawˬ-ahˇ gʼoe-eu baˬ da neh Miˬyehˇ-ahˇ tsaˬ leˇ tsahˇ leˇ-eu gaˇ kawˆ-ahˇ taꞈ leˇ-awˇ, “Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ dawˬ deuˬ-ahˇ naˇ haˬ geuꞈ-eu tsawˇ haˬ ya dehꞈ tehꞈ-a” lehˇ, Moˇseˬ neh boꞈ taˬ-euˬ jaˆ-eu meh.

⁶ Ehˇ kʼawꞈ, jah-eu baˬ da neh Miˬyehˇ-ahˇ tsaˬ leˇ tsahˇ leˇ-eu gaˇ kawˆ Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. “Mˬ kʼoeˇ taˆ aˬ suˇ gʼaˬ daˆ leˇ nmˇ lehˇ yawˬ haˇ yawˬ ha taˬ naˇ haˬ.” (Kʼoeˇ-aˬ, Ka li-ahˇ sheuˬ ka laˬ leˇ gaˇ ehˇ mawꞈ-eu meh.)

⁷ “Shiˇ-eu miˇ oˆ kʼahˬ-ahˇ aˬ suˇ gʼaˬ zaꞈ ka-iˇ nmˇ lehˇ kʼawꞈ, yawˬ haˇ yawˬ ha taˬ naˇ haˬ.” (Kʼoeˇ-aˬ, Ka li-ahˇ shiˇ-eu miˇ kʼahˬ-ahˇ neh sheuˬ doˆ laˬ-iˇ gaˇ ehˇ mawꞈ-eu meh.)

⁸ Ehˇ mawꞈ-eu dawˬ tsuiꞈ-aˬ, heu loꞈ-ehˇ meh. “Miˬyehˇ-euˬ dawˬ kawˬ-aˬ, naw maꞈ-euˬ dawˬ peh jaˆ-eu meh. Naw maꞈ-euˬ mehˬ luˬ kʼoeˇ taˆ jaˆ-awˇ, naw maꞈ-euˬ nui ma laꞈ kʼoeˇ ahˇ-eu meh.” Kʼoeˇ-aˬ, aˬ dui maꞈ dawˬ mehˬ mehˬ luꞈ-eu jah-eu gaˇ kawˆ kʼoeˇ meh.

⁹ Yeˬsuˇ-aˬ Sahˬpaˬ meh lehˇ saˇ kiˇ kamˬ-awˇ, Miˬyehˇ neh aˬ yawꞈ-ahˇ shiˇ-euˬ gaˇ bi gʼoꞈ dehꞈ laˇ-euˬ meh lehˇ nawˇ jah naˇ, ka kʼoꞈ-eu jeˬ za tehꞈ-a.

¹⁰ Aˬ jeˬ miˇ neh ehˇ naˇ, aˬ dui jah-eu miˇ neh Miˬyehˇ-ahˇ tsaˬ leˇ tsahˇ leˇ-awˇ, aˬ dui saˇ kiˇ kamˬ-euˬ miˇ neh ka kʼoꞈ eu jeˬ za-euˬ ma.

¹¹ “Aˬ yawꞈ-ahˇ kʼaˇ jah-eu tsawˇ haˬ deuˬ daˬ ga-awˇ maˬ ya shaꞈ dawˇ-aˇ” lehˇ, Jaˇliꞈ laꞈ kʼoeˇ ehˇ taˬ-euˬ meh.

¹² Yuˇdaˆ tsawˇ haˬ hawˇ-eu Yuˇdaˆ tsawˇ haˬ maˬ ngeuˇ-eu deuˬ maˬ tseˇ paˆ ni, dawˬ tawˆ luꞈ ahˇ leˇ jiˇ-eu meh. Miˬyehˇ-aˬ, dawˬ tawˆ luꞈ-euˬ Sahˬpaˬ pyeuꞈ-awˇ, aˬ yawꞈ-ahˇ kʼaˇ kuˇ-eu tsawˇ haˬ-ahˇ guiˬ lahˬ tiˬ byah ni biꞈ nehˬ-eu meh.

¹³ “Sahˬpaˬ Miˬyehˇ-euˬ tsawˇ myahˇ-ahˇ kuˇ-awˇ laꞈ jeuˬ kʼaˇ shaˇ-eu tsawˇ haˬ-ahˇ aˬ yawꞈ ka kʼoꞈ nehˬ tehꞈ-a.”

¹⁴ Ehˇ kʼawꞈ, aˬ yawꞈ maꞈ maˬ jah naˇ, aˬ yawꞈ-ahˇ aˬ joˆ-ehˇ kuˇ-awˇ laꞈ jeuˬ shaˇ nmˇ. Aˬ yawꞈ-euˬ gaˇ kawˆ maˬ ya gaˬ haw naˇ, aˬ joˆ-ehˇ jah nmˇ. Mehˬ nehˬ-iˇ-eu gʼaˬ ma jawˇ naˇ, aˬ joˆ-ehˇ ya gaˬ haw nmˇ.

¹⁵ Mehˬ nehˬ-iˇ-eu tsawˇ haˬ maˬ kʼehˇ gʼeh naˇ, aˬ joˆ-ehˇ bi mehˬ nehˬ-iˇ nmˇ. Kʼoeˇ miˇ neh, “Laˬ kʼaˬ cehˇ-eu Guiˬ lahˬ dawˬ mehˬ-eu tsawˇ haˬ deuˬ-euˬ kuiˇ toꞈ aˇ naˆ ni haw muiˬ-eu nga” lehˇ, Jaˇliꞈ laꞈ kʼoeˇ ehˇ taˬ-euˬ meh.

¹⁶ Ehˇ kʼawꞈ, tsawˇ haˬ yawˬ gʼaˬ na luꞈ Laˬ kʼaˬ cehˇ-eu Guiˬ lahˬ dawˬ-ahˇ ha geuꞈ-eu maˬ ngeuˇ-a. “Sahˬpaˬ Miˬyehˇ-oˇ, nga maꞈ neh mehˬ-euˬ dawˬ-ahˇ aˬ suˇ gʼaˬ naˇ haˬ geuꞈ-eu jawˇ nmˇ” lehˇ, Iˇsaˬyaˇ neh ehˇ-euˬ dawˬ jaˆ-eu meh.‘

¹⁷ Dawˬ tawˆ luꞈ ehˇ leꞈ naˇ, jah-eu kʼoeˇ-aˬ, Miˬyehˇ dawˬ kawˬ ya gaˬ-euˬ miˇ neh jah-awˇ, Miˬyehˇ dawˬ kawˬ ya gaˬ-euˬ kʼoeˇ-aˬ, Ka liˬ-euˬ dawˬ baˬ da neh ya gaˬ-euˬ jeˬ pyeuꞈ-eu meh.

¹⁸ Ehˇ kʼawꞈ, “Aˬ yawꞈ maꞈ Miˬyehˇ dawˬ kawˬ maˬ ya gaˬ-aˬ lehˇ ehˇ-eu ngeuˇ meh loˇ” lehˇ ngaˇ naˇ haˬ mawꞈ-eu ma. Aˬ yawꞈ maꞈ Miˬyehˇ dawˬ kawˬ ya gaˬ-euˬ yaw duˬ baw meh. Aˬ jeˬ miˇ neh ehˇ naˇ, Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. “A yawꞈ maꞈ neh mehˬ nehˬ-euˬ dawˬ, miˇ tsaˬ tahˬ kʼawˇ gaˬ byah-iˇ-awˇ, mˬ dzeˇ miˇ dzeˇ gaˬ keuˆ-euˬ meh.”

¹⁹ “Iˇsaˬleˬlaˆ tsawˇ haˬ deuˬ maˬ gʼoˆ shaw-aˬ loˇ” lehˇ ngaˇ paˇ naˇ haˬ mawꞈ-eu ma. Dawˬ heu dawˬ-ahˇ ehˇ kʼoꞈ beh beh-euˬ gʼaˬ Moˇseˬ meh. Aˬ yawꞈ ehˇ taˬ-euˬ heu loꞈ-ehˇ jaˆ-eu meh. “Aˬ cawˬ tsawˇ jeuˬ-ahˇ ngaˇ zmˬ-awˇ, naw maꞈ myaˆ naˆ ni ngaˇ jahˇ ma. Aˬ dzawˬ tsawˇ jeuˬ-ahˇ ngaˇ gʼoe-awˇ, naw maꞈ nui ma pehˇ ni jahˇ ma.”

²⁰ Iˇsaˬyaˇ neh kʼoeˇ naˆ maˬ tseˇ paˇ ehˇ taˬ-euˬ jaˆ-eu meh. “Ngaˬ-ahˇ maˬ poˆ-euˬ tsawˇ haˬ deuˬ. ngaˬ-ahˇ ya mawˇ duˬ gʼaˬ-euˬ meh. Ngaˬ-ahˇ maˬ shaˇ caw-eu deuˬ-ahˇ, ngaˇ iˇ dzoeˇ-awˇ bi mawˇ-euˬ ma.”

²¹ Ehˇ kʼawꞈ, Iˇsaˬleˬlaˆ tawˇ jeuˬ gaˇ kawˆ aˬ yawꞈ heu loꞈ-ehˇ ehˇ taˬ-euˬ meh. “Ngaˬ-euˬ ehˇ dawˬ maˬ naˇ haˬ-ehˇ ngaˬ-ahˇ puiˬ luꞈ-eu tsawˇ jeuˬ-ahˇ ha geuꞈ-eu gʼaˇ duˬ, ngaˬ-euˬ aˬ laꞈ nah ga-ehˇ cawˬ ja taˬ-euˬ ma.”