Jaceuq 75 - Akha

Miˬyehˇ yaˇ kʼaˬ daˇ-euˬ gʼaˬ pyeuꞈ-eu

(Aˬsaˆ-euˬ caˇ dawˬ)

¹ Miˬyehˇ-oˇ, nawˬ-ahˇ nga maꞈ ja ceuˬ-eu ma. Nawˬ-euˬ guiˬ lahˬ-ahˇ ja ceuˬ-eu ma. Nawˇ huiˬ dui mahˇ dui dui-eu gaˇ kawˆ nga maꞈ ja-awˇ, nawˬ neh mˇ-euˬ zahˬ leˇ paˬ-ehˇ gʼeh-eu gaˇ kawˆ deuˬ nga maꞈ ja gaˬ ma.

² Miˬyehˇ heu loꞈ-ehˇ ehˇ-eu meh. “Yaˇ kʼaˬ daˇ-eu gʼaˇ duˬ ngaˬ neh toꞈ taˬ-euˬ yamˬ law-ahˇ, dawˇ coe ni ngaˇ yaˇ kʼaˬ daˇ ma.

³ Miˇ tsaˬ tahˬ kʼawˇ nyeh nyeh-ehˇ pyeuꞈ laˇ-awˇ, yaw dehꞈ kʼaˇ dehꞈ-eu jeˬ dawˬ tawˆ luꞈ yaw dzuˬ dzuˬ laˇ kʼawꞈ, miˇ tsaˬ dawˬ pehˬ duˬ puˇ-ahˇ ziꞈ dah ni ngaˇ bi jaˆ ma.

⁴ Maˬ tsaˬ maˬ dawˇ-eu tsawˇ haˬ deuˬ taˬ jahˇ gʼeh lehˇ ngaˇ ehˇ-awˇ,

⁵ kʼahˬ sehˇ jehˆ-eu deuˬ taˬ paˇ jehˆ lehˇ ngaˇ ehˇ ma.”

⁶ Yaˇ kʼaˬ daˇ-eu jeˬ nahˇ ma doˆ kʼehˬ ga kʼehˬ paw neh oe-euˬ maˬ ngeuˇ-ehˇ, laꞈ oˆ laꞈ taˆ pyawˬ-ahˇ neh oe-euˬ kʼawꞈ maˬ ngeuˇ-a.

⁷ Yaˇ kʼaˬ daˇ-euˬ gʼaˬ Miˬyehˇ pyeuꞈ-awˇ, tiˬ deuˬ-ahˇ nawˬ awˆ-awˇ, tiˬ deuˬ-ahˇ gʼeu tuˇ nehˬ-eu meh.

⁸ Sahˬpaˬ Miˬyehˇ-euˬ aˬ laꞈ-ahˇ kʼmˬ maˬ tiˬ kʼmˬ ciˬ luꞈ-awˇ, aˬ yawꞈ-euˬ nui ma pehˇ-eu jeˬ pyeuꞈ-eu taˆ dui dui-eu aˬ gaꞈ dzaˇ uiˇ shehˆ ahˇ taˬ-euˬ meh. Aˬ gaꞈ dzaˇ uiˇ kʼoeˇ aˬ yawꞈ shehˆ kʼaˇ ngeh, haiˬ-eu tsawˇ haˬ dawˬ tawˆ luꞈ dawˇ-eu meh. Tiˬ dzaˆ-iˬ maˬ bi dzeˇ ni dawˇ jiˇ-eu meh.

⁹ Ehˇ kʼawꞈ, Yaˬkoˆ-euˬ Miˬyehˇ gaˇ kawˆ maˬ naˬ leˇ ni ngaˇ ja-awˇ, maˬ tsehˆ leˇ ni caˇ-awˇ ja ceuˬ ma.

¹⁰ Maˬ tsaˬ maˬ dawˇ-eu tsawˇ haˬ deuˬ-euˬ baoˬ-ahˇ aˬ yawꞈ ngawˬ kʼehꞈ dzeh-awˇ, yaw tsaˬ yaw dawˇ tsawˇ haˬ deuˬ baoˬ huiˬ laˇ ni aˬ yawꞈ caw ba tehꞈ-a.