Jaceuq 85 - Akha

Tsawˇ jeuˬ-ahˇ ngehˬ gʼeh nehˬ laꞈ lehˇ shaˇ-eu guiˬ lahˬ shaˇ dawˬ

(Kawˇlaˆ-euˬ aˬ li deuˬ-euˬ caˇ dawˬ)

¹ Sahˬpaˬ Miˬyehˇ-oˇ, nawˬ-euˬ miˇ kʼahˬ-ahˇ nawˇ gʼawˬ shaˬ gaˬ-euˬ meh. Iˇsaˬleˬlaˆ miˇ kʼahˬ paˇ baw paˇ za le ni, nawˇ ngehˬ gʼeh-euˬ meh.

² Nawˬ-euˬ tsawˇ jeuˬ-ahˇ nawˇ iˬ baˇ pyehˬ nehˬ-awˇ, aˬ yawꞈ maꞈ neh mˇ lehˬ-euˬ jeˬ-ahˇ nawˇ taˬ nehˬ-euˬ meh.

³ Aˬ yawꞈ maꞈ-ahˇ nawˇ nui ma maˬ paˇ pehˇ-ehˇ, nawˬ-euˬ nui ma-ahˇ nawˇ nyehꞈ tehˬ taˬ-euˬ meh.

⁴ Nga maꞈ-ahˇ ka kʼoꞈ-eu gʼaˬ pyeuꞈ-eu Miˬyehˇ-oˇ, nga maꞈ-ahˇ sheuˬ kʼoꞈ le nehˬ laꞈ. Nga maꞈ kʼoeˇ taˆ nawˇ nui ma maˬ saˇ-eu jeˬ bi byoˆ-iˇ nehˬ laꞈ.

⁵ Nawˇ nga maꞈ-ahˇ aˬ myah luꞈ nui ma pehˇ-eu gʼeh te loˇ. Nawˬ-euˬ nui pehˇ maˬ paˇ shuꞈ-iˇ nya meh loˇ.

⁶ Nga maꞈ-ahˇ gʼaˬ yaw shuiꞈ biꞈ nehˬ laꞈ. Nawˬ-euˬ tsawˇ haˬ pyeuꞈ-eu nga maꞈ nawˬ-ahˇ ja ceuˬ ma.

⁷ Sahˬpaˬ Miˬyehˇ-oˇ, maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ mehˬ nehˬ laꞈ-awˇ, nawˬ-euˬ ka kʼoꞈ-eu jeˬ bi keuˆ le nehˬ laꞈ.

⁸ Sahˬpaˬ Miˬyehˇ pyeuꞈ-eu Miˬyehˇ dawˬ ngehˬ gaˇ ngaˇ naˇ haˬ luꞈ-eu ma. Nui ma laꞈ kʼoeˇ keuˆ ni noeˬ poˆ noeˬ paˇ-euˬ aˬ yawꞈ-euˬ tsawˇ haˬ pyeuꞈ-eu nga maꞈ-ahˇ, nui saˇ bi za-eu dawˬ ngehˬ nehˬ laꞈ tehꞈ-a.

⁹ Aˬ yawꞈ-ahˇ taˬ huiˬ taˬ mahˇ-eu tsawˇ haˬ deuˬ-ahˇ aˬ diˇ aˬ maˇ ka kʼoꞈ nehˬ-awˇ, ka kʼoꞈ-eu guiˬ lahˬ yaw dzahˇ aˬ dui-euˬ miˇ kʼahˬ heu kʼoeˇ taˆ jaˆ tehꞈ-a.

¹⁰ Gʼoeˇ-eu gaˬ-eu jeˬ hawˇ-eu saˇ jaˇ ziꞈ-eu jeˬ tahˬ dzoeˇ tehꞈ-a. Yaw tsaˬ yaw dawˇ jeˬ hawˇ-eu nui saˇ oꞈ-eu jeˬ tiˬ gaˇ jaˆ le tehꞈ-a.

¹¹ Tsawˇ haˬ zaˬ-euˬ saˇ jaˇ ziꞈ-eu jeˬ mˬ kʼoeˇ taˆ le keuˆ-awˇ, Miˬyehˇ-euˬ yaw tsaˬ yaw dawˇ jeˬ miˇ tsaˬ kʼoeˇ taˆ haw ka leꞈ tehꞈ-a.

¹² Muiˬ-eu guiˬ lahˬ yaw dzahˇ deuˬ Sahˬpaˬ Miˬyehˇ biꞈ leꞈ-awˇ, aˬ dui-euˬ miˇ kʼahˬ baw le za le tehꞈ-a.

¹³ Yaw tsaˬ yaw dawˇ jeˬ Sahˬpaˬ Miˬyehˇ-euˬ mehˬ hu oe-awˇ, aˬ yawꞈ oe-eu gaˇ ma laˆ saˆ nehˬ le tehꞈ-a.