Jaceuq 79 - Akha

Tsawˇ jeuˬ-ahˇ ka kʼoꞈ nehˬ laꞈ lehˇ shaˇ-eu guiˬ lahˬ shaˇ dawˬ

(Aˬsaˆ-euˬ caˇ dawˬ)

¹ Miˬyehˇ-oˇ, aˬ cawˬ tsawˇ jeuˬ nawˬ-euˬ miˇ kʼahˬ-ahˇ uˇ le-euˬ meh. Muiˬ-eu shawˇ-eu nawˬ-euˬ Uˬ duˬ tahˬ nymˇ nymˇ ma-ahˇ aˬ yawꞈ maꞈ laˆ jawꞈ-awˇ, Yeˬluˇsaˬlehˬ meuˬ-ahˇ laˆ cawˆ yaꞈ-euˬ meh.

² Nawˬ-euˬ tsawˇ haˬ deuˬ-euˬ gʼawˇ mawˇ jeˬ shiˇ kʼaˬ dzeˇ-ahˇ bi dzaˬ-awˇ, nawˬ-euˬ zaˬ kʼaˆ deuˬ-euˬ gʼawˇ mawˇ bawˇ tsahˬ jeˬ zaˬ deuˬ-ahˇ bi dzaˬ-euˬ meh.

³ Nawˬ-euˬ tsawˇ haˬ deuˬ-euˬ shiˬ iˇ cuꞈ loꞈ-ehˇ aˬ yawꞈ maꞈ laˆ yoeˇ-awˇ, Yeˬluˇsaˬlehˬ meuˬ doe ni shiˬ iˇ cuꞈ loꞈ-ehˇ yoeˇ luꞈ kʼawꞈ, tsawˇ shiˇ duˬ pahˬ-eu tiˬ gʼaˬ-iˬ maˬ jawˇ-a.

⁴ Dawˬ peh jawˇ-eu tsawˇ haˬ deuˬ nga maꞈ-ahˇ kʼaˇ ehˇ mawꞈ-eu ehˇ-awˇ, uiˇ uiˇ-ehˇ ja bu ja doeˇ-eu meh.

⁵ Sahˬpaˬ Miˬyehˇ-oˇ, nga maꞈ-ahˇ mˬ maˬ maˬ byaˆ zaˇ ziˇ nui ma pehˇ-eu gʼeh te loˇ. Nawˇ nui ma pehˇ-eu jeˬ miˬ dzaˬ doꞈ-eu loꞈ-ehˇ, aˬ myah luꞈ doꞈ doꞈ-ehˇ bi jaˆ-eu gʼeh te loˇ.

⁶ Nawˬ-ahˇ uˬ duˬ tahˬ-eu tsawˇ jeuˬ deuˬ hawˇ-eu, nawˬ-ahˇ guiˬ lahˬ maˬ shaˇ-eu tsawˇ haˬ deuˬ kʼoeˇ taˆ, nawˇ nui ma pehˇ-eu jeˬ bi keuˆ le-awˬ.

⁷ Aˬ jeˬ miˇ neh ehˇ naˇ, nawˬ-euˬ tsawˇ haˬ deuˬ-ahˇ aˬ yawꞈ maꞈ sehꞈ-awˇ, nawˬ-euˬ miˇ kʼahˬ-ahˇ aˬ yawꞈ maꞈ laˆ cawˆ-euˬ meh.

⁸ Nga maꞈ-euˬ aˬ poeˬ aˬ bawˇ deuˬ-euˬ iˬ baˇ baˬ da neh, nga maꞈ-ahˇ taˬ kʼehˬ nehˬ laꞈ. Nga maꞈ-ahˇ nymˬ-mˇ gʼawˬ shaˬ gaˬ nehˬ laꞈ-awˬ. Nga maꞈ noeˬ tmˬ duˬ ma paˇ jaˆ miˇ-a.

⁹ Nga maꞈ-ahˇ ka kʼoꞈ-eu gʼaˬ pyeuꞈ-eu Miˬyehˇ-oˇ, nga maꞈ-ahˇ caw ba nehˬ laꞈ. Nawˬ-euˬ myaˆ pyawˬ naˇ mehˇ gʼaˇ duˬ nga maꞈ-ahˇ ka kʼoꞈ-awˇ, iˬ baˇ pyehˬ nehˬ laꞈ.

¹⁰ Naw maꞈ-euˬ Miˬyehˇ aˬ gaˇ jawˇ ta lehˇ, aˬ cawˬ tsawˇ jeuˬ nga maꞈ-ahˇ aˬ jeˬ gʼeh bi naˇ haˬ laˇ ta. Nawˬ-euˬ zaˬ kʼaˆ deuˬ-ahˇ shiˬ laˆ doˆ nehˬ-eu tsawˇ jeuˬ kʼoeˇ deuˬ-ahˇ nawˇ kʼehˬ nehˬ gaˇ, nga maꞈ-ahˇ bi mawˇ laꞈ.

¹¹ Paꞈ kuˆ-ahˇ bi dawˆ-euˬ tsawˇ haˬ deuˬ mahˇ gaˇ naˇ haˬ sheˇ. Aˬ cawˬ neh bi sehꞈ-eu lehˇ gʼeh-eu tsawˇ haˬ kʼoeˇ deuˬ-ahˇ, nawˬ-euˬ huiˬ-eu baoˬ-ahˇ gʼoe-awˇ pyehˬ doˆ nehˬ-awˬ.

¹² Sahˬpaˬ Miˬyehˇ-oˇ, aˬ cawˬ tsawˇ jeuˬ kʼoeˇ deuˬ nawˬ-ahˇ yehˬ bawˬ sehˇ lu-ehˇ gʼeh-euˬ miˇ neh, shiꞈ poˆ keuˆ ni aˬ yawꞈ maꞈ-ahˇ paˇ jahˇ kʼoꞈ nehˬ-awˬ.

¹³ Kʼoeˇ ngeh, nawˬ-euˬ yawˇ kuˆ-ahˇ uˇ-eu yawˇ pyeuꞈ-eu nga maꞈ nawˬ-euˬ tsawˇ haˬ deuˬ, nawˬ-euˬ guiˬ lahˬ-ahˇ aˬ myah luꞈ noeˬ mawˇ-awˇ, mˬ maˬ maˬ byaˆ zaˇ ziˇ nawˬ-ahˇ ja ceuˬ ma.