Jaceuq 65 - Akha

Guiˬ lahˬ ahˇ noeˬ keuˆ-awˇ ja ceuˬ-eu

(Daˬbiˇ-euˬ caˇ dawˬ)

¹ Miˬyehˇ-oˇ, Ziˇoˬ meuˬ laꞈ kʼoeˇ nga maꞈ nawˬ-ahˇ ja ceuˬ-awˇ, nawˬ-ahˇ saˇ jaˇ ziꞈ-eu tsaˬ dui dui meh.

² Aˬ jeˬ miˇ neh ehˇ naˇ, nga maꞈ-euˬ shaˇ dawˬ-ahˇ nawˇ naˇ haˬ nehˬ laꞈ-eu meh. Miˇ tsaˬ zaˬ dawˬ tawˆ luꞈ nawˇ jawˇ gaˇ ya laˇ tehꞈ-a.

³ Yawˬ ha-euˬ iˬ baˇ gaˇ kawˆ-ahˇ taꞈ leˇ-awˇ ya laˇ tehꞈ-a. Nga maꞈ-euˬ iˬ baˇ nga maꞈ-ahˇ gʼaˬ leˇ taˬ-euˬ kʼawꞈ, nawˇ iˬ baˇ pyehˬ nehˬ laꞈ-euˬ meh.

⁴ Nawˬ-euˬ muiˬ-eu shawˇ-eu jawˇ duˬ-ahˇ bi jawˇ-euˬ, nawˬ neh tseˇ doˆ-euˬ tsawˇ haˬ kʼoeˇ deuˬ, laˬ kʼaˬ cehˇ luꞈ-uˇ. Nawˬ-euˬ nymˇ-euˬ muiˬ-eu jaˬ-eu jeˬ hawˇ-eu, muiˬ-eu shawˇ-eu nawˬ-euˬ Uˬ duˬ tahˬ nymˇ nymˇ ma-euˬ guiˬ lahˬ yaw dzahˇ-ahˇ, nga maꞈ nui kʼahˇ shiˇ-eu ma.

⁵ Gʼaˬ leˇ-eu jeˬ biꞈ laꞈ-eu laꞈ kʼoeˇ, nga maꞈ-euˬ shaˇ dawˬ-ahˇ nawˇ naˇ haˬ nehˬ laꞈ-awˇ, nga maꞈ-ahˇ ka kʼoꞈ nehˬ laꞈ-eu laꞈ kʼoeˇ, zahˬ leˇ paˬ-ehˇ gʼeh-eu jeˬ nawˇ mˇ-euˬ meh. Mˬ dzeˇ miˇ dzeˇ keuˆ ni jawˇ-eu tsawˇ haˬ deuˬ hawˇ-eu, iˬ ma laˆ shaˆ nui baˬ-ahˇ jawˇ-eu tsawˇ haˬ deuˬ nawˬ-ahˇ gʼoe-eu meh.

⁶ Nawˬ-euˬ gʼaˬ neh gawˬ jawˬ deuˬ-ahˇ ciˬ tsaˬ taˬ-eu laꞈ kʼoeˇ, nawˬ-euˬ baoˬ bi mawˇ-euˬ meh.

⁷ Iˬ ma laˆ shaˆ iˇ cuꞈ mahˇ-eu teˇ saˇ hawˇ-eu, iˇ luˆ dzeh-eu teˇ saˇ nawˇ bi naˬ leˇ nya-awˇ, Miˇ kʼahˬ tsawˇ jeuˬ luiˬ gʼa-awˇ guˇ-eu teˇ saˇ-ahˇ, ciˬ cuˇ ni nawˇ bi pyeuꞈ-iˇ nya-eu meh.

⁸ Nawˬ neh mˇ-euˬ huiˬ-eu gaˇ deuˬ-ahˇ, miˇ kʼahˬ dawˬ tawˆ luꞈ zahˬ leˇ-eu meh. Miˇ tsaˬ tahˬ kʼawˇ mˬ dzeˇ miˇ dzeˇ keuˆ ni, nawˬ neh mˇ-euˬ gaˇ-ahˇ laˬ kʼaˬ cehˇ-awˇ guˇ-eu meh.

⁹ Miˇ tsaˬ-ahˇ nawˇ bo saˆ luꞈ-eu gaˇ kawˆ, uˬ yehˇ yehˇ-eu laꞈ kʼoeˇ bi siˬ bi mawˇ-eu meh. Miˇ tsaˬ miˇ muiˬ muiˬ ni nawˇ jahˇ-eu meh. Lawˇ gawˆ-ahˇ nawˇ iˇ cuꞈ bi yoeˇ le-awˇ, miˇ tsaˬ-ahˇ dzaˬ la gʼo cehˇ dehꞈ laˇ ni nawˇ jahˇ-euˬ meh. Nawˬ neh mˇ-euˬ gaˇ kawˆ heu loꞈ-ehˇ jaˆ-eu meh.

¹⁰ Tsehˬ taˬ-euˬ deh yaˇ-ahˇ uˬ yehˇ bi deh nyiꞈ-awˇ, miˇ tsaˬ bi jmˬ laˇ-eu meh. Miˇ tsaˬ-ahˇ uˬ yehˇ bi deh nahˬ-awˇ, sahˬ lahˬ aˇ bawˇ bi dehꞈ doˆ laˇ-eu meh.

¹¹ Dzaˬ la gʼo cehˇ za dui dui le ni nawˇ jahˇ-awˇ nawˇ kʼaˇ iˇ keuˆ gaˇ baw le za le-eu meh.

¹² Jeˬ zaˬ gaˆ kʼahˬ-ahˇ jeˬ zaˬ tiˬ teuˇ jawˇ-awˇ, gawˬ jawˬ baˬ gʼa-ahˇ laˬ kʼaˬ cehˇ-eu jeˬ byah luꞈ meh.

¹³ Deh ga-ahˇ yawˇ tiˬ byah jawˇ-awˇ, deh kʼawꞈ-ahˇ cehˇ tiˬ byah dehꞈ luꞈ meh. Yawˬ jeˬ na luꞈ laˬ kʼaˬ cehˇ-awˇ guˇ-eu laꞈ kʼoeˇ, caˇ-eu dawˬ caˇ luꞈ meh.