Jaceuq 94 - Akha

Dawˬ tawˆ kʼoeˇ taˆ yaˇ kʼaˬ daˇ-eu Miˬyehˇ

¹ Sahˬpaˬ Miˬyehˇ-oˇ, nawˇ-aˬ, kʼehˬ nehˬ kʼaˆ nehˬ-eu Miˬyehˇ meh. Nawˇ nui ma pehˇ-eu jeˬ bi mawˇ-awˬ.

² Nawˇ-aˬ, tsawˇ haˬ dawˬ tawˆ luꞈ kʼoeˇ taˆ yaˇ kʼaˬ daˇ-eu gʼaˬ meh. Tuˇ laˇ-awˇ, nui ma huiˬ-eu mahˇ-eu tsawˇ haˬ deuˬ-ahˇ oꞈ-eu geuˇ-eu loꞈ-ehˇ kʼehˬ nehˬ-awˬ.

³ Nui ma maˬ dawˇ-eu tsawˇ haˬ deuˬ aˬ myah keuˆ ni laˬ kʼaˬ cehˇ cehˇ-ehˇ ya dehꞈ nmˇ. Sahˬpaˬ Miˬyehˇ-oˇ, aˬ yawꞈ maꞈ aˬ myah keuˆ ni laˬ kʼaˬ cehˇ cehˇ-ehˇ ya dehꞈ nmˇ.

⁴ Yaw haiˬ jeˬ mˇ-eu tsawˇ haˬ deuˬ aˇ myah keuˆ ni nui ma huiˬ-awˇ ya dehꞈ nmˇ. Aˇ myah keuˆ ni aˬ yawꞈ maꞈ neh mˇ-euˬ haiˬ-eu gaˇ-ahˇ, kʼahˬ sehˇ jehˆ jehˆ-ehˇ ya jawˇ nmˇ.

⁵ Sahˬpaˬ Miˬyehˇ-oˇ, nawˬ-euˬ tsawˇ haˬ deuˬ-ahˇ aˬ yawꞈ maꞈ nawˬ tehˬ-awˇ, nawˬ-ahˇ taꞈ-eu tsawˇ haˬ deuˬ kʼoeˇ taˆ kʼaˆ dzaˬ-eu meh.

⁶ Miˬ coeˬ miˬ ma hawˇ-eu muˇ coe aˬ nmˇ deuˬ-ahˇ aˬ yawꞈ maꞈ sehꞈ-awˇ, nga maꞈ miˇ kʼahˬ laꞈ kʼoeˇ jawˇ-eu boeˇ miˬ siˬ kʼaˬ deuˬ-ahˇ sehꞈ-eu meh.

⁷ Sahˬpaˬ Miˬyehˇ nga maꞈ-ahˇ maˬ mawˇ nya-a. Nga maꞈ mˇ-eu gaˇ-ahˇ Iˇsaˬleˬlaˆ-euˬ Miˬyehˇ maˬ ya siˬ-a lehˇ aˬ yawꞈ maꞈ ehˇ-eu meh.

⁸ Ngaˬ-euˬ tsawˇ haˬ deuˬ-oˇ, naw maꞈ aˇ naˆ naˆ-ehˇ laꞈ-i te. Aˬ myah siˬ laˇ gahˇ laˇ-eu gʼeh te.

⁹ Aˬ dui-ahˇ naˬ bawˇ beh tsoꞈ nehˬ laꞈ-euˬ Miˬyehˇ maˬ gaˬ nya taˬ loˇ. Aˬ dui-ahˇ myaˆ nuiˆ beh dahˇ nehˬ laꞈ-euˬ gʼaˬ maˬ mawˇ nya ta loˇ.

¹⁰ Tsawˇ jeuˬ dawˬ tawˆ luꞈ-ahˇ haw luꞈ pyaˆ luꞈ-eu gʼaˬ aˬ yawꞈ maꞈ-ahˇ maˬ kʼehˬ maˬ kʼaˆ nehˬ nya ta loˇ. Tsawˇ haˬ dawˬ tawˆ luꞈ-ahˇ mehˬ luꞈ tsoˆ luꞈ-eu gʼaˬ tsawˇ gahˇ maˬ ahˇ nmˇ loˇ.

¹¹ Aˬ yawꞈ maꞈ-euˬ nui noeˬ Sahˬpaˬ Miˬyehˇ siˬ nya meh. Aˬ yawꞈ maꞈ shaˇ noeˬ shaˇ sawˇ-eu jeˬ gaˇ dahˇ maˬ tsoeˬ-eu aˬ yawꞈ siˬ nya luꞈ meh.

¹² Sahˬpaˬ Miˬyehˇ-oˇ, nawˬ neh mehˬ nehˬ tsoˆ nehˬ-euˬ gʼaˬ aˇ naˆ ni laˬ kʼaˬ ya cehˇ-eu nga. Nawˬ neh nawˬ-euˬ zahˇ dawˬ kʼoꞈ dawˬ mehˬ nehˬ-euˬ gʼaˬ aˇ naˆ ni guiˬ lahˬ huiˬ-eu nga.

¹³ Maˬ tsaˬ maˬ dawˇ-eu tsawˇ haˬ deuˬ bi ga ahˇ-eu gʼaˇ duˬ duˬ kʼahˬ maˬ kʼahˬ gʼaˬ kʼoeˇ keuˆ ni, guˆ-eu gaˆ-eu aˇ yamˬ laꞈ kʼoeˇ aˬ yawꞈ-ahˇ nawˇ nui saˇ bi za-euˬ meh.

¹⁴ Sahˬpaˬ Miˬyehˇ-aˬ, aˬ yawꞈ-euˬ tsawˇ haˬ deuˬ-ahˇ maˬ ngehˇ-a. Aˬ yawꞈ-ahˇ taꞈ-eu tsawˇ haˬ deuˬ-ahˇ aˬ yawꞈ maˬ byehˇ dzeh-a.

¹⁵ Yaˇ kʼaˬ daˇ-eu nymˇ laꞈ kʼoeˇ yaw tsaˬ yaw dawˇ jeˬ paˇ jaˆ le-awˇ, yaw tsaˬ yaw dawˇ tsawˇ haˬ dawˬ tawˆ luꞈ nui kʼahˇ shiˇ tehꞈ-a.

¹⁶ Maˬ tsaˬ maˬ dawˇ-eu tsawˇ haˬ deuˬ mehˬ shi, ngaˬ-euˬ gʼaˇ duˬ aˬ suˇ gʼaˬ yawꞈ daˬ nmˇ. Yaw haiˬ jeˬ mˇ-eu tsawˇ haˬ deuˬ mehˬ shi, ngaˇ jawˇ paw aˬ suˇ gʼaˬ pyawˬ nmˇ.

¹⁷ Sahˬpaˬ Miˬyehˇ ngaˬ-ahˇ maˬ caw ba laꞈ-euˬ law nmˇ-aˬ, ciˬ cuˇ ni gʼeh-eu miˇ kʼahˬ-ahˇ ngaˇ cehˆ jawˇ-iˇ gʼaˬ-euˬ ma.

¹⁸ Ngaˇ coˬ-iˇ miˇ-a lehˇ ehˇ-euˬ kʼawꞈ, Sahˬpaˬ Miˬyehˇ nawˬ-euˬ maˬ tsehˆ leˇ-eu gʼoeˇ-eu gaˬ-eu jeˬ, ngaˬ-ahˇ ciˬ tuˇ nehˬ laꞈ-euˬ meh.

¹⁹ Ngaˇ noeˬ shaˬ noeˬ zahˬ-awˇ noeˬ dui noeˬ duiˇ ngeh, nawˇ ngaˬ-ahˇ nui saˇ bi za-awˇ laˬ kʼaˬ bi cehˇ laꞈ-euˬ meh.

²⁰ Maˬ tsaˬ maˬ dawˇ-eu laꞈ kʼoeˇ yaˇ kʼaˬ daˇ-eu deuˬ nehˬ-ehˇ nawˇ nui ma maˬ gm-a. Aˬ yawꞈ maꞈ yaw lehˬ deuˬ-ahˇ tsaˬ-eu shaˬ bymˇ bi tawˆ-awˇ,

²¹ muiˬ-eu jaˬ-eu deuˬ-ahˇ mˇ coeˬ mˇ ciˆ-eu laꞈ kʼoeˇ, iˬ baˇ maˬ ahˇ-eu deuˬ bi shiˇ-eu gʼaˇ duˬ yaˇ kʼaˬ daˇ-eu meh.

²² Ehˇ kʼawꞈ Sahˬpaˬ Miˬyehˇ ngaˬ-ahˇ haw piˇ-eu meh. Miˬyehˇ ngaˬ-ahˇ ngehˬ gʼeh dah teˬ-euˬ meh.

²³ Maˬ sui maˬ dawˇ-eu baˬ da neh aˬ yawꞈ maꞈ-ahˇ aˬ yawꞈ kʼehˬ nehˬ-awˇ, aˬ yawꞈ maꞈ-euˬ iˬ baˇ baˬ da neh laˆ luˬ laˆ seˇ nehˬ tehꞈ-a. Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ, aˬ yawꞈ maꞈ-ahˇ laˆ cawˆ tehꞈ-a.