Jaceuq 78 - Akha

Miˬyehˇ hawˇ-eu aˬ yawꞈ-euˬ tsawˇ haˬ deuˬ

(Aˬsaˆ-euˬ caˇ dawˬ)

¹ Ngaˬ-euˬ tsawˇ haˬ deuˬ-oˇ, ngaˇ mehˬ nehˬ tsoˆ nehˬ laꞈ gaˇ naˬ bawˇ ciˬ kʼmˇ-awˇ, ngaˇ ngehˬ-euˬ dawˬ-ahˇ yaw muiˬ paˬ-ehˇ naˇ haˬ-awˬ.

² Tsawˇ gahˇ ahˇ-eu dawˬ daˬ deuˬ ngaˇ zmˬ-awˇ, dzeuˇ yaꞈ-euˬ gaˇ kawˆ dawˬ tsuiꞈ pah mehˬ nehˬ ma.

³ Aˬ dui siˬ haw mawˇ haw-euˬ gaˇ kawˆ deuˬ, aˬ dui-euˬ aˬ poeˬ aˬ bawˇ deuˬ neh ehˇ nehˬ laꞈ-euˬ gaˇ kawˆ deuˬ ngaˇ naw maꞈ-ahˇ dawˬ tsuiꞈ yuˇ doˆ nehˬ ma.

⁴ Sahˬpaˬ Miˬyehˇ-euˬ baoˬ hawˇ-euˬ aˬ yawꞈ neh mˇ-euˬ huiˬ-eu gaˇ deuˬ gaˇ kawˆ maˬ ehˇ, aˬ yawꞈ neh mˇ-euˬ zahˬ dui dui leˇ paˬ-ehˇ gʼeh-euˬ gaˇ deuˬ maˬ ehˇ, aˬ dui-euˬ zaˬ deuˬ-ahˇ maˬ ja mehˬ-ehˇ maˬ byehˇ ni, nahˬ ziˇ-ahˇ aˬ dui ja mehˬ yaꞈ ma.

⁵ Iˇsaˬleˬlaˆ tsawˇ haˬ-ahˇ zahˇ sahˇ kʼoꞈ deuˬ aˬ yawꞈ biꞈ yaꞈ-awˇ, Yaˬkoˆ-euˬ zaˬ deuˬ uˆ deuˬ-ahˇ zahˇ dawˬ kʼoꞈ dawˬ biꞈ yaꞈ-euˬ meh. Zaˬ deuˬ-ahˇ aˬ yawꞈ-euˬ zahˇ dawˬ kʼoꞈ dawˬ bi mehˬ yaꞈ-eu gʼaˇ duˬ, aˬ dui-euˬ aˬ poeˬ aˬ bawˇ deuˬ-ahˇ aˬ yawꞈ mehˬ yaꞈ tsoˆ yaꞈ-euˬ meh.

⁶ Tiˬ ziˇ saiˇ tiˬ ziˇ kʼoeˇ loꞈ-ehˇ mehˬ ka leꞈ nya ni, aˬ yawꞈ kʼoeˇ loꞈ-ehˇ mehˬ yaꞈ tsoˆ yaꞈ-euˬ meh.

⁷ Kʼoeˇ loꞈ-ehˇ jahˇ-eu laꞈ kʼoeˇ, Miˬyehˇ-ahˇ aˬ yawꞈ maꞈ gʼoe-awˇ, aˬ yawꞈ-euˬ zahˇ dawˬ kʼoꞈ dawˬ-ahˇ aˬ myah luꞈ caw teh nya tehꞈ-a.

⁸ Miˬyehˇ-ahˇ jah-eu maˬ ziꞈ-ehˇ, Miˬyehˇ-ahˇ saˇ jaˇ maˬ ziꞈ-eu uˬ taꞈ, aˬ yawꞈ-eu ehˇ dawˬ maˬ naˇ haˬ ni aˬ yawꞈ-ahˇ puiˬ-eu, aˬ yawꞈ maꞈ-euˬ aˬ poeˬ aˬ bawˇ kʼoeˇ deuˬ-ahˇ ma duˇ ni, aˬ yawꞈ maꞈ dehꞈ tehꞈ-a.

⁹ Eˇpaˬleˬ tsawˇ haˬ deuˬ kaˆ hawˇ-eu kaˆ myaˬ yuˇ luꞈ kʼawꞈ, guiˇ deuˆ ngeh nah cehˆ byoˆ-eu meh.

¹⁰ Miˬyehˇ nehˬ-ehˇ dzaˬ taˬ-euˬ dawˬ ma saˇ jaˇ-ahˇ aˬ yawꞈ maꞈ maˬ ziꞈ-ehˇ, aˬ yawꞈ-euˬ zahˇ dawˬ kʼoꞈ dawˬ-ahˇ maˬ naˇ haˬ geuꞈ-a.

¹¹ Aˬ yawꞈ neh mˇ mehˬ-euˬ zahˬ leˇ paˬ-ehˇ gʼeh-eu jeˬ hawˇ-eu, aˬ yawꞈ neh mˇ-euˬ gaˇ deuˬ-ahˇ aˬ yawꞈ maꞈ ngehˇ-euˬ meh.

¹² Iˇjiˇtuˆ miˇ kʼahˬ Zoˇnaˆ deh ga-ahˇ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ mehˬ shi, zahˬ leˇ paˬ-ehˇ gʼeh-eu jeˬ Miˬyehˇ mˇ mehˬ nehˬ-euˬ meh.

¹³ Iˬ ma laˆ shaˆ-ahˇ aˬ yawꞈ dehˬ paˆ-awˇ, aˬ yawꞈ maꞈ-ahˇ sheuˬ doˆ nehˬ-eu laꞈ kʼoeˇ, iˇ cuꞈ-ahˇ kaˇ pyawˇ loꞈ-ehˇ aˬ yawꞈ bi jaˆ-euˬ meh.

¹⁴ Nah gʼahˇ paw mˬ dmˇ neh bi sheuˬ gʼeh-euˬ meh.

¹⁵ Kʼaˇ shuiꞈ deh ga laꞈ kʼoeˇ kʼaˬ lo bi tsawˬ nga laˇ-awˇ, miˇ tsaˬ dawˬ dah-euˬ iˇ cuꞈ aˬ yawꞈ maꞈ-ahˇ bi dawˇ-euˬ meh.

¹⁶ Lo guˇ-ahˇ aˬ yawꞈ iˇ cuꞈ bi doˆ le-awˇ, lawˇ baˬ loꞈ-ehˇ bi yoeˇ-euˬ meh.

¹⁷ Ehˇ kʼawꞈ, Miˬyehˇ-ahˇ aˬ yawꞈ maꞈ maˬ tsehˆ leˇ ni puiˬ-awˇ, kʼaˇ shuiꞈ deh ga laꞈ kʼoeˇ Huiˬ dui Mahˇ dui dui-eu gʼaˬ-ahˇ aˬ yawꞈ maꞈ puiˬ-euˬ meh.

¹⁸ Aˬ yawꞈ maꞈ mehꞈ-eu jeˬ bi dzaˬ laꞈ lehˇ ehˇ-awˇ, Miˬyehˇ-ahˇ aˬ yawꞈ maꞈ lawˬ haw-euˬ meh.

¹⁹ Miˬyehˇ-ahˇ coeˬ leˇ-eu dawˬ aˬ yawꞈ maꞈ ngehˬ-awˇ, heu loꞈ-ehˇ ehˇ-euˬ meh. “Kʼaˇ shuiꞈ deh ga laꞈ kʼoeˇ Miˬyehˇ hawˬ bi dzaˬ laꞈ nya meh loˇ.

²⁰ Kaˬ lo-ahˇ aˬ yawꞈ juiꞈ-awˇ iˇ cuꞈ bi doˆ le-euˬ law nmˇ-aˬ ngeuˇ meh. Ehˇ kʼawꞈ, aˬ yawꞈ-euˬ tsawˇ haˬ deuˬ-ahˇ kaˬ muˇ hawˇ-eu shaˬ jiˇ bi dzaˬ nehˬ laꞈ nya tehꞈ-a loˇ.”

²¹ Aˬ yawꞈ maꞈ kʼoeˇ loꞈ-ehˇ ehˇ gaˇ Sahˬ paˬ Miˬyehˇ nui ma pehˇ laˇ-awˇ, miˬ dzaˬ neh aˬ yawꞈ maꞈ-ahˇ kʼehˬ nehˬ-euˬ meh. Aˬ yawꞈ maꞈ-ahˇ aˬ yawꞈ nui ma pehˇ dui dui-euˬ meh.

²² Aˬ jeˬ miˇ neh ehˇ naˇ, aˬ yawꞈ maꞈ aˬ yawꞈ-ahˇ maˬ jah-ehˇ, aˬ yawꞈ ka kʼoꞈ nehˬ laꞈ tehꞈ-a lehˇ maˬ jah-a.

²³ Ehˇ kʼawꞈ mˬ-ahˇ aˬ yawꞈ dawˬ biꞈ-awˇ mˬ taˆ laˇ gʼoˆ bi pah le-euˬ meh.

²⁴ Aˬ yawꞈ maꞈ jawˇ gaˇ maˬ naˆ kaˬ muˇ bi ga le-eu laꞈ kʼoeˇ, mˬ taˆ-euˬ cehˇ aˬ yawꞈ maꞈ-ahˇ bi dzaˬ-euˬ meh.

²⁵ Kʼoeˇ ngeh, mˬ taˆ gʼaˬ kʼehˇ-euˬ dzaˇ aˬ yawꞈ maꞈ ya dzaˬ-awˇ, aˬ yawꞈ maꞈ kʼaˇ loˬ-eu jeˬ Miˬyehˇ biꞈ nehˬ-euˬ meh.

²⁶ Nahˇ ma doˆ kʼehˬ paw-euˬ jaˬ lehˇ aˬ yawꞈ bi baw leꞈ-awˇ, aˬ yawꞈ-euˬ baoˬ neh laꞈ oˆ paw pyawˬ-ahˇ-euˬ jaˬ lehˇ bi baw daˆ laꞈ-eu laꞈ kʼoeˇ,

²⁷ laˆ shaˆ lawˇ deh-ahˇ ga-eu kʼaˇ shuiꞈ loꞈ-ehˇ myaˬ-eu aˇ jiˇ deuˬ, aˬ yawꞈ-euˬ tsawˇ haˬ deuˬ jawˇ gaˇ pyehˬ gʼeh leꞈ-euˬ meh.

²⁸ Aˬ yawꞈ maꞈ sehˬ gʼawˆ gʼawˆ-awˇ naˬ luꞈ-eu pu gʼahˇ ceh, sehˬ gʼawˆ tiˬ jawˬ aˇ jiˇ ga taˬ le-euˬ meh.

²⁹ Aˬ yawꞈ maꞈ mehꞈ-eu jeˬ Miˬyehˇ biꞈ nehˬ-euˬ miˇ neh, dzaˬ dehˆ dawˇ dehˆ-awˇ nui kʼahˇ shiˇ-euˬ meh.

³⁰ Ehˇ kʼawꞈ, aˬ yawꞈ maꞈ kʼaˇ noeˬ-euˬ loꞈ-ehˇ nui kʼahˇ tiˬ shiˇ maˬ ya dzaˬ dehˆ mi naˆ-ehˇ,

³¹ aˬ yawꞈ maꞈ-ahˇ Miˬyehˇ nui ma pehˇ laˇ-awˇ, gʼaˬ kʼaˆ dui dui-eu aˬ yawꞈ maꞈ-euˬ tsawˇ haˬ deuˬ-ahˇ sehꞈ-euˬ meh. Loˆ dui dui-eu Iˇsaˬleˬlaˆ zaˬ guˬ deuˬ-ahˇ aˬ yawꞈ sehꞈ-euˬ meh.

³² Kʼoeˇ loꞈ-ehˇ jahˇ nehˬ kʼawꞈ, aˬ yawꞈ maꞈ iˬ baˇ mˇ-eu maˬ naˬ leˇ-a. Zahˬ leˇ paˬ-ehˇ gʼeh-eu jeˬ mˇ mehˬ nehˬ kʼawꞈ, aˬ yawꞈ maꞈ aˬ yawꞈ-ahˇ maˬ jah-a.

³³ Kʼoeˇ miˇ neh, aˬ yawꞈ maꞈ-euˬ aˇ nah aˇ yamˬ-ahˇ saꞈ tiˬ poˆ gʼawˇ daˆ-eu myah ni tehꞈ-ehˇ bi myahˇ-awˇ, guˆ-eu gaˆ-eu jeˬ ja pyuˬ ni bi keuˆ le-awˇ, ziˇ bi dehꞈ jiˇ-euˬ meh.

³⁴ Aˬ yawꞈ maꞈ laꞈ kʼoeˇ tiˬ paˆ na deuˬ-ahˇ kʼaˇ bi shiˇ ngeh, dzeˇ-eu deuˬ aˬ yawꞈ jawˇ paw gʼoꞈ kʼoꞈ laˇ-awˇ, aˬ yawꞈ maꞈ nui ma noeˬ poˆ-eu laꞈ kʼoeˇ, nui ma laꞈ kʼoeˇ keuˆ ni guiˬ lahˬ shaˇ-eu meh.

³⁵ Miˬyehˇ aˬ yawꞈ maꞈ-ahˇ haw piˇ nehˬ-eu gʼaˬ pyeuꞈ-awˇ, Baoˬ huiˬ-eu gʼaˬ aˬ yawꞈ maꞈ-ahˇ caw ba le-euˬ gaˇ aˬ yawꞈ maꞈ paˇ noeˬ keuˆ-eu meh.

³⁶ Ehˇ kʼawꞈ, aˬ yawꞈ maꞈ ngehˬ-eu dawˬ jaˬ myawꞈ myawꞈ-awˇ, aˬ yawꞈ maꞈ neh kʼaˇ ehˇ taˬ-euˬ loꞈ-ehˇ maˬ jaˆ-a.

³⁷ Aˬ yawꞈ-ahˇ nui ma maˬ taꞈ-ehˇ, aˬ yawꞈ-euˬ dawˬ ma saˇ jaˇ-ahˇ maˬ ziꞈ-a.

³⁸ Ehˇ kʼawꞈ, aˬ yawꞈ-euˬ tsawˇ haˬ deuˬ-ahˇ Miˬyehˇ gʼawˬ shaˬ gaˬ-awˇ, aˬ yawꞈ maꞈ-ahˇ iˬ baˇ pyehˬ nehˬ-eu laꞈ kʼoeˇ, aˬ yawꞈ maꞈ kʼoeˇ taˆ luˬ-iˇ seˇ-iˇ-eu jeˬ maˬ bi keuˆ le-a. Aˬ yawꞈ nui ma kʼaˇ pehˇ-eu loꞈ-ehˇ aˬ laꞈ maˬ bi keuˆ leˇ ni, gʼawˬ mya poˆ oˇ dzeuˇ nehˬ-euˬ meh.

³⁹ Aˬ yawꞈ maꞈ gʼawˬ myahˇ ni maˬ gmˬ-eu shiˬ shaˬ jiˇ gʼawˇ mawˇ pyeuꞈ-awˇ, baw byoˆ gʼeh-awˇ maˬ gʼoꞈ kʼoꞈ laˇ nya-eu jaˬ lehˇ-ahˇ duˇ gaˇ, aˬ yawꞈ noeˬ keuˆ-eu meh.

⁴⁰ Kʼaˇ shuiꞈ deh ga laꞈ kʼoeˇ aˬ yawꞈ maꞈ aˬ yawꞈ-ahˇ aˇ myaˆ poˆ puiˬ-euˬ nga. Aˬ yawꞈ-ahˇ aˇ myaˆ poˆ bi noeˬ shaˬ-euˬ nga.

⁴¹ Miˬyehˇ-ahˇ tiˬ poˆ saˇ-iˬ tiˬ poˆ aˬ yawꞈ maꞈ lawˬ haw-awˇ, Iˇsaˬleˬlaˆ-euˬ Muiˬ-eu shawˇ-eu Miˬyehˇ-ahˇ nui ma shaˬ zahˬ bi mˇ-euˬ meh.

⁴² Aˬ yawꞈ-euˬ huiˬ-eu baoˬ-ahˇ aˬ yawꞈ maꞈ ngehˇ-awˇ, muiˇ-eu deuˬ-euˬ laꞈ-ahˇ neh ka kʼoꞈ nehˬ-euˬ aˇ nah-ahˇ ngehˇ-euˬ meh.

⁴³ Iˇjiˇtuˆ miˇ kʼahˬ Zoˇnaˆ deh ga-ahˇ, aˬ yawꞈ neh mˇ mehˬ-euˬ zahˬ leˇ paˬ-ehˇ gʼeh-eu huiˬ-eu gaˇ-ahˇ kʼawꞈ, aˬ yawꞈ maꞈ ngehˇ byoˆ jiˇ-euˬ meh.

⁴⁴ Lawˇ baˬ-ahˇ shiˬ bi pyeuꞈ tsehˆ-awˇ Iˇjiˇtuˆ tsawˇ haˬ deuˬ dawˇ-eu iˇ cuꞈ maˬ jaˆ ni bi shaˬ-euˬ meh.

⁴⁵ Aˬ yawꞈ maꞈ-ahˇ bi kawꞈ-eu puˬ saˆ baˬ maꞈ pyehˬ gʼeh leꞈ-awˇ, aˬ yawꞈ maꞈ-euˬ miˇ kʼahˬ-ahˇ bi laˆ cawˆ-eu kʼaˬ paˬ baˬ maꞈ pyehˬ gʼeh leꞈ-euˬ meh.

⁴⁶ Aˬ yawꞈ maꞈ-euˬ deh yaˇ bi laˆ cawˆ-eu gʼaˇ duˬ, nyehˇ bahˇ baˬ maꞈ pyehˬ gʼeh leꞈ-euˬ meh.

⁴⁷ Aˬ yawꞈ maꞈ-euˬ aˬ gaꞈ baw duˆ-ahˇ uˬ yehˇ aˇ siˬ neh bi deh sehꞈ jiˇ-awˇ, siˬ guˬ aˇ bawˇ-ahˇ ngehˇ bi ga sehꞈ-euˬ meh.

⁴⁸ Aˬ yawꞈ maꞈ-euˬ mawˇ neˇ mawˇ maꞈ-ahˇ uˬ yehˇ aˇ siˬ bi deh sehꞈ-awˇ, yawˇ yawˇ maꞈ-ahˇ tsoꞈ bi deh sehꞈ-euˬ meh.

⁴⁹ Shaˆ shiˇ hehˇ ahˇ leꞈ-euˬ loꞈ-ehˇ, aˬ yawꞈ maꞈ kʼoeˇ taˆ aˬ yawꞈ-euˬ nui pehˇ shehˆ daˆ nehˬ-awˇ, bi guˬ dzaˬ leˇ-euˬ meh.

⁵⁰ Aˬ yawꞈ nui ma pehˇ-eu maˬ shuꞈ-iˇ ni, aˬ yawꞈ maꞈ-ahˇ maˬ bi dzeuˇ-iˇ-ehˇ, nyawˬ leˇ nya-eu naˇ gawˇ gawˇ ma neh bi kʼehˬ sehꞈ-euˬ meh.

⁵¹ Iˇjiˇtuˆ nymˇ jiˇ yawˬ nymˇ na luꞈ laꞈ kʼoeˇ, dehꞈ beh beh le-euˬ aˬ li aˬ yuiꞈ deuˬ-ahˇ aˬ yawꞈ sehꞈ jiˇ nehˬ-euˬ meh.

⁵² Kʼoeˇ naˇ, yawˇ bo-eu yaw sahˇ loꞈ-ehˇ, aˬ yawꞈ-euˬ tsawˇ haˬ-ahˇ aˬ yawꞈ sheuˬ doˆ gʼeh-awˇ, kʼaˇ shuiꞈ deh ga gʼahˇ ceh sheuˬ gʼeh-euˬ meh.

⁵³ Aˬ yawꞈ maꞈ-ahˇ aˬ yawꞈ yaw muiˬ paˬ-ehˇ sheuˬ gʼeh-awˇ, aˬ yawꞈ maꞈ maˬ guˆ-a. Ehˇ kʼawꞈ, aˬ yawꞈ maꞈ-ahˇ muiˇ-eu deuˬ-ahˇ, iˬ ma laˆ shaˆ iˇ cuꞈ neh dahˬ pymˬ sehꞈ-euˬ meh.

⁵⁴ Aˬ yawꞈ-euˬ muiˬ-eu shawˇ-eu miˇ kʼahˬ-ahˇ aˬ yawꞈ maꞈ-ahˇ sheuˬ gʼeh nehˬ-awˇ, aˬ yawꞈ neh deuˆ gʼaˬ-euˬ gawˬ jawˬ deuˬ-ahˇ sheuˬ gʼeh-euˬ meh.

⁵⁵ Aˬ yawꞈ-euˬ tsawˇ haˬ deuˬ le uˇ gʼeh-eu nehˬ-ehˇ, kʼoeˇ gaˇ jawˇ luꞈ-eu tsawˇ haˬ deuˬ-ahˇ teh dzeh-awˇ, tsawˇ haˬ kʼoeˇ deuˬ-euˬ miˇ kʼahˬ Iˇsaˬleˬlaˆ tsawˇ jeuˬ deuˬ-ahˇ biˇ nehˬ-eu laꞈ kʼoeˇ, aˬ yawꞈ maꞈ-euˬ nymˇ kʼoeˇ deuˬ aˬ yawꞈ-euˬ tsawˇ haˬ deuˬ-ahˇ aˬ yawꞈ biꞈ-euˬ meh.

⁵⁶ Ehˇ kʼawꞈ, Baoˬ huiˬ-eu Miˬyehˇ-ahˇ aˬ yawꞈ maꞈ puiˬ-awˇ, aˬ yawꞈ-ahˇ lawˬ haw-euˬ meh. Aˬ yawꞈ-euˬ zahˇ dawˬ kʼoꞈ dawˬ-ahˇ aˬ yawꞈ maꞈ maˬ naˇ haˬ geuꞈ-a.

⁵⁷ Aˬ yawꞈ maꞈ-euˬ aˬ poeˬ aˬ bawˇ deuˬ loꞈ-ehˇ, saˇ jaˇ maˬ ziꞈ-eu tsawˇ haˬ deuˬ pyeuꞈ-awˇ, yaw gʼahˬ gʼahˬ-eu kaˆ myaˬ loꞈ-ehˇ, tiˬ pawꞈ-iˬ maˬ jah coeˇ-a.

⁵⁸ Aˬ yawꞈ maꞈ zmˬ luꞈ-eu aˬ cawˬ tsawˇ jeuˬ-euˬ muiˬ-eu shawˇ-eu jawˇ duˬ hawˇ-eu, tahˬ pahˬ aˬ ma mawˇ kawˇ deuˬ baˬ da neh, Miˬyehˇ nui ma bi pehˇ-euˬ meh.

⁵⁹ Kʼoeˇ deuˬ-ahˇ Miˬyehˇ ya mawˇ ngeh nui ma pehˇ-awˇ, aˬ yawꞈ-euˬ tsawˇ haˬ deuˬ-ahˇ byehˇ tsehˆ-euˬ meh.

⁶⁰ Tsawˇ haˬ zaˬ nehˬ-ehˇ aˬ yawꞈ jawˇ-euˬ jawˇ duˬ pyeuꞈ-eu, Shiˇloˬ meuˬ-ahˇ jaˆ-eu sehˬ gʼawˆ-ahˇ aˬ yawꞈ byehˇ dzeh-euˬ meh.

⁶¹ Aˬ yawꞈ-euˬ baoˬ hawˇ-eu yaw shehꞈ kʼahˬ sehˇ-euˬ dah zaˇ pyeuꞈ-eu Dawˬ ma saˇ jaˇ Bahˬ keuˆ-ahˇ, muiˇ-eu deuˬ-euˬ laꞈ-ahˇ aˬ yawꞈ a ahˇ nehˬ-euˬ meh.

⁶² Aˬ yawꞈ-euˬ tsawˇ haˬ deuˬ-ahˇ aˬ yawꞈ nui ma pehˇ-awˇ, aˬ yawꞈ maꞈ-ahˇ muiˇ-eu deuˬ neh bi sehꞈ-euˬ meh.

⁶³ Kʼaˬ dzeˇ zaˬ zaˬ guˬ deuˬ guiˇ deuˆ gaˇ bi deuˆ sehꞈ-awˇ, zaˬ miˬ aˬ buˇ zaˬ guˬ deuˬ mˇ dzaˬ-iˇ kʼaˇ maˬ za-a.

⁶⁴ Piˇ ma deuˬ shaˆ shiˇ shiˇ-awˇ, aˬ yawꞈ maꞈ-euˬ miˬ zaˬ deuˬ tsawˇ ngoeˇ maˬ ya ngoeˇ-a.

⁶⁵ Aˇ saˬ saˬ laˇ ngeh uˬ noeˬ beuˇ laˇ-euˬ loꞈ-ehˇ Miˬyehˇ luˆ laˇ-awˇ, aˬ gaꞈ dzaˇ uiˇ dawˇ beuˇ-euˬ gʼaˬ kʼaˆ dui dui-eu tsawˇ haˬ loꞈ-ehˇ tuˇ laˇ-euˬ meh.

⁶⁶ Aˬ yawꞈ-ahˇ muiˇ-eu deuˬ-ahˇ aˬ yawꞈ deuˆ gʼaˬ-awˇ, mˬ maˬ maˬ byaˆ zaˇ ziˇ daˬ bi ga-euˬ meh.

⁶⁷ Ehˇ kʼawꞈ, Yoˇsehˆ-euˬ zaˬ deuˬ uˆ deuˬ-ahˇ maˬ ha geuꞈ-ehˇ, Eˇpaˬleˬ tsawˇ jeuˬ-ahˇ aˬ yawꞈ maˬ tseˇ doˆ-a.

⁶⁸ Ehˇ kʼawꞈ Yuˇdaˆ tsawˇ jeuˬ hawˇ-eu aˬ yawꞈ gaˬ-eu Ziˇoˬ gawˬ jawˬ-ahˇ, aˬ yawꞈ tseˇ doˆ-euˬ meh.

⁶⁹ Mˬ kʼoeˇ taˆ jaˆ-eu aˬ yawꞈ-euˬ nymˇ loꞈ-ehˇ, aˬ yawꞈ-euˬ Uˬ duˬ tahˬ nymˇ nymˇ ma kʼoeˇ gaˇ tsoˆ-awˇ, mˬ maˬ maˬ byaˆ zaˇ ziˇ bi ziꞈ-euˬ meh.

⁷⁰ Aˬ yawꞈ-euˬ zaˬ kʼaˆ Daˬbiˇ-ahˇ aˬ yawꞈ tseˇ doˆ-awˇ, yawˇ bo duˬ-ahˇ jawˇ gaˇ sheuˬ doˆ laˬ-iˇ-euˬ meh.

⁷¹ Aˬ yawꞈ yawˇ bo luꞈ gaˇ kuˇ kʼoꞈ laꞈ-awˇ, Miˬyehˇ-euˬ tsawˇ haˬ deuˬ-ahˇ bo-eu yawˇ bo-eu yaw sahˇ bi geuꞈ-eu lehˇ, Iˇsaˬleˬlaˆ tsawˇ jeuˬ-euˬ sahˬ paˬ ka nehˬ-euˬ meh.

⁷² Aˬ yawꞈ maꞈ-ahˇ yaw tsaˬ yaw dawˇ laꞈ kʼoeˇ aˬ yawꞈ bo saˆ-awˇ, tsawˇ gahˇ ahˇ-eu laꞈ kʼoeˇ sheuˬ gʼeh-euˬ meh.