Jaceuq 59 - Akha

Haw piˇ nehˬ laꞈ lehˇ shaˇ-eu guiˬ lahˬ shaˇ dawˬ

(Daˬbiˇ-euˬ caˇ dawˬ)

¹ Ngaˬ-euˬ Miˬyehˇ-oˇ, muiˇ-eu deuˬ-euˬ aˬ laꞈ laꞈ kʼoeˇ ngaˬ-ahˇ ka kʼoꞈ nehˬ laꞈ. Dawꞈ le ceh le-eu deuˬ-euˬ laꞈ-ahˇ, ngaˬ-ahˇ haw piˇ nehˬ laꞈ.

² Haiˬ-eu tsawˇ haˬ deuˬ-euˬ aˬ laꞈ laꞈ kʼoeˇ, ngaˬ-ahˇ ka kʼoꞈ nehˬ laꞈ. Aˬ cawˬ-ahˇ sehꞈ-eu deuˬ-euˬ laꞈ-ahˇ, ngaˬ-ahˇ bi dzeuˇ-iˇ laꞈ.

³ Haw sheˇ, ngaˇ mˇ lehˬ-euˬ maˬ jaˆ gaˇ, ngaˬ-ahˇ sehꞈ-eu lehˇ aˬ yawꞈ maꞈ loꞈ luꞈ meh. Guˆ laˇ paˬ-ehˇ gʼeh-eu tsawˇ haˬ deuˬ uiˬ leˇ-awˇ, ngaˬ-ahˇ laˆ cawˆ-eu lehˇ gʼeh luꞈ meh.

⁴ Sahˬpaˬ Miˬyehˇ-oˇ, ngaˇ yaw lehˬ jeˬ mˇ taˬ-euˬ maˬ jaˆ gaˇ, ngaˬ-ahˇ laˆ cawˆ-eu lehˇ aˬ yawꞈ lehˬ hmˬ luꞈ meh.

⁵ Dawˬ tawˆ luꞈ mˇ nya-eu Miˬyehˇ pyeuꞈ-eu Sahˬpaˬ Miˬyehˇ-oˇ, tuˇ-awˇ ngaˬ-ahˇ caw ba le-awˬ. Nawˬ-euˬ mawˇ do oe-awˇ haw le-awˬ. Noeˬ laˇ-awˇ Miˬyehˇ maˬ baw-eu deuˬ-ahˇ kʼehˬ-awˬ. Saˇ jaˇ maˬ ziꞈ-eu haiˬ-eu tsawˇ haˬ deuˬ-ahˇ gʼawˬ shaˬ taˬ gaˬ nehˬ.

⁶ Aˬ yawꞈ maꞈ uˬ ciꞈ paw gʼoꞈ laˇ-awˇ, aˬ kuiˬ loꞈ-ehˇ lmˬ lmˬ-ehˇ meuˬ doe ni cah-eu meh.

⁷ Aˬ yawꞈ maꞈ yaˬ kʼehˇ yaˬ yaˬ-ehˇ lmˬ luꞈ gaˇ naˇ haˬ sheˇ. Aˬ yawꞈ maꞈ-euˬ mehˬ laˇ-aˬ, kʼaˬ meh laꞈ kʼoeˇ ahˇ-eu mi cehˇ-ahˇ duˇ kʼawꞈ, aˬ yawꞈ maꞈ dawˬ ngehˬ gaˇ aˬ cawˬ maˬ gaˬ nya-aˇ lehˇ noeˬ-eu meh.

⁸ Ehˇ kʼawꞈ Sahˬpaˬ Miˬyehˇ nawˇ aˬ yawꞈ maꞈ-ahˇ uiˇ yoeˇ-eu meh. Miˬyehˇ maˬ baw-eu tsawˇ haˬ deuˬ-ahˇ nawˇ nui daˆ daˆ-eu meh.

⁹ Miˬyehˇ-oˇ, nawˬ-euˬ gʼaˬ-ahˇ ngaˇ gʼoe-eu ma. Nawˇ-aˬ, ngaˬ-euˬ ziꞈ duˬ lo guˇ meh.

¹⁰ Ngaˬ-euˬ Miˬyehˇ ngaˬ-ahˇ gaˬ-awˇ ngaˇ jawˇ gaˇ oe tehꞈ-a. Ngaˬ-ahˇ muiˇ-eu deuˬ luˬ-iˇ seˇ-iˇ gaˇ, aˬ yawꞈ ngaˬ-ahˇ bi haw laꞈ tehꞈ-a.

¹¹ Miˬyehˇ-oˇ, aˬ yawꞈ maꞈ-ahˇ ngaˬ-euˬ tsawˇ haˬ deuˬ maˬ bi ngehˇ-eu gʼaˇ duˬ aˬ yawꞈ maꞈ-ahˇ nawˇ taˬ sehꞈ dzeh. Nga maꞈ-ahˇ haw piˇ-eu Sahˬpaˬ Miˬyehˇ-oˇ, nawˬ-euˬ gʼaˬ neh aˬ yawꞈ maꞈ-ahˇ miˇ kʼahˬ doe ni teh byaˆ-awˇ, guiˇ deuˆ gʼaˬ nehˬ-awˬ.

¹² Aˬ yawꞈ maꞈ-euˬ mehˬ laˇ kʼoeˇ taˆ iˬ baˇ jaˆ meh. Aˬ yawꞈ maꞈ kʼaˇ ngehˬ-eu dawˬ iˬ baˇ ahˇ meh. Aˬ yawꞈ maꞈ nui ma huiˬ-eu jeˬ-ahˇ aˬ yawꞈ maꞈ paˇ bi teuˆ paꞈ-awˬ. Aˬ yawꞈ maꞈ yaˬ kʼehˇ yaˬ-awˇ jaˬ myawꞈ myawꞈ-eu miˇ neh,

¹³ nui ma pehˇ-eu laꞈ kʼoeˇ laˆ cawˆ nehˬ-awˬ. piˬ-iˇ byoˆ-iˇ jiˇ ni laˆ cawˆ nehˬ-awˬ. Kʼoeˇ ngeh, Iˇsaˬleˬlaˆ miˇ kʼahˬ-ahˇ Miˬyehˇ uˆ lahˇ-awˇ, mˬ dzeˇ miˇ dzeˇ keuˆ ni uˆ lahˇ luꞈ-eu gaˇ kawˆ, tsawˇ haˬ dawˬ tawˆ luꞈ ya siˬ tehꞈ-a.

¹⁴ Ngaˬ-ahˇ muiˇ-eu deuˬ uˬ ciꞈ paw gʼoꞈ laˇ-awˇ, aˬ kuiˬ loꞈ-ehˇ lmˬ lmˬ-ehˇ meuˬ doe ni cah-eu meh.

¹⁵ Doe doe-ehˇ dzaˇ poˆ dzaˬ-eu aˬ kuiˬ deuˬ, dzaˇ maˬ ya dzaˬ dehˆ-ehˇ mahˇ-eu loꞈ-ehˇ, aˬ yawꞈ maꞈ mahˇ mahˇ-ehˇ cah-eu meh.

¹⁶ Ehˇ kʼawꞈ, nawˇ gʼaˬ huiˬ-eu gaˇ kawˆ ngaˇ caˇ ma. Maˬ tsehˆ leˇ nya-eu nawˬ-euˬ gʼoeˇ-eu gaˬ-eu gaˇ kawˆ yawˬ shawˬ na luꞈ ngaˇ guˇ guˇ-ehˇ caˇ ma. Nawˇ ngaˬ-euˬ gʼoe duˬ lo guˇ pyeuꞈ-awˇ, shaˬ ngeh zahˬ ngeh tahˬ shaˇ duˬ pyeuꞈ-eu meh.

¹⁷ Ngaˬ-ahˇ haw piˇ-eu gʼaˬ-oˇ, nawˬ-ahˇ ngaˇ ja ceuˬ ma. Miˬyehˇ-oˇ, nawˇ ngaˬ-euˬ gʼoe duˬ pyeuꞈ-awˇ, ngaˬ-ahˇ maˬ tsehˆ leˇ ni gaˬ-eu Miˬyehˇ meh.