Jaceuq 81 - Akha

Bawˬ-iˬ gʼeh-eu caˇ dawˬ

(Aˬsaˆ-euˬ caˇ dawˬ)

¹ Aˬ dui-ahˇ haw piˇ-eu Miˬyehˇ-ahˇ laˬ kʼaˬ cehˇ-awˇ guˇ-awˬ. Yaˬkoˆ-euˬ Miˬyehˇ-ahˇ caˇ-awˇ ja ceuˬ-awˬ.

² Caˇ dawˬ caˇ-awˇ cehˇ lehˇ ciˆ-awˬ. Deuˇ-mˬ diˬ, bawˬ law baw-awˇ, naˇ haˬ muiˬ-eu caˇ dawˬ caˇ-awˬ.

³ La shuiꞈ tsehˬ ngeh hawˇ-eu la loˆ loˆ ngeh, daˇ heh baw-awˇ bawˬ-iˬ gʼeh-awˬ.

⁴ Heu-aˬ, Iˇsaˬleˬlaˆ tsawˇ jeuˬ-euˬ zahˇ sahˇ kʼoꞈ meh. Yaˬkoˆ-euˬ Miˬyehˇ neh biꞈ taˬ-euˬ zahˇ sahˇ kʼoꞈ meh.

⁵ Iˇjiˇtuˆ miˇ kʼahˬ-ahˇ aˬ yawꞈ guiˇ deuˆ ngeh, Iˇsaˬleˬlaˆ tsawˇ jeuˬ-ahˇ zahˇ sahˇ kʼoꞈ kʼoeˇ aˬ yawꞈ biꞈ-euˬ meh. Ngaˇ maˬ gaˬ haw-euˬ teˇ saˇ heu loꞈ-ehˇ ehˇ-eu ya gaˬ-euˬ ma.

⁶ “Nawˬ-euˬ naˇ kʼah daˬ luꞈ-eu kʼaˆ behˆ ngaˇ ciˬ dzeh ma. Nawˬ-euˬ tsaˬ byaˆ kʼaˆ behˆ ngaˇ bi pi taˬ ma.

⁷ Nawˇ guˆ-eu gaˆ-eu jeˬ tahˬ puˬ-awˇ ngaˬ-ahˇ kuˇ ngeh, nawˬ-ahˇ ngaˇ ka kʼoꞈ nehˬ-euˬ ma. Ngaˬ-euˬ dzuˇ yaꞈ duˬ pyeuꞈ-eu mˬ jeˬ jaˬ lehˇ laꞈ kʼoeˇ jawˇ-awˇ, nawˬ-euˬ shaˇ dawˬ-ahˇ ngaˇ naˇ haˬ-euˬ ma. Meˬliˇbaˬ lawˇ gawˆ dawˬ peh, nawˬ-ahˇ ngaˇ lawˬ haw-euˬ ma.

⁸ Naw maꞈ yahˇ paˬ-ehˇ gʼeh-eu gaˇ kawˆ ngaˇ mehˬ gaˇ, ngaˬ-euˬ tsawˇ haˬ deuˬ naˇ haˬ-awˬ. Iˇsaˬleˬlaˆ-oˇ, ngaˬ-euˬ dawˬ-ahˇ nawˇ bi naˇ haˬ geuꞈ mawꞈ dui dui nya.

⁹ Miˬyehˇ nui gʼaˬ-ahˇ naw maꞈ tiˬ jawˇ-iˬ uˬ duˬ maˬ ya tahˬ-a.

¹⁰ Ngaˇ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma. Naw maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ laꞈ-euˬ gʼaˬ ngaˇ ma. Naw maꞈ-euˬ kʼaˬ meh mˇ nga-awˬ. Naw maꞈ-ahˇ ngaˇ bi dzaˬ bi dawˇ ma.

¹¹ Ehˇ kʼawꞈ, ngaˬ-euˬ ehˇ dawˬ-ahˇ ngaˬ-euˬ tsawˇ haˬ deuˬ maˬ naˇ haˬ-a. Ngaˬ-euˬ ehˇ dawˬ Iˇsaˬleˬlaˆ maˬ geuꞈ-a.

¹² Kʼoeˇ miˇ neh aˬ yawꞈ maꞈ nui ma gʼahˇ-eu loꞈ-ehˇ yawˬ ha-euˬ nui noeˬ nui loˆ bi geuꞈ-euˬ ma.

¹³ Ngaˬ-euˬ tsawˇ haˬ deuˬ ngaˬ-euˬ ehˇ dawˬ bi naˇ haˬ mawꞈ dui dui nya. Ngaˬ neh mehˬ-euˬ dawˬ-ahˇ bi naˇ haˬ geuꞈ mawꞈ nya.

¹⁴ Aˬ yawꞈ maꞈ-ahˇ muiˇ-eu tsawˇ haˬ deuˬ-ahˇ ngaˇ kʼehˬ-awˇ, aˬ yawꞈ maꞈ-ahˇ bye-eu tsawˇ jeuˬ-ahˇ ngaˇ deuˆ gʼaˬ ma.

¹⁵ Ngaˬ-ahˇ bye-eu tsawˇ haˬ deuˬ ngaˬ-euˬ mehˬ shi ya awˆ byaˆ-awˇ, mˬ maˬ maˬ byaˆ zaˇ ziˇ kʼehˬ nehˬ kʼaˆ nehˬ ma.

¹⁶ Ehˇkʼawꞈ ngaˇ naw maꞈ-ahˇ, muiˬ dui dui-eu cehˇ bi dzaˬ-awˇ, lo guˇ byaˬ uiˇ bi dawˇ dehˆ ma.”