Lormav 1 - Akha

¹ Ngaˇ-aˬ, Yeˬsuˇ Ka liˬ-euˬ zaˬ kʼaˆ Pawˇluˆ ma. Miˬyehˇ-euˬ Laˬ kʼaˬ cehˇ-eu Guiˬ lahˬ dawˬ mehˬ-eu gʼaˇ duˬ, Miˬyehˇ neh tseˇ doˆ-awˇ kuˇ-euˬ gʼaˬ kʼehˇ tiˬ gʼaˬ pyeuꞈ-eu ma.

² Jaˇliꞈ laꞈ kʼoeˇ boꞈ taˬ-euˬ loꞈ-ehˇ, Miˬyehˇ aˬ yawꞈ-euˬ gʼaˇ duˬ ngehˬ dah-eu deuˬ-ahˇ gʼoe-eu laꞈ kʼoeˇ, Laˬ kʼaˬ cehˇ-eu Guiˬ lahˬ dawˬ bi keuˆ le ma lehˇ, aˇ hu ba neh saˇ jaˇ dzaˬ taˬ-euˬ jaˆ-eu meh.

³ Kʼoeˇ-aˬ, aˬ yawꞈ-euˬ Zaˬmaˇ pyeuꞈ-eu aˬ dui-euˬ Sahˬpaˬ Yeˬsuˇ Ka li gaˇ kawˆ meh. Tsawˇ haˬ zaˬ-ahˇ taꞈ-eu paw neh sawˇ leꞈ naˇ, aˬ yawꞈ-aˬ, Daˬbiˇ-euˬ zaˬ deuˬ uˆ deuˬ laꞈ kʼoeˇ dehꞈ le-euˬ meh.

⁴ Miˬyehˇ-ahˇ taꞈ-eu paw neh sawˇ leꞈ naˇ, aˬ yawꞈ-aˬ, Miˬyehˇ-euˬ Zaˬmaˇ pyeuꞈ-eu gaˇ kawˆ, huiˬ dui dui-eu baoˬ laꞈ kʼoeˇ aˬ dui-ahˇ bi mawˇ laꞈ-euˬ meh. Aˬ yawꞈ shiˇ gʼaˬ-euˬ gaˇ Miˬyehˇ neh paˇ bi gʼoꞈ dehꞈ laˇ-eu laꞈ kʼoeˇ bi mawˇ laꞈ-euˬ meh.

⁵ Tsawˇ jeuˬ dawˬ tawˆ luꞈ jah laˇ-awˇ naˇ haˬ geuꞈ ni sheuˬ gʼeh-eu gʼaˇ duˬ, Ka li-euˬ gʼaˬ kʼehˇ bi geuꞈ-eu lehˇ, Ka li-ahˇ gʼoe-awˇ Miˬyehˇ ngaˬ-ahˇ aˬ kawˬ-aˬ biꞈ laꞈ-euˬ meh.

⁶ Kʼoeˇ-euˬ laꞈ kʼoeˇ, Yeˬsuˇ Ka li-ahˇ taꞈ-eu tsawˇ haˬ bi pyeuꞈ laˇ-eu lehˇ Miˬyehˇ neh kuˇ doˆ-euˬ naw maꞈ Loˇmaˆ meuˬ-ahˇ jawˇ-eu tsawˇ haˬ deuˬ kʼawꞈ ahˇ-eu meh.

⁷ Kʼoeˇ miˇ neh, Miˬyehˇ-euˬ tsawˇ haˬ bi pyeuꞈ laˇ-eu lehˇ kuˇ doˆ taˬ-euˬ, aˬ yawꞈ gaˬ-eu naw maꞈ Loˇmaˆ meuˬ-ahˇ kʼaˇ jawˇ-eu tsawˇ haˬ deuˬ-ahˇ, ngaˇ sahˬ boꞈ boꞈ ahˇ laꞈ-euˬ ma. Aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ Ka liˬeuˬ guiˬ lahˬ yaw dzahˇ hawˇ-eu nui saˇ oꞈ-eu jeˬ, naw maꞈ kʼoeˇ taˆ keuˆ le luꞈ-uˇ.

Miˬyehˇ-euˬ guiˬ lahˬ-ahˇ ja ceuˬ-awˇ guiˬ lahˬ shaˇ-eu

⁸ Yeˬsuˇ Ka li-ahˇ gʼoe-awˇ, naw maꞈ-euˬ gʼaˇ duˬ Miˬyehˇ-ahˇ guiˬ lahˬ huiˬ-eu dawˬ huˬ teˇ ngehˬ-eu ma. Aˬ jeˬ miˇ neh ehˇ naˇ, naw maꞈ jah-eu gaˇ kawˆ, miˇ kʼahˬ dawˬ tawˆ luꞈ gaˬ byah jiˇ-euˬmeh.

⁹ Ngaˇ ehˇ-eu dawˬ heu deuˬ tsaˬ-eu gaˇ kawˆ saˇ kiˇ-aˬ, Miˬyehˇ meh. Aˬ jeˬ miˇ neh ehˇ naˇ, ngaˇ nui ma keuˆ dui dui-awˇ aˬ yawꞈ-euˬ Zaˬmaˇ gaˇ kawˆ Laˬ kʼaˬ cehˇ-eu Guiˬ lahˬ dawˬ mehˬ-eu laꞈ kʼoeˇ aˬ yawꞈ-euˬ gaˇ mˇ luꞈ-eu ma. Ngaˇ naw maꞈ-ahˇ noeˬ keuˆ luꞈ meh lehˇ Miˬyehˇ siˬ nya meh.

¹⁰ Ngaˇ guiˬ lahˬ kʼaˇ shaˇ ngeh, naw maꞈ jawˇ gaˇ dawˬ deh gʼa keuˆ laˇ nya ni gʼawˬ shaˬ gaˬ-awˇ gaˇ ma bi dahˇ laˇ laꞈ lehˇ, Miˬyehˇ-ahˇ shaˇ-eu ma.

¹¹ Naw maꞈ-ahˇ ngaˇ mawˇ mawꞈ dui dui nya. Saꞈ laˇ paw-euˬ guiˬ lahˬ biꞈ taꞈ yuˇ taꞈ-eu laꞈ kʼoeˇ, naw maꞈ gʼaˬ ahˇ dzehˬ laˇ ni mˇ mawꞈ dui dui nya.

¹² Ngaˇ ehˇ mawꞈ-eu-aˬ, ngaˬ-euˬ jah-eu jeˬ baˬ da neh naw maꞈ gʼaˬ ahˇ dzehˬ laˇ-eu uˬ taꞈ, naw maꞈ-euˬ jah-eu jeˬ baˬ da neh ngaˇ gʼaˬ ahˇ dzehˬ laˇ-awˇ, nyiˬ paw luꞈ guiˬ lahˬ baw-eu jeˬ-ahˇ ehˇ mawꞈ-eu ma.

¹³ Aˬ yuiꞈ aˬ nyiˇ Ka li zaˬ deuˬ-oˇ, naw maꞈ jawˇ gaˇ laˇ-eu gʼaˇ duˬ ngaˇ gʼawˬ mya poˆ lehˬ hmˬ-euˬ gaˇ naw maꞈ noeˬ mawˇ-eu tsaˬ meh. Ehˇ kʼawꞈ, tiˬ poˆ tiˬ jeˬ gʼeu tehˬ-eu jaˆ-eu miˇ neh, maˬ laˇ doˆ nya nya. Nui gaˇ jawˇ-eu aˬ cawˬ tsawˇ jeuˬ deuˬ-ahˇ ngaˬ neh mehˬ-awˇ, jah-eu tsawˇ haˬ bi pyeuꞈ laˇ-euˬ loꞈ-ehˇ, naw maꞈ jawˇ gaˇ kʼawꞈ, jah-eu tsawˇ haˬ bi pyeuꞈ laˇ ni ngaˇ mehˬ laˇ mawꞈ miˇ-a.

¹⁴ Aˬ jeˬ miˇ neh ehˇ naˇ, meuˬ-ahˇ jawˇ-eu aˇ tiˆ goˇ-eu tsawˇ haˬ deuˬ-ahˇ maˬ ehˇ, pu-ahˇ jawˇ-eu teˬ dui dui-eu tsawˇ haˬ deuˬ-ahˇ maˬ ehˇ, zaˬ siˬ tsawˇ gahˇ maˬ ahˇ-eu tsawˇ haˬ deuˬ-ahˇ maˬ ehˇ, tsawˇ jeuˬ dawˬ tawˆ luꞈ-ahˇ dawˬ mehˬ mehˬ-eu gʼaˇ duˬ ngaˇ dziˇ dzoˆ naꞈ-eu ma.

¹⁵ Kʼoeˇ miˇ neh, naw maꞈ Loˇmaˆ meuˬ-ahˇ jawˇ-eu tsawˇ haˬ deuˬ-ahˇ kʼawꞈ, ngaˇ dawˬ mehˬ mehˬ mawꞈ dui dui-eu ma.

Laˬ kʼaˬ cehˇ-eu Guiˬ lahˬ dawˬ baoˬ ahˇ-eu

¹⁶ Laˬ kʼaˬ cehˇ-eu Guiˬ lahˬ dawˬ-ahˇ ngaˇ nui ma huiˬ dui dui luꞈ ma. Laˬ kʼaˬ cehˇ-eu Guiˬ lahˬ dawˬ-aˬ, jah-eu tsawˇ haˬ dawˬ tawˆ luꞈ-ahˇ ka kʼoꞈ nehˬ-eu Miˬyehˇ-euˬ baoˬ pyeuꞈ-eu meh. Yuˇdaˆ tsawˇ haˬ-ahˇ neh dahˬ beh-awˇ, Yuˇdaˆ tsawˇ haˬ maˬ ngeuˇ-eu deuˬ-ahˇ keuˆ ni ka kʼoꞈ-eu meh.

¹⁷ Tsawˇ haˬ zaˬ aˬ yawꞈ-ahˇ tsaˬ laˇ tsahˇ laˇ ni Miˬyehˇ aˬ joˆ-ehˇ jahˇ-eu gaˇ kawˆ, La kʼaˬ cehˇ-eu Guiˬ lahˬ dawˬ laꞈ kʼoeˇ pah mehˬ taˬ-euˬ meh. Miˬyehˇ neh kʼaˇ mˇ-euˬ jeˬ dawˬ tawˆ luꞈ, tsawˇ haˬ zaˬ jah-eu baˬ da neh tehꞈ-ehˇ keuˆ le nya-eu meh. “Jah-eu miˇ neh Miˬyehˇ-ahˇ tsaˬ lehˇ tsahˇ leˇ-eu tsawˇ haˬ-aˬ, saꞈ laˇ dehꞈ-eu jeˬ za tehꞈ-a” lehˇ, Jaˇliꞈ laꞈ kʼoeˇ ehˇ taˬ-euˬ meh.

Tsawˇ haˬ dawˬ tawˆ luꞈ iˬ baˇ zaˬ meh

¹⁸ Yaw tsaˬ yaw dawˇ jeˬ-ahˇ aˬ cawˬ maˬ mawˇ nya ni laˆ tsoeˬ-eu tsawˇ haˬ zaˬ-euˬ iˬ baˇ hawˇ-eu yaw haiˬ jeˬ mˇ gaˇ, Miˬyehˇ nui ma pehˇ-eu laꞈ kʼoeˇ tsawˇ haˬ zaˬ-ahˇ yaˇ kʼaˬ daˇ-eu gaˇ kawˆ, mˬ-ahˇ neh pah mehˬ leꞈ-euˬ meh.

¹⁹ Miˬyehˇ-euˬ gaˇ kawˆ aˬ yawꞈ maꞈ bya cehˆ ni siˬ duˬ mawˇ duˬ nya paˬ-ehˇ Miˬyehˇ neh pah mehˬ taˬ-euˬ kʼawꞈ, aˬ yawꞈ maꞈ kʼoeˇ loꞈ-ehˇ gʼeh-eu miˇ neh, aˬ yawꞈ yaˇ kʼaˬ daˇ-eu meh.

²⁰ Miˬyehˇ mˬ beh miˇ beh ngeh tiˬ nah neh, maˬ haw mawˇ nya-eu jeˬ pyeuꞈ-eu aˬ yawꞈ-euˬ laꞈ kʼoeˇ ahˇ-eu baoˬ hawˇ-eu, aˬ yawꞈ mˬ maˬ maˬ byaˆ zaˇ ziˇ Miˬyehˇ pyeuꞈ-eu gaˇ kawˆ, bya cehˆ ni siˬ duˬ mawˇ duˬ laˇ-euˬ meh. Aˬ yawꞈ neh mˇ taˬ-euˬ gaˇ-ahˇ haw-awˇ, kʼoeˇ loꞈ-ehˇ siˬ duˬ nya-eu meh. Kʼoeˇ miˇ neh, aˬ yawꞈ maꞈ maˬ pyehˇ dzeuˇ nya-a.

²¹ Aˬ yawꞈ maꞈ Miˬyehˇ-ahˇ siˬ nya-eu kʼawꞈ, taˬ huiˬ taˬ mahˇ nehˬ geuˇ-eu loꞈ-ehˇ maˬ taˬ huiˬ maˬ taˬ mahˇ-eu uˬ taꞈ, aˬ yawꞈ-euˬ guiˬ lahˬ-ahˇ maˬ siˬ nya-a. Aˬ yawꞈ maꞈ tiˬ jeˬ-iˬ maˬ noeˬ doˆ nya-ehˇ, nui ma kʼehˬ bahˬ zahˇ tsui ni jaˆ-eu meh.

²² Yaw gahˇ ma lehˇ yawˬ haˇ yawˬ ha ehˇ kʼawꞈ, aˬ dzawˬ aˇ gah-ahˇ duˇ-eu meh.

²³ Shiˇ-eu maˬ baw-eu Miˬyehˇ-ahˇ uˬ duˬ maˬ tahˬ ni, shiˇ nya-eu jeˬ-ahˇ duˇ leˇ ni tehˆ taˬ-euˬ mawˇ kawˇ pyeuꞈ-eu, tsawˇ haˬ mawˇ kawˇ, aˇ jiˇ mawˇ kawˇ, oeˬ kuiˇ oeˬ laꞈ tsoꞈ-eu jeˬ zaˬ mawˇ kawˇ, miˇ tsa joe joe-ehˇ cah-eu jeˬ-euˬ mawˇ kawˇ, heu deuˬ-ahˇ uˬ duˬ tahˬ-eu meh.

²⁴ Kʼoeˇ miˇ neh, Miˬyehˇ neh tsawˇ haˬ kʼoeˇ deuˬ-ahˇ aˬ yawꞈ maꞈ nui kʼahˇ jaˆ-eu jawꞈ dui dui-eu jeˬ laꞈ kʼoeˇ a dzeh nehˬ-awˇ, aˬ yawꞈ maꞈ tiˬ gʼaˬ tiˇ gʼaˬ shaꞈ dawˇ dui dui paˬ-ehˇ gʼeh-eu jeˬ mˇ taꞈ-eu meh.

²⁵ Miˬyehˇ-euˬ gaˇ kawˆ tsaˬ-eu dawˇ-eu jeˬ yuˇ-awˇ, maˬ tsaˬ maˬ dawˇ-eu jaˬ myawꞈ myawꞈ-eu jeˬ-ahˇ paˇ geuꞈ-euˬ meh. Beh-euˬ yaw sahˇ gʼaˬ pyeuꞈ-eu Miˬyehˇ-ahˇ uˬ duˬ maˬ tahˬ ni, aˬ yawꞈ neh beh taˬ-euˬ jeˬ-ahˇ uˬ duˬ tahˬ-eu meh. Beh-euˬ yaw sahˇ gʼaˬ-ahˇ mˬ maˬ maˬ byaˆ zaˇ ziˇ ja ceuˬ luꞈ-uˇ. Aˬ miˬ.

²⁶ Aˬ yawꞈ maꞈ kʼoeˇ loꞈ-ehˇ dehꞈ-eu baˬ da neh, shaꞈ dawˇ dui dui paˬ-ehˇ gʼeh-eu kʼaˬ miˬ sheu-eu jeˬ laꞈ kʼoeˇ, Miˬyehˇ neh aˬ yawꞈ maꞈ-ahˇ a dzeh nehˬ-euˬ meh. Zaˬ miˬ zaˬ deuˬ-ahˇ keuˆ ni, zaˬ miˬ zaˬ cawˬ cawˬ kʼaˬ miˬ sheu taꞈ gaˇ dehꞈ keuˆ-euˬ meh.

²⁷ Kʼoeˇ loꞈ-ehˇ duˇ ni, kʼaˬ dzeˇ zaˬ deuˬ kʼawꞈ, zaˬ miˬ zaˬ deuˬ-ahˇ nui kʼahˇ maˬ jaˆ-ehˇ, kʼaˬ dzeˇ zaˬ cawˬ cawˬ kʼaˬ miˬ sheu taꞈ mawꞈ-eu nui kʼahˇ-ahˇ maˬ gʼaˬ leˇ ni pyeuꞈ laˇ taˬ-euˬ meh. Kʼaˬ dzeˇ zaˬ cawˬ cawˬ shaꞈ dawˇ dui dui paˬ-ehˇ gʼeh-eu jeˬ jahˇ-eu laꞈ kʼoeˇ, aˬ yawꞈ maꞈ kʼoeˇ taˆ oꞈ-eu geuˇ-eu kʼehˬ-eu kʼaˆ-eu jeˬ keuˆ le ni yawˬ haˇ yawˬ ha mˇ-euˬ meh.

²⁸ Miˬyehˇ gaˇ kawˆ dawˇ coe ni siˬ nya taˬ paˬ-ehˇ gʼeh-eu jeˬ-ahˇ aˬ yawꞈ maꞈ maˬ shaˇ noeˬ-eu baˬ da neh, aˬ yawꞈ maꞈ maˬ mˇ kʼmˬ-eu jeˬ mˇ ni, bahˬ dui jawꞈ dui dui-eu jeˬ mˇ-eu nui ma jaˆ gaˇ, Miˬyehˇ neh aˬ yawꞈ maꞈ-ahˇ a dzeh nehˬ-euˬ meh.

²⁹ Aˬ yawꞈ maꞈ laꞈ kʼoeˇ maˬ muiˬ maˬ jaˬ-eu jeˬ, yaw haiˬ jeˬ, mehˇ juiˇ juiˇ-eu jeˬ, yaw doeˇ jahˇ-eu jeˬ, heu deuˬ tiˬ byah ni ahˇ-eu meh. Aˬ yawꞈ maꞈ laꞈ kʼoeˇ, myaˆ naˆ-eu, sehꞈ mawꞈ-eu, diˬ mawꞈ ceh mawꞈ-eu, mehˇ shuiˇ shuiˇ-eu, aˬ cawˬ-ahˇ noeˬ doeˇ-eu, heu deuˬ tiˬ byah ni ahˇ-eu meh. Aˬ cawˬ gaˇ kawˆ maˬ ngeuˇ-eu jeˬ ja kʼoeˬ-eu meh.

³⁰ Tiˬ gʼaˬ tiˇ gʼaˬ ja bu ja doeˇ-eu, Miˬyehˇ-ahˇ muiˇ-eu, aˬ cawˬ-ahˇ ngehˬ coeˬ ehˇ coeˬ-eu, yawˬ haˇ yawˬ ha taˬ huiˬ-eu, kʼahˬ sehˇ jehˆ-eu, yaw haiˬ jeˬ mˇ-eu gʼaˇ duˬ kʼaˆ kʼaˆ ni shaˇ noeˬ-eu, aˬ da aˬ ma ehˇ dawˬ maˬ naˇ haˬ-eu, heu deuˬ kʼawꞈ ahˇ-eu meh.

³¹ Noeˬ siˬ nya-eu nui ma maˬ ahˇ-a. Saˇ jaˇ maˬ ziꞈ-a. Kʼoeˇ uˬ taꞈ, aˬ cawˬ-ahˇ gʼawˬ shaˬ gaˬ-eu maˬ siˬ nya-a.

³² Kʼoeˇ loꞈ-ehˇ dehꞈ-eu tsawˇ haˬ deuˬ shiˇ-eu geuˇ meh lehˇ, Miˬyehˇ-euˬ zahˇ dawˬ kʼoꞈ dawˬ laꞈ kʼoeˇ ehˇ tsehˆ taˬ-euˬ aˬ yawꞈ maꞈ siˬ nya meh. Ehˇ kʼawꞈ, aˬ yawꞈ maꞈ kʼoeˇ loꞈ-ehˇ mˇ-eu maˬ byehˇ-eu uˬ taꞈ, kʼoeˇ loꞈ-ehˇ mˇ caw-eu tsawˇ haˬ deuˬ-ahˇ nui ma tsaˬ-eu meh.