Jaceuq 95 - Akha

Ja ceuˬ-eu caˇ dawˬ

¹ Laˇ-awˬ. Sahˬpaˬ Miˬyehˇ-ahˇ aˬ dui ja ceuˬ ma. Aˬ dui-ahˇ haw piˇ nehˬ laꞈ-euˬ Miˬyehˇ-ahˇ laˬ kʼaˬ tiˬ cehˇ caˇ-awˇ ja ceuˬ kaˇ-euˇ.

² Guiˬ lahˬ-ahˇ noeˬ keuˆ-eu laꞈ kʼoeˇ aˬ yawꞈ-euˬ mehˬ shi uiˬ leˇ-awˇ, laˬ kʼaˬ tiˬ cehˇ ja ceuˬ-eu caˇ dawˬ caˇ kaˇ-euˇ.

³ Aˬ jeˬ miˇ neh ehˇ naˇ, Sahˬpaˬ Miˬyehˇ-aˬ, Baoˬ huiˬ-eu Miˬyehˇ pyeuꞈ-awˇ, Miˬyehˇ dawˬ tawˆ kʼoeˇ taˆ baoˬ huiˬ-eu sahˬ paˬ meh.

⁴ Naꞈ dui dui-eu lawˇ kʼmˬ-ahˇ neh goˇ dui dui-eu gawˬ jawˬ-ahˇ keuˆ ni, miˇ tsaˬ dawˬ tawˆ luꞈ-ahˇ aˬ yawꞈ uˆ lahˇ-eu meh.

⁵ Aˬ yawꞈ neh beh-euˬ iˬ ma laˆ shaˆ-ahˇ aˬ yawꞈ uˆ lahˇ-eu meh. Miˇ tsaˬ tahˬ kʼawˇ-ahˇ kʼawꞈ aˬ yawꞈ tehˆ taˬ-euˬ meh.

⁶ Laˇ-awˬ. Aˬ dui dawˬ tawˆ luꞈ awˆ byaˆ-awˇ, aˬ yawꞈ-ahˇ uˬ duˬ tahˬ kaˇ-euˇ. Aˬ dui-ahˇ beh-euˬ yaw sahˇ Sahˬpaˬ Miˬyehˇ mehˬ shi, pawˬ tsuiꞈ pawˬ dmˬ dmˬ kaˇ-euˇ.

⁷ Aˬ yawꞈ-aˬ, aˬ dui-euˬ Miˬyehˇ meh. Aˬ dui-aˬ, aˬ yawꞈ haw piˇ luꞈ-eu tsawˇ haˬ deuˬ pyeuꞈ-awˇ, aˬ yawꞈ bi dzaˬ bi dawˇ luꞈ-eu yawˇ yawˇ maꞈ ma. Iˬ nah aˬ yawꞈ ehˇ gaˇ naˇ haˬ sheˇ.

⁸ “Maˬ sah kʼaˇ shuiꞈ deh yaˇ-ahˇ jaˆ-eu Meˬliˇbaˬ lawˇ gawˆ-ahˇ, naw maꞈ-euˬ aˬ poeˬ aˬ bawˇ deuˬ nui ma gʼahˇ-euˬ loꞈ-ehˇ, naw maꞈ nui ma taˬ gʼahˇ. Kʼoeˇ ngeh nah aˬ yawꞈ maꞈ gʼeh-euˬ loꞈ-ehˇ, naw maꞈ taˬ gʼeh.

⁹ Aˬ yawꞈ maꞈ gʼaˇ duˬ ngaˬ neh mˇ nehˬ shaˇ nehˬ dzeuˇ-euˬ jeˬ-ahˇ aˬ yawꞈ maꞈ ya mawˇ gʼaˬ-euˬ kʼawꞈ, kʼoeˇ tsahˇ-ahˇ aˬ yawꞈ maꞈ ngaˬ-ahˇ lawˬ haw-euˬ meh.

¹⁰ Oeˬ tseˇ kʼoꞈ byah ni kʼoeˇ ziˇ-euˬ tsawˇ haˬ kʼoeˇ deuˬ-ahˇ, ngaˇ nui daˆ daˆ-euˬ ma. Aˬ yawꞈ maꞈ aˇ naˆ ni saˇ jaˇ maˬ ziꞈ-eu tsawˇ haˬ nga. Ngaˬ-euˬ zahˇ dawˬ kʼoꞈ dawˬ-ahˇ aˬ yawꞈ maꞈ maˬ naˇ haˬ geuꞈ-a lehˇ ngaˇ ehˇ-euˬ ma.

¹¹ Ngaˇ nui ma pehˇ-awˇ heu loꞈ-ehˇ ehˇ tsehˆ nehˬ-euˬ ma. Naw maꞈ gʼaˬ naˬ bi naˬ-eu lehˇ, ngaˬ neh lehˬ hmˬ taˬ-euˬ miˇ kʼahˬ-ahˇ, naw maꞈ maˬ ya uˇ leˇ-aˇ’ lehˇ ehˇ tsehˆ nehˬ-euˬ ma.”