Jaceuq 84 - Akha

Miˬ yehˇ-euˬ nymˇ-ahˇ noeˬ mawˇ-eu

(Kawˇlaˆ-euˬ aˬ li deuˬ-euˬ caˇ dawˬ)

¹ Baoˬ huiˬ-eu Miˬyehˇ-oˇ, nawˬ-euˬ Uˬ duˬ tahˬ nymˇ nymˇ ma-ahˇ ngaˇ noeˬ mawˇ dui dui-eu ma. Kʼoeˇ gaˇ ngaˇ le keuˆ mawꞈ-eu ma.

² Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ, ngaˇ jawˇ leˇ mawꞈ dui dui miˇ-a. Ngaˬ-euˬ nui ma gʼawˇ mawˇ dawˬ tawˆ luꞈ dehꞈ luꞈ-eu Miˬyehˇ-ahˇ laˬ kʼaˬ tiˬ cehˇ caˇ-awˇ ja ceuˬ-eu ma.

³ Jaˇ tseuˆ yawˬ ha jawˇ duˬ baw-awˇ, jawꞈ jiˇ jawꞈ gʼaꞈ bahˬ baw-eu meh. Ngaˬ-euˬ sahˬ paˬ, ngaˬ-euˬ Miˬyehˇ, Baoˬ huiˬ-eu Sahˬpaˬ Miˬyehˇ-oˇ, nawˬ-euˬ lawˇ duˬ dawˬ peh aˬ yawꞈ maꞈ zaˬ ceuꞈ taˬ-euˬ meh.

⁴ Nawˬ-euˬ Uˬ duˬ tahˬ nymˇ nymˇ ma laꞈ kʼoeˇ ya jawˇ-awˇ, aˬ myah luꞈ nawˬ-ahˇ caˇ-awˇ ja ceuˬ-eu deuˬ, laˬ kʼaˬ cehˇ-eu jeˬ byah luꞈ-uˇ.

⁵ Nawˬ neh biꞈ-euˬ gʼaˬ baˬ da neh, Ziˇoˬ gawˬ jawˬ-ahˇ le mawꞈ-eu nui ma jaˆ-eu deuˬ, laˬ kʼaˬ cehˇ-eu jeˬ byah luꞈ-uˇ.

⁶ Baˬkaˬ deh kʼawꞈ-ahˇ aˬ yawꞈ maꞈ le tsehˆ ngeh, lawˇ gawˆ gawˆ zaˬ myaˬ-eu jawˇ duˬ pyeuꞈ laˇ-awˇ, naꞈ-eu uˬ yehˇ baˬ da neh lah gʼawˬ mya ni jaˆ luꞈ meh.

⁷ Aˬ yawꞈ maꞈ mehˬ hu paw le ngeh gʼaˬ ahˇ dzehˬ laˇ-awˇ, miˬyehˇ dawˬ tawˆ luꞈ-euˬ Miˬyehˇ-ahˇ, Ziˇoˬ gawˬ jawˬ kʼoeˇ taˆ aˬ yawꞈ maꞈ ya tahˬ puˬ tehꞈ-a.

⁸ Baoˬ huiˬ-eu Miˬyehˇ pyeuꞈ-eu Sahˬpaˬ Miˬyehˇ-oˇ, ngaˬ-euˬ shaˇ dawˬ-ahˇ naˇ haˬ nehˬ laꞈ. Yaˬkoˆ-euˬ Miˬyehˇ-oˇ, naˬ bawˇ ciˬ kʼmˇ nehˬ laꞈ.

⁹ Miˬyehˇ-oˇ, nawˬ neh tseˇ doˆ-euˬ sahˬ paˬ pyeuꞈ-eu nga maꞈ-euˬ sahˬ paˬ-ahˇ guiˬ lahˬ biꞈ-awˬ.

¹⁰ Nawˬ-euˬ Uˬ duˬ tahˬ nymˇ nymˇ ma laꞈ kʼoeˇ tiˬ nah jawˇ ciꞈ-euˬ-aˬ, nui gaˇ tiˬ heˇ nah jawˇ-euˬ naˆ maˬ tseˇ poeˬ nya. Haiˬ-eu tsawˇ haˬ deuˬ-euˬ nymˇ laꞈ kʼoeˇ jawˇ-eu naˆ maˬ tseˇ, Miˬyehˇ-euˬ nymˇ gʼoˆ kʼehˬ-ahˇ ya yawꞈ gaˇ ngaˇ nui kʼahˇ shiˇ dzehˬ ma.

¹¹ Sahˬpaˬ Miˬyehˇ-aˬ, nga maꞈ-ahˇ haw piˇ-eu yaw shehꞈ kʼahˬ sehˇ muiˬ-eu sahˬ paˬ meh. Nga maꞈ-ahˇ gʼawˬ shaˬ gaˬ-awˇ ciˬ huiˬ ciˬ mahˇ nehˬ laꞈ-eu meh. Yaw tsaˬ yaw dawˇ jeˬ mˇ-eu tsawˇ haˬ deuˬ kʼoeˇ taˆ, muiˬ-eu guiˬ lahˬ tiˬ hmˬ-iˬ maˬ bi dzeuˇ-iˇ ni bi keuˆ le-eu meh.

¹² Baoˬ huiˬ-eu Miˬyehˇ-oˇ, nawˬ-ahˇ gʼoe-eu tsawˇ haˬ deuˬ aˇ naˆ ni laˬ kʼaˬ ya cehˇ-eu nga.