Jaceuq 66 - Akha

Guiˬ lahˬ-ahˇ noeˬ keuˆ-awˇ ja ceuˬ-eu caˇ dawˬ

¹ Tsawˇ haˬ dawˬ tawˆ luꞈ laˬ kʼaˬ cehˇ-awˇ guˇ-eu laꞈ kʼoeˇ, Miˬyehˇ-ahˇ ja ceuˬ-awˬ.

² Aˬ yawꞈ-euˬ tsawˇ myahˇ yaw shehꞈ kʼahˬ sehˇ huiˬ-eu gaˇ kawˆ caˇ-awˬ. Aˬ yawꞈ-euˬ yaw shehꞈ kʼahˬ sehˇ-ahˇ ja ceuˬ-awˬ.

³ Miˬyehˇ-ahˇ heu loꞈ-ehˇ ehˇ nehˬ-awˬ. Nawˬ neh mˇ-euˬ gaˇ deuˬ aˇ naˆ ni zahˬ leˇ paˬ-ehˇ gʼeh-eu nga. Nawˬ-euˬ baoˬ huiˬ dui mahˇ dui dui-eu miˇ neh, nawˬ-ahˇ muiˇ-eu deuˬ guˆ-eu laꞈ kʼoeˇ, nawˬ-euˬ mehˬ shi awˆ byaˆ-eu meh.

⁴ Miˇ tsaˬ zaˬ yawˬ gʼaˬ na luꞈ nawˬ-ahˇ ja ceuˬ-eu meh. Nawˬ-ahˇ aˬ yawꞈ maꞈ caˇ-awˇ ja ceuˬ-eu meh. Nawˬ-euˬ tsawˇ myahˇ-ahˇ aˬ yawꞈ maꞈ caˇ-awˇ ja ceuˬ-eu meh lehˇ ehˇ nehˬ-awˬ.

⁵ Miˬyehˇ neh mˇ taˬ-euˬ gaˇ-ahˇ haw laˇ-awˬ. Tsawˇ haˬ zaˬ gʼaˇ duˬ aˬ yawꞈ neh mˇ taˬ-euˬ huiˬ-eu gaˇ-ahˇ haw laˇ-awˬ.

⁶ Iˬ ma laˆ shaˆ-ahˇ gui coˇ ni gʼeh-eu miˇ tsaˬ bi pyeuꞈ-iˇ-awˇ, aˬ dui-euˬ aˬ poeˬ aˬ bawˇ deuˬ lawˇ baˬ baˬ ma-ahˇ aˬ kuiˇ neh tsehˆ-euˬ meh. Aˬ yawꞈ neh mˇ-euˬ gaˇ baˬ da neh, kʼoeˇ gaˇ aˬ dui laˬ kʼaˬ cehˇ-euˬ ma.

⁷ Aˬ yawꞈ-euˬ baoˬ-ahˇ gʼoe-awˇ mˬ maˬ maˬ byaˆ zaˇ ziˇ uˆ lahˇ-eu laꞈ kʼoeˇ, tsawˇ jeuˬ dawˬ tawˆ luꞈ-ahˇ myaˆ nuiˆ haw luꞈ-awˇ, tsawˇ haˬ tiˬ gʼaˬ-iˬ aˬ yawꞈ-ahˇ maˬ bi puiˬ-a.

⁸ Tsawˇ jeuˬ dawˬ tawˆ luꞈ nga maꞈ-euˬ Miˬyehˇ-ahˇ ja ceuˬ-awˇ, ja ceuˬ-eu teˇ saˇ bi gaˬ leˇ-awˬ.

⁹ Aˬ dui maꞈ-ahˇ aˬ yawꞈ bi dehꞈ laꞈ-awˇ, maˬ bi coˬ-iˇ laꞈ-a.

¹⁰ Miˬyehˇ-oˇ, nga maꞈ-ahˇ nawˇ lawˬ haw-euˬ meh. Pyuˇ-ahˇ miˬ dzaˬ neh lawˬ haw-eu loꞈ-ehˇ lawˬ haw nehˬ laꞈ-euˬ meh.

¹¹ Nga maꞈ-ahˇ lahˇ ju kʼmˇ taˬ-euˬ gaˇ bi paꞈ leˇ-awˇ, kʼaˆ behˆ yaw kah ciꞈ pi nehˬ laꞈ-euˬ meh.

¹² Muiˇ-eu deuˬ neh nga maꞈ-ahˇ mahˬ dziˬ bi dziˬ-awˇ, miˬ dzaˬ hawˇ-eu iˇ jeuˬ laꞈ kʼoeˇ bi cah tsehˆ laꞈ-euˬ meh. Ehˇ kʼawꞈ nui saˇ oꞈ-eu miˇ kʼahˬ laꞈ kʼoeˇ, nymˬ-mˇ nawˇ nga maꞈ-ahˇ sheuˬ keuˆ nehˬ laꞈ-euˬ meh.

¹³ Miˬ dzaˬ-ahˇ dzah puiˆ-awˇ lawˇ-eu jeˬ, nawˬ-euˬ nymˇ-ahˇ ngaˇ yuˇ laꞈ-awˇ, ngaˬ neh saˇ jaˇ dzaˬ taˬ-euˬ loꞈ-ehˇ lawˇ nehˬ ma.

¹⁴ Ngaˇ ya shaˬ ya zahˬ ngeh ehˇ dzeuˇ taˬ-euˬ loꞈ-ehˇ, nawˬ-ahˇ biꞈ paˬ-ehˇ jaˆ-eu jeˬ ngaˇ biꞈ ma.

¹⁵ Lawˇ duˬ kʼoeˇ taˆ dzah puiˆ-awˇ bi lawˇ-eu yawˇ, nawˬ-ahˇ ngaˇ damˬ nehˬ ma. Mawˇ neˇ hawˇ-eu ciꞈ myehꞈ ngaˇ lawˇ-awˇ, mˬ kʼoeˇ taˆ uˬ kʼoeˬ bi le keuˆ ma.

¹⁶ Miˬyehˇ-ahˇ taˬ huiˬ-eu tsawˇ haˬ dawˬ tawˆ luꞈ naˇ haˬ laˇ-awˬ. Aˬ yawꞈ neh ngaˬ-euˬ gʼaˇ duˬ mˇ nehˬ laꞈ-eu jeˬ naw maꞈ-ahˇ ngaˇ ja mehˬ ma.

¹⁷ Aˬ yawꞈ-ahˇ ngaˇ ngoeˇ-awˇ tahˬ shaˇ haw-euˬ ma. Aˬ yawꞈ-ahˇ ngaˇ caˇ-awˇ ja ceuˬ haw-euˬ ma.

¹⁸ Ngaˬ-euˬ nui ma laꞈ kʼoeˇ iˬ baˇ-ahˇ gaˬ law nmˇ-aˬ, ngaˬ-euˬ dawˬ-ahˇ Sahˬpaˬ Miˬyehˇ maˬ naˇ haˬ-aˇ.

¹⁹ Ehˇ kʼawꞈ, ngaˬ-euˬ dawˬ Miˬyehˇ-ahˇ gaˬ leˇ-awˇ, ngaˬ-euˬ shaˇ dawˬ-ahˇ aˬ yawꞈ naˇ haˬ nehˬ laꞈ-euˬ meh.

²⁰ Miˬyehˇ-ahˇ ngaˇ ja ceuˬ ma. Aˬ jeˬ miˇ neh ehˇ naˇ ngaˬ-euˬ shaˇ dawˬ-ahˇ aˬ yawꞈ maˬ byehˇ dzeh-eu uˬ taꞈ, ngaˬ-ahˇ aˬ yawꞈ gaˬ-eu maˬ tsehˆ leˇ-a.