Jaceuq 72 - Akha

Sahˬ paˬ gʼaˇ duˬ shaˇ-eu guiˬ lahˬ shaˇ dawˬ

(Sawˇlaˬmoˬ-euˬ caˇ dawˬ)

¹ Miˬyehˇ-oˇ, nawˬ-euˬ yaw tsaˬ yaw dawˇ jeˬ laꞈ kʼoeˇ yaˇ kʼaˬ daˇ nya ni, sahˬ paˬ-ahˇ mehˬ nehˬ tsoˆ nehˬ-awˬ. Nawˬ-euˬ yaw tsaˬ yaw dawˇ jeˬ aˬ yawꞈ-ahˇ biꞈ nehˬ-awˬ.

² Nawˬ-euˬ tsawˇ haˬ deuˬ-ahˇ dawˇ coe ni aˬ yawꞈ yaˇ kʼaˬ daˇ-awˇ, shaˬ zaˬ zahˬ zaˬ kʼoeˇ taˆ yaw tsaˬ yaw dawˇ dawˇ-ehˇ uˆ lahˇ nya laˇ luꞈ-uˇ.

³ Miˇ kʼahˬ laꞈ kʼoeˇ baw le za le-awˇ, yaw tsaˬ yaw dawˇ jeˬ-ahˇ siˬ nya luꞈ-uˇ.

⁴ Sahˬ paˬ gʼaˬ shaˬ zaˬ zahˬ zaˬ deuˬ-ahˇ dawˇ coe ni yaˇ kʼaˬ daˇ luꞈ-uˇ. Iˇ shaˬ zaˬ deuˬ-ahˇ aˬ yawꞈ caw ba nehˬ-awˇ, aˬ yawꞈ maꞈ kʼoeˇ taˆ nawˬ dzaˬ kʼaˆ dzaˬ-eu deuˬ-ahˇ, aˬ yawꞈ kʼehˬ luꞈ-uˇ.

⁵ Nahˇ ma bya-awˇ ba la kʼaˇ tsehˬ kʼoeˇ keuˆ ni, nawˬ-euˬ tsawˇ haˬ deuˬ nawˬ-ahˇ uˬ duˬ tahˬ luꞈ-uˇ. Aˬ kaˇ kaˇ ziˇ keuˆ ni nawˬ-ahˇ uˬ duˬ tahˬ luꞈ-uˇ. 1

⁶ Sahˬ paˬ gʼaˬ deh ga-ahˇ yehˇ le-eu uˬ yehˇ-ahˇ duˇ luꞈ-uˇ. Miˇ tsaˬ-ahˇ yehˇ shehˬ le-eu uˬ yehˇ-ahˇ duˇ luꞈ-uˇ.

⁷ Aˬ yawꞈ-euˬ ziˇ laꞈ kʼoeˇ yaw tsaˬ yaw dawˇ jeˬ jaˆ-awˇ, ba la kʼaˇ tsehˬ kʼoeˇ keuˆ ni baw le za le luꞈ-uˇ.

⁸ Aˬ yawꞈ-euˬ miˇ kʼahˬ iˬ ma laˆ shaˆ kʼoeˇ dzeˇ heu dzeˇ tuˆ-awˇ, Uˇpaˬlaˇ lawˇ baˬ-ahˇ neh mˬ dzeˇ miˇ dzeˇ keuˆ ni jeˇ luꞈ-uˇ.

⁹ Kʼaˇ shuiꞈ deh-ahˇ jawˇ-eu tsawˇ jeuˬ deuˬ aˬ yawꞈ mehˬ shi awˆ byaˆ-awˇ, aˬ yawꞈ-ahˇ muiˇ-eu deuˬ kʼaˬ lehˇ lehˇ-iˇ luꞈ-uˇ.

¹⁰ Saˬbeˬ sahˬ paˬ hawˇ-eu iˇ jaw lahˇ deuˬ-ahˇ jawˇ-eu sahˬ paˬ deuˬ, aˬ yawꞈ-ahˇ laꞈ sawˬ ya biꞈ ha laˇ tehꞈ-a. Sheˬba sahˬ paˬ hawˇ-eu Seˬbaˬ sahˬ paˬ aˬ nyaꞈ aˬ yawꞈ-ahˇ damˬ nehˬ laˇ tehꞈ-a.

¹¹ Sahˬ paˬ dawˬ tawˆ luꞈ aˬ yawꞈ mehˬ shi ya awˆ byaˆ-awˇ, tsawˇ jeuˬ dawˬ tawˆ luꞈ aˬ yawꞈ zaˬ kʼaˆ ya geuꞈ tehꞈ-a.

¹² Aˬ yawꞈ-ahˇ kuˇ-eu shaˬ zaˬ zahˬ zaˬ deuˬ hawˇ-eu, laꞈ jeuˬ shaˇ kʼaˇ maˬ za-eu iˇ shaˬ zaˬ deuˬ-ahˇ, aˬ yawꞈ ka kʼoꞈ nehˬ-eu meh.

¹³ Gʼaˬ baˬ-eu deuˬ hawˇ-eu shaˬ-eu deuˬ-ahˇ aˬ yawꞈ gʼawˬ shaˬ gaˬ-awˇ, maˬ jaˆ-eu tsawˇ haˬ deuˬ-ahˇ maˬ bi shiˇ ni ka kʼoꞈ nehˬ-eu meh.

¹⁴ Aˬ cawˬ kʼehˬ nehˬ kʼaˆ nehˬ-awˇ yehˬ bawˬ-ehˇ bi jahˇ-eu laꞈ kʼoeˇ, aˬ yawꞈ maꞈ-ahˇ aˬ yawꞈ ka kʼoꞈ-eu meh. Aˬ yawꞈ maꞈ-euˬ saꞈ laˇ-ahˇ aˬ yawꞈ taˬ huiˬ-eu meh.

¹⁵ Sahˬ paˬ ziˇ baw ziˇ za luꞈ-uˇ. Sheˬba miˇ kʼahˬ-ahˇ jaˆ-eu shuiˇ deuˬ aˬ yawꞈ-ahˇ damˬ nehˬ luꞈ-uˇ. Aˬ yawꞈ gʼaˇ duˬ aˬ cawˬ aˬ myah luꞈ guiˬ lahˬ shaˇ nehˬ luꞈ-uˇ. Miˬyehˇ-euˬ guiˬ lahˬ yaw dzahˇ aˬ yawꞈ kʼoeˇ taˆ maˬ tsehˆ leˇ ni jaˆ luꞈ-uˇ.

¹⁶ Miˇ kʼahˬ laꞈ kʼoeˇ cehˇ za dui dui le luꞈ-uˇ. Gawˬ duˇ deuˬ-ahˇ cehˇ dehꞈ byah jiˇ-awˇ, Leˬbaˬnoˬ miˇ kʼahˬ loꞈ-ehˇ maˇ le luꞈ-uˇ. Deh ga-ahˇ yaˇ moꞈ dehꞈ gʼoeˬ taˬ-euˬ loꞈ-ehˇ, meuˬ deuˬ laꞈ kʼoeˇ tsawˇ haˬ behˇ dui dui luꞈ-uˇ.

¹⁷ Sahˬ paˬ-euˬ tsawˇ myahˇ tiˬ jawˇ-iˬ maˬ byoˆ-iˇ ni, nahˇ ma kʼaˇ bya kʼoeˇ keuˆ ni aˬ yawꞈ tsawˇ myahˇ doˆ luꞈ-uˇ. Tsawˇ jeuˬ dawˬ tawˆ luꞈ aˬ yawꞈ-ahˇ ja ceuˬ luꞈ-uˇ. Aˬ yawꞈ maꞈ-ahˇ guiˬ lahˬ biꞈ laꞈ lehˇ Miˬyehˇ-ahˇ aˬ yawꞈ maꞈ shaˇ-awˇ, sahˬ paˬ nui saˇ oꞈ ni aˬ yawꞈ maꞈ nui ma keuˆ luꞈ-uˇ.

¹⁸ Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ. Aˬ yawꞈ tehꞈ-ehˇ zahˬ leˇ paˬ-ehˇ gʼeh-eu gaˇ heu deuˬ mˇ-eu meh.

¹⁹ Yaw shehꞈ kʼahˬ sehˇ huiˬ-eu aˬ yawꞈ-euˬ tsawˇ myahˇ-ahˇ, mˬ maˬ maˬ byaˆ zaˇ ziˇ ja ceuˬ-awˬ. Aˬ yawꞈ-euˬ yaw shehꞈ kʼahˬ sehˇ miˇ tsaˬ kʼoeˇ taˆ byah luꞈ-uˇ. Aˬmiˬ. Aˬmiˬ.

²⁰ Yeˬshehˇ-euˬ aˬ li Daˬbiˇ-euˬ guiˬ lahˬ shaˇ dawˬ heu gaˇ aˇ saˬ saˬ-eu meh.