Jaceuq 56 - Akha

Miˬyehˇ-ahˇ gʼoe-eu guiˬ lahˬ shaˇ dawˬ

(Daˬbiˇ-euˬ caˇ dawˬ)

¹ Sahˬpaˬ Miˬyehˇ-oˇ, aˬ cawˬ ngaˬ-ahˇ diˬ laˇ ceh laˇ-awˇ, muiˇ-eu deuˬ maˬ tsehˆ leˇ ni kʼehˬ nehˬ kʼaˆ nehˬ laꞈ-eu miˇ neh, ngaˬ-ahˇ gʼawˬ shaˬ gaˬ nehˬ laꞈ-awˬ.

² Muiˇ-eu deuˬ nah ga-ehˇ ngaˬ-ahˇ tsawˬ nawˬ nawˬ-awˇ, ngaˬ-ahˇ dawꞈ laˇ-eu tsawˇ haˬ myaˬ dui dui meh.

³ Dawˬ tawˆ luꞈ mˇ nya-eu Sahˬpaˬ Miˬyehˇ-oˇ, guˆ-eu gaˆ-eu jeˬ ngaˬ-euˬ kʼoeˇ taˆ keuˆ le ngeh, nawˬ-ahˇ ngaˇ gʼoe-eu ma.

⁴ Miˬyehˇ-ahˇ ngaˇ gʼoe-awˇ guˆ-eu nui ma maˬ ahˇ, aˬ yawꞈ neh saˇ jaˇ dzaˬ taˬ-euˬ jeˬ baˬ da neh, aˬ yawꞈ-ahˇ ngaˇ ja ceuˬ ma. Tsawˇ haˬ zaˬ ngaˬ-ahˇ aˬ jeˬ paˇ jahˇ laˇ nya nmˇ.

⁵ Muiˇ-eu deuˬ nah ga-ehˇ ngaˬ-ahˇ laˆ shaˬ luꞈ meh. Ngaˬ-ahˇ laˆ coeˬ laˆ ciˆ-eu gʼaˇ duˬ, aˬ yawꞈ maꞈ aˬ myah luꞈ shaˇ noeˬ luꞈ meh.

⁶ Aˬ yawꞈ maꞈ tiˬ kawˆ loꞈ-ehˇ lehˬ hmˬ-eu laꞈ kʼoeˇ, ngaˇ kʼaˇ mˇ kʼaˇ shaˇ-eu jeˬ-ahˇ kʼoeˬ sho haw luꞈ meh.

⁷ Miˬyehˇ-oˇ, aˬ yawꞈ maꞈ neh mˇ-euˬ yaw haiˬ jeˬ baˬ da neh, aˬ yawꞈ maꞈ-ahˇ nawˇ kʼehˬ nehˬ kʼaˆ nehˬ-awˬ. Nawˇ nui ma pehˇ-eu laꞈ kʼoeˇ aˬ yawꞈ maꞈ-ahˇ guiˇ deuˆ gʼaˬ nehˬ-awˬ.

⁸ Ngaˇ aˇ naˆ ni shaˬ zahˬ naꞈ-eu nawˇ siˬ nya meh. Ngaˬ-euˬ myaˆ biˇ-ahˇ nawˇ maˇ tsaꞈ neh ciˬ kʼmˇ uiˬ taˬ-euˬ meh. Gaˇ kawˆ heu nawˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ maˬ ngeuˇ loˇ.

⁹ Ngaˇ nawˬ-ahˇ kuˇ ngeh nah, muiˇ-eu deuˬ cehˆ gʼoꞈ jiˇ tehꞈ-a. Miˬyehˇ ngaˇ jawˇ paw pyawˬ-eu ngaˇ siˬ nya ma.

¹⁰ Saˇ jaˇ ziꞈ-eu miˇ neh ngaˇ ja ceuˬ luꞈ-eu gʼaˬ pyeuꞈ-eu, Sahˬpaˬ Miˬyehˇ ngaˇ jawˇ paw pyawˬ-eu ngaˇ siˬ nya ma.

¹¹ Aˬ yawꞈ-ahˇ ngaˇ gʼoe-awˇ maˬ guˆ ni dehꞈ ma. Tsawˇ haˬ zaˬ ngaˬ-ahˇ aˬ jeˬ paˇ jahˇ laˇ nya nmˇ.

¹² Miˬyehˇ-oˇ, ngaˬ neh saˇ jaˇ dzaˬ taˬ-euˬ jeˬ nawˬ-ahˇ ngaˇ lawˇ nehˬ ma. Guiˬ lahˬ-ahˇ noeˬ keuˆ-eu lawˇ-eu jeˬ, nawˬ-ahˇ ngaˇ lawˇ nehˬ ma.

¹³ Aˬ jeˬ miˇ neh ehˇ naˇ, shiˇ-eu jeˬ laꞈ kʼoeˇ ngaˬ-ahˇ nawˇ ka kʼoꞈ-awˇ, maˬ coˬ-iˇ ni bi dehꞈ laꞈ-euˬ meh. Kʼoeˇ miˇ neh Miˬyehˇ mehˬ shi ngaˇ cah-awˇ, dehꞈ-eu yaw shehꞈ laꞈ kʼoeˇ ngaˇ cah ma.