Jaceuq 68 - Akha

Gʼaˬ leˇ-eu caˇ dawˬ

(Daˬbiˇ-euˬ caˇ dawˬ)

¹ Miˬyehˇ tsawˬ tuˇ laˇ-awˇ, aˬ yawꞈ-ahˇ muiˇ-eu deuˬ-ahˇ teh byaˆ-eu meh. Aˬ yawꞈ-ahˇ bye-eu tsawˇ haˬ deuˬ aˬ yawꞈ mehˬ shi cehˆ byaˆ jiˇ-eu meh.

² Uˬ kʼoeˬ-ahˇ jaˬ lehˇ baw byoˆ-eu loꞈ-ehˇ, aˬ yawꞈ maꞈ-ahˇ aˬ yawꞈ teh byoˆ-eu meh. Miˬ dzaˬ mehˬ shi byaˬ shahˬ guiˇ-iˇ-eu loꞈ-ehˇ, Miˬyehˇ-euˬ mehˬ shi haiˬ-eu tsawˇ haˬ deuˬ cawˆ-iˇ-eu meh.

³ Ehˇ kʼawꞈ yaw tsaˬ yaw dawˇ tsawˇ haˬ deuˬ-aˬ, aˬ yawꞈ mehˬ shi laˬ kʼaˬ ya cehˇ-eu meh. Aˬ yawꞈ maꞈ laˬ kʼaˬ cehˇ-awˇ guˇ-eu meh.

⁴ Miˬyehˇ-ahˇ caˇ-awˇ ja ceuˬ-awˬ. Aˬ yawꞈ-euˬ tsawˇ myahˇ-ahˇ caˇ-awˇ ja ceuˬ-awˬ. Mˬ dmˇ dziˬ-awˇ cah luꞈ-eu gʼaˬ-ahˇ, caˇ dawˬ caˇ-awˇ ciˬ huiˬ ciˬ mahˇ nehˬ-awˬ. Aˬ yawꞈ-euˬ tsawˇ myahˇ Sahˬpaˬ Miˬyehˇ meh. Aˬ yawꞈ mehˬ shi laˬ kʼaˬ cehˇ-awˬ.

⁵ Aˬ yawꞈ-euˬ muiˬ-eu shawˇ-eu Uˬ duˬ tahˬ nymˇ nymˇ ma laꞈ kʼoeˇ jawˇ luꞈ-eu Miˬyehˇ-aˬ, muˇ coe aˬ nmˇ deuˬ-ahˇ ngehˬ gʼeh-awˇ, miˬ coeˬ miˬ ma deuˬ-ahˇ haw piˇ-eu meh.

⁶ Nymˇ maˬ jaˆ-eu deuˬ-ahˇ nymˇ jiˇ bi baw laˇ-awˇ, tawˬ-ahˇ uˇ-eu deuˬ-ahˇ laˬ kʼaˬ cehˇ-eu jawˇ duˬ-ahˇ sheuˬ doˆ nehˬ-eu meh. Ehˇ kʼawꞈ, aˬ yawꞈ-ahˇ puiˬ-eu tsawˇ haˬ deuˬ-aˬ, bawˇ tsahˬ bawˇ dahˇ-ahˇ ya jawˇ-eu meh.

⁷ Miˬyehˇ-oˇ, nawˬ-euˬ tsawˇ haˬ deuˬ-ahˇ nawˇ sheuˬ gʼeh-awˇ, kʼaˇ shuiꞈ deh-ahˇ nawˇ cah luꞈ ngeh,

⁸ Miˇ tsaˬ tahˬ kʼawˇ nyeh laˇ-awˇ, mˬ kʼoeˇ taˆ uˬ yehˇ shehˆ dzeh leꞈ-euˬ meh. Siˇnaˆ gawˬ jawˬ-euˬ Miˬyehˇ oe luꞈ-eu miˇ neh, Iˇsaˬleˬlaˆ-euˬ Miˬyehˇ oe luꞈ-eu miˇ neh, kʼoeˇ loꞈ-ehˇ pyeuꞈ laˇ-euˬ meh.

⁹ Nawˇ uˬ yehˇ yehˇ ma bi ma le-awˇ, koˆ kaˆ ni gʼeh-eu nawˬ-euˬ miˇ tsaˬ bi jmˬ laˇ-eu meh.

¹⁰ Nawˬ-euˬ tsawˇ haˬ deuˬ kʼoeˇ gaˇ jawˇ-awˇ, shaˬ zaˬ zahˬ zaˬ deuˬ-ahˇ gʼawˬ shaˬ gaˬ nehˬ-eu laꞈ kʼoeˇ, loˬ-eu jeˬ biꞈ nehˬ-eu meh.

¹¹ Sahˬpaˬ Miˬyehˇ dawˬ biꞈ gʼeh leꞈ-awˇ, zaˬ miˬ zaˬ deuˬ dawˬ kʼoeˇ ja gaˬ-eu meh.

¹² Sahˬ paˬ deuˬ hawˇ-eu aˬ yawꞈ maꞈ-euˬ guiˇ maꞈ deuˬ cehˆ byaˆ luꞈ meh lehˇ ja gaˬ-eu meh. Iˇ kahˇ jawˇ-eu zaˬ miˬ zaˬ deuˬ, guiˇ deuˆ za-euˬ myawˬ gahˬ biˇ geuꞈ-eu meh.

¹³ Aˬ dahˇ guiˇ nyiˬ ni shuiˇ yaw taˬ-awˇ, gʼawˇ mawˇ pyuˇ yaw taˬ-euˬ kʼaˬ kʼoeˬ mawˇ kawˇ deuˬ aˬ yawꞈ maꞈ biˇ geuꞈ-eu meh. (Aˬ jeˬ miˇ neh naw maꞈ tiˬ paˆ na deuˬ, aˬ cawˬ guiˇ deuˆ-eu tehˬ gʼa luꞈ ngeh, yawˇ kuˆ laꞈ kʼoeˇ jawˇ byoˆ yaꞈ te.)

¹⁴ Zaˬlaˬmoˬ gawˬ jawˬ-ahˇ jawˇ-eu sahˬ paˬ deuˬ-ahˇ, Baoˬ huiˬ-eu Miˬyehˇ teh byaˆ nehˬ ngeh, kʼoeˇ gaˇ neh bi ga le-euˬ meh.

¹⁵ Gawˬ jawˬ pu cu gʼawˬ mya ni jaˆ-eu, Baˬshaˬ gawˬ jawˬ aˇ naˆ ni baoˬ huiˬ-eu nga.

¹⁶ Baoˬ huiˬ-eu nawˬ-euˬ gawˬ jawˬ pu cu deuˬ-ahˇ neh, Miˬyehˇ jawˇ-eu lehˇ tseˇ doˆ-euˬ gawˬ jawˬ-ahˇ, aˬ jeˬ miˇ neh nawˇ haw teˬ te. Mˬ maˬ maˬ byaˆ zaˇ ziˇ Sahˬpaˬ Miˬyehˇ kʼoeˇ gaˇ jawˇ tehꞈ-a.

¹⁷ Mahˬ laˆ lawˬ aˇ heˇ aˇ muiˇ laˇ teh-awˇ, Siˇnaˆ gawˬ jawˬ-ahˇ neh muiˬ-eu shawˇ-eu jawˇ duˬ-ahˇ, Sahˬpaˬ Miˬyehˇ oe tehꞈ-a.

¹⁸ Tsawˇ haˬ gʼawˬ mya ni aˬ yawꞈ nyehꞈ gʼeh-awˇ, gawˬ jawˬ yaw goˇ-ahˇ daˆ leˇ tehꞈ-a. Aˬ yawꞈ-ahˇ puiˬ-eu tsawˇ haˬ deuˬ-ahˇ keuˆ ni, aˬ yawꞈ-ahˇ laꞈ sawˬ biꞈ laˇ-awˇ, mˬ maˬ maˬ byaˆ zaˇ ziˇ Sahˬpaˬ Miˬyehˇ kʼoeˇ gaˇ jawˇ tehꞈ-a.

¹⁹ Aˬ yawꞈ nah yawꞈ aˬ dui-euˬ kʼaˆ behˆ caw pi nehˬ laꞈ-eu gʼaˬ pyeuꞈ-eu, Sahˬpaˬ Miˬyehˇ-ahˇ ja ceuˬ-awˬ. Aˬ yawꞈ-aˬ, aˬ dui-ahˇ ka kʼoꞈ-eu Miˬyehˇ meh.

²⁰ Aˬ dui-euˬ Miˬyehˇ-aˬ, aˬ dui-ahˇ ka kʼoꞈ-eu Miˬyehˇ pyeuꞈ-awˇ, shiˇ-eu jeˬ keuˆ le ngeh aˬ dui-ahˇ sheuˬ dzeuˇ nehˬ laꞈ-eu meh.

²¹ Iˬ baˇ mˇ mˇ-ehˇ kʼaˬ gʼa luꞈ-eu muiˇ-eu deuˬ-euˬ uˬ duˬ-ahˇ, Miˬyehˇ kʼoˆ paˆ nehˬ tehꞈ-a.

²² Sahˬpaˬ Miˬyehˇ heu loꞈ-ehˇ ehˇ taˬ-euˬ meh. Nawˬ-ahˇ muiˇ-eu deuˬ-ahˇ Baˬshaˬ meuˬ-ahˇ neh ngaˇ sheuˬ kʼoꞈ laꞈ-awˇ, iˬ ma laˆ shaˆ dawˬ dah neh gʼeu doˆ laꞈ ma.

²³ Kʼoeˇ ngeh, aˬ yawꞈ maꞈ-euˬ shiˬ laꞈ kʼoeˇ, nawˬ-euˬ aˬ kuiˇ cawˬ puꞈ-awˇ ya cah-awˇ, nawˬ-euˬ aˬ kuiˬ deuˬ shiˬ maˬ myeuꞈ jiˇ coeˇ-aˇ.

²⁴ Miˬyehˇ-oˇ, nawˇ guiˇ deuˆ gʼaˬ-awˇ cah luꞈ gaˇ, yawˬ gʼaˬ na luꞈ mawˇ luꞈ meh. Ngaˬ-euˬ sahˬ paˬ pyeuꞈ-eu Miˬyehˇ-aˬ, aˬ yawꞈ-euˬ muiˬ-eu shawˇ-eu jawˇ duˬ-ahˇ iˇ luꞈ meh.

²⁵ Caˇ dawˬ caˇ-eu deuˬ mehˬ hu paw cah-awˇ, bawˬ law baw, deuˇ-mˬ diˬ-eu deuˬ mehˬ nah paw cah-awˇ, cehˇ lehˇ ciˆ-eu zaˬ miˬ aˬ buˇ deuˬ gʼahˇ ceh cah luꞈ meh.

²⁶ Aˬ yawꞈ-euˬ tsawˇ haˬ deuˬ uiˬ leˇ-eu laꞈ kʼoeˇ, Miˬyehˇ-ahˇ ja ceuˬ-awˬ. Yaˬkoˆ-euˬ zaˬ deuˬ uˆ deuˬ dawˬ tawˆ luꞈ, Sahˬpaˬ Miˬyehˇ-ahˇ ja ceuˬ-awˬ.

²⁷ Aˬ cawˬ naˆ maˬ tseˇ nyiˇ teˬ-eu Beˬyaˬmiˬ tsawˇ jeuˬ aˬ cawˬ jeˬ hu doˆ laˇ-awˬ. Kʼoeˇ naˇ, Yuˇdaˆ tsawˇ jeuˬ aˬ yuiꞈ aˬ tsu deuˬ, aˇ muˇ muˇ muˇ-ehˇ doˆ laˇ-awˬ. Kʼoeˇ naˇ, Zeˬbuˬloˬ tsawˇ jeuˬ hawˇ-eu Naˬtaˬliˇ tsawˇ jeuˬ-euˬ aˬ yuiꞈ aˬ tsu deuˬ doˆ laˇ-awˬ.

²⁸ Miˬyehˇ-oˇ, nawˬ-euˬ baoˬ pah mehˬ-awˬ. Nga maꞈ-ahˇ ka kʼoꞈ-euˬ nawˬ-euˬ baoˬ pah mehˬ-awˬ.

²⁹ Miˇ kʼahˬ sahˬ paˬ deuˬ nawˬ-ahˇ laꞈ sawˬ biꞈ laˇ-euˬ jawˇ duˬ pyeuꞈ-eu, Yeˬluˇsaˬlehˬ meuˬ-ahˇ jaˆ-eu Uˬ duˬ tahˬ nymˇ nymˇ ma laꞈ kʼoeˇ pah mehˬ-awˬ.

³⁰ Aˇ toꞈ yaˇ-ahˇ uˇ-eu haiˬ-eu bawˇ tsahˬ jeˬ zaˬ-ahˇ duˇ-eu, Iˇjiˇtuˆ miˇ kʼahˬ-ahˇ nawˇ sawˇ dzeh-awˬ. Mawˇ neˇ mawˇ zaˬ sheuˬ-awˇ cah-eu mawˇ gaw deuˬ-ahˇ duˇ-eu tsawˇ jeuˬ kʼoeˇ deuˬ-ahˇ kʼawꞈ nawˇ sawˇ dzeh-awˬ. Aˬ cawˬ tsawˇ jeuˬ kʼoeˇ taˆ kawˬ taꞈ dzaˬ mawꞈ-eu deuˬ-ahˇ nawˇ nawˬ pahˬ-awˇ, guiˇ deuˆ mawꞈ-eu nui ma ahˇ-eu deuˬ-ahˇ teh byaˆ nehˬ-awˬ.

³¹ Iˇjiˇtuˆ tsawˇ jeuˬ miˇ kʼahˬ-euˬ dah zaˇ tsawˇ haˬ pyehˬ gʼeh laꞈ-awˇ, Suˬdaˬ tsawˇ jeuˬ aˬ laꞈ cawˬ ja-awˇ Miˬyehˇ-ahˇ guiˬ lahˬ shaˇ tehꞈ-a.

³² Miˇ kʼahˬ tsawˇ jeuˬ dawˬ tawˆ luꞈ Miˬyehˇ-ahˇ caˇ-awˇ ja ceuˬ-awˬ. Sahˬpaˬ Miˬyehˇ-ahˇ ja ceuˬ-eu caˇ dawˬ caˇ-awˬ.

³³ Aˇ hu ba neh mˬ kʼoeˇ taˆ cah luꞈ-eu gʼaˬ-ahˇ, ja ceuˬ-eu caˇ dawˬ caˇ-awˬ. Mˬ jeˬ jeˬ gaˇ duˇ-eu aˬ yawꞈ-euˬ teˇ saˇ-ahˇ, yawˬ gʼaˬ na luꞈ naˇ haˬ geuꞈ-awˬ.

³⁴ Miˬyehˇ-euˬ baoˬ gaˇ kawˆ ja gaˬ-awˬ. Aˬ yawꞈ-euˬ yaw shehꞈ kʼahˬ sehˇ Iˇsaˬleˬlaˆ miˇ kʼahˬ kʼoeˇ taˆ jaˆ-awˇ, aˬ yawꞈ-euˬ baoˬ mˬ kʼoeˇ taˆ jaˆ-eu meh.

³⁵ Aˬ yawꞈ-euˬ muiˬ-eu shawˇ-eu jawˇ duˬ-ahˇ neh doˆ le-eu Miˬyehˇ, aˇ naˆ ni zahˬ leˇ paˬ-ehˇ gʼeh-eu nga. Iˇsaˬleˬlaˆ-euˬ Miˬyehˇ aˇ naˆ ni zahˬ leˇ paˬ-ehˇ gʼeh-eu nga. Aˬ yawꞈ-euˬ tsawˇ jeuˬ-ahˇ, gʼaˬ hawˇ-eu baoˬ aˬ yawꞈ biꞈ nehˬ-euˬ meh. Miˬyehˇ-ahˇ ja ceuˬ-awˬ.