Jaceuq 87 - Akha

Yeˬluˇsaˬlehˬ meuˬ-ahˇ ja ceuˬ-eu caˇ dawˬ

(Kawˇlaˆ-euˬ aˬ li deuˬ-euˬ caˇ dawˬ)

¹ Sahˬpaˬ Miˬyehˇ aˬ yawꞈ-euˬ meuˬ-ahˇ, muiˬ-eu shawˇ-eu gawˬ jawˬ kʼoeˇ taˆ teˬ-euˬ meh.

² Iˇsaˬleˬlaˆ miˇ kʼahˬ-ahˇ jaˆ-eu meuˬ deuˬ laꞈ kʼoeˇ, Yeˬluˇsaˬlehˬ meuˬ-ahˇ aˬ yawꞈ gaˬ dzehˬ-eu meh.

³ Miˬyehˇ-euˬ meuˬ-oˇ, naˇ haˬ sheˇ. Miˬyehˇ nawˬ-ahˇ ciˬ huiˬ ciˬ mahˇ gaˇ naˇ haˬ sheˇ.

⁴ “Ngaˬ-euˬ ehˇ dawˬ naˇ haˬ-euˬ miˇ kʼahˬ deuˬ-euˬ tsawˇ myahˇ ngaˇ yuˇ ngeh, Iˇjiˇtuˆ miˇ kʼahˬ hawˇ-eu Baˬbuˇloˬ miˇ kʼahˬ ngaˇ boꞈ ahˇ ma. Piˇliˇtiˆ, Duˇlu, Suˬdaˬ miˇ kʼahˬ heu deuˬ-ahˇ jawˇ-eu tsawˇ haˬ deuˬ-ahˇ, Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ nehˬ-ehˇ tsawˇ myahˇ dawˆ nehˬ ma.”

⁵ Ziˇoˬ meuˬ-ahˇ taꞈ leˇ-awˇ heu loꞈ-ehˇ ehˇ tehꞈ-a. Tsawˇ jeuˬ dawˬ tawˆ luꞈ Ziˇoˬ-euˬ pyeuꞈ-awˇ, meuˬ kʼoeˇ meuˬ gʼaˬ kʼaˆ laˇ ni Baoˬ huiˬ-eu gʼaˬ jahˇ tehꞈ-a.

⁶ Sahˬpaˬ Miˬyehˇ tsawˇ myahˇ yuˇ ngeh, aˬ yawꞈ tsawˇ jeuˬ dawˬ tawˆ luꞈ-ahˇ Yeˬluˇsaˬlehˬ meuˬ zaˬ deuˬ lehˇ boꞈ tehꞈ-a.

⁷ “Guiˬ lahˬ yaw dzahˇ dawˬ tawˆ luꞈ, Ziˇoˬ meuˬ-ahˇ neh oe-euˬ meh” lehˇ, aˬ yawꞈ maꞈ gaˇ nyeh nyeh-awˇ caˇ tehꞈ-a.