Jaceuq 9 - Akha

Dawˇ coe ni yaˇ kʼaˬ daˇ-eu Miˬyehˇ-ahˇ ja ceuˬ-eu

(Daˬbiˇ-euˬ caˇdawˬ)

¹ Sahˬpaˬ Miˬyehˇ-oˇ, ngaˬ-euˬnui ma gʼawˇmawˇdawˬtawˆ, nawˬ-ahˇja ceuˬdui dui-eu ma. Nawˬneh mˇdoˆtaˬ-euˬgaˇdeuˬ, zahˬdui dui leˇpaˬ-ehˇgʼeh-eu, maˬja gaˬ-ehˇ maˬjawˇcoeˇnya.

² Nawˇbaˬda neh ngaˬ-euˬkʼaˬmeh, laˬkʼaˬcehˇ-eu caˇdawˬcaˇma. Baoˬhuiˬdui dui-eu Miˬyehˇ-oˇ, nawˬ-ahˇcaˇ-awˇ ja ceuˬ-eu ma.

³ Ngaˬ-ahˇmuiˇ-eu tsawˇhaˬkʼoeˇdeuˬ, nawˬ-ahˇmawˇngeh zeuˆpyawˇkʼoꞈ-awˇ, naˇkʼah paw coˬsehꞈdzeh-eu meh.

⁴ Nawˇ dawˇ coe ni yaˇ kʼaˬ daˇ-awˇ, ngaˇtsaˬ-eu bi duˬlaˇ-euˬ meh.

⁵ Miˇkʼahˬtsawˇjeuˬ-ahˇnawˇmuiˇ-awˇ, yaw haiˬdeuˬ-ahˇ laˆcawˆ-euˬ meh. Yawꞈmaꞈtsawˇmyahˇmiˇtsaˬ kʼoeˇtaˆ, byoˆtsehˆ-iˇni jahˇ nehˬ-euˬ meh.

⁶ Muiˇ-eu deuˬ-ahˇ mˬmaˬmaˬbyaˆ, nawˇlaˆluˬlaˆseˇnehˬ-euˬmeh. meuˬdeuˬ-ahˇ ciˇtahˬgʼawˇlehˆ-awˇ, laˆ luˬ laˆ seˇ nehˬ-eu laꞈ kʼoeˇ, yawꞈmaꞈdehꞈdzeuˇyaꞈ-euˬgaˇkawˆ, miˇtsaˬzaˬdeuˬ ngehˇtsehˆ-euˬmeh.

⁷ Ehˇkʼawꞈni, SahˬpaˬMiˬyehˇ-aˬ, mˬmaˬmaˬbyaˆ sahˬpaˬpyeuꞈ-awˇ, yaˇkʼaˬdaˇ-eu dzoeˬdzaˬnuiˇmahˬ, ciˬtsoꞈ-awˇlehˬhmˬtaˬ-euˬmeh.

⁸ Miˇtsaˬheu dawˬtawˆluꞈkʼoeˇtaˆ, Yaw tsaˬyaw dawˇneh uˆ lahˇ-awˇ, miˇtsaˬzaˬdawˬtawˆluꞈkʼoeˇtaˆ, dawˇcoe ni yaˇkʼaˬdaˇ-eu meh.

⁹ Bi kʼehˬbi kʼaˆ-euˬdeuˬgʼaˇduˬ, SahˬpaˬMiˬyehˇgʼoe duˬpyeuꞈ-awˇ, shaˬ-eu zahˬ-eu jeˬ keuˆ le ngeh, nui saˇbi oꞈ-eu lo guˇ meh.

¹⁰ Nawˬ-ahˇsiˬnya-eu tsawˇhaˬdeuˬ, SahˬpaˬMiˬyehˇ nawˬ-ahˇgʼoe-awˇ, nawˬ-ahˇtahˬshaˇ-eu tsawˇhaˬ-ahˇ, nawˇbyehˇdzeh nehˬ-eu maˬbaw-a.

¹¹ Ziˇoˬmeuˬ-ahˇ uˆlahˇ luꞈ-eu, SahˬpaˬMiˬyehˇ-ahˇja ceuˬ-awˬ. Aˬyawˬneh mˇ-euˬ gaˇkawˆdeuˬ, tsawˇjeuˬdawˬtawˆ-ahˇdzawˇnehˬ-awˬ.

¹² Bi kʼehˬbi kʼaˆ-euˬtsawˇhaˬ-ahˇ, Miˬyehˇtiˬjawˇ-iˬ maˬngehˇ-a, yawꞈmaꞈngoeˇ-eu teˇsaˇgaˬ-awˇ, haiˬ-eu deuˬ-ahˇkʼehˬnehˬ-eu meh.

¹³ Sahˬpaˬ Miˬyehˇ-oˇ, ngaˬ-ahˇgʼawˬshaˬgaˬnehˬlaꞈ-awˬ. Muiˇ-eu deuˬkʼehˬlaꞈgaˇmawˇ-awˬ. Shiˇ-eu miˇkʼahˬlaˇgʼoˆ-ahˇneh, ngaˬ-ahˇciˬkʼoꞈdoˆnehˬlaꞈ-awˬ.

¹⁴ Yeˬluˇsaˬlehˬmehˬshi yawꞈ-awˇ, gaˇkawˆheu dzawˇmehˬ-eu laꞈkʼoeˇ, nawˬ-ahˇbi ja ceuˬnehˬlaꞈ-awˬ. Nawˇka kʼoꞈnehˬlaꞈ-euˬ miˇ neh, ngaˇlaˬkʼaˬcehˇ nui kʼahˇshiˇma.

¹⁵ Aˬcawˬmiˇkʼahˬtsawˇjeuˬdeuˬ-aˬ, yawˬha neh kʼahˬ-euˬduˬkʼahˬ-ahˇ, yawˬhaˇyawˬha ga ahˇbyoˆ-awˇ, yawˬha neh kʼmˇ-euˬbaw gʼaꞈ-ahˇ, yawˬhaˇyawˬha nawˬpaꞈ-euˬmeh. 1

¹⁶ SahˬpaˬMiˬyehˇ yaˇkʼaˬdaˇ-awˇ, yawˬhaˇyawˬha pah mehˬ-euˬmeh. yaw haiˬdeuˬlahˇju kʼmˇtaˬ-awˇ, yawˬhaˇyawˬha teuˆpaꞈ-eu meh.

¹⁷ Miˬyehˇ-ahˇbyehˇdzeh-euˬtsawˇjeuˬ, haiˬ-eu tsawˇhaˬkʼoeˇdeuˬdawˬtawˆ, shiˇ-eu miˇkʼahˬ-ahˇkeuˆtehꞈ-a.

¹⁸ Mehꞈ-eu shuꞈ-eu tsawˇhaˬdeuˬ-ahˇ, SahˬpaˬMiˬyehˇ maˬbyehˇdzeh-ehˇ, shaˬ-eu zahˬ-eu tsawˇhaˬdeuˬ-ahˇ, ya cawˆ-iˇgaˇ maˬbi keuˆ-a.

¹⁹ Sahˬpaˬ Miˬyehˇ-oˇ, oe-awˬ. nawˬ-ahˇyehˬbawˬ-ehˇ ehˇ-eu jeˬ, tsawˇhaˬzaˬneh taˬbi mˇlaw. miˇtsaˬtsawˇjeuˬdawˬtawˆluꞈ-ahˇ, nawˬ-euˬmehˬshi yaˇkʼaˬdaˇ-awˬ.

²⁰ Sahˬpaˬ Miˬyehˇ-oˇ, aˬyaw maꞈ-ahˇ bi guˆ-iˇ-awˬ. miˇtsaˬtsawˇjeuˬdawˬtawˆluꞈ-ahˇ, miˇtsaˬzaˬ baoˬmaˬahˇnya lehˇ, yawˬhaˇyawˬha bi siˬleˇ-awˬ.