Jaceuq 77 - Akha

Nui ma cawˆ ngeh gʼaˬ yuˇ-eu

(Aˬsaˆ-euˬ caˇ dawˬ)

¹ Miˬyehˇ-ahˇ ngaˇ yaw kʼaˆ-ehˇ kuˇ-euˬ ma. Ngaˇ guˇ-awˇ kuˇ ngeh, aˬ yawꞈ naˇ haˬ nehˬ laꞈ-euˬ meh.

² Ngaˇ shaˬ zahˬ naꞈ ngeh, Sahˬpaˬ Miˬyehˇ-ahˇ guiˬ lahˬ shaˇ-euˬ ma. Uˬ ciꞈ miˇ lah-ehˇ aˬ laꞈ baꞈ diˇ-awˇ guiˬ lahˬ shaˇ kʼawꞈ, nui ma saˇ laˇ duˬ maˬ jaˆ nya.

³ Miˬyehˇ gaˇ kawˆ ngaˇ shaˇ noeˬ ngeh, saꞈ gʼawˇ daˆ laˇ miˇ-a. Ciˬ cuˇ ni jawˇ-awˇ shaˇ noeˬ ngeh, gʼaˬ baˬ dui dui nya.

⁴ Aˬ yawꞈ ngaˬ-ahˇ uˬ ciꞈ miˇ lah-ehˇ yaw noeˬ-ehˇ bi jawˇ laꞈ-euˬ meh. Ngaˇ nui ma cawˆ dui dui-eu miˇ neh dawˬ ma ngehˬ doˆ coeˇ nya.

⁵ Dzeuˇ yaꞈ-euˬ aˇ nah aˇ yamˬ-ahˇ shaˇ noeˬ ngeh, aˇ hu ba-euˬ gaˇ kawˆ deuˬ noeˬ mawˇ laˇ miˇ-a.

⁶ Ngaˇ uˬ ciꞈ miˇ lah-ehˇ shaˇ noeˬ dui dui-awˇ, shaˇ noeˬ duˬ leꞈ-euˬ laꞈ kʼoeˇ yawˬ haˇ yawˬ ha heu loꞈ-ehˇ naˇ haˬ haw-euˬ ma.

⁷ “Sahˬpaˬ Miˬyehˇ aˬ dui-ahˇ byehˇ tsehˆ tsehˆ tehꞈ-a loˇ. Aˬ yawꞈ aˬ dui-ahˇ nui ma maˬ paˇ tsaˬ meh loˇ.

⁸ Aˬ yawꞈ aˬ dui-ahˇ gaˬ-eu jiˇ shaw taˬ loˇ. Aˬ yawꞈ-euˬ dawˬ ma saˇ jaˇ gaˇ dahˇ maˬ paˇ tsoeˬ meh loˇ.

⁹ Gʼawˬ shaˬ gaˬ-eu jeˬ-ahˇ Miˬyehˇ ngehˇ taˬ loˇ. Gʼawˬ shaˬ gaˬ-eu dah zaˇ nui ma pehˇ-eu jeˬ-ahˇ aˬ yawꞈ tuˆ tehˬ shaw taˬ loˇ.” lehˇ naˇ haˬ-euˬ ma.

¹⁰ “Miˬyehˇ baoˬ maˬ paˇ ahˇ meh lehˇ ehˇ-eu jeˬ taꞈ-ehˇ, ngaˬ-ahˇ coeˬ laˇ-eu tiˬ jeˬ-iˬ maˬ paˇ jaˆ miˇ-a” lehˇ ngaˇ ehˇ-euˬ ma.

¹¹ Sahˬpaˬ Miˬyehˇ-oˇ, nawˬ neh mˇ-euˬ huiˬ-eu gaˇ deuˬ-ahˇ ngaˇ noeˬ keuˆ ma. Dzeuˇ laˇ ngeh nawˬ neh mˇ yaꞈ-euˬ zahˬ leˇ paˬ-ehˇ gʼeh-eu gaˇ deuˬ-ahˇ ngaˇ noeˬ mawˇ ma.

¹² Nawˬ neh mˇ yaꞈ-euˬ gaˇ dawˬ tawˆ luꞈ-ahˇ ngaˇ paˇ shaˇ noeˬ poˆ ma. Nawˬ-euˬ huiˬ-eu gaˇ kʼoeˇ deuˬ-ahˇ, ngaˇ ciˬ cuˇ ni shaˇ noeˬ-awˇ gʼaˬ yuˇ ma.

¹³ Miˬyehˇ-oˇ, nawˬ neh kʼaˇ mˇ-euˬ yawˬ jeˬ na luꞈ muiˬ dui jaˬ dui dui-eu meh. Nawˇ loꞈ-ehˇ huiˬ-eu miˬyehˇ maˬ jawˇ-a.

¹⁴ Nawˇ-aˬ, kʼaˆ jeˬ-ehˇ gʼeh-eu jeˬ mˇ-eu Miˬyehˇ meh. Tsawˇ jeuˬ dawˬ tawˆ luꞈ-ahˇ nawˬ-euˬ baoˬ nawˇ bi mawˇ-euˬ meh.

¹⁵ Yaˬkoˆ hawˇ-eu Yoˇsehˆ-euˬ zaˬ deuˬ uˆ deuˬ pyeuꞈ-eu nawˬ-euˬ tsawˇ haˬ deuˬ-ahˇ, nawˬ-euˬ baoˬ-ahˇ gʼoe-awˇ nawˇ ka kʼoꞈ nehˬ-euˬ meh.

¹⁶ Miˬyehˇ-oˇ, iˇ cuꞈ-ahˇ keuˆ ni nawˬ-ahˇ mawˇ ngeh guˆ-eu siˬ nya-awˇ, naꞈ dui dui-eu iˬ ma laˆ shaˆ yaw dzuˬ dzuˬ-eu meh.

¹⁷ Mˬ dmˇ neh uˬ yehˇ shehˆ dzeh leꞈ-awˇ, mˬ kʼoeˇ taˆ mˬ jeˬ jeˬ ngeh, yawˬ coeˇ na luꞈ mˬ myawꞈ myawꞈ-eu meh.

¹⁸ Nawˬ-euˬ mˬ jeˬ mahˇ doˆ laˇ-awˇ, mˬ myawꞈ myawꞈ-awˇ miˇ tsaˬ-ahˇ bi bya laˇ ngeh, miˇ tsaˬ tahˬ kʼawˇ yaw dzuˬ dzuˬ-awˇ luˆ luˆ-ehˇ jaˆ-eu meh.

¹⁹ Iˇ luˆ dzeh-eu kʼoeˇ taˆ nawˇ cah-awˇ, iˬ ma laˆ shaˆ-ahˇ nawˇ cah tsehˆ gʼeh kʼawꞈ, nawˬ-euˬ pehˬ zaˇ maˬ ya mawˇ-a.

²⁰ Moˇseˬ hawˇ-eu Aˬloˬ-ahˇ nawˇ gʼoe-awˇ, yawˇ bo-eu yaw sahˇ loꞈ-ehˇ, nawˬ-euˬ tsawˇ haˬ deuˬ-ahˇ nawˇ sheuˬ gʼeh-euˬ meh.