Jaceuq 62 - Akha

Miˬyehˇ haw piˇ-eu jeˬ laꞈ kʼoeˇ nui ma ziꞈ-eu

(Daˬbiˇ-euˬ caˇ dawˬ)

¹ Miˬyehˇ ngaˬ-ahˇ ka kʼoꞈ le gaˇ, ngaˇ oˇ-awˇ dawˬ luꞈ-eu ma. Aˬ yawꞈ-ahˇ tehꞈ-ehˇ ngaˇ gʼoe-eu ma.

² Aˬ yawꞈ tehꞈ-ehˇ ngaˬ-ahˇ haw piˇ-awˇ ka kʼoꞈ nehˬ laꞈ-eu meh. Aˬ yawꞈ-aˬ, ngaˬ-euˬ gʼoe duˬ lo guˇ meh. Aˬ cawˬ ngaˬ-ahˇ guiˇ maˬ deuˆ gʼaˬ nya-a.

³ Coˬ pyaˆ taˬ-euˬ kmˇ cehˇ naˆ ni tehꞈ-ehˇ deuˇ-eu tsawˇ haˬ tiˬ gʼaˬ-ahˇ, naw maꞈ aˬ myah keuˆ ni ga uiˬ-awˇ ceh-eu gʼeh te.

⁴ Aˬ yawꞈ-euˬ myaˆ pyawˬ naˇ mehˇ-ahˇ naw maꞈ laˆ cawˆ-eu lehˇ gʼeh-eu meh. Jaˬ myawꞈ myawꞈ-eu jeˬ-ahˇ naw maꞈ laˬ kʼaˬ cehˇ-eu meh. Naw maꞈ-euˬ mehˬ boeˬ dawˬ ngehˬ gʼeh nehˬ luꞈ kʼawꞈ, nui ma laꞈ kʼoeˇ aˬ yawꞈ-ahˇ yaˬ kʼehˇ yaˬ luꞈ meh.

⁵ Miˬyehˇ-ahˇ tehꞈ-ehˇ ngaˇ gʼoe-eu ma. Aˬ yawꞈ laꞈ kʼoeˇ ngaˇ noeˬ tmˬ kʼaˇ za-eu ma.

⁶ Aˬ yawꞈ tehꞈ-ehˇ ngaˬ-ahˇ haw piˇ-awˇ ka kʼoꞈ nehˬ laꞈ-eu meh. Aˬ yawꞈ-aˬ, ngaˬ-euˬ gʼoe duˬ lo guˇ meh. Aˬ cawˬ ngaˬ-ahˇ guiˇ maˬ deuˆ gʼaˬ nya-a.

⁷ Ngaˬ-ahˇ ka kʼoꞈ-eu jeˬ hawˇ-eu ngaˬ-euˬ myaˆ pyawˬ naˇ mehˇ, Miˬyehˇ laꞈ kʼoeˇ jaˆ-eu meh. Aˬ yawꞈ-aˬ, ngaˬ-euˬ gʼoe duˬ hawˇ-eu, ngaˬ-euˬ ziꞈ duˬ lo guˇ meh.

⁸ Ngaˬ-euˬ tsawˇ haˬ deuˬ-oˇ, Miˬyehˇ-ahˇ aˬ myah luꞈ gʼoe-awˬ. Naw maꞈ-euˬ shaˬ zahˬ dawˬ tawˆ luꞈ aˬ yawꞈ-ahˇ dzawˇ nehˬ-awˬ. Aˬ yawꞈ-aˬ, aˬ dui-euˬ gʼoe duˬ meh.

⁹ Tsawˇ haˬ zaˬ dawˬ tawˆ luꞈ saꞈ kʼoeˬ loꞈ-ehˇ tehꞈ meh. Huiˬ zaˬ nyiˇ zaˬ dawˬ tawˆ luꞈ yawꞈ ngehꞈ meh. Aˬ yawꞈ maꞈ-ahˇ paˆ yawˬ neh saˆ haw ngeh tiˬ pawꞈ-iˬ maˬ kah-ehˇ, saꞈ kʼoeˬ naˆ maˬ tseˇ pyaˇ-eu meh.

¹⁰ Nawˬ dzaˬ kʼaˆ dzaˬ gaˇ gʼaˬ taˬ huiˬ. Kʼoeˬ dzaˬ joe dzaˬ gaˇ taˬ noeˬ tmˬ. Nawˬ-euˬ pyuˇ shuiˇ myawˬ gahˬ myaˬ laˇ luꞈ kʼawꞈ, kʼoeˇ deuˬ-ahˇ nawˇ taˬ gʼoe.

¹¹ Baoˬ ehˇ-eu jeˬ aˬ yawꞈ-euˬ ma lehˇ Miˬyehˇ ehˇ gaˇ, ngaˇ gʼawˬ mya poˆ ya gaˬ haw-euˬ ma.

¹² Aˬ yawꞈ-euˬ gʼoeˇ-eu gaˬ-eu jeˬ maˬ tsehˆ leˇ lehˇ ehˇ gaˇ, ngaˇ ya gaˬ haw-euˬ ma. Sahˬpaˬ Miˬyehˇ-oˇ, tsawˇ haˬ yawˬ gʼaˬ na luꞈ yawˬ ha neh kʼaˇ mˇ kʼaˇ shaˇ taˬ-euˬ loꞈ-ehˇ, nawˇ laꞈ sawˬ biꞈ nehˬ-awˬ.