Jaceuq 71 - Akha

Tsawˇ mawˬ tiˬ gʼaˬ-euˬ guiˬ lahˬ shaˇ dawˬ

¹ Sahˬpaˬ Miˬyehˇ-oˇ, nawˬ-ahˇ ngaˇ tahˬ shaˇ laˇ-euˬ ma. Ngaˬ-euˬ kʼoeˇ taˆ shaꞈ dawˇ-eu jeˬ taˬ bi keuˆ le laꞈ.

² Nawˇ yaw tsaˬ yaw dawˇ gʼaˬ pyeuꞈ-eu miˇ neh, ngaˬ-ahˇ ngehˬ gʼeh dah teˬ nehˬ laꞈ. Ngaˬ-euˬ shaˇ dawˬ-ahˇ naˇ haˬ-awˇ, ngaˬ-ahˇ ka kʼoꞈ nehˬ laꞈ.

³ Ngaˬ-euˬ gʼoe duˬ lo guˇ hawˇ-eu, guˆ-eu gaˆ-eu jeˬ-ahˇ kʼahˬ lahˇ kʼaˇ maˬ za-eu ziꞈ dah ni gʼeh-eu nymˇ nymˇ ma loꞈ-ehˇ, nawˇ ngaˬ-ahˇ haw piˇ nehˬ laꞈ.

⁴ Miˬyehˇ-oˇ, nui ma maˬ dawˇ-eu tsawˇ haˬ deuˬ hawˇ-eu, gʼawˬ shaˬ gaˬ-eu maˬ siˬ nya-eu haiˬ-eu tsawˇ haˬ deuˬ-euˬ laꞈ-ahˇ, ngaˬ-ahˇ ka kʼoꞈ nehˬ laꞈ.

⁵ Sahˬpaˬ Miˬyehˇ-oˇ, nawˬ-ahˇ ngaˇ noeˬ tmˬ-eu ma. Nyiˇ ngeh neh nawˬ-ahˇ ngaˇ gʼoe-euˬ ma.

⁶ Ngaˬ-euˬ tiˬ ziˇ nawˬ-ahˇ tehꞈ-ehˇ laꞈ jeuˬ shaˇ-euˬ ma. Dehꞈ le ngeh tiˬ nah neh ngaˬ-ahˇ nawˇ haw piˇ nehˬ laꞈ-euˬ meh. Nawˬ-ahˇ ngaˇ aˬ myah luꞈ ja ceuˬ ma.

⁷ Nawˇ ngaˬ-ahˇ yaw muiˬ paˬ-ehˇ ngehˬ gʼeh dah teˬ nehˬ laꞈ-euˬ miˇ neh, ngaˇ yaw dehꞈ dehꞈ-eu aˬ cawˬ dzaw geuꞈ duˬ pyeuꞈ-eu meh.

⁸ Nawˬ-ahˇ ngaˇ nah ga-ehˇ ja ceuˬ-awˇ, nawˬ-euˬ yaw shehꞈ kʼahˬ sehˇ gaˇ kawˆ ja gaˬ-euˬ ma.

⁹ Nymˬ-mˇ ngaˇ mawˬ laˇ-euˬ miˇ neh taˬ byehˇ dzeh nehˬ laꞈ. Ngaˇ gʼaˬ baˬ le-euˬ miˇ neh myaˆ haw maˬ cawˬ-ehˇ taˬ gʼeh nehˬ laꞈ.

¹⁰ Muiˇ-eu deuˬ ngaˬ-ahˇ sehꞈ mawꞈ-eu laꞈ kʼoeˇ, mehˬ bawˬ mˇ kʼoeˬ luꞈ meh.

¹¹ Aˬ yawꞈ maꞈ ngaˬ-euˬ gaˇ kawˆ heu loꞈ-ehˇ ja luꞈ meh. “Miˬyehˇ aˬ yawꞈ-ahˇ byehˇ dzeh-euˬ miˇ neh, aˬ dui maꞈ aˬ yawꞈ-ahˇ nyehꞈ-iˇ kaˇ beuˇ. Aˬ yawꞈ-ahˇ ngehˬ gʼeh-eu tiˬ gʼaˬ-iˬ maˬ paˇ jawˇ meh.”

¹² Miˬyehˇ-oˇ, gaˇ mahˇ kaˬ gaˇ taˬ jawˇ nehˬ laꞈ. Ngaˬ-euˬ Miˬyehˇ-oˇ, ngaˬ-ahˇ yaw kawˇ-ehˇ caw ba le-awˬ.

¹³ Ngaˬ-ahˇ laˆ coeˬ laˆ ciˆ le-eu tsawˇ haˬ deuˬ, laˆ luˬ laˆ seˇ nehˬ gaˇ ya daˬ luꞈ-uˇ. Ngaˬ-ahˇ laˆ tahˬ laˆ naˇ mawꞈ-eu deuˬ kʼoeˇ taˆ, shaꞈ dawˇ-eu jeˬ hawˇ-eu nui ma cawˆ-eu jeˬ keuˆ le luꞈ-uˇ.

¹⁴ Nawˬ-ahˇ ngaˇ aˬ myah luꞈ noeˬ tmˬ ma. Tiˬ nah taꞈ-ehˇ tiˬ nah nawˬ-ahˇ ngaˇ ja ceuˬ ma.

¹⁵ Nawˇ muiˬ-eu jeˬ gaˇ kawˆ ngaˇ ja ma. Nawˬ-euˬ ka kʼoꞈ-eu jeˬ gaˇ kawˆ-ahˇ ngaˇ maˬ siˬ maˬ mawˇ byah nya kʼawꞈ, gaˇ kawˆ kʼoeˇ nah ga-ehˇ ngaˇ ja ma.

¹⁶ Dawˬ tawˆ luꞈ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, nawˬ-euˬ baoˬ-ahˇ ngaˇ ja ceuˬ ma. Nawˇ muiˬ-eu jeˬ gaˇ kawˆ ngaˇ ja gaˬ ma. Nawˇ muiˬ-eu jaˬ-eu gaˇ kawˆ tehꞈ-ehˇ ngaˇ ja ma.

¹⁷ Nyiˇ ngeh neh nawˇ ngaˬ-ahˇ mehˬ nehˬ tsoˆ nehˬ laꞈ-awˇ, nawˬ neh mˇ-euˬ zahˬ leˇ paˬ-ehˇ gʼeh-eu gaˇ deuˬ-ahˇ, iˬ nah keuˆ ni ngaˇ ja luꞈ ma.

¹⁸ Nymˬ-mˇ ngaˇ mawˬ le-awˇ uˬ duˬ pyuˇ le-euˬ ma. Miˬyehˇ-oˇ, ngaˬ-ahˇ taˬ byehˇ dzeh nehˬ laꞈ. Nawˬ-euˬ baoˬ hawˇ-eu nawˬ-euˬ gʼaˬ gaˇ kawˆ, nahˬ ziˇ dawˬ tawˆ luꞈ-ahˇ ngaˇ dzawˇ nehˬ ngeh, ngaˬ nehˬ-ehˇ nawˇ jawˇ nehˬ laꞈ.

¹⁹ Miˬyehˇ-oˇ, nawˬ-euˬ yaw tsaˬ yaw dawˇ jeˬ mˬ-ahˇ keuˆ ni tuˆ-awˇ, huiˬ-eu gaˇ deuˬ nawˇ mˇ yaꞈ-euˬ meh. Nawˬ-ahˇ duˇ-eu tiˬ gʼaˬ-iˬ maˬ jawˇ-a.

²⁰ Ngaˬ-euˬ kʼoeˇ taˆ shaˬ zahˬ naˇ gawˇ nawˇ bi keuˆ le-euˬ meh. Ehˇ kʼawꞈ, nawˇ ngaˬ-ahˇ gʼaˬ paˇ bi kʼoꞈ laˇ-awˇ, shiˇ-eu miˇ kʼahˬ-ahˇ maˬ ya keuˆ ni ka kʼoꞈ nehˬ laꞈ tehꞈ-a.

²¹ Dzeuˇ laˇ ngeh naˆ maˬ tseˇ ciˬ huiˬ ciˬ mahˇ nehˬ laꞈ-eu laꞈ kʼoeˇ, nawˇ ngaˬ-ahˇ nui ma paˇ bi saˇ laˇ tehꞈ-a.

²² Ngaˇ nawˬ-ahˇ deuˇ-mˬ diˬ-awˇ ja ceuˬ ma. Ngaˬ-euˬ Miˬyehˇ-oˇ, nawˇ saˇ jaˇ ziꞈ gaˇ ngaˇ ja ceuˬ ma. Iˇsaˬleˬlaˆ-euˬ Muiˬ-eu shawˇ-eu Gʼaˬ pyeuꞈ-eu nawˬ-ahˇ, deuˇ-mˬ diˬ-awˇ ja ceuˬ-eu caˇ dawˬ caˇ ma.

²³ Nawˬ-ahˇ ngaˇ caˇ-awˇ ja ceuˬ ngeh, ngaˇ laˬ kʼaˬ cehˇ-awˇ guˇ ma. Nawˇ ngaˬ-ahˇ ka kʼoꞈ nehˬ laꞈ-eu miˇ neh, nui ma gʼawˇ mawˇ dawˬ tawˆ luꞈ caˇ-awˇ ja ceuˬ ma.

²⁴ Ngaˬ-ahˇ laˆ coeˬ laˆ ciˆ mawꞈ-eu deuˬ kʼoeˇ taˆ, shaꞈ dawˇ-eu jeˬ bi keuˆ le-euˬ miˇ neh, nawˬ-euˬ yaw tsaˬ yaw dawˇ jeˬ gaˇ kawˆ, nah ga-ehˇ ngaˇ ja ceuˬ ma.