Jaceuq 63 - Akha

Miˬyehˇ-ahˇ noeˬ tmˬ-eu

(Daˬbiˇ-euˬ caˇ dawˬ)

¹ Miˬyehˇ-oˇ, nawˇ-aˬ ngaˬ-euˬ Miˬyehˇ pyeuꞈ-awˇ, nawˬ-ahˇ ngaˇ noeˬ tmˬ luꞈ-eu ma. Ngaˬ-euˬ nui ma gʼawˇ mawˇ dawˬ tawˆ luꞈ nawˬ-ahˇ noeˬ tmˬ luꞈ-eu ma. Iˇ cuꞈ maˬ jaˆ ehˇ koˆ kaˆ ni tsawˬ paˆ-iˇ taˬ-euˬ miˇ tsaˬ tiˬ tsahˇ iˇ cuꞈ mehꞈ-eu loꞈ-ehˇ, ngaˬ-euˬ saꞈ laˇ nawˬ-ahˇ noeˬ tmˬ luꞈ-eu ma.

² Muiˬ-eu shawˇ-eu jawˇ duˬ laꞈ kʼoeˇ, nawˬ-ahˇ bi mawˇ laꞈ. Nawˬ-euˬ baoˬ hawˇ-eu yaw shehꞈ kʼahˬ sehˇ ngaˬ-ahˇ bi mawˇ laꞈ.

³ Maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ, ngaˇ yaw dehꞈ dehꞈ luꞈ-eu naˆ maˬ tseˇ poeˬ-eu miˇ neh, nawˬ-ahˇ ngaˇ ja ceuˬ-eu ma.

⁴ Ngaˇ kʼaˇ dehꞈ-eu tiˬ ziˇ nawˬ-euˬ guiˬ lahˬ-ahˇ ja ceuˬ-eu ma. Ngaˇ aˬ laꞈ cawˬ ja-awˇ nawˬ-ahˇ guiˬ lahˬ shaˇ ma.

⁵ Ngaˬ-euˬ saꞈ laˇ dzaˬ dehˆ dawˇ dehˆ-awˇ, nui kʼahˇ shiˇ tehꞈ-a. Kʼoeˇ naˇ, nawˬ-ahˇ ja ceuˬ-eu caˇ dawˬ laˬ kʼaˬ tiˬ cehˇ ngaˇ caˇ ma.

⁶ Ngaˇ yuꞈ zaˇ-ahˇ yuꞈ luꞈ ngeh, nawˬ-ahˇ noeˬ mawˇ-eu ma. Uˬ ciꞈ miˇ lah-ehˇ nawˬ-euˬ gaˇ kawˆ ngaˇ shaˇ noeˬ-euˬ ma.

⁷ Nawˇ ngaˬ-ahˇ aˬ myah luꞈ ngehˬ gʼeh dah teˬ-eu miˇ neh, nawˬ-euˬ aˬ dahˇ naˇ shmˇ uˬ moˆ, laˬ kʼaˬ cehˇ-eu caˇ dawˬ ngaˇ caˇ-eu ma.

⁸ Nawˬ-euˬ dawˬ peh ngaˇ tah uˇ laˇ ngeh, nawˬ-euˬ aˬ laꞈ ngaˬ-ahˇ byaˇ cuꞈ-eu meh.

⁹ Ngaˬ-ahˇ sehꞈ-eu lehˇ leh jeh-eu tsawˇ haˬ deuˬ, shiˇ-eu miˇ kʼahˬ-ahˇ ya iˇ byoˆ tehꞈ-a.

¹⁰ Aˬ yawꞈ maꞈ guiˇ deuˆ gaˇ bi deuˆ sehꞈ-awˇ, kʼaˬ yehˇ neh bi dzaˬ jiˇ tehꞈ-a.

¹¹ Ehˇ kʼawꞈ sahˬ paˬ aˬ cawˬ-ahˇ gʼaˬ leˇ-awˇ, Miˬyehˇ laꞈ kʼoeˇ laˬ kʼaˬ ya cehˇ tehꞈ-a. Ehˇ kʼawꞈ, jaˬ myawꞈ myawꞈ-euˬ tsawˇ haˬ deuˬ-euˬ kʼaˬ meh tsoeˬ-iˇ jiˇ tehꞈ-a.