Jaceuq 64 - Akha

Haw piˇ nehˬ laꞈ lehˇ shaˇ-eu guiˬ lahˬ shaˇ dawˬ (Daˬbiˇ-euˬ caˇ dawˬ)

¹ Miˬyehˇ-oˇ, ngaˇ shaˬ zahˬ naꞈ luꞈ-eu ma. Ngaˬ-euˬ shaˇ dawˬ-ahˇ naˇ haˬ nehˬ laꞈ-awˬ. Ngaˬ-ahˇ muiˇ-eu tsawˇ haˬ deuˬ-ahˇ guˆ luꞈ-eu ma. Ngaˬ-ahˇ ka kʼoꞈ neh laꞈ-awˬ.

² Yaw doeˇ jahˇ-eu tsawˇ haˬ deuˬ-euˬ laꞈ-ahˇ, ngaˬ-ahˇ haw piˇ nehˬ laꞈ. Haiˬ-euˬ tsawˇ haˬ deuˬ-euˬ baꞈ dzah laꞈ kʼoeˇ, ngaˬ-ahˇ bi buˬ-iˇ laꞈ.

³ Aˬ yawꞈ maꞈ-euˬ mehˬ laˇ mi cehˇ loꞈ-ehˇ siˬ taˆ taˬ-awˇ, kaˆ myaˬ-ahˇ duˇ-eu dawˬ ngoꞈ daˆ taˬ-euˬ meh.

⁴ Maˬ lehˬ maˬ ca-eu tsawˇ haˬ deuˬ-ahˇ, aˬ yawꞈ maꞈ dzuˇ zaꞈ-awˇ beuˆ-eu meh. Guˆ-eu nui ma tiˬ pawꞈ-iˬ maˬ ahˇ ni, ja tawˆ ni deuˆ-eu meh.

⁵ Yaw haiˬ jeˬ mˇ-eu gʼaˇ duˬ tiˬ gʼaˬ tiˇ gʼaˬ gʼaˬ biꞈ-awˇ, tsawˇ haˬ zaˬ-ahˇ lahˇ ju kʼmˇ-eu gʼaˇ duˬ, mehˬ bawˬ mˇ taꞈ-eu laꞈ kʼoeˇ, “Tiˬ gʼaˬ-iˬ maˬ siˬ maˬ mawˇ nya-aˇ” lehˇ ehˇ-eu meh.

⁶ Aˬ yawꞈ maꞈ yaw haiˬ jeˬ bawˬ kʼoeˬ-awˇ, Tiˬ gʼaˬ-iˬ maˬ caw siˬ nya-aˇ lehˇ ehˇ-eu meh. Tsawˇ haˬ zaˬ-euˬ nui naꞈ-aˬ, zaꞈ taˬ-euˬ myawˬ-ahˇ duˇ-eu meh.

⁷ Ehˇ kʼawꞈ, aˬ yawꞈ maꞈ-ahˇ Miˬyehˇ kaˆ neh beuˆ-awˇ, ja pyuˬ ni beuˆ naˇ nehˬ tehꞈ-a.

⁸ Aˬ yawꞈ maꞈ ngehˬ-euˬ dawˬ kʼoeˇ deuˬ baˬ da neh, aˬ yawꞈ maꞈ-ahˇ Miˬyehˇ laˆ cawˆ tehꞈ-a. Aˬ yawꞈ maꞈ-ahˇ kʼaˇ ya mawˇ-eu tsawˇ haˬ deuˬ, uˬ duˬ juiꞈ gaˇ keuˆ tehꞈ-a.

⁹ Tsawˇ haˬ dawˬ tawˆ luꞈ ya guˆ-iˇ tehꞈ-a. Miˬyehˇ nui ma pehˇ-eu gaˇ kawˆ aˬ yawꞈ maꞈ ja-awˇ, aˬ yawꞈ neh mˇ-euˬ gaˇ kawˆ shaˇ sawˇ tehꞈ-a.

¹⁰ Sahˬpaˬ Miˬyehˇ neh mˇ-euˬ jeˬ baˬ da neh, yaw tsaˬ yaw dawˇ tsawˇ haˬ dawˬ tawˆ luꞈ laˬ kʼaˬ cehˇ tehꞈ-a. Sahˬpaˬ Miˬyehˇ laꞈ kʼoeˇ aˬ yawꞈ maꞈ nui saˇ oꞈ-awˇ, tsawˇ muiˬ dawˬ tawˆ luꞈ aˬ yawꞈ-ahˇ ja ceuˬ tehꞈ-a.