Jaceuq 80 - Akha

Tsawˇ jeuˬ-ahˇ bo saˆ nehˬ laꞈ lehˇ shaˇ-eu guiˬ lahˬ shaˇ dawˬ

(Aˬsaˆ-euˬ caˇ dawˬ)

¹ Iˇsaˬleˬlaˆ tsawˇ jeuˬ-ahˇ bo-eu yawˇ bo-eu gʼaˬ-oˇ, nga maꞈ-euˬ shaˇ dawˬ-ahˇ naˇ haˬ nehˬ laꞈ. Yawˇ maꞈ-ahˇ sheuˬ gʼeh-eu gʼaˬ-oˇ, nga maꞈ-ahˇ naˬ bawˇ ciˬ kʼmˇ nehˬ laꞈ. Jeˬluˇbeˬ kʼoeˇ taˆ nuiˇ luꞈ-eu gʼaˬ-oˇ,

² Eˇpaˬleˬ tsawˇ jeuˬ, Beˬyaˬmiˬ tsawˇ jeuˬ hawˇ-eu Maˬnaˇseˬ tsawˇ jeuˬ-ahˇ, nawˬ-euˬ gʼawˇ mawˇ pah mehˬ nehˬ laꞈ. Nawˬ-euˬ gʼaˬ nga maꞈ-ahˇ bi mawˇ laꞈ-awˇ, nga maꞈ-ahˇ ka kʼoꞈ le-awˬ.

³ Miˬyehˇ-oˇ, nga maꞈ-ahˇ gʼeu tuˇ nehˬ laꞈ-awˬ. Nga maꞈ guˆ kʼaˇ maˬ za-ehˇ ya dehꞈ ni, nawˬ-euˬ gʼawˬ shaˬ gaˬ-eu jeˬ bi mawˇ laꞈ-awˬ.

⁴ Baoˬ huiˬ-eu Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ-euˬ tsawˇ haˬ deuˬ nawˬ-ahˇ guiˬ lahˬ shaˇ gaˇ, aˇ myah keuˆ ni nui ma pehˇ-eu gʼeh te.

⁵ Nawˇ nga maꞈ-ahˇ noeˬ shaˬ noeˬ zahˬ-eu jeˬ bi dzaˬ laꞈ-awˇ, myaˆ biˇ kʼmˬ maˬ tiˬ byah ni bi dawˇ laꞈ-euˬ meh.

⁶ Nga maꞈ-euˬ tiˬ jawˬ jawˇ-eu aˬ cawˬ tsawˇ jeuˬ deuˬ-ahˇ, nga maꞈ-euˬ miˇ kʼahˬ-ahˇ nawˇ bi deuˆ laˇ-awˇ, nga maꞈ-ahˇ muiˇ-eu tsawˇ haˬ kʼoeˇ deuˬ neh, nga maꞈ-ahˇ yehˬ bawˬ-ehˇ bi gʼeh laꞈ-euˬ meh.

⁷ Miˬyehˇ-oˇ, nga maꞈ-ahˇ gʼeu tuˇ nehˬ laꞈ-awˬ. Nga maꞈ guˆ kʼaˇ maˬ za-ehˇ ya dehꞈ ni, nawˬ-euˬ gʼawˬ shaˬ gaˬ-eu jeˬ bi mawˇ laꞈ-awˬ.

⁸ Iˇjiˇtuˆ miˇ kʼahˬ-ahˇ neh aˬ gaꞈ ciˇ ni tiˬ ni nawˇ yuˇ laꞈ-awˇ, aˬ cawˬ tsawˇ jeuˬ deuˬ-ahˇ nawˇ teh dzeh-awˇ, aˬ yawꞈ maꞈ-euˬ miˇ kʼahˬ-ahˇ toeˬ ka-euˬ meh.

⁹ Baw duˆ kʼoeˇ mehˇ laˇ ni moꞈ juiˇ nehˬ-awˇ, duˬ ciˇ iˇ naꞈ-eu laꞈ kʼoeˇ, miˇ kʼahˬ kʼoeˇ kʼahˬ uˆ byoˆ-euˬ meh.

¹⁰ Baw duˆ kʼoeˇ gawˬ jawˬ-ahˇ guˇ ba ba-awˇ, uˬ pyaˬ uˬ laꞈ sahˇ dui dui-awˇ, goˇ dui dui-eu shuˬ liˇ aˇ bawˇ-ahˇ uˆ tehˬ-euˬ meh.

¹¹ Gʼahˇ ceh-euˬ iˬ ma laˆ shaˆ-ahˇ keuˆ ni laˆ cawˬ gʼeh-awˇ, Uˇpaˬlaˇ lawˇ baˬ-ahˇ keuˆ ni cawˬ keuˆ taˬ-euˬ meh.

¹² Aˬ jeˬ miˇ neh baw duˆ kʼoeˇ duˆ-ahˇ mˇ jawˬ taˬ-euˬ yaˇ kmˇ-ahˇ nawˇ ngawˬ pyaˆ teˬ. Nymˬ-mˇ poˆ jawˇ kʼaˇ iˇ kʼaˇ laˇ tsehˆ-eu tsawˇ haˬ deuˬ aˬ gaꞈ aˇ siˬ pyaˆ kʼoeˬ dzaˬ nya-eu meh.

¹³ Zaꞈ teˬ deuˬ aˬ gaꞈ baw duˆ kʼoeˇ nawˬ pahˬ-awˇ, bawˇ tsahˬ jeˬ zaˬ deuˬ ga uiˬ-awˇ dzaˬ-eu meh.

¹⁴ Baoˬ huiˬ-eu Miˬyehˇ-oˇ, nga maꞈ jawˇ paw ciˬ pyawˇ nehˬ laꞈ-awˬ. Mˬ kʼoeˇ taˆ neh nga maꞈ-ahˇ haw ka leꞈ-awˇ, nawˬ-euˬ tsawˇ haˬ deuˬ-ahˇ ka kʼoꞈ le-awˬ.

¹⁵ Nawˬ neh ka taˬ-euˬ aˬ gaꞈ baw duˆ-ahˇ ka kʼoꞈ le-awˬ. Nawˬ neh laˆ mehˇ taˬ-euˬ baw duˆ-ahˇ ka kʼoꞈ le-awˬ.

¹⁶ Nga maꞈ-ahˇ muiˇ-eu tsawˇ haˬ deuˬ aˬ gaꞈ baw duˆ kʼoeˇ-ahˇ miˬ dzaˬ dzah puiˆ-awˇ coeˇ tsehˆ dzeh-euˬ meh. Aˬ yawꞈ maꞈ-ahˇ nui ma pehˇ-awˇ laˆ cawˆ nehˬ-awˬ.

¹⁷ Nawˬ neh tseˇ doˆ-awˇ bi huiˬ bi mahˇ laˇ-euˬ tsawˇ jeuˬ-ahˇ bo saˆ haw piˇ nehˬ-awˬ.

¹⁸ Nga maꞈ nawˬ-ahˇ tiˬ jawˇ-iˬ maˬ paˇ byehˇ dzeh ma. Nga maꞈ-ahˇ yaw dehꞈ bi dehꞈ laꞈ-awˬ. Nawˬ-ahˇ nga maꞈ ja ceuˬ ma.

¹⁹ Miˬyehˇ-oˇ, nga maꞈ-ahˇ gʼeu tuˇ nehˬ laꞈ-awˬ. Nga maꞈ guˆ kʼaˇ maˬ za-ehˇ ya dehꞈ ni, nawˬ-euˬ gʼawˬ shaˬ gaˬ-eu jeˬ bi mawˇ laꞈ-awˬ.