Jaceuq 61 - Akha

Haw piˇ nehˬ laꞈ lehˇ shaˇ-eu guiˬ lahˬ shaˇ dawˬ

(Daˬbiˇ-euˬ caˇ dawˬ)

¹ Miˬyehˇ-oˇ, ngaˇ ngoeˇ gaˇ naˇ haˬ nehˬ laꞈ-awˬ. Ngaˬ-euˬ guiˬ lahˬ shaˇ dawˬ-ahˇ naˇ haˬ nehˬ laꞈ-awˬ.

² Ngaˇ nui ma cawˆ dui dui-eu laꞈ kʼoeˇ, mˬ dzeˇ miˇ dzeˇ jawˇ-awˇ nawˬ-ahˇ kuˇ-eu ma. Ziꞈ dah ni gʼeh-eu lo guˇ-ahˇ, ngaˬ-ahˇ sheuˬ gʼeh nehˬ laꞈ-awˬ.

³ Nawˇ ngaˬ-ahˇ haw piˇ-eu gʼaˬ meh. Muiˇ-eu deuˬ maˬ laˆ cawˆ laˇ nya-eu ziꞈ dah ni 3 gʼeh-eu gʼoe duˬ meh.

⁴ Ngaˬ-euˬ tiˬ ziˇ nawˬ-euˬ muiˬ-eu shawˇ-eu jawˇ duˬ-ahˇ bi jawˇ nehˬ laꞈ. Guˆ kʼaˇ maˬ za-eu nawˬ-euˬ aˬ dahˇ uˬ moˆ, ngaˬ-ahˇ bi naˬ nehˬ laꞈ.

⁵ Miˬyehˇ-oˇ, ngaˇ saˇ jaˇ dzaˬ-euˬ dawˬ-ahˇ nawˇ ya gaˬ gʼaˬ-awˇ, nawˬ-ahˇ taˬ huiˬ-eu deuˬ-ahˇ biꞈ-eu jeˬ, nawˇ ngaˬ-ahˇ biꞈ laꞈ-euˬ meh.

⁶ Sahˬpaˬ-ahˇ ziˇ lahˬ ka nehˬ-awˇ, gʼawˬ myahˇ ni bi dehꞈ-awˬ.

⁷ Miˬyehˇ-oˇ, nawˬ-euˬ mehˬ shi aˬ yawꞈ aˬ myah luꞈ sahˬpaˬ ya geuꞈ luꞈ-uˇ. Maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ hawˇ-eu saˇ jaˇ ziꞈ-eu jeˬ laꞈ kʼoeˇ aˬ yawꞈ-ahˇ haw piˇ nehˬ-awˬ.

⁸ Kʼoeˇ naˇ, ngaˬ neh saˇ jaˇ dzaˬ taˬ-euˬ lawˇ-eu jeˬ aˬ yawꞈ nah yawꞈ ngaˇ lawˇ ngeh, nawˬ-ahˇ aˬ myah luꞈ caˇ-awˇ ja ceuˬ ma.