Jaceuq 98 - Akha

Miˇ tsaˬ-ahˇ uˆ lahˇ-eu Miˬyehˇ

¹ Caˇ dawˬ yaw shuiꞈ caˇ-awˇ Sahˬpaˬ Miˬyehˇ-ahˇ ja ceuˬ-awˬ. Kʼaˆ jeˬ-ehˇ gʼeh-eu gaˇ aˬ yawꞈ mˇ-euˬ meh. Aˬ yawꞈ-euˬ baoˬ hawˇ-eu muiˬ-eu shawˇ-eu gʼaˬ baˬ da neh, aˬ yawꞈ gʼaˬ leˇ-eu gʼaˬ pyeuꞈ-eu meh.

² Aˬ yawꞈ gʼaˬ leˇ-eu gʼaˬ pyeuꞈ-eu gaˇ kawˆ Sahˬpaˬ Miˬyehˇ pah mehˬ-eu meh. Aˬ yawꞈ-euˬ ka kʼoꞈ-eu baoˬ tsawˇ jeuˬ dawˬ tawˆ luꞈ-ahˇ bi siˬ-eu meh.

³ Iˇsaˬleˬlaˆ tsawˇ jeuˬ-ahˇ saˇ jaˇ ziꞈ-awˇ maˬ tsehˆ leˇ ni gaˬ-eu laꞈ kʼoeˇ, aˬ yawꞈ maꞈ nehˬ-ehˇ dzaˬ taˬ-eu saˇ jaˇ-ahˇ ziꞈ-eu meh. Aˬ dui-euˬ Miˬyehˇ gʼaˬ leˇ-eu gʼaˬ pyeuꞈ-eu gaˇ kawˆ, miˇ tsaˬ zaˬ dawˬ tawˆ luꞈ ya mawˇ-euˬ meh.

⁴ Miˇ tsaˬ zaˬ dawˬ tawˆ luꞈ laˬ kʼaˬ tiˬ cehˇ, Sahˬpaˬ Miˬyehˇ-ahˇ ja ceuˬ-awˇ caˇ-awˬ. Laˬ kʼaˬ cehˇ-eu caˇ dawˬ caˇ-awˇ guˇ-eu laꞈ kʼoeˇ, aˬ yawꞈ-ahˇ ja ceuˬ-awˬ.

⁵ Sahˬpaˬ Miˬyehˇ-ahˇ caˇ-awˇ ja ceuˬ-awˬ. Deuˇ-mˬ diˬ-awˇ ja ceuˬ-awˬ.

⁶ Daˇ heh hawˇ-eu coiˇ doi baw-eu laꞈ kʼoeˇ, aˬ dui-euˬ sahˬ paˬ pyeuꞈ-eu Sahˬpaˬ Miˬyehˇ-ahˇ, laˬ kʼaˬ tiˬ cehˇ guˇ-awˇ ja ceuˬ-awˬ.

⁷ Iˬ ma laˆ shaˆ hawˇ-eu kʼoeˇ gaˇ kʼaˇ uˇ-eu jeˬ dawˬ tawˆ luꞈ, teˇ saˇ mahˇ doˆ laˇ-awˬ. Miˇ tsaˬ tahˬ kʼawˇ hawˇ-eu kʼoeˇ gaˇ kʼaˇ jawˇ-eu deuˬ dawˬ tawˆ luꞈ, ja ceuˬ-eu caˇ dawˬ caˇ-awˬ.

⁸ Iˇ cuꞈ lawˇ baˬ deuˬ laꞈ kʼawˆ tehˆ-awˬ. Gawˬ jawˬ deuˬ laˬ kʼaˬ tiˬ cehˇ uiˬ laˇ-awˇ, Sahˬpaˬ Miˬyehˇ mehˬ shi caˇ dawˬ caˇ-awˬ.

⁹ Aˬ jeˬ miˇ neh ehˇ naˇ, miˇ tsaˬ-ahˇ aˬ yawꞈ uˆ lahˇ le-euˬ meh. Miˇ tsaˬ zaˬ deuˬ-ahˇ dawˇ coe ni aˬ yawꞈ uˆ lahˇ tehꞈ-a.