Jaceuq 55 - Akha

Cawˬ neh bi byehˇ dzeh-euˬ gʼaˬ-euˬ shaˇ dawˬ

(Daˬbiˇ-euˬ caˇ dawˬ)

¹ Miˬyehˇ-oˇ, ngaˬ-euˬ guiˬ lahˬ shaˇ dawˬ-ahˇ naˇ haˬ nehˬ laꞈ. Ngaˬ-euˬ shaˇ dawˬ-ahˇ taˬ byehˇ dzeh nehˬ laꞈ.

² Ngaˇ ehˇ gaˇ naˇ haˬ-awˇ, ngaˬ-ahˇ ehˇ kʼoꞈ nehˬ laꞈ-awˬ. Ngaˇ noeˬ shaˬ dui dui-awˇ, nui ma cawˆ dui dui nya.

³ Muiˇ-eu deuˬ laˆ guˆ laˇ-eu miˇ neh, nui saˇ tiˬ pawꞈ-iˬ maˬ oꞈ nya. Haiˬ-eu tsawˇ haˬ deuˬ kʼehˬ nehˬ kʼaˆ nehˬ laꞈ-eu miˇ neh, shaˬ zahˬ naꞈ dui dui miˇ-a. Aˬ yawꞈ maꞈ ngaˬ-ahˇ laˆ shaˬ laˆ zahˬ nehˬ laꞈ-eu meh. Ngaˬ-ahˇ nui ma pehˇ-awˇ bye-eu meh.

⁴ Ngaˇ guˆ dui dui luꞈ-awˇ, shiˇ taw tehˬ ni ya daˬ luꞈ-eu ma.

⁵ Guˆ-awˇ yaw dzuˬ dzuˬ-eu jeˬ ngaˬ-ahˇ zuiˆ gʼaˬ-awˇ, laˇ baˇ-iˇ miˇ-a.

⁶ Kʼaˬ kʼoeˬ loꞈ-ehˇ aˬ dahˇ tsoꞈ law nmˇ-aˬ, zaw byoˆ gʼeh-awˇ gʼaˬ naˬ naˬ-iˇ ma.

⁷ Gaˇ mahˇ kaˬ gaˇ zaw byoˆ gʼeh-awˇ, kʼaˇ shuiꞈ deh-ahˇ nymˇ tsoˆ-awˇ jawˇ-iˇ ma.

⁸ Guˆ laˇ paˬ-ehˇ gʼeh-eu mˬ jeˬ jaˬ lehˇ laꞈ kʼoeˇ, awˆ duˬ tiˬ tsahˇ ngaˇ yaw kawˇ-ehˇ poˆ ma.

⁹ Sahˬpaˬ Miˬyehˇ-oˇ, muiˇ-eu deuˬ-euˬ dawˬ-ahˇ laˆ bahˬ laˆ baˆ nehˬ-awˬ. Meuˬ laꞈ kʼoeˇ dawꞈ-awˇ ceh-awˇ lawꞈ gʼa luꞈ gaˇ ngaˇ ya mawˇ-euˬ ma.

¹⁰ Uˬ ciꞈ nah gʼahˇ maˬ tseˇ paˆ ni, bahˬ-eu muˆ-eu jeˬ hawˇ-eu shaˬ-eu zahˬ-eu jeˬ tiˬ byah ni jaˆ luꞈ meh.

¹¹ Meuˬ meuˬ lah-ehˇ luˬ-iˇ seˇ-iˇ luꞈ-awˇ, gaˇ ma doe ni kʼehˬ-eu kʼaˆ-eu jeˬ hawˇ-eu nawˬ dzaˬ kʼaˆ dzaˬ-eu jeˬ byah luꞈ meh.

¹² Muiˇ-eu deuˬ cehꞈ lehꞈ ka laˇ gaˇ ngaˇ daˬ coeˇ ma. Nui ma gʼawˬ-eu deuˬ aˬ jaꞈ jaꞈ gaˇ ngaˇ dzuˇ zaꞈ nya ma.

¹³ Ehˇ kʼawꞈ, ngaˬ-ahˇ gʼoeˇ-eu ngaˬ-euˬ cawˬ nawˇ gʼaˬ kʼoeˇ loꞈ-ehˇ jahˇ nehˬ laꞈ gaˇ maˬ daˬ coeˇ nya.

¹⁴ Aˇ nyaꞈ dawˬ gʼoeˇ ngehˬ-awˇ, Uˬ duˬ tahˬ nymˇ nymˇ ma laꞈ kʼoeˇ uˬ duˬ tiˬ kawˆ loꞈ-ehˇ tahˬ-euˬ ma.

¹⁵ Ngaˬ-ahˇ muiˇ-eu deuˬ aˇ yamˬ maˬ keuˆ laˇ mi naˆ-ehˇ shiˇ luꞈ-uˇ. Shiˇ-eu miˇ kʼahˬ-ahˇ yaw dehꞈ-ehˇ iˇ byoˆ gʼeh luꞈ-uˇ. Aˬ yawꞈ maꞈ-euˬ nui ma hawˇ-eu nymˇ jiˇ laꞈ kʼoeˇ, yaw haiˬ jeˬ byah luꞈ-eu meh.

¹⁶ Ehˇ kʼawꞈ, Sahˬpaˬ Miˬyehˇ pyeuꞈ-eu Miˬyehˇ-ahˇ, caw ba le-awˬ lehˇ ngaˇ shaˇ ngeh, aˬ yawꞈ ngaˬ-ahˇ ka kʼoꞈ le tehꞈ-a.

¹⁷ Uˬ shawˬ, nah gʼahˇ hawˇ-eu uˬ ciꞈ paw, ngaˇ nui ma cawˆ-eu dawˬ aˬ yawꞈ-ahˇ gaˬ leˇ ngeh, 2 ngaˬ-euˬ shaˇ dawˬ-ahˇ aˬ yawꞈ naˇ haˬ tehꞈ-a.

¹⁸ Myaˬ dui dui-eu muiˇ-eu deuˬ-ahˇ ngaˇ guiˇ deuˆ gaˇ, luˬ-iˇ seˇ-iˇ-eu jeˬ maˬ bi keuˆ le ni, aˬ yawꞈ ngaˬ-ahˇ sheuˬ kʼoꞈ le tehꞈ-a.

¹⁹ Aˬ yawꞈ maꞈ nui ma maˬ paˇ-ehˇ, Miˬyehˇ-ahˇ maˬ guˆ-eu miˇ neh, mˬ hawˇ-eu miˇ maˬ bymˬ mi naˆ-ehˇ uˆ lahˇ luꞈ-eu Miˬyehˇ, ngaˬ-euˬ shaˇ dawˬ naˇ haˬ-awˇ, aˬ yawꞈ maꞈ-ahˇ kʼehˬ nehˬ kʼaˆ nehˬ tehꞈ-a.

²⁰ Yaw beh ngaˬ-ahˇ gʼoeˇ-eu tsawˇ haˬ saˇ jaˇ puiˬ-awˇ, aˬ yawꞈ-euˬ cawˬ deuˬ-ahˇ dawꞈ-eu ceh-eu meh.

²¹ Aˬ yawꞈ-euˬ dawˬ saˇ byaˬ loꞈ-ehˇ juˇ kʼawꞈ, nui ma laꞈ gʼoꞈ baw-eu meh. Aˬ yawꞈ-euˬ dawˬ zaꞈ tsiˇ-ahˇ duˇ kʼawꞈ, mi cehˇ loꞈ-ehˇ coeˇtsehˆ laˇ nya-eu meh.

²² Nawˬ-euˬ shaˬ zahˬ Sahˬpaˬ Miˬyehˇ jawˇ gaˇ taˬ-awˬ. Aˬ yawꞈ nawˬ-ahˇ haw piˇ tehꞈ-a. Yaw tsaˬ yaw dawˇ tsawˇ haˬ-ahˇ aˬ yawꞈ maˬ bi coˬ-iˇ-a.

²³ Ehˇ kʼawꞈ Sahˬpaˬ Miˬyehˇ nawˇ-aˬ, tsawˇ haˬ-ahˇ sehꞈ-eu deuˬ hawˇ-eu jaˬ myawꞈ mehˇ shuiˇ deuˬ-ahˇ, saꞈ maˬ gʼawˇ tsehˆ mi naˆ-ehˇ lmˬ bymˇ-ahˇ bi uˇ-iˇ tehꞈ-a. Ehˇ kʼawꞈ, ngaˇ-aˬ, nawˬ-ahˇ gʼoe ma.